“Gürcü arzusu” prezidenti dəyişməkdə israrlıdır
Gürcüstanda prezident seçkilərinə bir il qalsa da,
hakim "Gürcü arzusu” partiyası artıq indidən mümkün namizədlərin axtarışına start
verib. Hakim partiyanın siyasi opponentləri də geri qalmaq istəməyərək bəyan
edirlər ki, hakimiyyət qarşısına öz namizədlərini mütləq çıxaracaqlar. Rəsmən
hələ ki hər hansı bir namizədin adı çəkilməsə də, kluarlarda tanış adlar
səslənməkdədir.
Gələcək prezident naturaca akademik, hakim
partiyaya və müxalifətə qarşı qərəzli biri olmamalıdır. Parlamentin spikeri
İrakli Kobaxidze hesab edir ki, gələcək prezident məhz bu cür keyfiyyətlərə
malik olmalıdır. Spiker Gürcüstan televiziyalarından birində efirə gedən siyasi
proqramda çıxışında bəyan edib ki, hakim koalisiya prezidentliyə namizəd irəli
sürərkən onun təcrübəsi, imici və mövqeyini rəhbər tutacaq. "Bizim
prezidentliyə namizədimiz mütləq olacaq. Bu şəxs partiyadan yüksəkdə durmalı,
konstitusiya sisteminə uyğun olaraq heç bir partiyanın üzvü olmamalıdır. Həmin
şəxs bütün tələblərə cavab verməlidir”, - deyə spiker vurğulayıb. Onun
sözlərinə görə, hakim komandanın üzvü də namizəd ola bilər. Lakin təqdimatı
veriləndən sonra neytrallıq nümayiş etdirməlidir. Bu zaman onun şəxsi
keyfiyyətləri də nəzərə alınmalıdır. İ.Kobaxidzenin bəyanatından bəlli olan
yalnız odur ki, indiki prezident Georgi Marqvelaşvili hakim komandanı qane etmir.
Lakin bu o anlama gəlmir ki, Marqvelaşvili prezident sarayını mütləq tərk
etməli olacaq.
Gələn ilin payızında onun prezidentliyinin birinci
müddəti başa çatacaq və o, "Gürcü arzusu”nun razılığı olub-olmamasından asılı
olmayaraq, konstitusiyaya müvafiq olaraq növbəti dəfə namizədliyini irəli sürə
biləcək. Dörd il bundan əvvəl Marqvelaşvilini ictimaiyyətə təqdim edən
koalisiyanın rəhbəri Bidzina İvanişvili onun barəsində komplimentlər
səsləndirməkdə xəsislik etməmişdi. Onu yaxın dostu, ölkənin ehtiyac duyduğu
ağıllı və təhsil almış biri adlandırmışdı. Bu sözlər də Marqvelaşvilinin qələbə
qazanması üçün kifayət edirdi və belə də oldu – gürcü ictimaiyyəti faktiki
olaraq onlardan Marqvelaşviliyə səs verməyi xahiş edən İvanişvilinin istəyinin
əleyhinə getmədi. Və bununla da Marqvelaşvili barəsində partiya qərarını
təsdiqləmiş oldu. Lakin deyir, sən saydığını say, gör fələk nə sayır. Üstündən
heç bir-iki ay keçməmiş oliqarx açıq şəkildə etiraf etdi ki, indiyə qədər
insanlara qiymət verəndə bu qədər səhv etməmişdi. Bəlli olub ki, prezident
"Gürcü arzusu”nun ssenarisinə əks gedərək onun əmrlərinin icrasına qarşı çıxır.
Məsələ tək Marqvelaşvili İvanişvili ilə əldə etdiyi razılaşmanı pozaraq Mixail
Saakaşvilinin inşa etdiyi Prezident iqamətgahına daxil olmasında deyil.
