Bakı 19°C
Göyçayın narı gözəl... - Fotolar
Göyçayda əsil bayram havasıdır.
Artıq 12-ci ildir ənənəvi olaraq keçirilən Nar Bayramına təbiət də sanki öz
xeyir-duasını verib. Hava günəşli, isti və sakitdir. İki gün davam edəcək Festival
rayonun sükutunu demək olar ki, tamam pozub. Adi vaxtlarda başı iş-gücə,
gündəlik qayğılara qarışan insanların üzündə qeyri-adi sevinc hiss olunur. Hamı
elliklə Nar Bayramına qoşulub. Qocalar, gənclər, uşaqların üzündə qəribə bir
fərəh duyulur. Küçələr boyu səslənən musiqilər, milli geyimdə rəqs edən oğlan
və qızlar, oxunan şən mahnılar bayrama xüsusi rövnəq verir. Folklor nümunələrimizə,
adət-ənənələrimizə yaxından bələd olmaq istəyənlər təndirdə bişən çörəyin ətrini duya, qədim
samovardan armudu stəkana süzülən pürrəngi çayın dadını, dədə-baba üsulu ilə
hazırlanan çeşidli nar məhsulları, fəsəli, şəkərbura, lavaş, qutab və s.
bişintilərdən dada bilərlər. Bayram həm
də kökümüzə, milli adət -ənənəmizə, folklorumuza qayıdışdır.
Nar Bayramıni sevinclə qeyd etməyə səbəb həm də festivalın
YUNESKO-nun beynəlxalq bayramlar siyahısında yer almasıdır. Artıq Göyçayda
keçirilən Nar Bayramı beynəlxalq status daşımaqla festivalın əhəmiyyətliliyini
daha da artırır.
Bayrama
gəl, bayrama…
Göyçayın mərkəzi meydanı bayramsayağı bəzədilib. "Nar mobile”-in təşkilatçılığı və
dəstəyi ilə festivala qatılan media işçiləri də sakinlərin sevincini bölüşür.
Göyçayın camaatı ilə söhbət edir, vitrinləri bəzəyən şirkətlərin yerli malları
ilə tanış olur, min bir dərdin dərmanı olan nar, onun sağlamlığa və
iqtisadiyyatımıza verdiyi faydaları da
öyrənirik. "Narın meyvəsi və qabığı əksər xəstəliklərin dərmanıdır”-
deyə rayon Bitki Mühafizə İdarəsinin
rəisi Nazim Əhmədov danışır: "Narin qabığından alınan rəngdən sənayedə
boyanmada istifadə olunur. Narin tumundan müxtəlif yağlar alınır. Meyvənin
çiçəyi və yarpaqları dəmləmə kimi faydalıdır. Həmçinin nardan doşab, nar
şərabı, şirə, nardança, mürəbbə və s. məhsullar hazırlanır”. Aqronomun dediyinə
görə, son vaxtlar rayonda fermerlərin bu
sahəyə maraq artıb. Belə ki, hazırda 3 min hektar sahədə yetişdirilirsə,
gələcəkdə bu sahələrin genişlənəcəyi və
5 min hektarı əhatə edəcəyinə ümid var”.
N.Əhmədov rayonda həmçinin narın saxlama məntəqələrinin olduğunu da bildirdi:
”Oktyabr ayından yığılmağa başlanan nar may ayına qədər bu məntəqələrdə saxlanır”. "Aznar SC” isə xarici ölkələrlə bağladığı müqavilə əsaslnda narın ixracını həyata keçirir. Nəticədə Göyçay narı ABŞ və Avropa ölkələrinə göndərilir. N.Əhmədov festivalın
əhəmiyyətini də qeyd edir: "Nar bayramı narın vətəninin Azərbayvan olduğunu
sübut edir. Həmçinin xarici bazarlara çıxış üçün imkanlar yaradır”.
Göçayın nar təsərrüfatları bölgədə insanların əsas dolanışıq
yeridir. Fermerlər nar və ondan hazırlanan digər məhsullarla ölkə bazarlarını
təmin edirlər. Yolboyu sıralanan vitrinlərdə yerli nar məhsulları torpağımızın
təkcə bərəkətindən xəbər vermir, həmçinin ölkədə sahibkarlığa yaradılan
şəraitdən söz açır. Artıq fermerlər məhsullarını maneəsiz yetişdirə, bazara
çıxara, alıcı tapa bilirlər. Elə bu kimi bayramların keçiriliməsinə səbəb də
kənd təsərrüfatının bütün sahələr üzrə inkişafda olmasıdır. Bayramlar isə
insanlaın torpağa bağlılığına, özlərini təsərrüfatlarının sahibi kimi hiss
etmələrinə, nəhayət min bir zəhmətlə əldə etdikləri məhsulu nümayiş etdirməyə
və real alıcı axtarmağa stimul verir.
Ölkəyə
turist axını
Festivala qatılan millət vəkilləri, xarici ölkələrin
ölkəmizdəki səfirləri, nazirliklərin nümayəndələri və digər qonaqlar bayramın
bölgə üçün nə qədər əhəmiyyətli olduğuna yüksək dəyərləndirirlər. Üstəlik
xarici ölkələrdən gələn turistlərı də rast gəlmək olur. Ərəb və iranlı turistlər üçün isə bayram çoxdan gözlənilən gün təsiri
bağışlayır. Söhbətləşdiyim Muhammed adlı misirli səfərini məhz festival
ərəfəsinə saldığını deyir: "Ailəmlə Azərbaycana səfər etmək istərkən Göyçayda
Nar Bayramının keçiriləcəyini öyrəndik və məhz bu tarixdə səyahət etməyi
düşündük. Hər şey çox gözəldir. Qeyd edim ki, burada yediyimiz narın dadını heç
bir yerdə hiss etməmişik”.
