Heydər Əliyev xalqımızı acı tale yaşamaqdan xilas etdi
"AXC – Müsavat cütlüyünün cəmi 13 ay
davam edən hakimiyyəti Azərbaycanı dövlət müstəqilliyini itirmək, ölkəni bölünmək,
xalqı isə müsibətlər yaşamaq taleyi ilə üzbəüz qoydu. Ölkə xaos, anarxiya, dərəbəylik,
özbaşınalıq girdabında boğulurdu”.
Bu barədə Baş nazirin müavini, Yeni Azərbaycan Partiyasının
(YAP) Sədr müavini - İcra katibi Əli Əhmədov özünün "facebook” səhifəsində
yazıb.
"İqtisadiyyat bütünlüklə çökmüşdü”
O qeyd edib ki, həmin dövrdə sözün həqiqi mənasında
yaşamaq uğrunda mübarizə gedib, çörək növbələri 1993-cü il Azərbaycanda həyatın
ən acı mənzərələrindən birinə çevrilib, inflyasiya 1000 faizlə ölçülüb. İcra
katibinin sözlərinə görə, o dövrdə milli valyuta sözün əsl mənasında dəyərsiz
kağız parçası olub: "İqtisadiyyat bütünlüklə çökmüşdü. Vaxtilə
minlərlə insanın çalışdığı fabrik və zavodlar sökülüb dəzgahları metal kimi dəyər-dəyməzinə
xaricə satılırdı. İş o yerə çatmışdı ki, dəmir yol relsləri, tramvay xətləri,
vaxtilə Azərbaycana böyük valyutalar gətirən şərab çənləri daşınıb xaricdə "əridilirdi”.
Digər heç bir sahədə bacarıq göstərə bilməyən o zamankı hakimiyyətə cəmi bir il
kifayət etdi ki, ölkəni bütünlüklə talan etsin”.
"Silahlı güvvələr hakimiyyət savaşına cəlb
olunmuşdu”
Ə.Əhmədov qeyd edib ki, o dövrdə Ermənistanla
müharibə vəziyyətində olan ölkədə nizami ordu da yaradılmayıb, ayrı-ayrı
qruplara, maraqlara, hətta siyasi partiyalara xidmət edən silahlı dəstələr
ordunu əvəz edib, hərbi vəzifələrdən daha çox siyasi vəzifələrə qulluq göstərib:
"Silahlı güvvələr hakimiyyət savaşına cəlb olunmuşdu. Ermənilər
isə bundan istifadə edib Azərbaycanın torpaqlarını zəbt etməkdə davam edirdi.
Dövlətin və mərkəzi hakimiyyətin ifrat zəifliyindən istifadə edən məkrli qüvvələr
separatçı hərəkata rəvac vermişdilər. Cənubda Talış-Muğan respublikası elan
edilmiş, şimalda "Sadval” hərəkatı baş qaldırmışdı. Azərbaycanın parçalanması
demək olar ki, artıq baş vermişdi. AXC-Müsavat hakimiyyəti bütünlükdə iflasa
uğrayıb taqətini itirmişdi. Azərbaycanı acı tale gözləyirdi. Dövləti idarə edən
siyasətçilərin görməli və qiymətləndirməli olduğu təhlükələri onlar deyil,
müdrik Azərbaycan xalqı görür və qiymətləndirirdi. Xalq hökmünü vermişdi:
Hakimiyyət dəyişməli, siyasətdə naşıları siyasətin nəhəngi əvəz etməlidir. Beləliklə,
xalq Heydər Əliyevi hakimiyyətə dəvət etdi. Azərbaycanın fəlakətdən, xalqın
müsibətdən qurtulması naminə”.
Azərbaycanın müasir tarixinin yeni mərhələsi
İcra katibi vurğulayıb ki, Heydər Əliyevin qayıdışı
ilə Azərbaycanın müasir tarixinin yeni mərhələsi başlayıb, xaos, anarxiya
aradan qaldırılıb, sabitlik təmin edilib, inflyasiya və iqtisadi tənəzzül
cilovlanıb, islahatlar həyata keçirilib, Azərbaycana firavanlıq gətirən neft
strategiyası reallaşıb, nizami ordu yaradılıb, erməni təcavüzü dayandırılıb,
separatizmin kökü kəsilib, Azərbaycanın bütövlüyü qorunub saxlanılıb: "Çörək
növbələri, 1000 faizlik inflyasiya, separatizm, AXC-Müsavat hakimiyyətinin digər
"şedevrləri” indiki gənclərə yəqin ki, fantaziya kimi gəlir. Ancaq
bütün bunlar yaşadığımız tarixin qaranlıq bir parçasıdır. Daha dəqiq ifadə etsək,
bizə yaşadılan bir tarix, bir müsibətdir”.
Azərbaycan başqa bir tale yaşamağa məhkum olacaqdı
Ə.Əhmədov bildirib ki, əgər xalq vaxtında o zamankı
hakimiyyəti devirməsəydi və siyasət nəhəngi Heydər Əliyev hakimiyyətə gəlməsəydi,
Azərbaycan başqa bir tale yaşamağa məhkum olacaqdı: "Yalnız Heydər Əliyevin sayəsində,
onun müdrikliyi və 2003-cü ildən Prezident İlham Əliyevin həyata keçirdiyi
uğurlu siyasət sayəsində Azərbaycan güclü, qüdrətli, firavan, təhlükəsiz dövlət
və ölkə kimi tanınır və qəbul olunur. Ən başlıcası isə
insanlar rahat yaşayır, gələcəyə ümidlə baxır. Ona görə də xalq 1993-cü ilin
iyun ayında Heydər Əliyevin qayıdışını Milli Qurtuluş günü kimi qeyd edir”.
Uğursuzların özlərini qəhrəman kimi göstərməsi
İcra katibi qeyd edib ki, Azərbaycan xalqı hər il
böyük coşqu ilə Milli Qurtuluş bayramını qeyd etdiyi halda, 26-27 il bundan əvvəl
ölkəni dəhşətli böhrana salaraq insanlara müsibətlər yaşadanların qalıqlarının
indiki hakimiyyəti və bütünlükdə reallıqlarımızı yalan-böhtan əsasında tənqid
etmələri istər-istəməz acı təbəssüm yaradır: "Uğursuzların özlərini qəhrəman
kimi göstərməsi tarixin ironiyasıdır. Lakin tarixi o tarixi yaşamış insanlara
unutdurmaq mümkün deyil”.
Azərbaycan daha böyük uğurlar qazanacaq
Ə.Əhmədov Milli Qurtuluş məfkurəsinin Azərbaycanın
qarşısında geniş perspektivlər açdığını diqqətə çatdıraraq, ölkəmizin uzun illər
bu yolla gedəcəyinə və daha böyük uğurlar qazanacağına dərindən inandığını
vurğulayıb. İcra katibi yazısının sonunda Azərbaycan xalqını Milli Qurtuluş
Günü bayramı münasibətilə təbrik edib.
Alpər TURAN