İbtidai sinif müəllimləri: say çox, yer az
"İndi ibtidai sinif müəllimlərinin
sayı həddindən artıq çoxdur. Taxtanı götürüb atırsan, ibtidai sinif müəlliminə
dəyir. İbtidai sinif müəllimi hazırlayan Azərbaycan Dövlət Pedaqoji
Universiteti, digər universitetlər var. Bunlarla bərabər, bir neçə pedaqoji
texnikumun olması nəyə lazımdır axı?!”
Bu sözləriAzEdu.az-a
açıqlamasında193 saylı məktəbin direktoru Rahim Hüseynovdeyib.
O, müəllimlərin işə qəbulu məsələsinə də münasibət bildirib:"Artıq
9 ildir ki, 193 saylı məktəbin direktoruyam. Mən bu məktəbi 240 müəllimlə qəbul
etmişəm. Əvvəllər direktorlar hansısa tapşırığa, maraqlara görə xeyli müəllimi
işə qəbul edir, 6 saat dərs verirdilər. Beləcə, müəllimlərin sayı artırdı. İndi
isə rəhbəri olduğum məktəbdə müəllimlərin sayı 145-ə düşüb. Mən 6-7 ildə
cəmi 2 və ya 3 müəllim işə götürmüşəm. Hansı ki, bu fənlərə məktəbdə ehtiyac
var və onlara uyğun vakansiya açılıb. Bu 9 ildə məktəbi yalnız
"təmizləmişəm”. Rəhmətə gedən, işdən çıxan müəllimlərin sayəsində işçilərin
sayı100 nəfər azalıb. Ölkədə müəllimlərin sayı həddindən artıq çoxdur”.
O, müəllim sayının vakansiyalarla müqayisədə
çox olmasının səbəbini izah edib: "Müəllimlərin sayı ona görə çoxdur ki, bu ixtisaslara çox yer
verilib. Elə ibtidai sinfi götürək. 1930-cu illərdə ibtidai sinif kadrı çox
lazım idi, müəllim çatışmırdı. Bunun üçün texnikumlar açıldı və ibtidai sinif
üçün müəllim hazırlamağa başladılar. İndi isə ibtidai sinif müəllimlərinin sayı
həddindən artıq çoxdur. Taxtanı götürüb atırsan, ibtidai sinif müəlliminə
dəyir. Azərbaycan Dövlət Pedaqoji Universiteti, digər universitetlər var.
Bunlarla bərabər bir neçə pedaqoji texnikumun olması nəyə lazımdır axı? Pedaqoji
texnikumlar hamısı ibtidai sinif müəllimi yetişdirirlər. Belə olanda, təbii ki,
müəllimlərin sayı çox olacaq.
1990-cı illərdə isə texnikumları
bağlayıb, Müəllimlər İnstitutunun filiallarına çevirdilər. Axı bu qədər müəllim
nəyə lazımdır? Hər rayonda müəllim hazırlayan universitet filialı var. Hamısı
da ibtidai sinif müəllimi hazırlayır. Mən o vaxt iradımı bildirdim. Cavab
verdilər ki, eybi yoxdur, onsuz da ora yalnız qızlar qəbul olunacaq, iş
tapmayacaqlar. Heç olmasa evdə uşaqlarını düzgün istiqamətdə böyütsünlər. Axı
bu, düzgün yanaşma deyil. Onlar da hamısı diplom əlində hansısa texnikumu
bitiriblər. Nə yaxşı oxuyub, nə də müəllim işləyiblər. Özünüz bilirsiniz ki,
rayonlarda necə dərs keçirlər. Çoxu heç dərsə də getməyib, imtahanları
tanışlarının köməyi ilə veriblər. İndi həmin savadsız müəllimlər hamısı gəlib
ortalığa düşüb ki, mən də müəlliməm, işləmək istəyirəm. Hazırda Təhsil
Nazirliyi müəllimləri imtahanla işə qəbul edir. Bundan əvvəl isə kimin
adamı vardısa, o iş tapırdı. Buna görə də ibtidai siniflərdə xeyli savadsız
müəllimlər var. Bunlar hamısı 1990-cı illərin səhvləridir. Elə bilirsiniz ki,
mənim məktəbimdəki ibtidai sinif müəllimlərinin hamısı yaxşıdır? O qədər
savadsız adamlar var ki, heç nə edə bilmirik, işləyirlər”.
Məktəb direktoruna haqq
qazandırmamaq mümkün deyil. Həqiqətən də son dövrlər müəllimliyə, xüsusilə də
ibtidai sinif müəllimliyinə marağın artması danılmaz faktdır. Bəs bu artımın
səbəb nədir, bu artımı necə tənzimləmək olar? Məsələ ilə bağlı ekspertlərin
fikrini öyrənməyə çalışdıq.
