İddialar əsassız və qərəzlidir
Müstəqil Azərbaycan beynəlxalq birliyinin layiqli
üzvünə çevrildiyi andan dünyadakı erməni diasporu və onların təsiri altında
olan siyasi qüvvələr, müxtəlif təşkilatlar ölkəmiz əleyhinə kampaniya aparır, Cənubu
Qafqazın lider dövlətinin uğurlarına kölgə salmağa çalışırlar. Xüsusən də
paytaxt Bakı beynəlxalq tədbirlərə ev sahibliyi etdiyi ərəfədə anti-Azərbaycan
şəbəkə daha da fəallaşır, ölkəmizin beynəlxalq nüfuzuna xələl gətirmək üçün ən
müxtəlif vasitələrə əl atırlar. Təəssüf doğuran haldır ki, bir sıra hallarda bəzi
nüfuzlu təşkilatlar, ayrı-ayrı siyasilər, rəsmi şəxslər də erməni diasporunun
apardığı anti-Azərbaycan təbliğatın təsiri altında bəyanatlarla çıxış edirlər.
Biz belə halları mühüm enerji və nəqliyyat layihələrinin reallaşdırılması,
qlobal xarakterli tədbirlərin keçirilməsi, həmçinin I Avropa Oyunları,
"Avroviziya-2012”,
Bakı-2017: İslam Həmrəylik Oyunları, Formula 1 yarışları ərəfəsində dəfələrlə
müşahidə etmişik.
Sözsüz ki, bütün bu qarayaxma kampaniyaları effekt
vermir, iflasa uğrayır. Lakin buna baxmayaraq, ermənipərəst dairələr də öz işlərindən
qalmır, hər dəfə yeni bəhanə ilə anti-Azərbaycan şəbəkəni işə salır, ölkəmiz
haqqında neqativ rəy formalaşdırmağa çalışırlar. Misal üçün, artıq xeyli müddətdir
ki, Qərbdəki ənənəvi anti-Azərbaycan dairələr ölkəmizə qarşı növbəti çirkin
kampaniyaya başlayıblar. Bu dəfə qarayaxma kampaniyasına əsas səbəb mayın 29-da
Bakıda UEFA finalının keçirilməsidir. Böyük Britaniya XİN də daxil olmaqla bir
sıra instansiyalar idmana heç bir aidiyyəti olmayan, qərəzli və reallıqdan uzaq
subyektiv mülahizələr irəli sürür və beynəlxalq ictimaiyyətdə bu mühüm idman tədbirinin
Azərbaycanda keçirilməsinin məqsədəuyğun olmadığı barədə rəy formalaşdırmağa
çalışırlar. Bəzi dairələr əsassız şəkildə insan hüquqları, qanunun aliliyi məsələsini
qabardırlar. Halbuki, Qərb ölkələrinin özündə belə hallar kifayət qədərdir. Bəzən
də iddia olunur ki, guya viza rejimi problem yaradır. Ancaq sadələşdirilmiş
viza rejimi bu iddiaları tam təkzib edir və hər bir xarici vətəndaşa çox asan şəkildə
viza almasına şərait yaradır.
Bütün bu yalanlar baş tutmayanda Bakıdakı otellərin
baha olması dərhal ortalığa atılır. Amma reallıq budur ki, paytaxt şəhərimizdə
20-30 dollardan başlayaraq daha yüksək qiymətlərə otellər on minlərlə idman
azarkeşini qəbul etməyə imkan yaradır. Bundan başqa, anti-Azərbaycan qüvvələr
uçuş biletlərinin qiymətinin baha olmasını da növbəti "fakt” kimi gündəmə gətirir,
ictimailəşdirirlər. Bu zaman da onlar yanılırlar. Çünki AZAL hazırda Böyük
Britaniyaya və geri olan reyslərinə beynəlxalq mülki aviasiyada mümkün olan ən
aşağı qiymətlərdən başlayan qiymətlər tətbiq edir. Yəni, AZAL-ın təklif etdiyi
qiymətlər mövcud beynəlxalq qiymətlərdən daha aşağıdır. Əlləri hər yerdən üzülən,
yalanları ifşa olunduqca batan ermənipərəst şəbəkə kürəyini yerə vurmamaq üçün "Arsenal”
klubunun oyunçusu erməni əsilli Genrix Mxitaryanın məsələsini şişirdirlər.
