Gərgin, əyləncəli və rəngarəng - Gənclər təşkilatında bir gün
Yeni il
abı-havası içəri daxil olan kimi hiss olunur. Yolka, zərləri, rəngli işıqları
öz yerində. Bayrama bir neçə gün qaldığı üçün hələ ki iş başındadırlar. Amma
gündəlik işdən əlavə həm də tədbirləri var, ona görə işlərinin çoxluğu artıq içəri
daxil olarkən hiss edilir. Lakin "işimizi də görərik, qonaq da qarşılayarıq,
söhbət də edərik” – deyib, bizi içəri dəvət edirlər.
Rəhbərliklə
gedəcəyimiz vaxtı dəqiqləşdirsək də, ilk təəssüratdan belə hiss etdim ki, işçilərin
reportaj üçün gedəcəyimizdən, söhbətin, nədən və necə olacağından xəbərləri yox
idi, amma bu, bizim işimizə mane olmadı. "Gənclər təşkilatında bir gün”
rubrikası üçün bu dəfə "ELM” Gənclərin
Sosial-İntellektual İnkişafına Dəstək İctimai Birliyindəyik, bir günlük iş
rejimlərini izləyib, işlərilə bağlı ümumi fikirləri, təəssüratlarımızı
yazacağıq.
Hamının üzünə gülən xanım
Hər kəs
öz işində idi, deyib gülə-gülə işlərini görürdülər, ofisə gələnlərlə söhbət
edirdilər. Söhbətə elə bizi girişdə qarşılayan qeydiyyat şöbəsinin əməkdaşı Şəhla Mehdiyeva ilə başlayaq. Birlik
binanın 2-ci mərtəbəsində olduğu halda, o birinci mərtəbədə oturur, işçilərdən uzaq
düşdüyünü də demək olar. Birinci mərtəbədə oturduğu üçün nəinki birliyə,
ümumilikdə binada bütün ofislərə gələnləri qarşılayır, suallarına cavab verir.
Bu, asan deyil, ona görə elə ilk olaraq onun təəssüratlarını almaq daha maraqlı
olar. 2 ildir burda çalışan Şəhla bildirdi ki, əslində mərtəbə fərqi olsa da,
bu, onu kollektivdən qətiyyən uzaq salmır.
Şəhla
deyir ki, rəhbərləri dəqiq adamdır, ona görə işin mükəmməl olmasına fikir
verir: "Bizdə məsuliyyət, mehribançılıq daha çoxdur. Rəhbərimiz riyaziyyatçı, məntiq
adamı olduğu üçün dəqiqliyi çox sevir. Bəzən bizim fikir vermədiyimiz xırda bir
detal onun nəzərindən qaçmır. Düzdür, bunu deməsə də, artıq hiss edirik ki, nəzərindədir”.
Saat 17.00-dan
sonra artıq Şəhla yorulduğunu, buna görə də bəzən məcburən yalandan güldüyünü də
etiraf etdi: "Məni yoran əslində öz birliyimizin işləri deyil. Binada aşağı mərtəbədə
oturduğum üçün yuxarı mərtəbədə bütün ofislərə gələnlərin ilk sual
ünvanlayacağı adam mən oluram. Bir yox, bir neçə ofisin işini görürəm (gülür).
Hamıya xoş münasibət göstərməyə çalışıram. Hətta mən gəlməyəndə axtarırlar ki,
aşağıdakı xanım yoxdur?”
Heç vaxt işə gecikməyən adam
İkinci mərtəbədə
qapıdan daxil olanda isə otaqda ilk gördüyümüz adam birliyin baş koordinatoru Sahib Kərimov oldu. O bildirdi ki,
birliyin yaranmasında iştirak edən şəxslərdəndir. "Öhdəsindən gələ bilməyəcəyimiz
iş yoxdur” - deyən Sahibin həm də işə heç vaxt gecikmədiyini deyirlər. O
bildirdi ki, gecikməyi sevmir: "Bəli, heç vaxt işə gecikmirəm, bir saat tez gəlirəm
ki, gecikmirəm. Yadıma gəlmir ki, işə vaxtından gec gəlim”.
Bir az gərgin, bir az əyləncəli
Qeydiyyat bölməsinin əməkdaşı olan Aynur Hümbətova da elə təşkilat yaranandan burdadır. Deyir ki, gənclərlə
çalışmağın müsbət tərəfləri çox olduğu kimi, çətinlikləri də var: "Mən həm də
birliyin nəzdində fəaliyyət göstərən kursda ingilis dili müəllimi kimi
çalışıram. Burada pozitiv ab-hava var. Çünki gənclər olan yerdə rəngarənglik
qaçılmazdır. Bir az gərgin, bir az əyləncəli. Çalışırıq ki, həm işimizin öhdəsindən
gələk, həm də üzümüzdən gülüş əskik olmasın. Bilirsiniz, gənclər çox səbirsiz
olurlar, bəzən tənqidi qəbul etmək istəmirlər. Amma təcrübə artdıqca, gənclərlə
işləməkdə problem olmur”.
"Mənə istirahət etmək düşmür”
Bakı Dövlət Universitetinin mexanika-riyaziyyat
fakültəsinin 3-cü kurs tələbəsi Pərviz Əmənov birliyin könüllülərindəndir. Dərsi bitdikdən sonra
universitetdə rektorluqda çalışan Pərviz axşamlar və həftə sonları da birliyə gəlir.
Deyir ki, burda hansı işi görməyə ehtiyac olsa, geri çəkilmir. Sənəd işlərindən
tutmuş, dil biliyi tələb olunan işlərə qədər hər sahədə bacarığı var. Türklər
demiş, "on barmağında on mərifət” Pərviz deyir ki, bu cür rejim onun üçün çətin
deyil: "Mənə istirahət etmək düşmür, ona görə mümkün qədər iş olan yerlərdə
oluram (gülür)”.