Azad
Müəllimlər Birliyinin sədri Məlahət Mürşüdlü bildirdi ki,
bu problemin belə davam etməməsi naminə növbəti 5 il üçün düzgün planlama
aparmaq lazımdır: "Direktorların fikirləri ilə tamamilə razıyam. Son dövrlər
ibtidai sinif müəllimlərinin sayı kifayət qədər artıb. 1990-cı illərdən sonra
müxtəlif fənn müəllimləri arasında ixtisas dəyişməyə, ibtidai sinif
müəllimliyinə maraq çoxaldı. Həmin dövrdə başqa fənn müəllimləri ixtisaslarını
dəyişərək ibtidai siniflərdə dərs deməyə başladılar. Digər bir səbəb isə
planlaşdırmada olan qüsurlardan irəli gəlir. Yəni düzgün şəkildə planlaşdırma
aparmaq lazımdır. Biz bilməliyik ki, növbəti 5 ildə hansı fəndən müəllimlərə daha
çox ehtiyac olacaq. Bu ehtiyacı müəyyən etdikdən sonra universitetlərə sosial
sifariş verilməlidir. Həmin sifariş siyahısında növbəti mərhələdə nə qədər
ibtidai sinif, fizika, kimya, coğrafiya müəlliminə yer ayrılmalı olduğu qeyd
edilməlidir. Amma təəssüf ki, bizdə bu sistem yoxdur. Bura həm dövlət, həm də
özəl universitetlər daxildir. Universitetlər də baxır ki, hansı ixtisasa maraq
daha çoxdur, həmin sahəyə daha çox tələbə qəbul edir. Bunun da nəticəsində bir
fənn üzrə böyük müəllim ordusu yaranır, başqa bir fənn üzrə isə müəllim qıtlığı
yaşayırıq”.
Müsahibimizdən balans yaratmaq
üçün nə etmək lazım olduğunu da soruşduq: "Balansı tənzimləmək üçün ilk növbədə
planlamaya diqqət edilməlidir. Hansı universitetin nə qədər müəllim hazırlayacağı
barədə təlimat verilsə, o zaman universitetlər də öz işini bilər. Bəli, etiraf
etməliyik ki, günümüzdə ibtidai sinif müəllimi ixtisasına maraq böyükdür. Əgər
perspektivli bir plan tərtib edilərsə, yəni lazım olan qədər kadr məzun olarsa,
həmin məzunları gələcəkdə işlə təmin etmək də mümkün olar. Hazırda nə qədər
diplomlu müəllim işsizdir. Çünki müəllim sayı, ayrılan vakansiyadan daha
çoxdur. Universitetlər onlara verilən siyahıdan artıq tələbə qəbul
etməməlidir”.
M. Mürşüdlü qeyd etdi ki, ibtidai
sinif müəlliminin çoxluğuna səbəb həm də valideynlərin ixtisas seçimi zamanı,
xüsusilə də qızları bu sahəyə yönəltmələridir. Yəni düşünürlər ki, bu peşə
xanım üçün daha uyğundur, maaşı və dərs saatı digər fənlərdən yaxşıdır.
Təhsil eksperti Kamran Əsədov bildirir
ki, ümumiyyətlə, son dövrlər müəllimlik ixtisasını maraq artıb: "İxtisas seçimi
zamanı əvvəllər həm valideynlər, həm də abituriyentlər prestijli peşələrə meyl
edirdilərsə, indi isə əmək bazarında daha çox ehtiyac duyulan sahələri seçirlər
ki, istər dövlət, istərsə də özəl sektorda iş tapa bilsinlər. Buna görə, qəbul imtahanında yetərli
balı toplayanlar seçimini müəllimlik ixtisasından edir. Çünki hamıya məlumdur
ki, bu fakültəni bitirənlər həm dövlət, həm də özəl sektorda çalışa bilirlər.
Ən pis halda repetitorluqla məşğul olurlar. Digər bir tərəfdən isə yüksək bal
toplayıb bu sahəni seçənlərə prezidentin qərarı ilə 100 manat təqaüd verilir
deyə, istər-istəməz bu ixtisasa maraq artır. Bundan başqa, son zamanlar
müəllimlərin işə qəbul imtahanındakı şəffaflıq da abituriyentlərin bu ixtisasa
yönəlməsini stimullaşdırır. Həmçinin bunu da qeyd edim ki, aşağı bal toplayan
da müəllimliyi seçir. Məncə, bu fakültələrin keçid balını artırmaq lazımdır.
Yəni pedaqoji yönlü sahəni seçənlərin balı 350-dən aşağı olmamalıdır”.
Ekspert
yuxarı siniflərlə müqayisədə, ibtidai sinifdə uşaqların daha çox olduğunu və
ibtidai sinif müəllimlərinin də digərlərindən daha çox fənn tədris etdiyini
deyir: "Hər il ölkəmizdə ibtidai sinfə 125-130 min şagird qəbul olur. Amma 9-cu
sinifdən məzun olanları sayı isə 100 minə qədər azalır. Həmçinin fənn müəllimi
bir sinifdə yalnız bir dərsi deyirsə, ibtidai sinif müəllimi isə bir neçə fənni
tədris edir. İbtidai sinif müəllimlərinin dərs saatının və əmək haqqının çox
olması gənclərin həmin ixtisası seçməsinə səbəb olur”.
Günel
Azadə