Halbuki, G.Mxitaryanın Azərbaycana gəlməsində heç bir problem yoxdur və ən yüksək
təhlükəsizlik zəmanəti verilib. Diqqətli oxucular yaxşı xatırlayar ki, əvvəllər
də erməni idmançılar Azərbaycana gəliblər və heç bir insident, xoşagəlməz hal
qeydə alınmayıb.
Sadalanan faktlar onu deməyə tam əsas verir ki,
ayrı-ayrı dairələrin irəli sürdüyü iddialar əsassızdır və qərəzlidir, Azərbaycanın
beynəlxalq nüfuzuna xələl gətirməyə, ölkəmizə təzyiq göstərməyə hesablanıb. Azərbaycan Xarici İşlər Nazirliyi də
qeyd olunanlarla bağlı açıqlama yayıb. Qeyd olunub ki, UEFA Avropa Liqasının 29
mayda Bakıda keçiriləcək final oyunu ərəfəsində Böyük Britaniya Xarici İşlər
Nazirliyinin yaydığı Azərbaycana aid səyahət tövsiyələri anlaşılan deyil və təəccüb
doğurur. Bildirilib ki, Azərbaycanda təhlükəsizlik və sabitlik tam şəkildə təmin
olunub, ölkəmiz çoxsaylı mötəbər beynəlxalq tədbirlərə, o cümlədən beynəlxalq
miqyaslı idman yarışlarına ev sahibliyi edir. Bu sırada Birinci Avropa
oyunları, Dördüncü İslam Həmrəylik Oyunları, illik əsasda keçirilən Formula 1
Bakı Qran Prisi və UEFA Çempionlar Liqası çərçivəsində 2017-ci ildə "Qarabağ”-"Çelsi”
futbol oyunu qeyd oluna bilər. Bu idman yarışlarını izləmək məqsədilə ölkəmizə
gələn çoxsaylı əcnəbi ölkə vətəndaşları Azərbaycanda ictimai asayişin təmin
olunması, mövcud olan sabitlik və təhlükəsizlik mühiti və bu kimi böyük
miqyaslı idman tədbirlərinin təşkilatçılığından məmnun qalıblar. XİN-in
açıqlamasında Azərbaycanın həm də turizm ölkəsi olması, hər il ölkəmizə
çoxsaylı əcnəbi turistlərin səfər etdiyi də diqqətə çatdırılıb. Vurğulanıb ki,
ölkəmizin malik olduğu digər müsbət xüsusiyyətləri ilə bərabər, Azərbaycanda
hökm sürən əmin-amanlıq, sabitlik və təhlükəsizlik əcnəbi turistləri cəlb edən
vacib amillər sırasındadır.
Milli Məclisin
deputatı, politoloq Hikmət Babaoğlu mövzu ilə bağlı "Kaspi” qəzetinə açıqlamasında
bildirib ki, Böyük Britaniya XİN-də daxil olmaqla bir sıra instansiyalar idmana
heç bir aidiyyəti olmayan, qərəzli və reallıqdan uzaq subyektiv mülahizələr irəli
sürür və beynəlxalq ictimaiyyətə bu mühüm idman tədbirinin Azərbaycanda
keçirilməsinin məqsədə uyğun olmadığı barədə rəy formalaşdırmağa çalışırlar.
Onun fikrincə, ilk növbədə, bu, obyektiv deyil və Böyük Britaniya və Azərbaycan
münasibətlərinin ruhuna yaraşmır: "Qərb də daxil olmaqla, bütün dünya ilə
müqayisədə Azərbaycan kriminal vəziyyətə görə ən sabit ölkələrdən biridir. Bəyanatda
adı çəkilən oğurluq, dələduzluq halları Azərbaycanda çox azdır və etik
davranışla bağlı problem yoxdur. Mən düşünürəm ki, bu məsələdə siyasi köklərə
enmək lazımdır. Anti-Azərbaycan qüvvələrin dəst-xətti burada aydın şəkildə
görünür. Azərbaycanda həmişə mühüm beynəlxalq tədbirlər keçirilən zaman və
yaxud belə tədbirlər ərəfəsində bu və ya digər qüvvələr Azərbaycana qarşı bir
qarayaxma kampaniyasına başlayırlar. Diqqət etsək görəcəyik ki, bu cür
kampaniyalar qərəzlidir və heç bir əsası yoxdur”.
