Hərbi və siyasi əhəmiyyətli təlim - Fotolar
Azərbaycan Türkiyə ilə qardaş və strateji tərəfdaş olduğu üçün
müxtəlif sahələrdə birgə fəaliyyət göstərirlər. Bu fəaliyyət istiqamətlərindən
biri də hərbi əməkdaşlıq sahəsidir. Hərbi sahədə qardaş ölkə ilə təcrübə
mübadiləsinin aparılması Azərbaycan Ordusunun təkmilləşməsində, kadr
hazırlığının yüksəlməsində öz rolunu oynayıb. Onu qeyd edək ki, 2014-cü ildən
başlayaraq, hər il davamlı şəkildə Azərbaycan və Türkiyə Hərbi Hava
Qüvvələrinin birgə "TurAz Qartalı” təlimləri keçirilir. Yaxın günlərdə yenidən
Azərbaycanda "TurAz Qartalı-2019”
təliminə start veriləcək. Təlimlərdə "MiQ-29”, "F-16”, "Su-25”, "P-235” "Kasa” təyyarələri, "Mi-35”, "Mi-17”, "Sikorski” UH-70, CH-47
"Çinok” və "ATAK/AH-1W” helikopterlərindən ibarət 30-dək aviasiya vasitəsi
iştirak edəcək.
Azərbaycanın yerləşdiyi region və eləcə də Ermənistanla müharibə
vəziyyətinin davam etməsi, şübhəsiz ki, ordunun daim hazırlıq olmasını tələb
edir. Bu istiqamətdə müxtəlif addımlar atılır. Bəs görəsən "TurAz Qartalı”
birgə təliminin əhəmiyyəti nədən ibarətdir və bu təlimlər Azərbaycan Hərbi Hava
Qüvvələrinin inkişafında hansı rola malikdir?
Mövzu ilə bağlı "Kaspi” qəzetinə açıqlamasında politoloq Elşad Mirbəşiroğlu bildirdi ki, Türkiyə və Azərbaycanın
Hərb Hava Qüvvələrinin birgə təlimlərinin keçirilməsi özündə əsasən iki məna
daşıyır: "Birincisi, hərbi-texniki hazırlıq səviyyəsinin yüksəldilməsi
baxımından belə təlimlərin olduqca böyük əhəmiyyəti olur. Təbii ki, hər zaman
hərbi qüvvələrin hazır vəziyyətdə olması üçün təlimlərin keçirilməsi vacibdir.
Eyni zamanda hərbi qüvvələr üzərində nəzarət, o cümlədən çatışmazlıqların
aradan qaldırılması baxımından da bu təlimlərin əhəmiyyəti böyükdür.
Dövlətlərin birgə təlimlərin keçirilməsinə gəlincə, bu təlimlərin hərbi-texniki
əhəmiyyəti ilə yanaşı, həm də siyasi əhəmiyyəti var. Bildiyimiz kimi, Türkiyə
ilə Azərbaycan arasında strateji tərəfdaşlıq münasibətləri mövcuddur. Bundan
öncə də Türkiyə və Azərbaycan hərbçilərinin, xüsusilə hərbi hava qüvvələrinin
birgə təlimləri təşkil olunub. Bu, Türkiyə-Azərbaycan münasibətlərinin
xarakterini bir daha dünyaya, region dövlətlərinə çatdırmaq üçün effektiv bir
vasitədir. Eyni zamanda bu, kənar müşahidəçilər üçün o anlama gəlir ki, Türkiyə
ilə Azərbaycan kifayət qədər bir-birinə sıx bağlıdır, onlar tək deyillər və
biri-birilərinin yanındadırlar. Hesab edirəm ki, bu təlimin əsas siyasi mesaj
yükü bundan ibarətdir”.
E.Mirbəşiroğlu qeyd etdi ki, atəşkəs rejimi qüvvədə olmasına
baxmayaraq, Azərbaycan müharibə vəziyyətindədir: "Çünki işğalçı Ermənistan
davamlı olaraq atəşkəs rejimini pozmaqda, hərbi təxribatlar törətməkdədir.
Azərbaycan və Türkiyə hərbiçilərinin təlimi həm də işğalçı Ermənistana bir
siqnaldır. Paşinyanın məlum bəyanatlarından sonra belə təlimlərin keçirilməsi
xüsusilə yerinə düşür. Çünki Paşinyan "Qarabağ Ermənistandır” deməklə, faktiki
olaraq bundan sonra danışıqların keçirilməsi variantını sıfıra endirib. Yəni
danışıqlar yoxdursa, deməli ortada qalan müharibədir. Təbii ki, Azərbaycanla
Ermənistan arasında hərbi potensialla bağlı fərq müqayisəolunmazdır. Ermənistan
kənardan dəstək almasa, hərbi baxımdan Azərbaycanın qarşısında qısa zaman
kəsiyində belə tab gətirə bilməz. Bu baxımdan hesab edirəm ki, indiki məqamda
Türkiyə ilə Azərbaycan arasında birgə təlimlərin keçirilməsi ölkəmizin hərbi
imkanları sarıdan Ermənistana bir əzələ nümayişi kimi qəbul edilməlidir. O
baxımdan ki, əgər danışıqlar olmayacaqsa, deməli, müharibə olacaq. Azərbaycan
da qısa zaman kəsiyində öz torpaqlarını azad edərək ərazi bütövlüyünü təmin
edəcək. Hesab edirəm ki, həm beynəlxalq ictimaiyyətə, həm də işğalçı
Ermənistana bu təlimlərin keçirilməsinin məqsədilə bağlı mesaj bundan ibarət
olacaq”.
