Gəncləşən Cocuq Mərcanlı - Fotolar
Təhsil Naziri Mikayıl
Cabbarovun ümumi təhsil müəssisələrində 2017-2018-ci tədris ilinin ilk dərs
məşğələsi haqqında əmrinə əsasən, sentyabrın 15-i Bilik Günü ilk dərs məşğələsi
"Cocuq Mərcanlı - tarixi qayıdışın başlanğıcı” mövzusuna həsr
olunacaq.Burada əsas məqsəd gələcəyimiz olan məktəblilərə Azərbaycan
Ordusunun 2016-cı il aprel döyüşlərində göstərdiyi qəhrəmanlıqlar və işğaldan
azad olunmuş torpaqlarımıza qayıdışın rəmzinə çevrilən Cocuq Mərcanlı kəndi
haqqında daha dolğun məlumatlar verməkdir. Çünki, Cocuq Mərcanlı kəndinin
bərpası ilə cəmiyyətdə yaranan ruh yüksəkliyi uşaq və gənclərin vətənpərvərlik
tərbiyəsində mühüm əhəmiyyət kəsb edir. Sevindirici haldır ki, Bilik günündə
Cəbrayıl rayonunun Cocuq Mərcanlı kəndinin şəhid Novruz Aslanov adına orta
məktəbi də 23 illik fasilədən sonra qapılarını yenidən müəllim və şagirdlərin
üzünə açacaq, bu təhsil müəssisəsində də ilk dərs saatı sözügedən yaşayış
məntəqəsinə həsr olunacaq.
Azərbaycan
Respublikasının Prezidenti yanında Bilik Fondunun təşəbbüsü ilə bir neçə gün
öncə Cocuq Mərcanlıya təşkil olunan səfər zamanı öyrəndik ki, şəhid Novruz
Aslanov adına tam orta məktəbdə "Cocuq Mərcanlı - tarixi qayıdışın başlanğıcı”
mövzusunda ilk dərsi yaşlı və orta nəslin nümayəndəsi olan müəllimlər deyil, direktor Zamin Həziyevin rəhbərliyi
altında gənc pedaqoqlardan formalaşdırılmış kollektiv deyəcək. Bu məlumat
diqqətimizi çəkdiyindən, kənd məktəbinin bir neçə gənc müəllimi ilə görüşüb
söhbətləşməyi özümüzə borc bildik. Öncə məktəb
direktoru Zamin Həziyevlə həmsöhbət olduq. Öyrəndik ki, o, Cocuq Mərcanlı
kəndində anadan olub, hazırda direktor olduğu məktəbdə birinci sinfə gedib.
Lakin kənd işğal olunduqdan sonra məcburi köçkünə çevrilib, təhsilini Sabirabad
rayonunun Qaralar kənd orta məktəbində başa vurmaq məcburiyyətində qalıb. 2008-ci
ildə Odlar Yurdu Universitetinin nəzdindəki orta ixtisas ingilis dili kollecini
bitirib. 2015-ci ildə Azərbaycan Müəllimlər İnstitutunda Psixologiya ixtisası
üzrə ali təhsil alıb. 2008-ci ildən başlayaraq pedaqoji fəaliyyətlə məşğul
olub. Z.Həziyev doğma kəndində yaşamaqdan, buradakı təhsil müəssisəsində
çalışmaqdan böyük qürur hissi keçirdiyini dilə gətirdi. Pedaqoji kollektivə,
xüsusilə gənc kadrlara rəhbərlik etməyin olduqca məsuliyyətli bir iş olduğunu
xatırladan Z.Həziyev məktəbin əvvəlki şan-şöhrətini özünə qaytarmaq, şagirdlərə
nümunəvi təhsil vermək üçün müəllimlərin öz bilik və bacarıqlarını
əsirgəməyəcəyini söylədi.
Riyaziyyat
müəlliməsi Leyla Maqsudova və onun həyat yoldaşı, məktəb direktorununtəsərrüfat işləri üzrə müavini Baxşəli Bədəlovla da
söhbətləşdik. Onların hər ikisinin valideyni vaxtilə Cocuq Mərcanlı kənd orta
məktəbində bir sinifdə oxuyublar. B.Bədəlov doğulduğu Cocuq Mərcanlı kəndi
işğal olunan zaman valideynləri ilə birlikdə Biləsuvar rayonunda məskunlaşıb,
orada da orta təhsil alıb. L.Maqsudova isə hələ altı aylıq uşaq olarkən məcburi
köçkün həyatı yaşamağa məhkum olub, doğma kəndindən didərgin düşüb. Orta
təhsilini başa vurduqdan sonra 2014-cü ildə Sumqayıt Dövlət Universitetində riyaziyyat
ixtisası üzrə ali təhsil alıb. Hazırda bu gənc ailəyə Cocuq Mərcanlı kəndində
yeni mənzil verilib, hər ikisi orta məktəbdə işlə təmin olunub.