H.Babaoğlu Londonla Bakıda baş verən kriminal hadisələri
rəsmi statistikaya əsaslanaraq müqayisə edib. Deyib ki, bu barədə vəziyyət heç
də Böyük Britaniya XİN-in bəyanatında olduğu kimi deyil, tam əksinədir: "Bu ölkənin
paytaxtında baş verən cinayətlər hər min nəfərə düşən rəqəmlərə görə, Bakıdan ən
azı on dəfə çoxdur. Belə olduqda rəsmi Londonun Bakını ittiham etməyə nə mənəvi,
nə də hüquqi haqqı çatır. London polisinin rəsmi veb-səhifəsinə bildirilir ki,
Londonda 2017-ci ildə 824.704 cinayət faktı qeydə alınıb. Onların da 225.247-si
oğurluqla bağlı cinayətlərdir. Bakıda bu göstərici 7.898 təşkil edir. Bununla
yanaşı, Londonda 175.348 dələduzluq, 103.918 yol-nəqliyyat hadisəsi faktı qeydə
alınıb. Bakıda həmin ildə 3.856 dələduzluq, 1.753 yol-nəqliyyat hadisəsi cinayəti
baş verib. Bu halda Böyük Britaniya Xarici İşlər Nazirliyi hansı əsasla Azərbaycanı
kriminal və dələduzluq hadisələrinin çox olması ilə ittiham edə bilər? Mən bunu
dövlətin rəsmi məlumatı kimi təqdim etmək istəmirəm. Amma bütün hallarda bu,
obyektiv deyil”.
Ölkəmizə gələn turistlərin qarşılaşdığı kriminal vəziyyətlərlə
bağlı statistika aparılması ilə bağlı təklif irəli sürən deputat həmin göstəricilərin
çox aşağı olacağını əminliklə söyləyib: "Statistikadan da gördüyümüz kimi,
kriminal halların sayı 10 dəfə azdır. Heç şübhəsiz ki, idman yarışlarına gələn
azarkeşlərin təhlükəsizliyi və sabitliyi tam şəkildə qorunacaq. Biz bilirik ki,
davranışlarına görə ən mədəni azarkeşlər sırasında Azərbaycan azarkeşləri yer
alır. Lakin ən aqressiv azarkeşlər dedikdə ilk ağıla ingilis azarkeşlər gəlir.
Britaniyalıların özləri də bunu yaxşı bilirlər. Dəfələrlə bir çox kütləvi
yarışlarda onların aqressivliklərinin şahidi olmuşuq. Göründüyü kimi, ayrı-ayrı
dairələrin irəli sürdüyü iddialar əsassızdır və qərəzlidir. Azərbaycan dünyanın
ən multikultural cəmiyyətlərindən biridir. Bu gün Avropanın multikulturalizmi
imtina etdiyi bir vaxtda Azərbaycan bu dəyərləri yenidən təbliğ edərək Avropaya
qaytarır. Nəticədə Avropa da bundan bəhrələnməyə çalışır”.
Məsələnin hüquqi kontekstə qiymətləndirilməsinə gəlincə,
H.Babaoğlu bunun üçün hər hansı problemin olmadığını dilə gətirib. Deputat
deyib ki, "Arsenal” klubunun oyunçusu erməni əsilli G.Mxitaryanın Azərbaycana gəlməsində
heç bir problem yoxdur və onun təhlükəsizliyinin ən yüksək səviyyədə təmin
olunması ilə bağlı bəyanat verilib: "O, Azərbaycana idmançı kimi gəlir.
Göründüyü kimi, burada bir məhdudlaşdırma yoxdur. O cümlədən, hazırda AZAL-ın təklif
etdiyi qiymətlər mövcud beynəlxalq qiymətlərdən daha aşağıdır. İddia olunduğu
kimi burada maddi baxımdan hüquqların məhdudlaşdırılmasından söhbət belə gedə
bilməz. Bütün bunlar sübut edir ki, xaricdəki maraqlı dairələr Azərbaycanın
dünyada nüfuzunun artmasından, onun yüksək səviyyəli iqtisadi, siyasi,
humanitar mərkəzə çevrilməsindən narahatdırlar”.
