Günəşi “oğurlamaq” üçün Bakıya gələn kino xadimləri - Fotolar
S.A.Gerasimov adına Ümumrusiya Dövlət
Kinematoqrafiya İnstitutunun (VQİK) professor-müəllim heyətindən və tələbələrindən
ibarət 40 nəfərlik nümayəndə heyəti Bakıda qonaqdır. ÜDKİ-nin rektoru,
professor Vladimir Malışovun rəhbərlik etdiyi nümayəndə heyətinin tərkibinə
V.Arxipov, A.Zakirov, İ.Klebanov, V.Menşov, E.Rusinova, V.Fokin, V.Xotinenko,
T.Yakovleva, Y.Yaromenko kimi məşhur pedaqoqlar, o cümlədən institutun 25 tələbəsi
daxildir. Mədəniyyət Nazirliyi, Təhsil Nazirliyi və Mədəniyyət və İncəsənət
Universitetinin birgə təşkil etdiyi tədbir «MDB ölkələrinin Ümumrusiya Dövlət Kinematoqrafiya
İnstitutu - VQİK günləri. Dünyanın ilk kino məktəbinin 100 illiyi» layihəsi çərçivəsində
həyata keçirilir.
Universitetin həyətində
qonaqların rəsmi qarşılanma mərasimi keçirildikdən sonra tədbirin açılış mərasimi
və mətbuat konfransı baş tutdu. İki ali təhsil müəssisəsi arasında əməkdaşlıq
müqaviləsi imzalandı.
ADMİU-nun rektoru, professor Ceyran Mahmudova imzalanan əməkdaşlıq
müqaviləsini rəhbərlik etdiyi ali məktəbin tarixi üçün vacib hadisə adlandırdı:
«Hesab edirəm ki, bu, həmçinin ÜDKİ-nin tarixi üçün də əhəmiyyətli hadisədir.
Bu sənəd bizə sıx əməkdaşlıq etməyə imkan yaradacaq”. C.Mahmudova qeyd etdi ki,
bir gün öncə ÜDKİ-ni bitirən məzunlarla keçirilən görüş xoş təəssüratlarla
yadda qalıb: "Fərqi yoxdur, həmin institutun məzunu oldu, ya olmadı bu görüş
hamıda xoş təəssüratlar yaratdı. Məzunların əksəriyyəti bu görüşdə iştirak etdi
və xatirələrini bölüşdülər. Bu, çox gözəl ab-hava idi. Həmin məzunlar indiyə qədər
ÜDKİ-ilə əlaqələrini kəsməyiblər. Onların çoxu bizim universitetdə dərs deyir”.
«Bu müqaviləsiz
də, bizim qəlbimiz görüşmək üçün bir-birimizə həmişə açıqdır. Təkcə sistemli iş
çatışmırdı” deyən ÜDKİ-nin rektoru,
professor Vladimir Malışov "Biz rəsmiyyəti o qədər sevmirik, ancaq bu, bəzən
lazım olur» - deyə qeyd etdi: «Biz böyük nümayəndə heyəti ilə gəlmişik. Bakını
gəzmək, həmkarlarla görüşmək, günəşi bir az sizdən "oğurlamaq”, təcrübəmizi
bölüşmək istəyirik. Səfərimiz çərçivəsində tələbələrlə tanış olmaq, ustad dərsləri
keçmək və əlaqələr qurmağı nəzərdə tuturuq. Hesab edirəm ki, bu günlər ərzində
bizim əlaqələrimiz daha da möhkəmlənəcək və bir-birimizlə daha çox əməkdaşlıq
etmək arzuları yaranacaq”. Rektor qeyd etdi ki, məqsədləri daha çox gənc tələbələrlə tanış olmaqdır:
"Qoy yaşlı nəsil inciməsin. Tələbələrlə daha yaxından tanış olmaq istəyirik.
Bir yerdə işlər görmək, festivallarda iştirak etmək lazımdır. Hamını ÜDKİ-də
gözləyirik. Bir də yaxşı plov bişirməyi bacarırıq. İnternetdə resept var, amma ən
yaxşısı bunu birlikdə bişirməkdir. Gəlin bu işləri birlikdə yaradıcılıq emalatxanasında
həyata keçirək». V. Malışev bu səfərin
kino sahəsindəki əlaqələrin inkişafına töhfə verəcəyini bildirdi: "Təbii ki,
bütün sahələrdə problemlər var, ancaq bu cür görüşlər aktiv işləməyə sövq edir.
