Hollandiyanın Türkiyəyə ögey münasibəti nədən qaynaqlanır?
Türkiyənin xarici işlər naziri Mövlud Çavuşoğlunun
təyyarəsinin Hollandiyaya uçuş izninin ləğv edilməsi iki ölkə arasında gərginliyə
səbəb oldu. Bu məsələ eyni zamanda bütün dünyanın siyasi arenasında diqqət mərkəzinə
gəldi. Azərbaycan da Türkiyəyə qarşı belə bir addımın atılmasına biganə
qalmadı. Xarici İşlər Nazirliyi bunu pisləyən bəyanatla çıxış etdi. Bəs görəsən,
Hollandiyanın Avropanın söz azadlığı, demokratiya kimi prinsiplərinə zidd olan
bu addımı nədən qaynaqlanır? Bunun nəticələri necə olacaq? Bu kimi
suallarla Milli Məclisin Azərbaycan-Türkiyə
parlamentlərarası əlaqələr üzrə işçi qrupunun üzvü olan millət vəkillərinə
müraciət etdik.
Millət vəkili,
Azərbaycan Demokratik İslahatlar Partiyasının sədri Asim Mollazadə "Kaspi”yə açıqlamasında bildirdi ki, hazırda
Almaniya və Hollandiyada seçki ərəfəsidir. Deputatın sözlərinə görə, həmin ölkələrin
Türkiyəyə bu münasibətləri onların seçkidə özləri üçün müəyyən xal qazanmaq cəhdləri
ilə bağlıdır: "Həm Almaniyada, həm də Hollandiyada baş vermiş hadisələr təəssüf
doğurur. Sözügedən ölkələrin rəhbərləri türk icmasına istənilən şərtlərlə
görüş, toplantı keçirməyə icazə verməyiblər. Bu isə Avropanın söz azadlığı və
demokratiya prinsiplərinə ziddir. Düşünürəm ki, bu hadisələrin mahiyyəti ilk
növbədə həm Almaniyada, həm də Hollandiyada seçki ərəfəsi olması ilə bağlıdır və
onların seçkilərdə özləri üçün müəyyən xal qazanmalarına yönəlmiş addımlardır.
Beynəlxalq münasibətləri öz daxili siyasətində istifadə etmək istəyən siyasətçilər
əslində Avropa-Türkiyə münasibətlərinə xələl gətiriblər”.
A.Mollazadə deyir ki, belə bir görüşün Fransada sərbəst
şəkildə keçirilməsi həmin ölkələrə nümunə ola bilər: "Orada belə bir görüş sərbəst
şəkildə keçirilsə, digər ölkələrə mesaj olaraq çatdırılacaq ki, Fransa Avropa dəyərlərinə
sadiq qaldı. Baxmayaraq ki Fransada da seçki keçirilir. Ümidvarıq ki, gələcəkdə
Türkiyənin bu ölkələrlə münasibətləri emosional deyil, rasional və Avropa
demokratik prinsiplərinə uyğun inkişaf edəcək”.
Millət vəkili,
Milli Dirçəliş Hərəkatı Partiyasının sədri Fərəc Quliyev Avropa ölkələri tərəfindən Türkiyəyə qarşı ögey
münasibətin olduğunu dilə gətirdi. Dedi ki, bu, çox yanlış bir siyasətdir:
"Türkiyə ilə NATO kimi bir blokda müttəfiq olub, ona qarşı bu cür davranmaq
doğru sayılmaz. Həm ikitərəfli münasibətlər baxımından Türkiyəyə qarşı normal
davranış deyil, həm də beynəlxalq konvensiyalara sığmayan hərəkətdir. Bir
blokda olub öz müttəfiqinə qarşı bu cür davranmaq normal deyil. Çağırışlar edərək
Avropa İttifaqında Türkiyə ilə bir yerdə olmaq istədiklərini bildirirlər. Amma əvəzində
fərqli davranışlar nümayiş etdirirlər. Bu, daha çox Türkiyəyə qarşı qısqanc
münasibət, bu dövlətin güclənməsinə qarşı olmaq, bir az da qardaş ölkənin
daxili işinə qarışmaqdır. Orada referendumla bağlı tədbirlər keçiriləcəksə,
yaxud Ankara rəsmiləri, diplomatları Hollandiyaya gedirsə və onlara qarşı bu
cür tədbirlər görülürsə, məncə, bununla Türkiyə xalqının daxili işinə
qarışırlar, onların iradələrinə qarşı gedirlər. Bu hərəkətlərlə onlar türk
xalqının iradəsini yönləndirməyə çalışırlar”.
F.Quliyev bildirdi ki, Türkiyəyə qarşı belə bir
münasibətin sərgilənməsində dini amillərin də rolu var: "Bir xristian dövləti
olaraq onlar Türkiyəni qısqanırlar. Bunu bir dəfə Angela Merkel ifadə etmişdi
ki, biz Avropa Birliyini "xristian klubu” kimi görürük və burada da Türkiyəyə
yer yoxdur. O, fikrini açıq şəkildə ifadə etmişdi. Bu davranışların arxasında
Tükiyəyə qarşı münasibət durub”.
Millət vəkili hesab edir ki, Türkiyə-Rusiya münasibətlərindəki
gərginliklərin aradan qaldırılması da burada müəyyən dərəcədə rol oynayır:
"Görünür son zamanlar Türkiyənin Rusiya ilə münasibətləri sahmana salması da
onları narahat edir. Türkiyə bütün qonşuları ilə yaxşı münasibətdə olmağa
çalışır. Bu, Rusiya ilə bir bloka girmək, ittifaq yaratmaq deyil. Amma
göründüyü qədər bir ara Türkiyəni Rusiyaya qarşı istifadə edə bilməmələri də
bunlara yer edib”.
F.Quliyev qeyd etdi ki, bütün hallarda türklərə
olan bu münasibət dolayısı ilə bumeranq effekti verəcək: "Avropa Birliyində və
NATO-da olan ölkələrə çox pis təsir edəcək. Çünki bir çox ölkələr ümumiyyətlə,
Türkiyənin NATO-da olmasını istəmirlər, güclü dövlət olaraq Türkiyənin orada
iştirakından narahatdırlar. Həmin dövlətlərin Hollandiya da daxil olmaqla bu
cür vəziyyət yaratmağı dolayısı ilə həm də onların özlərinə pis təsir edəcək.
Türkiyənin prezidenti Rəcəb Tayyib Ərdoğan da açıq ifadə etdi ki, bundan sonra
sizin təyyarələr Türkiyəyə daxil olanda necə olacaq? O, sıravi adamları yox,
diplomatları nəzərdə tutduğunu dedi. Bu həm də gələcəkdə diplomatik qalmaqala,
münasibətlərin pozulmasına gətirib çıxaracaq. Yaxın və Orta Şərqdə yeni çözüm
yolları axtarılan zamanda Türkiyəyə qarşı bu cür davranışı ağılsız bir addım
hesab edirəm. Amma düşünürəm ki, Türkiyə bu durumdan da sağlam çıxacaq”.
Aygün