Həkimlər kommersiya marağını peşə etikasından yüksək tutmamalıdır
"Azərbaycanda
dərman vasitələrinin qanunsuz dövriyyəsi ilə məşğul olmaqda şübhələndirilən
şəxslərlə əlbir olub xəstələrə keyfiyyətsiz dərmanları tövsiyə edən 100-ə yaxın
həkim cəzalandırılacaq. Onlar işlərini itirə də bilərlər”. Bunu "Xəzər
Xəbər”ə açıqlamasında Səhiyyə
Nazirliyinin hüquq və daxili siyasət sektorunun müdiri Elxan Əzizov deyib.
Onun sözlərinə görə, hazırda Səhiyyə Nazirliyi sözügedən məsələ ilə bağlı
istintaqın yekunlaşmasını gözləyir. E.Əzizov reseptlərin yazılması və bioloji
əlavələrdən istifadə ilə bağlı da həkimlərə xəbərdarlıq edib. O, dərman
firmaları ilə əməkdaşlıq edən və reseptə qida əlavəsi yazan həkimlərin
cəzalandırılacağını bildirib.
Qeyd edək ki, bir neçə gün öncə
prokurorluq əməkdaşları tərəfindən dərman vasitələrinin qanunsuz dövriyyəsi ilə
məşğul olan beş vəzifəli şəxs həbs olunub və onların 100-dən çox həkimlə əməkdaşlıq
etdiyi açıqlanıb.
Əlbəttə, bəzi həkimlərin hansısa dərman firması ilə əməkdaşlıq etdiyi
hər kəsə bəllidir. Həmin həkimlər reseptə daha çox bahalı dərmanlar yazırlar.
Hansı ki, həmin dərmanları daha ucuzu ilə əvəzləmək olar. Bəs həkimlərin və
firmaların qurduğu bu kommersiya oyununu necə pozmaq olar, onlara qarşı hansı
tədbirlər görülməlidir - öyrənməyə çalışdıq.
Tibb üzrə ekspert, professor Adil Qeybulla bildirir ki, əslində son dönəmlər bu məsələnin izinə düşülməsi
olduqca təqdirəlayiq haldır: "Çünki hazırda firmalarla işbirliyi quran kifayət
qədər həkim var. Çalışmaq lazımdır ki, həkimlərlə ayrı-ayrı firmalar arasında
olan qeyri-sağlam münasibət pozulsun. Amma, belə baxanda, bu situasiya dünyanın
bir çox ölkəsində mövcuddur. Hətta Amerikanın özündə belə dərman firmaları
həkimlərlə əməkdaşlıq etməyə can atırlar. Bu, kommersiya marağı güdən bir
yanaşmadır. Və təbii ki, həkimlərin həmin firmadan alacaqları pula ehtiyacları
olmasın deyə, onların məzuniyyətlərini, ezamiyyətlərini, elmi tədqiqat işlərini
maliyyələşdirirlər. Amma bizdə bir az sui-istifadə halları var. Normadan artıq,
yeri gəldi-gəlmədi, dərmanların reseptə yazılması bu gün həkimlərin bəzilərinin
daha artıq pul qazanmaq üçün atdığı yanlış addımdır. Hesab edirəm ki, bu kimi
halların qarşısını almaq üçün müəyyən bir tədbirlər sistemi olmalıdır”.
Ekspertdən
hansı tədbirlərin görülməli olduğunu soruşduq: "İstənilə halda, hər bir
qanunsuz addımın qarşısını almaq üçün mexanizm olmalıdır. Bu məsələ ilə bağlı
da bəzi mexanizmlər tətbiq edilməlidir. Mexanizm nədən ibarət olmalıdır sualına
gəlincə isə, ilkin olaraq müalicə protokolu tərtib olunmalıdır. Yəni orada
müalicənin getməsi yazılmalıdır və müalicə ona uyğun şəkildə aparılmalıdır. Nə
vaxtsa həkimin fəaliyyətinin düzgün olub-olmadığını yoxlamaq üçün həmin
protokoldan istifadə ediləcək. Və həkimin hansısa firma dərmanını çox və ya
lazımsız yerə yazdığını bilmək olacaq”.
