GÖZƏLLİYİ ŞƏRTLƏNDİRƏN ÖZƏLLİK
Müasir poeziyamızı öz şeirləri ilə zənginləşdirən,
bəlkə də ən doğrusu, bu mənəvi xəzinənin incilərini artıran şairlərin, ya bəlkə
də nəsə yazanların sayını necə dəqiqləşdirmək olar? Bütün imza sahibləri də
Yazıçılar Birliyinin üzvü deyildir ki... Hələ sandıq ədəbiyyatını demirəm. Bir
bayatı ilə ədəbiyyatda, yaddaşlarda qalmaq da mümkündür, silsilə şeirlərlə
unudulmaq da, diqqət cəlb etməmək də . Şeirin gözəlliyi onun özəlliyində, mükəmməl
olmasında, saf, təmiz duyğular ifadə etməsində, qəlbə yol açmasındadır. Elə bu
fikirlərin nəticəsidir, hər şairin də təqdimində onun yaradıcılığını açıqlayan
ifadələr işlədilir: vətəndaş şair, məhəbbət şairi, satirik şair, nəğməkar şair,
təbiət şairi... Etirazım yox, amma mənim üçün bir epitet də var doğma şair! Əlbəttə,
bu qohumluq əlaqələri ilə bağlı deyildir. Əgər onun misraları dilimdən düşmürsə,
yaşadığım və üzləşdiyim müxtəlif ovqatların, ağrıların mənəvi çıxış yolunu o
misraları xatırlamaqla təsəlli tapıramsa, daha doğmalıq necə olur? Ulu Nizamidən,
Füzulidən üzü bəri ürəyimdə mürgüləyən, mənimlə yol gedən, tez-tez qəlbimi isidən,
gözlərimdən yanağıma yuvarlanan inciləri qurudan, səsimi titrədən, bəzən də məni
ötənlərə aparan misraların qüdrətini tez-tez duyuram. Bu mənada sevdiyim, şeirləri
ilə xiffətimi ovutduğum doğma şairlər var ki, onları minnətdarlıqla yad etməyi
həmişə özümə borc bilirəm. Maraqlıdır ki, belə şairləri yadıma salan, məni mütəmadi
olaraq məhz o müəllifin poeziyasına çəkən də elə öz şeirləri olur. Bu məqamın
yaranması da qeyri-adi baş verir.
Xeyli müddətdir ki, anamı xəyalımdan çıxara
bilmirəm. Dolmuş gözlərimi, dağılan ürəyimi o misraların ahəngində oxşayıram:
Sellər ilə süpürləşən,
Çətin günlərdə kürləşən,
Göyçək əli kömürləşən,
Birçəyi qarlaşan anam...
Bu şerin müəlifi unudulmaz şairimiz Məstan
Günərdir. Onun yaradıcılığına hansı yöndən yanaşsaq poetik sözün böyük qüdrətini
dərhal hiss edərik. Xəlil Rza Ulutürkə məxsus fikirdir ki, Məstanın
yaradıcılığında milli ruhun dərin qatları var. Xüsusi ilə də klassik şerimizin ənənəsi
çox güclüdür. Amma mən bu qeydlərimdə Məstan Günərin ana və Vətən mövzusunda yazdığı şeirlərindən söz
açmaq istəyirəm. Bunun da bir özəl səbəbi var. Elə ki payız fəsli gəlir, qışın
soyuğu məni dondurur anamın isti nəfəsini duymaq, "can” kəlməsini eşitmək, o bəxtəvər
günlərimə qayıtmaq, birdə illərlə həsrət qaldığım doğma yurduma dönmək istəyirəm.
Bax bu əl yetməz arzularımın ağrıları məni bu mövzuda yazılmış şeirlərlə
baş-başa qoyur. Unuduram özümü. Məstan Günər deyərdi: " Analar ağıllı, analar dərin...”
O insan da xoşbəxtdir ki, bu ucalıqdan kifayət qədər dərs ala bilsin. Ana yeganə
varlıqdır ki, insan yaşından, başından asılı olmayaraq ona həmişə möhtacdır. Müəllifin
"Anama” adlı şerindəki düşüncələri ürəyimi sızlatdı. Həqiqətən də biz hələ
beşikdə ikən məhz anamızın gözlərində göyləri tapardıq. Günəş bəbəyimizdə gül
toxuyardı. Xoşbəxtliyə bax:
Mənim ilk günəşim doğdu
səninlə,
Beşik kənarından qalxıb
güləndə.
Yerə dəyməmişdi ayağım hələ,
Beşikdən tanıdım cahanı
səndə...
Şeirlərinin birində qəribə bir sualı
var: "Hansı məhəbbətdir ki qədərindədir...” Cavab açıqlanmır, amma poetik
nisgillərinin doğurduğu misralar görün nə söyləyir.
İnana bilmirəm yanımda
yoxsan,
Axırda yad olan ilkim, əzəlim.
Sənin saçlarına əl
uzadıram,
Sənin yoxluğuna toxunur əlim.
Əslində bu bir məhəbbət şeridir. Yanar
ürəyimə su kimi çəkdim. Bütün bədii sualların ünvanında Ana obrazını gördüm.
