Bakı 20°C
Gənclər hardadırsa, biz də ordayıq
Nəyəsə başlamaq, səhv etmək, təkrar cəhd
etmək, alınmayanda bir daha etməkdən bezməmək, uğursuzluqlarından nəticə
çıxarmaq və s. bu kimi şans və imkanların daha çox olduğu dövrdür, gənclik illəri.
Bir Afrika atalar sözündə deyilir ki, cavanlıqda odun yığsan, qocalıqda üşüməzsən.
Bəs bizim gənclər bu qızıl dövrlərindən necə bəhrələnirlər? Qəzetimizin artıq 4
ildir ki, həftədə bir dəfə yayımlanan "Gənclik qəzeti” əlavəsi də məhz gənclərin
fəaliyyətlərinə işıq salır.
4 ildir bu yoldayıq və artıq 169-cu nömrəmiz
işıq üzü görür. 20-dən artıq fərqli istiqamətdə rubrikamız var və zamanla yeniləri
də əlavə olunur. "Gənclik qəzeti” təsis olunan gündən indiyə qədər yayımlanan
rubrikalarımızdan biri "Uğur hekayəsi”dir. Bu rubrikada nəinki Azərbaycanda, eləcə
də xarici ölkələrdə çalışan, öz karyerasında uğurlu nəticə əldə edən gənclərimizdən
müsahibələr edirik. Hətta tez-tez eşidirik ki, bu qədər uğurlu gənci hardan
tapırsınız?
"Azərbaycanda iş qurmaq mümkün deyil”
fikrini doğru hesab etməyən, bunu öz əməlində sübut edən gənclərimizi də nəzərə
almışıq. "İş adamı” və "Biznes” rubrikalarında öz işlərini qurmağı bacaran gənclər
təcrübələrini bölüşürlər.
"Keçmişdəki mən” rubrikamızda həyatda təcrübə
qazanan şəxslərlə keçmişə səyahət edirik, gənclərə məsləhətlərini yazırıq. "Gör-götür”də
isə görüb-götürüləcək təcrübələri olan şəxslərlə söhbətləşirik.
Gənclərin fərqli mövzularda fikirlərini cəmiyyətə
təqdim etmək üçün "Polemika” və "Diskussiya”mız var.
Gənclər hardadırsa, biz də ordayıq. Onlara
maraqlı olan məkanlardan, təlimlərdən, tədbirlərdən reportajlar hazırlayırıq. Gənclərin
daha çox olduğu ünvan həm də gənclər təşkilatlarıdır. Bunu nəzərə alaraq "Gənclər
təşkilatında bir gün” rubrikası açdıq. Hər dəfə fərqli bir təşkilatda oluruq,
iş rejimlərindən yazırıq, orada çalışanlarla həmsöhbət oluruq.
Gənc ailələri də unutmamışıq. Onlar sevgi
tarixçələri, ailə təcrübələrini "Ailə” rubrikasında, övlad böyütməklə bağlı təcrübələrini
"Mənim balam”da paylaşırlar. Baba və nənələr isə "Mənim nəvəm”də öz şirin-şəkər
nəvələrindən danışırlar.
Alimlər, ixtiraçılar, xaricdə oxuyan, fəaliyyət
göstərən, maraqlı hobbisi olan, sadə peşə sahibləri və s. istiqamətlərdə fərqli
rubrikalarla da gənclərimizin fəaliyyətlərini oxuculara təqdim edirik. İncəsənət,
idman sahəsində çalışan gənclərimizi də unutmamışıq. Ölkəmizdə yaşayan,
çalışan, təhsil alan əcnəbi gənclərin də fərqli baxışlarını təqdim edirik.
Demək olar ki, bütün sferalardakı gənclərlə
təmasda oluruq. Rubrikalarımızı hazırlayarkən, gənclərin təcrübələrini öyrənərkən
əmin oluruq ki, çalışan, cəhd edən, təşəbbüskar və ağıllı riskləri bacaran gənclərimiz
çoxdur.
Əziz gənclər, siz qurun, yaradın, biz də gəlib
yazaq. Gənclərdən yazmaq, onlarla çalışmaq, rəngarəng mühitlərində olmaq "Gənclik
qəzeti” olaraq bizim üçün xoşdur.
Aygün Asimqızı
