Bakı 19°C
Hər şeyi qara görənlər
Azərbaycanın yürütdüyü uğurlu daxili və xarici siyasət ölkəmizin
inkişafına şərait yaradır. Respublikamızın neftdən əldə etdiyi gəlirlərin qeyri-neft
sektorunun inkişafına yönəldilməsi sayəsində ərzaq təhlükəsizliyi təmin
edilməkdədir. Son illər ölkəmizin uğurları beynəlxalq səviyyədə də davam edir.
Artıq dünyanın nüfuzlu beynəlxalq təşkilatlarında Azərbaycanın sözü
eşidilməkdədir. Bunlar əslində hər bir azərbaycanlını qürurlandıracaq hadisələr
olsa da, ölkəmizin inkişafını gözü götürməyən, şəxsi maraqlarına görə milli
maraqlarımıza kölgə salanlar da var. Təəssüf ki, Azərbaycan əleyhinə təbliğat
aparanlar təkcə düşmən tərəf deyil. Bəzən elə öz soydaşlarımız "vətənpərvərlik”
edərək Azərbaycan əleyhinə aparılan təbliğatın alətinə çevrilir. İstər ölkə
daxilində, istərsə də ölkəmizdən kənarda yaşayan həmin şəxslər hər vasitədən
istifadə etməklə Azərbaycanı qaralamağa çalışırlar. Bu "vətənpərvərlər” bu gün
yeni medianın verdiyi imkanlardan da geninə-boluna istifadə edirlər. Özü də
onları sayı getdikcə artır.
Ölkəsini tərk edib, özlərinə xarici ölkələrdə
sığınacaq tapanlar Azərbaycanla bağlı qarayaxma kampaniyalarını sığındıqları
ölkələrdə də davam etdirirlər. Əgər bir müddət əvvəl Qənimət Zahid, Əlövsət
Əliyev, Ramiz Yunus, İsa Sadıqov daha fəal idisə, indi sosial şəbəkələrdə yeni
"qəhrəmanlar” peyda olub. Son zamanlar isə Fəridə Hüseynova, Rəşad Hüseynov,
Səbuhi Qulusoy, Rövşən Bəşirov, Zöhrab Məlikov, Ruslan Cavadov, İlqar Sadiqov,
Rəşad Mehdi, Vüsal Bağırov, Məhərrəm Məmmədov, Taryel Bayramov, Əsmər
İmsayilzadə, Murad Əhmədov və onlarla bu tipli feysbuk "qəhrəman”ları yaranıb. Onlar
feysbuk səhifələrində çox hallarda Azərbaycana aid olmayan foto, video
paylaşaraq, bunu bizim adımıza çıxırlar. Məqsədləri ancaq Azərbaycanı qara
rəngdə göstərməkdir. Ölkədə heç bir nüfuzu olmayan, əksəriyyətin tanımadığı bu
adamlar xaricə gedən kimi "qəhrəman”a çevrilirlər. Bu gün Azərbaycanda bütün
dini inanclara sahib insanlar bərabər şəkildə yaşasa da, ölkəmiz dünyaya
tolerantlıq nümunəsi kimi göstərilsə də, bu insanlar Azərbaycanda guya dini
inanclı insanların sıxışdırıldığını iddia edir. Sosial şəbəkələrdə mütəmadi
olaraq dövlətçiliyimiz əleyhinə kampaniya apararaq, heç bir etikaya sığmayan
təhqirlər səsləndirirlər.
Sual olunur: nədir və kimdir bunları danışdıran? Xaricdə oturub niyə Azərbaycan
əleyhinə iş aparırlar? Öz dövlətlərini əcaib formada təqdim edirlər. Reallığı
görmədən Azərbaycanın əleyhinə bu cür təbliğat aparanlara qarşı mütləq ölçü
götürülməlidir. Bəlkə də qanunvericiliyə internetdə saxta istifadəçi adları,
profil və ya hesablardan istifadə edərək böhtan atanlar, insanları təhqir
edənlərlə bağlı edilən dəyişikliklər əsasında belələri ilə bağlı tədbirlər
görülə bilər və görülməlidir də.
Alpər Turan