"AzeriDefence” jurnalının
baş redaktoru Rəşad Süleymanov bildirdi ki, "TurAz Qartalı” təlimləri
2014-cü ilin sentyabr ayından etibarən ildə iki dəfə keçirilir: "Bir dəfə
"TurAz Qartalı” adı ilə Azərbaycanda, digəri isə "TurAz Şahini” adı ilə
Türkiyədə, Konyada keçirilir. Təlimə Azərbaycanın və Türkiyənin Hərbi Hava Qüvvələrinin
döyüş təyyarələri, hərbi nəqliyyat təyyarələri, eyni zamanda döyüş və nəqliyyat
helikopterləri cəlb olunurlar. Təlimlərin məqsədi iki ölkənin hərbi hava
qüvvələri arasındakı koordinasiyanı təşkil etmək, birgə əməliyyat uyğunluğunu
təmin etmək, bir sözlə, birgə əməliyyatların planlaşdırılmasını, icrasını
həyata keçirməkdən ibarətdir. Bu təlimlər zamanı Azərbaycan pilotları Türkiyə
Hərbi Hava Qüvvələrinin silahlanmasında olan F-4 və F-16 döyüş təyyarələri,
helikopterləri ilə tanış olur, onların idarəetməsini mənimsəyir. Eləcə də,
Türkiyə pilotları da Azərbaycan Hərbi Hava Qüvvələrinin silahlanmasında olan
təyyarə və helikopterlərdə uçuşlar edərək onların imkanlarını mənimsəyirlər. Təlim
həm əməliyyat planlaşdırılması, döyüşlərin icrası, həm də axtarış-xilasetmə
qruplarının təlimlərindən ibarət olur. Ümumilikdə, düşünürəm ki, iki qardaş
ölkənin hərbi hava qüvvələri artıq bu təlimlər vasitəsilə ortaq bir nöqtəyə
gələ biliblər. Çünki ötən 5 il ərzində kifayət qədər böyük təcrübə əldə olunub.
Bu təlimlərin davamı olaraq Azərbaycan Hərbi Hava Qüvvələrinin nümayəndələri
Türkiyədə "Anadolu Qartalı” və "İşıq” təlimlərində də iştirak edirlər və
biliklərini, təcrübələrini daha da genişləndirirlər”.
R.Süleymanovun sözlərinə görə, döyüş təyyarələrinin əməliyyat
imkanları dedikdə, bu, tək qərargahda aparılan planlaşdırmadan ibarət deyil,
həmçinin rabitənin, silah və cəbbəxananın uyğunlaşdırılması kimi məqamları da
var: "Bu çərçivədə Azərbaycan HHQ-nin rabitə sistemi Türkiyənin HHQ-nin rabitə
sistemi ilə uzlaşdırılıb. Türkiyə tərəfi də bildirib ki, ölkəsinin HHQ-i
Bakının radarlarından əldə olunan informasiyaları da görə bilir və dərhal iki
ölkə qarşılıqlı addım atmağı planlaşdırırlar."TurAz Qartalı-2019”
təliminin bir fərqli cəhəti də var ki, Türkiyə milli sənayesinin istehsalı olan
"T-129 Atak” zərbə kəşfiyyat helikopteri ilk dəfə olaraq Azərbaycan səmasında
uçacaq. Müdafiə Nazirliyi və Hərbi Hava Qüvvələri Komandanlığı bu hərbi
helikopteri silahlanmaya qəbul etməkdə maraqlı olduqlarını açıqlamışdı. Ona
görə də, bu, helikopterlərin Azərbaycanda ilk sınaqları da hesab oluna bilər.
Çünki bizim pilotlarımız bu helikopterlə Azərbaycan mühitində uçuşlar edərək
onun döyüş imkanlarını görə biləcəklər".
Ekspert qeyd edib ki,
"TurAz Qartalı” təlimləri tək Azərbaycan və Türkiyə miqyaslı təlimlər deyil: "Eyni zamanda Gürcüstan və Pakistan da bu təlimdə müşahidəçi qismində çıxış
etmək üçün müraciət ediblər. Bu da gələcəkdə "TurAz Qartalı”nın regional
miqyaslı hava təliminə çevriləcəyini deməyə əsas verir. Hesab edirəm ki,
Türkiyə və Azərbaycanın birgə təlimləri tək hərbi hava qüvvələrini deyil, eləcə
də digər qoşun növlərini əhatə edəcək. Bu təlimlər hərbi-siyasi baxımdan iki
ölkə arasında qardaşlığın bariz nümunəsidir və heç şübhəsiz ki, başqa ölkələrə
açıq mesajdır”.
BƏXTİYAR