Səhiyyə
Nazirliyinin baş pediatrı Nəsib Quliyevdeyir ki, insan gərək işinə məsuliyyətlə, vicdanla yanaşsın: "İşlədiyim
müəssisənin girişindən qurtaracağına qədər hər yerə yazıb elan kimi asmışıq ki,
firma dərmanlarının satışı ilə məşğul olanlara giriş qadağandır. Və konkret
olaraq bizim klinikanın onlarla heç bir əlaqəsi yoxdur. Amma kimsə bu cür işlə
məşğul olursa, mütləq şəkildə onu cəzalandırmaq lazımdır. Yəni dövlət tibb
müəssisəsi olaraq bizim iş prinsipimizə qəti olaraq ziddir. Digər bir tərəfdən
isə, xəstəxanalarda dərman təchizatı qapalıdır. Yəni onları dövlət özü dərmanla
təmin edir və onlar da reseptə yazılır. Ancaq bəzi özəl klinikalarda həkimlər firma
dərmanları yazır. Bu cür həkimlərə münasibətimiz tamamilə mənfidir. Və bu çox
yaramaz və mövqesiz işdir. Bir neçə həkimin etdiyi bu yanlışlığa görə bütün
həkimlərin adına ləkə gəlir. Səhiyyə Nazirliyi daim bu kimi hallarla mübarizə
üçün müxtəlif üsullara əl atıb. Müəyyən sərəncamlarla, göstərişlərlə həkimləri
bu yanlışdan dönməyə səsləyir”.
Müsahibimiz,
ümumiyyətlə kütləvi informasiya vasitələrində belə dərmanların reklamına qarşı
olduğunu bildirir: "Milli Məclisin qəbul etdiyi əczaçılıqla bağlı qanunda da
bunlar öz əksini tapıb. Xüsusilə də dərmanları reklam edənlərin yaxasından
tutmaq lazımdır ki, hansı qanunla dərmanı reklam edir. Xəstələrə dərman
yazılanda, onun firma adı yox, molekulyar tərkibi qeyd olunmalıdır. Amma bir
məsələ də var ki, gərək insan özü də peşəsinə vicdanla, məsuliyyətlə yanaşsın.
İnsan gərək işini mənəviyyatını pozmadan görsün. Hələ üstəlik, bu adam
həkimdirsə, peşə etikası qaydalarına ikiqat əməl etməlidir”.
Məsələ
ilə bağlı özəl klinikalardan birində çalışan və adının çəkilməsini istəməyən
həkimlə həmsöhbət olduq. Müsahibimiz firmalarla əməkdaşlıq etdiyini bildirir:
"Həkimlərin dərman firması ilə əməkdaşlığı normal haldır. Onsuz da yazılan
istənilən dərman hansısa bir "x” şirkətinə məxsusdur. Həmkarlarımın necə
işlədiyini bilmirəm, amma konkret olaraq bir firma ilə əməkdaşlıq edirəm. Və
işimə də kifayət qədər məsuliyyətlə yanaşıram. Hər yoldan keçən firmanın
dərmanlarını yazmıram. Çünki hər firmaya etibar etmirəm. Dərmanların qiymətinə
gəlincə isə, onu deyim ki, dərman bahalıdırsa, demək keyfiyyətlidir. Çünki
dərman ucuz olanda onun molekulyar tərkibi yaxşı olmur. Dərmanın molekulasını istehsal edən firma onu baha, ona oxşar, lakin
daha aşağı keyfiyyətdə hazırlayanlar isə ucuz satır. Və beləcə qiymət fərqi
yaranır”.
Günel
Azadə