Festivalda ölkəmizdə
fəaliyyət göstərən şirkətlərin yerli filialları da təmsil olunur.
"Optimal-elektroniks” şirkətinin satış-sərgi yarmarkasında məişət texnikası
avadanlığı sərgilənib. Şirkətin
marketinq üzrə direktor müavini İsrafil Əliyev və mağazanın satış təmsilçisi Yeganə Cəbrayılova təşkilatçılığın yüksək
səviyyədə olduğunu deyirlər: "Şirkətimiz festivala qatılan insanlara xüsusi
endirimlər və kredit şərtləri təklif edir. Biz bukletlər təqdim edirik və
sonradan alıcılar mağazaya yaxınlaşırlar. Bu tip festivallar həm xalqda ruh
yüksəkliyi yaradır, həm də ölkəyə turist axının güclənməsinə səbəb olur”.
Festivalda nar ekstraktlı Buta məhsullarla təmsil olunan "Gazelli Group LTD” şirkətinin təmsilçisi
Yelena Sidorenko bayramın əhəmiyyətini vurğulayır: "Şirkət bayram
günlərində müəyyən endirimlər təklif edir. Mallara xüsusi maraq var. Təkcə
yerli sakinlər deyil, ətraf rayonlardan gələn, o cümlədən turistlər də
maraqlanırlar. Festival yerli məhsulların nümayişi üçün geniş imkanlar açır”.
Eləcə də "Azərsun”, "Azərçay”, "Ordubad quru meyvələri” və
başqa şirkətlərin nümayəndələri malların nümayişi, alıcı toplaması baxımından
festivalın əhəmiyyətini yüksək qiymətləndirdilər.
Üzərində nar şəkillərinin əks olunduğu rəsm əsərləri ilə
festivala töhvəsini verən rayon sakini
Asiman Əhmədov bayramın əhəmiyyətinə turizmin inkişafı baxımından yanaşır:
"Nə vaxtsa ölkəmizdə turizm inkişaf etməli idi. Ölkəmizə təkcə ərəb
ölkələrindən, İrandan, Türkiyədən və ya Rusiyadan deyil, həmçinin Avropa
ölkələrindən turistlərin gəlməsi, ölkəmizin tanınması üçün bu cür bayramlara
ehtiyac var. Bu, yerli istehsalçılara mallarını nümayiş etdirməyə stimul verir.
Rəssam festivalların insanların sosial
əlaqəsini genişləndirdiyini xüsusi qeyd edir: "İndi hamının başı kompyuterə,
mobil telefonlara qarışıb. Amma bu cür
festivallarda insanlar bir-birinə yaxınlaşır, ünsiyyət qurur. Hamı bir-birinin
işi ilə tanış olur. Bu, bizə mədəniyyətimizi, adət-ənənələrimizi qoruyub
saxlamaq üçün vacibdir”. Rəssam festivalıların gələcəkdə regionlarda turizmin
inkişafına təkan verəcəyinə ümidini gizlətmir: "Əminəm ki, bu tip festivalların
sayı çoxaldıqca, ölkənin iqtisadiyyatına töhvəsi də çox olacaq. Ölkəmizə turist
axını çoxalacaq. Bu, xüsusən torpağı hər cür nemət yetirən regionlarımız üçün
çox vacibdir”.
Məhsullarını nümayiş etdirməyə əla
imkan tapan fermerlərin sevinci hədsizdir. Nar məhsulları ilə təkcə bölgədə
deyil, bütün ölkədə məşhur olan Bığır
kənd sakini Polad İbrahimov təsərrüfatlarından 500, 1000 bəzən də 2000 ton
məhsul əldə etdiyini deyir: "Narın 72 növünün olduğu deyilir. Amma "Bığır
narı”nı heç bir növlə müqayisə etmək olmaz. Bu nar bütün xəstəliklərin
dərnanıdır. 300 qram nardan 200 qram şirə alınır. Keyfiyyəti olduqca yüksəkdir
və sağlamlıq baxımından əksər xəstəliklərin, o cümlədən, onkoloği xəstəliklərin
dərmanıdır”. Sahibkar yaşadığı kənddə 20 növ nar məhsulunun yetişdiyini və
ölkəmizin bütün regionlarına satıldığını deyir: "Biz festivallarda
məhsullarımızı nümayiş etdirir və yeni alıcılar qazanırıq. Festival tanışlıq və
yeni əlaqələr üçün gözəl imkandır”.
Təsərrüfatında yetişdirdiyi nardan
təkcə meyvə kimi deyil, həmçinin şirə, mürəbbə, nar suyu, nar şərabı hazırlayıb
satışa çıxaran Quliyevlər ailəsi də bayram günlərində xeyli məhsul satmaqlarından
məmnun görünür. Ailənin başçısı Hüseyn
Quliyev "Festivalda müştərimiz daha çox olur” deyə sevincini
bölüşür: "Çünki ətraf rayonların sakinləri də bayrama gəlir və məhsullarımızla
tanış olurlar. Real müştərilərimizi tapırıq. Bu da dolanışığımızın təminatına
kömək edir. Demək olar ki, gətirdiyimiz malların hamısı satılır. İnsanlar da
yerli məhsullarımızın nə qədər sərfəli və keyfiyyətli olduğunun şahidi
olurlar”.
Bayrama qoşulmaq istəyənlər bölgəyə səyahət edə, nəinki min bir dərdin dərmanı nar meyvəsi və ondan hazırlanan çeşidli məhsullardan, digər yerli məhsullardan da dada və sərfəli qiymətə ala bilərlər. Bayramın qəlblərə gətirəcəyi sevin də öz yerində. Odur ki, bayrama gəlin…
Təranə Məhərrəmova
Göyçay