"Burda ailə mühiti var”
Birliyin
aktiv üzvlərindən olan Pərviz Bilişzadəofisdə günlərinin maraqlı keçdiyini deyir: "Mən həm də kursda PR meneceri kimi
çalışıram. Özüm də gənc olduğum üçün yaşıdlarımla işləmək yaxşıdır. Bəzi
problemlər ola bilər, amma öz inkişafı üçün çalışan gənclərlə işləmək gözəldir.
Bəzi yerlədə də könüllü olmuşam, amma burdakı mühiti görmədiyim üçün davam etməmişəm.
Burda ailə mühiti var. Biz burda bir ailə olaraq vətənimizin inkişafı üçün
çalışırıq”.
İşçilərlə
söhbət etsək də, hiss olunurdu ki, artıq tədbirin başlama vaxtıdır. Çünki tədbirdə
iştirak edəcək gənclər artıq gəlmişdilər. Biz də söhbəti dayandırıb tədbirə qatılırıq.
Tədbir birliyin Gənclər Fondunun maliyyə dəstəyi ilə reallaşdırdığı "Prezident
turniri” layihəsinin qaliblərinin mükafatlandırılması ilə bağlı idi. Qaliblər
mükafatlandırıldı, gənclərlə tədbir çərçivəsində söhbət edildi və xatirə şəkli
çəkildi.
"Ehtiyac olanda onlar da burda olurlar”
Sonda isəbirliyin rəhbəri Səbuhi Abdullayevlə
həmsöhbət olduq. O bildirdi ki, birlik 2011-ci ildən fəaliyyətə başlayıb, tədbirlər
keçirib. Lakin 2015-ci ildən rəsmi olaraq dövlət qeydiyyatına alınıb: "Əvvəllər
də tədbirlər, müsabiqələr keçirirdik, 2015-ci ildən sonra müsabiqələrimizin
arenasını böyütmək, bütün universitetlərin tələbələrinin iştirak etməsi üçün
çalışdıq. Təhsil Nazirliyinin, Gənclər və İdman Nazirliyinin layihələrinə
qoşulduq. Nəhayət, Gənclər Fondunun 10-cu qrant müsabiqəsinin qalibiyik. Bu gün
onun yekunu olaraq təltifetmə mərasimini keçirdik. Tədbirdə respublikanın
10-dan çox universitetinin 2000-dən artıq tələbəsi iştirak etdi. İşlərimiz, tədbirlərimiz
davam edir. Birlik olaraq gənclərin elmi istiqamətdə mümkün olan qədər köməyimizi
etməyə çalışırıq”.
Öyrəndik
ki, birliyin 20-yə yaxın üzvü, 150-yə yaxın könüllüsü var. Könüllülərdən Pərviz
Əmənovdan başqa heç kim ofisdə yox idi. S.Abdullayev dedi ki, adından da
göründüyü kimi onlar könüllüdürlər, ofisə gəlmə vaxtları da istəklərinə
bağlıdır: "İşləyəni, başqa yerdə könüllü olanı var. Amma ehtiyac olanda onlar
da burda olurlar, hər gün gəlmələrinə ehtiyac olmur”.
"Nə qədər xoş münasibət olsa da, iş-işdir”
Birliyin
əməkdaşları ilə həmsöhbət olarkən bildirdilər ki, S.Abdullayev hər bir işə
pozitiv tərəfdən yanaşan rəhbərdir. Ona görə onunla işləmək problem olmur.
S.Abdullayev deyir ki, gənclərlə işləyən adamın pozitiv olmaması mümkün deyil:
"Gənclər daim enerjilidirlər. Biz gənclərlə həm də ona görə işləyirik ki,
özümüzü daim gənc hiss edək. Düzdür, bizim də yaşımız elə çox deyil. 18-30
yaşlı insanların həyata baxışı bir başqadır. Daxillərində bir enerji var, onu
yaxşı tərəfə yönəltmək üçün üstlərində yaxşı işləmək lazımdır. Biz daim gənclərlə
işləyirik, onlar bizə işləmək üçün stimul verir və bu enerjini alan rəhbər
pozitiv olmaya bilməz”.
Həm də
işçilərdən öyrəndik ki, S.Abdullayevin sevmədiyi əsas məqam işə gecikməklə
bağlıdır. Birlik rəhbəri deyir ki, işə gecikmə mütəmadi olanda işin irəli getməsindən
danışmaq olmaz: "Burda ofisdə nə qədər xoş münasibət olsa da, iş-işdir. Onu
vaxtında və gözəl şəkildə görmək üçün çalışmaq lazımdır. İşlərimizi qaydasında
gördükdən sonra dost-yoldaşlığımızı qapıdan çıxandan sonra gözəl şəkildə davam
etdirə bilərik. Ofisdən çıxandan sonra yoldaşların hamısını özümdən böyük hesab
edirəm. Amma işə gələndə mütləq rəhbər olmalıdır. Burda rəhbər başqa bir şəxs
olsaydı, mən də ona tabe olacaqdım”.
Artıq
axşam saatları olduğu üçün söhbəti bitirib ordan uzaqlaşmaq istədiyimizi
bildiririk. S.Abdullayev bizi çaya dəvət etdi. Bu zaman yadıma düşdü ki, bu qədər
vaxt ərzində ofisdə bizə "gəlin bir çay için" deyən olmayıb. Artıq
gec olduğu üçün sağollaşıb, ordan uzaqlaşırıq. Amma onlar işlərinə davam edirlər.
Eybi yox, çay da gələn dəfəyə qalsın.
Aygün
Asimqızı