İndiki
dövlət başçısı hazırkı iqtidar partiyası ilə müxalif "Vahid Milli Hərəkat” arasında
neytrallıq nümayiş etdirməyə cəhd göstərdi. G.Marqvelaşvili hər iki qanada
məxsus insanları yürütdükləri siyasətə görə tənqid etsə də, müxalifət onun
tənqidlərindən elə də rəncidə düşmürdü. Qarşıdurma o həddə çatmışdı ki, xarici
səfərlərdə kimin ölkəni təmsil etməsi qalmaqalı yaşandı. Belə ki, beynəlxalq
tədbirlərə kimin getməsi ilə bağlı anlaşılmazlıq utancverici bir vəziyyət
yaranmışdı. Bütün bunlardan sonra hakimiyyət onu satqınlıqda ittiham etməyə
başladı. O vaxtkı baş nazir İrakli Qaribaşvili ilə gərginlik o həddə çatdı ki,
tərəflər bir-birini ittiham etməyə başladılar. Nəticədə Qaribaşvili də
İvanişvilinin qəzəbinə tuş gəldi və onu vəzifəsindən götürməyə üstünlük verdi.
Hətta onu hansısa bir vəzifəyə belə təyin etmədi. İndiki baş nazir Georgi
Kvirikaşvili isə sələfindən fərqli olaraq daha sözbaxan təsir bağışlayır. Lakin
sabiq baş nazir İvanişviliyə problem də yarada bilər. Belə ki, vəzifə ilə təmin
olunmayan Qaribaşvili bu yaxınlarda partiya yaratmaq niyyətini ortaya qoyub və
bununla da "boz kardinal” İvanişvilinin qəzəbinə tuş gəlib. Gəzən şayiələrə
görə, gələcək prezident məhz Qaribaşvili ola bilər. Bu barədə cəmiyyətdə ciddi
müzakirələr və şayiələr dolaşır. Əgər bu, baş verərsə, digər bir şayiə də təsdiqini
tapa bilər – İvanişvili real olaraq siyasətdən gedir. Lakin buna inanan azdır.
İvanişvilinin əvvəlki tək siyasi məsələlərin həllində aktivlik nümayiş
etdirəcəyi gözlənilir.
Prezidentliyə digər namizəd kimi isə səhiyyə naziri
David Serqeenko göstərilir. Populyar siyasətçi imicinə malik bu şəxs isə hələ
ki bunu təkzib edir. "Mənim belə bir ambisiyam yoxdur və ümid edirəm ki,
olmayacaq da”, - deyə prezidentliyə namizəd ola biləcəyi barədə şayiələri
cavablandıran nazir bildirib.
Ekspert dairələrində isə "Gürcü arzusu”nun oyun
oynamağa çalışdığı və növbəti prezident kimi elə Marqvelaşvilinin üzərində
dayanacağı və onun ikinci müddətə prezident olmasına mane olmayacağı söhbətləri
dolaşır. Yəni məsələ ondadır ki, tərəflər arasında ziddiyyətlər də əvvəlki kimi
deyil, bir qədər səngiyib. Bu da ola bilsin tərəflər arasında razılığın əldə
olunması ilə bağlıdır. Elə prezident də dəfələrlə bəyan edib ki, indiki baş
nazirlə istənilən məsələ ilə bağlı kompromis əldə etmək mümkündür. Qarşı tərəf
də ona qarşı hər hansı bir irad səsləndirmir. Bəziləri isə bu qənaətdədir ki,
hakim komanda, hər halda parlamentdə konstitusiya çoxluğundan istifadə edərək
mövqeyini möhkəmləndirmək və prezidentliyə tamamilə yeni şəxsi irəli sürmək
niyyətindədir. Məhz bu şəxs də gələcək seçkilərin favoritinə çevriləcək.
Son məlumatlara görə, hakimiyyət
mövqelərini daha da gücləndirməyə müvəffəq olub. Belə ki, noyabrın 12-də
keçirilmiş seçkinin ikinci raundunda hakim koalisiya altı mer postunun beşini qazanıb.
Üç həftə öncəki birinci raundda dahakimkoalisiyası
əksər dairələrdə üstün olub. "Gürcü arzusu”nun namizədləri ölkənin ikinci böyük
şəhəri olan Kutaisidə, eləcə də Borjomi, Kazbeki, Xaşuri və Martvilidə qalib
gəliblər. Koalisiyanın Ozurgetidəki namizədi az səs fərqiylə müstəqil namizədə
uduzub. MSK seçicilərin 33,2 faizinin səsverməyə qatıldığını bildirib. Oktyabrın
21-də birinci raundda "Gürcü arzusu” proporsional sistemlə bütün dairələr üzrə
qələbə çalıb. Bu seçkini çoxları gələn ilki prezident seçkisi öncəsi hakim
koalisiyadan ötrü əsas sınaq sayırdı.
Azər NURİYEV