Millət vəkili Naqif Həmzəyev də bizimlə söhbətində bildirib ki, bu gün Azərbaycan
Cənubi Qafqaz regionunda əsas söz sahibi olan dövlət, dünyada sabitlik diyarı,
iqtisadi inkişaf ölkəsi, yeni iqtisadi və sosial çağırışların müzakirə olunduğu
məkan kimi tanınır. O qeyd edib ki, ölkəmiz, həmçinin humanist fəaliyyəti ilə
sülhün və təhlükəsizliyin möhkəmləndirilməsinə dəyərli töhfələr verir: "Müstəqil
Azərbaycan enerji layihələri, regional inteqrasiyaya xidmət edən əməkdaşlıq
formatları kimi səmərəli təklif və təşəbbüslərlə çıxış edir. İnkaredilməz gerçəklikdir
ki, ölkəmizin dünyada nüfuz qazanmasının təməlində müstəqil Azərbaycanın
qurucusu ulu öndər Heydər Əliyevin layiqli davamçısı Prezident İlham Əliyevin
müəyyənləşdirdiyi və parlaq gələcəyə hesablanmış siyasəti dayanır. Təəssüf ki,
Azərbaycanın bu inkişafını gözü götürməyən qüvvələr də mövcuddur. Onlar hər an
fürsət gözləyirlər. Müxtəlif media vasitələri vasitəsilə ölkəmizə qara yaxır,
yalan, şər, böhtan, uydurma, iftiradan istifadə edərək əməllərinə, xainliklərinə
haqq qazandırmağa çalışırlar. Lakin müdrik xalqımız həmişə olduğu kimi bu gün də
ölkəmizin müstəqilliyinə, inkişafına, sabitliyinə qara yaxmağa çalışanlara fürsət
vermir, əksinə, bu təsirlərə qarşı kəskin fikirlərini bildirir, qəti mövqeyini
ortaya qoyur və ölkə Prezidenti İlham Əliyevi dəstəkləyir. Azərbaycan xalqı
yaxşı bilir ki, dövlət başçısının rəhbərliyi ilə ölkənin iqtisadi inkişaf
strategiyasının ana xəttini məhz əhalinin rifah halının yaxşılaşdırılması təşkil
edir və burada ikinci bir mövqe ola bilməz”.
Milli Məclisin
deputatı Azər Badamov da
Azərbaycanın inkişaf edən ölkə olduğunu, bir çox uğurlara imza atdığını
vurğulayıb. Onun fikrincə, bu kontekstdə ən böyük uğur ölkədəki siyasi
sabitliyin təmin edilməsi olub. Millət vəkili deyib ki, Azərbaycan indiyə qədər
bir çox beynəlxalq idman yarışlarına ən yüksək səviyyədə ev sahibliyi edib:
"Bildiyiniz kimi Birinci Avropa Oyunları, İslam Həmrəyliyi Oyunları, Formula 1
və sair ayrı-ayrı idman növləri üzrə beynəlxalq yarışmalar Azərbaycanda
keçirilib. Hər bir böyük beynəlxalq yarışmalar ərəfəsində Azərbaycanı ləkələmək,
ölkəmizdə təhlükələrin mövcud olması barədə yalançı təbliğat kampaniyası işə
düşür. Bu təbliğat kampaniyası ölkəmizə qarşı olan qarayaxma kampaniyasının tərkib
hissəsidir və müəyyən sifarişlərin icrasıdır. Yəni, ölkəmizə qarşı çevrilmiş
anti-milli ünsürlərin məqsədi Azərbaycanı beynəlxalq miqyasda nüfuzdan salmaq,
ölkəmizi təhlükəli bir məkan kimi təqdim etmək, Bakıda keçiriləcək UEFA
finalının baş tutmaması istiqamətində müəyyən işlər görməkdir. Lakin onların
apardığı hər bir qarayaxma kampaniyası, anti-milli siyasət ancaq özlərinin
boş-boş danışmaları ilə yadda qalacaq. Çünki Azərbaycanda beynəlxalq yarışların
keçirilməsi üçün kifayət qədər təcrübə formalaşıb. Biz müəyyən xarici anti-Azərbaycan
dairələrin mühüm tədbirlər ərəfəsində ölkəmizə qarşı belə qərəzli kampaniyalar
təşkil etməsinin dəfələrlə şahidi olmuşuq və onlara layiqli cavab verilib”.
Rufik İSMAYILOV