Həmsədrlərdən yeni təşəbbüslər gözləməyə dəyərmi?
İmperialist güclərin havadarlığına arxalanan ermənilər
azərbaycanlılara məxsus ərazilərə zaman-zaman əsassız iddialar irəli sürüblər.
Tarixin müxtəlif mərhələlərində, o cümlədən ötən əsrin əvvəllərində bolşevik
libasına bürünən erməni daşnakları azərbaycanlılara qarşı soyqırımı, kütləvi qətliam
həyata keçirməkdən də çəkinməyiblər. 1988-ci ildən başlayaraq Ermənistan siyasi
rəhbərliyi etnik təmizləmə siyasətinə əl atıb, məhz Azərbaycan türkü, müsəlman
olduğuna görə 200 minə yaxın həmvətənimizi öz doğma el-obasından deportasiyaya
edib. Bunun davamı olaraq, xarici ölkələrdəki erməni diaspor təşkilatlarından,
ermənipərəst siyasi dairələrdən böyük dəstək alan Ermənistan rəhbərliyi Azərbaycanın
ərazi bütövlüyünü parçalamaq, qəsb etmək məqsədilə Dağlıq Qarabağdakı erməni əhalinin
vasitəsilə separatçılıq hallarına yol açıb. Elə Dağlıq Qarabağ münaqişəsinin
müasir mərhələsi də məhz bu andan - 1988-ci ildə Ermənistan SSR-in Azərbaycan
SSR-ə qarşı ərazi iddiaları irəli sürməsindən başlayıb.
İndiyə qədər münaqişənin
dinc yolla həlli üçün ATƏT-in Minsk qrupu çərçivəsində aparılan danışıqlar hər
hansı nəticə verməyib. Ermənistan qeyri-konstruktivlik nümayiş etdirib ki, bu
da münaqişənin həllini uzadıb. Bununla belə, Milli Məclisin vitse-spikeri, Azərbaycanın ATƏT Parlament
Assambleyasındakı nümayəndə heyətinin rəhbəri Bahar Muradovanın mətbuata
verdiyi açıqlamadan bəlli olur ki, rəsmi Bakı həm ATƏT-in Minsk Qrupunun həmsədrlərindən,
həm də onların təmsil etdikləri ölkələrdən Dağlıq Qarabağ münaqişəsinin həlli
ilə bağlı öz vəzifələrini yerinə yetirmək istiqamətində hələ də yeni səylər
ortaya qoymağı gözləyir. Deputatın sözlərinə görə, Azərbaycan gələn il də
münaqişənin həlli ilə bağlı müsbətə doğru dəyişikliklərin olacağını ümid bəsləyir:
"Biz gözləyirik ki, bütün münaqişə ocaqlarında olduğu kimi, regionda da
insanların həyatını, ölkələrin əməkdaşlığını, beynəlxalq təhlükəsizliyi təhdid edən
münaqişələr həll edilməlidir. Ölkələrin ərazi bütövlüyü, suverenliyi qorunmalı,
təcavüzkar işğal etdiyi torpaqları tərk etməli, işğalçıya münasibət özünü göstərməlidir.
Biz Azərbaycana hansısa güzəştlərin edilməsini, birtərəfli qaydada Azərbaycanın
tərəfinin tutulmasını istəmirik. Biz ədalətli yanaşma istəyirik. Ədalətli
yanaşma da beynəlxalq hüququn prinsiplərinə riayətdir. Əgər o prinsiplər
qorunarsa, münaqişə də ədalətlə həll olunar”.