Bir çox dünya ölkələri ilə əməkdaşlıq edir, müqavilələr imzalayırıq. Bu ünsiyyəti
daha da fəallaşdıracağıq. Bu gün ali məktəblərdə incəsənət sahəsində eyni
proqramlar tədris olunur. Ancaq nüanslar fərqlidir. Kimdə nə yoxdursa, o təcrübəni
əldə etmək lazımdır. Rusiyada uzun illərdir ki, tələbə festivalı keçirilir və
40-a yaxın ölkə iştirak edir. Noyabr ayında keçiriləcək festivalda sizi də gözləyirik.
Orada tələbələrin bir-birləri və müəllimlərlə ünsiyyət qurmasına imkan
yaranacaq”. Rektor 10 ildən çoxdur ki, hər yay tələbə məktəbinin fəaliyyətinə dəstək
göstərdiklərini bildirdi: "Təxminən 15-20 ölkə həmin məktəbə tələbə göndərir.
Orada rejissor, prodüser, aktyorlar fərqli ölkələrdən olur və onlar çəkilişlər
həyata keçirirlər. Bu forma tələbələr üçün faydalıdır. Bəzən elə məqamlar var
ki, ümumi variantlar tapmaq üçün pul əsas rol oynamır”.
Jurnalistlərin
suallarını cavablandıran nümayəndə heyətinin üzvləri gələcəkdə kino sahəsində
Azərbaycanın aktyor və rejissorları ilə birgə layihə həyata keçirəcəklərini
bildirdilər. "Rusiyada film çəkəndə Azərbaycandan və ya MDB ölkələrindən aktyor
dəvət etməyə alışmayıblar. Bu məsələ üzərində işləmək lazımdır. Ancaq başqa ölkələrdən
aktyor dəvət etmək üçün heç bir əngəl yoxdur”- deyə Xalq artisti Vladimir
İvanoviç Xotinenko bildirdi: "Hesab etmirəm ki, bu, çox ağrılı məsələdir.
Bu, filmin məzmunundan, ssenaridən asılıdır. Birgə işləmək üçün yaxşı ssenari
yazmaq lazımdır. Hesab edirəm ki, bu
cür əlaqələrin gələcəkdə formalaşması üçün ilk növbədə uşaqların ünsiyyəti
vacibdir. Bizim ümumi köklərimiz var. Biz bu köklərin üzərində yaradıcılıq əlaqələrimizi
daha da möhkəmləndirə bilərik. Təbii ki,
gələcək filmlər, əlaqələr olacaq».
Tədbirdə kino
sahəsi üzrə institutlar arasında telekörpünün olması təklifi irəli sürüldü:
«ÜDKİ tələbələri ilə ünsiyyət lazımdır. Bu, gənclərə, sənətin sirlərini
qarşılıqlı öyrənməyə imkan verər”.
Qeyd edək ki,
ÜQKİ günləri çərçivəsində bir sıra maraqlı tədbirlərin həyata keçirilməsi gözlənilir.
Aprel ayının
9-da saat 19-da Nizami Kino Mərkəzində Rusiyanın Xalq Artisti, SSRİ Dövlət
Mükafatı və Oskar mükafatı laureatı Vladimir Valentinoviç Menşovun yaradıcılıq
gecəsi baş tutacaq. Aprelin 10-da saat 19.00-da Azərbaycan Dövlət Gənc
Tamaşaçılar Teatrının binasında ÜQKİ-nin professoru Vladimir Petroviç Fokinin
A.M.Volodinin əsəri əsasında quruluş verdiyi «Beş axşam» tamaşası nümayiş
olunacaq. Layihə çərçivəsində bir çox ustad dərsləri, seminarlar, treninq və məşğələlər,
dəyirmi masalar, sərgilər, konsertlər, film nümayişləri və ÜDKİ-nin məzunları
ilə görüşlər keçiriləcək. Qonaqlar həmçinin
11 aprel saat 18.00-da ADMİU-nun tələbəsi RaulyaTürkkanın hazırladığı «Səmavi»
tamaşasına da baxa biləcəklər. Həmçinin ADMİU-da ÜDKİ-nin kino klubu da
açılacaq.
Mətbuat
konfransında iştirak etdi
Təranə Məhərrəmova