Gürcüstan tarixi seçim qarşısında
Oktyabrın 8-də Gürcüstan öz tarixinin ən önəmli günlərindən birini
yaşamalı olacaq. Ölkədə parlament seçkiləri keçiriləcək.150 nəfərlik
parlamentə 77 deputat partiya siyahıları üzrə, 73 deputat isə birmandatlı
dairələrdən seçiləcək.Deputat mandatları uğrunda 25 partiya və seçki
bloku mübarizə aparır. Birmandatlı dairələrdə isə 800 namizəd
yarışır.Daha çox səs toplayan partiya və blok hökuməti formalaşdırmaq
hüququ əldə edəcək.Seçkilərdə əsas rəqiblər hakim partiya "Gürcü arzusu”
və müxalifət partiyası "Vahid Milli Hərəkat” hesab olunur. Seçkilərə bir neçə
gün qalmış ölkədə maraqlı proseslər yaşanıb. Ən əhəmiyyətli hal - heç kimin gözləmədiyi
halda "Vahid Milli Hərəkat” irimiqyaslı mitinq keçirib. Tbilisinin mərkəzi
meydanında keçirilən mitinq zamanı sözün əsil mənasında izdiham yaşanıb. Belə
ki, on minlərlə insan oliqarx Bidzina İvanişvilinin hakimiyyətinə etirazlarını
bildirib, Saakaşvilinin tərəfdarı olduqlarını nümayiş etdiriblər."Vahid
Milli Hərəkat”ın seçkiqabağı mitinqinə toplaşmış rekord sayda etirazçı
"Mişa, Mişa" qışqıraraq Mixail Saakaşvilini Tbilisidə hakimiyyətə
dəvət ediblər.
Başqa bir hadisə isə "Vahid Milli Hərəkat”ın liderlərindən olan deputat Givi
Tarqamadzenin maşının partladılması olub. Deputat xəsarət almasa da,
avtomobilin yaxınlığından keçənlərdən 5-nin yaralandığı xəbər verilib.
Gürcüstanın baş naziri Giorgi Kvirikaşvili bunu "oktyabrın 8-də baş tutacaq
parlament seçkiləri ərəfəsində ölkədə sabitliyi pozmaq üçün Gürcüstanın
düşmənləri tərəfindən planlaşdırılmış təxribat” adlandırıb. Sosial şəbəkələrdə
isə bu partlayışın sifarişçiləri sırasında təhlükəsizlik orqanları və Rusiya
xüsusi xidmət orqanları göstərilir. Partiyanın lideri sırasında olan David
Bakradze isə avtomobilin partlayışında "Gürcü arzusu”nu günahlandırıb.
Eks-prezident Mixail Saakaşvili də baş verənlərə münasibət bildirib və əlavə
edib ki, G.Tarqamadze ona görə seçilib ki, o, hüquq-mühafizə orqanları ilə
ünsiyyət qururdu: "Vaxtilə İvanişvilinin də yaxşı tanıdığı Boris Nemtsov bir
dəfə mənə Kiyevdə xəbərdar etdi ki, İvanişvili və onun qələbəsində maraqlı olan
şəxslər hər cür zorakılığa getməyə hazırdırlar. İvanişvili üçün hakimiyyətdən
getmək hər şeyin sonu deməkdir və o, sona kimi mübarizə aparacaq. Seçkilərin
son gününə kimi sabitliyi saxlamaq və ölkəni bu mənfur rejimdən qurtarmağa
çalışmalıyıq”.
Ekspertlər hesab edir ki, bu və yuxarıda göstərilən insidentlər onu
deməyə əsas verir ki, Rusiyaya yaxın olan Bidzina İvanişvili hakimiyyəti
asanlıqla verməyəcək.
Qərb mediasında dərc edilən yazılarda isə bu seçkilərin Gürcüstandan
ötrü həm də "sabitlik sınağı” olduğu vurğulanır. Məsələn, "Reuters” yazır ki, seçki
kampaniyası müxalifət nümayəndəsinin maşının partladılması, mitinqdə atışma ilə
yadda qalıb. "Ötən bazar günü Qoridə müstəqil namizəd İrakli Okruaşvilinin
çıxış etdiyi nümayişdə iki nəfər odlu silahdan açılan atəşdən yaralanıb. "Reuters”
yazır ki, rəy sorğuları "Gürcü arzusu”nun qalib gələcəyini, Milli Hərəkat
Partiyası tərəfdarlarının da çoxaldığını, həm də seçicilərin böyük qisminin –
57 faizinin qərarsız olduğunu göstərir.
"Kimin qalib gələcəyini heç kim deyə bilməz. Amma seçkinin azad və
ədalətli keçəcəyi gözlənir”. Bunu Karnegi Fondunun Qafqaz üzrə eksperti Tomas
de Vaal "Reuters”ə müsahibəsində deyib. "The Washinqton Post”qəzeti yazır
ki, baş nazir Georgi Kvirikaşvili seçkini izləməkdən ötrü ölkəyə
saysız-hesabsız müşahidəçi dəvət etdiklərini deyib. Twitter-də yerləşdirdiyi
məlumatda baş nazir onların partiyasının qalib gələcəyinə, amma ən vacibi
seçkinin azad və ədalətli keçəcəyinə inandığını bildirib.
Əvvəldən 6 partiyanın koalisiyası kimi formalaşmış "Gürcü arzusu”nu
ölkənin ən varlı adamı, milyarder Bidzina İvanişvili yaradıb. O, sərvətini
Rusiyada əldə edib. İvanişvilinin partiyası 2012-ci ildə hökumətə gələrək,
keçmiş prezident Mixail Saakaşvilinin 9 illik hakimliyinə son qoyub. "Gürcü arzusu”nun
iqtidarı dövründə onlarla keçmiş dövlət rəsmisi, o cümlədən keçmiş baş nazir
vəzifəsindən sui-istifadədə günahlandırılaraq həbs olunub. Ölkə rəhbərliyi
Ukraynada regional siyasətçi kimi fəaliyyət göstərən Mixail Saakaşvilinin
ekstradisiyasını tələb edib. İttihamların siyasi xarakter daşıdığını bildirən eks-prezident
seçki kampaniyasına videoçarxlar vasitəsilə qatılıb. Qərb ölkələri Gürcüstan
hökumətini keçmiş rəsmiləri təqib etdiyinə görə qınayıb. Bəzi gürcülər isə
indiki hökuməti iqtisadiyyatı düzgün idarə edə bilməməkdə günahlandırırlar.
Halbuki ilin ilk 8 ayı iqtisadi artımın 2,7 faiz olduğunu göstərib. Mühüm neft
və qaz kəmərlərinin keçdiyi, zaman-zaman Qərblə Rusiya arasındakı zərbələrə
sinə gərmiş, ərazisinin 1/5-i Rusiyaya meylli separatçılar tərəfindən işğal
edilmiş Gürcüstanın həm hakim, həm də müxalif partiyaları ölkəni Aİ-yə, NATO-ya
birləşdirmək arzusundadırlar. Amma hakim "Gürcü arzusu” koalisiyası, əsasən,
ABŞ-ın müttəfiqi kimi tanınan ölkənin həm də Rusiya ilə əlaqələrini
möhkəmlətmək istəyir. "The Washington Post”un yazdığına görə, yeni Gürcüstan
parlamenti Qərb, yaxud Rusiya tərəfdarlarının artdığı orqandan çox, siyasi
mərkəz rolunu oynayacaq. Onu da qeyd edək ki, bugünkü seçkidə iştirak edən
namizədlər arasında 30 etnik
azərbaycanlı da var.
Azər NURİYEV