Esmira
Orucova da vaxtilə Cocuq Mərcanlı kəndində doğulub, sonradan məcburi köçkün
həyatı yaşayıb. İndi isə doğma kəndinə qayıdan E.Orucova Bakı Slavyan
Universitetinin məzunudur. O, rus dili və ədəbiyyatı ixtisası üzrə ali təhsil
alıb. Pedaqoji fəaliyyətlə yanaşı, Milli Olimpiya Komitəsinin "Olimpiya
dünyası”, Binəqədi İcra Hakimiyyətinin "Binəqədi” qəzetlərində jurnalistlik
fəaliyyəti ilə də məşğul olub. Yeni dərs ilindən doğma kəndindəki məktəbdə
ixtisası üzrə pedaqoji fəaliyyətə başlayacaq. O, bizimlə söhbət zamanı öz
kəndində yaşamaqdan, vaxtilə dərs aldığı məktəbdə şagirdlərə dərs deməkdən,
işləməkdən böyük sevinc hissi keçirdiyini söylədi. E.Orucova övladlarının Cocuq
Mərcanlı kənd orta məktəbində təhsil alacaqlarını, həyat yoldaşının isə
təsərrüfatla məşğul olacağını da qeyd etdi.
Məktəbin
riyaziyyat və informatika müəllimi İlkin Zeynalov da Cocuq
Mərcanlı kəndində yeni mənzillə təmin olunub. 1990-cı ildə bu kənddə anadan
olan İ.Zeynalov 3 yaşında məcburi köçkünə çevrilib. 2007-ci ildə Oğuz rayonunun
Böyük Söyüdlü kəndindəki Kamil İlyasov adına orta məktəbi bitirib. 2013-cü ildə
Azərbaycan Dövlət Pedaqoji Universitetində riyaziyyat və informatika ixtisası
üzrə ali təhsil alıb. Pedaqoji fəaliyyətə öz doğma kəndində başlamaqdan məmnun
olduğunu dilə gətirən İ.Zeynalov yaradılan bu şəraitə görə dövlət rəhbərliyinə,
həmçinin düşmənə canlı sipər olub insanlarımızın təhlükəsizliyini təmin edən
Silahlı Qüvvələrimizin bütün şəxsi heyətinə minnətdarlığını çatdırdı. Yaradılan
şəraitdən maksimum yararlanıb Vətənə, dövlətə, vətəndaşlara fayda verməyə
çalışacağını söylədi. Qeyd etdi ki, övladlarından ikisi bu il Cocuq
Mərcanlıdakı məktəbə, kiçiyi isə oktyabrda istifadəyə veriləcək bağçaya
gedəcək.
100 şagird yerlik Cocuq
Mərcanlı kənd orta məktəbinin ibtidai sinif müəlliməsi Gülarə
Seyidəliyeva Cəbrayıl rayonunun Xudafərin kəndində anadan olub. Məcburi
köçkün həyatı yaşayarkən orta təhsilini başa vurub, 2009-cu ildə Astara
Pedaqoji Texnikumunu bitirib. G.Seyidəliyeva və onun hərbçi həyat yoldaşı Cocuq
Mərcanlıya ilk qayıdan sakinlərdən sayılırlar. Dövlət tərəfindən onlara müasir
tələblərə cavab verən, yaşamaq üçün maksimum şəraitli ev verilib.
G.Seyidəliyevanın sözlərinə görə, həyat yoldaşının doğulduğu bu kənd onun üçün
də doğmadır. O, işğal altındakı digər rayonlarımızın da azad ediləcəyi günün
uzaqda olmadığına əminliyini ifadə etdi. Arzu etdi ki, bütün qaçqın və məcburi
köçkünlərimiz öz el-obasına qayıtsın, bütün məktəblərimizdə Bilik Günü, Qələbə
bayramı sevinci yaşansın.
Cocuq Mərcanlıdakı Novruz
Aslanov adına tam orta məktəb kollektivinin bir neçə gənc üzvü ilə söhbətimiz
gələcəyimiz olan şagirdlərin, gənclərin təlim-tərbiyəsinin etibarlı əllərdə
olması barədə bizdə rəy formalaşdırdı. Əmin olduq ki, vətənpərvər ruhlu,
ölkəsinə, xalqına, dövlətinə və dövlətçiliyinə qəlbən bağlı olan müəllimlər
sabahın kamil vətəndaşlarının yetişdirilməsi üçün bacardıqlarını
əsirgəməyəcəklər.
Rufik
İSMAYILOV
Bakı-Cəbrayıl-Cocuq
Mərcanlı-Bakı