Bizim ilk və son məhəbbətimiz olan, aqillər demişkən dünyanın ən təhlükəsiz
qadını sayılan Ana! İtirilən bütün məhəbbətlərin əvəzini tapmaq mümkündür.
Anadan başqa. Bəlkə də şair ona görə nalə çəkir: "heyif ki, gec başa saldılar məni...” Bu səbəbdən də, Məstan Gunər bu müqəddəs
varlığı düşünəndə həmişə "Bağışla məni, bağışla anam” deyib. Gecələr gözlərindən
çəkilən yuxular da bayatıya, qoşmaya çevrilib:
Əylə gələn bir qatarı,
Çapsın yuxumda çarxları.
Şəhərə köçməyən qarı-
Elinə bağlaşan anam.
Dünyanın bütün pisliklərindən uzaqda
dayanan ana, hətta yuxularını da qarışdıranda ağlına qara fikir gətirməyib,
Allaha sığınıb, Tanrıdan ümidini üzməyib:
Fikirli yatsa gecələr -
Yuxusunu qatsa əgər,
Gördüyünü səhər-səhər
Sulara danışan anam.
Şairin "Bəs anam hanı” adlı şerindəki həsrətin
doğurduğu sualın cavabını vermək o qədər ağır və çətindir ki... Çoxumuz bu dərdi
inanmaya-inanmaya yaşamışıq. Gözümüz yolda, qulağımız səsdə qalsa da taleyin zərbəsi
imkan verməyəcək ki, anamızın səsi gəlsin, gül üzünü bir də görə bilək. Ən
ağırı da doğulduğun yurda gedəsən, amma ananı tapmayasan:
Tovuzda obaşdan dayanır
qatar,
Düşürəm, əlimdə yol
çamadanı.
Elə bil qarşıma çıxıb
qovaqlar,
Şehli qələmələr, bəs
anam hanı?
Bu həmin cığırlar, yoxuşdakı dağdağan,
ceviz ağacları, kövşənli çöllər, dumanlı təpələr... Nə varsa yerindədir, görünməyən,
həniri gəlməyən bircə anadır. Ana hey!.. Vaxtı ilə balasının gəlişini bilən
kimi qarşısına ayaqyalın qaçan ana!
Cismi torpağın qoynunda, özü ürəyimizdə olan anamız!
Elə bilirəm ki, bu sözləri deməsəm, şairin
ruhu məni bağışlamaz. Məstan Günər təbiət aşiqi olub. Onun şeirlərində Azərbaycan
təbiətinin bütün gözəllikləri bütün əl-əlvanlığı ilə sayrışır. Kürün
yaxınlığında Şabadın adlı bir meşə var. Təkcə bu zümrüd aləmə 10-a yaxın şeir
yazıb. Məni heyrətə gətirən onun duyğularıdır. Müəllif tarixin dərin qatlarına
elə poetik səyahət edib ki, bu ayrı-ayrı şeirlər sanki bir poemanın müəyyən hissələridir. Çox mətləblərdən
söz açan bu şeirlər ötən əsrin 70-ci illərində yazılıb. Bir nümunə gətirməklə Məstan Günərin necə cəsarətli qələm sahibi
olduğunu bildirmək istəyirəm:
Fatehlər! Qəbirlər
almadı bizi,
Məni layla çalıb dirildi
anam.
Gün o gün olsun ki, göynətsin
sizi -
Mən deyim: mən
bütöv Azərbaycanam!
Məstan Günərin lirik şeirləri də çox
siqlətli, məzmunlu və ürəyə yatandır. Onun porziyasında Molla Pənah Vaqifin ruhu duyulur. Gözəllərə
ünvanladığı poetik nümunələrdə saf, təmiz eşqin tərənnümü, cavabsiz məhəbbətin
gileyləri, bəzən də aşiqin atmacaları diqqət çəkir. Bütün olanların isə bir
cavabı var:
Əlləri lalədən badəli
qızlar,
Məstanam, xətərli, xətalı
qızlar.
Dünyaya gəlişi sədalı
qızlar,
Sizləri yetirən Vətənə
heyrət.
Məstan Günər uzun illər Bakıda yaşasa
da, müxtəlif məsul vəzifələrdə çalışsa da ömrünün son illərini doğma Əsrik
Cırdaxan (Tovuz rayonu) kəndində başa vurdu. "Burda anama daha yaxınam, ondan
uzaq salarlar məni” deyirdi. Bir də söyləyirdi ki, "zirvədə ölüm”. Elə bu niyyətlə
də "yığıb son gücünü, üzü dağlara” bir əbədi köç elədi. "Dərdimin dünya gəmisi”
adlı şerindəki vidasına isə laqeyd qalmaq mümkün deyil, əslində bu şerində
şairin mənəvi dünyası apaydındır:
Səhər-səhər salam verib
Sünbüllərin kədərinə,
Yayılırdım külək kimi
Bizim Tovuz çöllərinə.
Qəmlərinə boğulmadım,
Bəlkə bir də doğulmadım.
Yoldaş olub quşlarına,
Qondum uca dağlarına.
Gözəlliyi, əbədiliyi
şərtləndirən özəllik bax budur. Çünki "bir kirpik çalınınca da yaşamağa dəyər
Flora XƏLİLZADƏ,
Əməkdar
jurnalist