Ana Vətən
Partiyasının (AVP) sədri, millət vəkili Fəzail Ağamalı mövzu ilə bağlı "Kaspi”yə açıqlamasında bildirib
ki, Azərbaycan xalqının mütləq əksəriyyəti Dağlıq Qarabağ probleminin dinc
yolla həlli istiqamətində artıq ATƏT-in Minsk qrupunun həmsədrlərindən ciddi nə
isə gözləmir. Deputatın fikrincə, BMT TŞ-nın 1992-ci ildən indiyə qədər onlara
verdiyi mandatdan həmsədrlər Azərbaycanın ərazi bütövlüyünün təmin olunması,
problemin həlli, BMT TŞ-nın 4 qətnaməsinin yerinə yetirilməsi üçün lazımınca
istifadə edə bilməyiblər: "Əksinə, həmsədrlər zaman-zaman sərgilədikləri mövqeyə
görə işğalçı ilə demək olar ki, eyni mövqedə dayanıblar, status-kvonun dəyişməz
olaraq qalmasında Ermənistana yardımçı olublar, hətta Azərbaycan ərazisində
ikinci erməni dövlətinin yaradılmasına çalışıblar. Onların fəaliyyətini ancaq
bu cür qiymətləndirmək olar. Bu səbəbdən ATƏT-in Minsk qrupuna Azərbaycan
xalqının etimadı çox aşağı səviyyədədir. Həmsədrlər üzərlərinə düşən missiyanı
bu günə qədər yerinə yetirə bilməyiblər. Bu da o deməkdir ki, onlar iflasa
uğrayıblar. Hesab edirəm ki, biz yalnız öz gücümüzə, dövlətimizin imkanlarına
arxalanmalı, Silahlı Qüvvələrin Ali Baş Komandanı, Prezident İlham Əliyevin ətrafında
daha sıx birləşməli, hərbçilərimizlə kürək-kürəyə söykənərək, yalnız hərbi
yolla torpaqlarımızı işğaldan azad etməliyik. Bu xalqın nümayəndəsi, millət vəkili
olaraq heç zaman arzu etmirəm ki, müharibə olsun, qan tökülsün, övladlarımız şəhid
olsun və sair. Amma aprel döyüşləri və ondan sonrakı proseslər bir daha sübut
edir ki, işğal altındakı torpaqlarımızın azadlığı, ərazi bütövlüyümüzün təmini
yalnız düşmənlə savaşdan, onları bu yolla geri oturtmaqdan keçir. Düşünürəm ki,
2017-ci il bunun üçün ən əlverişli ildir”.
Politoloq
Natiq Miri isə
hesab edir ki, Dağlıq Qarabağ probleminin həlli üçün gələcəkdə həmsədrlərdən,
eləcə də onların təmsil etdiyi dövlətlərdən yeni səylər gözləməyə dəyər. Onun
fikrincə, bunun üçün geosiyasi şərtlər, geosiyasi maraqların təmin olunması
vacibdir: "Heç kəsə sirr deyil ki, postsovet məkanındakı bir sıra münaqişələr
kimi Dağlıq Qarabağ problemini də SSRİ adlı imperiyanın varisi Rusiya süni surətdə
yaradıb. Gələcəyə hesablanmış bu addım münaqişə regionundakı dövlətlərə təsir
etmək, onları bu yolla idarə etmək məqsədi daşıyırdı. Gürcüstanda, Moldovada,
Azərbaycanda belə münaqişə ocaqları yaradılıb. Çünki hər üç dövlətin mövcud
olduğu coğrafiyada Rusiyanın geosiyasi maraqları var. Bəzi hallarda bu maraqlar
Qərb dünyası ilə toqquşur. Müasir dövrümüzdə Ukraynadakı proseslərə də bu
kontekstdən yanaşmaq lazımdır. Rusiya münaqişə ocaqlarından istifadə etməklə bu
dövlətlərin birmənalı şəkildə Qərbə inteqrasiyasına, onların öz nəzarətindən
çıxmasına əngəllər yaradır. Bu baxımdan, əgər Rusiya istəyərsə, Dağlıq Qarabağ
münaqişəsinin həllini yenidən aktivləşdirə bilər. Buna digər həmsədr dövlətlərin
də marağı olmalıdır. Bunun üçün isə dünyadakı digər regional münaqişələrin həll
olunması gərəkdir. Ukraynadakı proseslərə görə Qərb Rusiyaya qarşı
iqtisadi-siyasi sanksiyalar tətbiq edib. Bu isə Rusiyanın aqressiv xarici siyasəti
ilə müşayiət olunur. Nəticədə Krım işğal olunur, Donbasda savaş gedir, Suriyaya
müdaxilə olunub, orada vətəndaş müharibəsi yaşanır. Bu savaşlar çərçivəsində
artıq dünya gücləri üz-üzə dayanıb. Bu səbəbdən Rusiya ilk növbədə Suriyada
savaşın bitməsini, öz geosiyasi maraqlarının təmin olunmasını istəyir. Paralel olaraq
Ukrayna münaqişəsi də həll olunmalıdır ki, bu kontekstdə Dağlıq Qarabağ münaqişəsinin
həlli də aktivləşsin. Sadalanan münaqişələrdən Dağlıq Qarabağ problemini
ayırmaq və ayrıca olaraq həll etmək qeyri-mümkündür”.
Rufik
İSMAYILOV