Gəncədə açıq səma altında arxeologiya muzeyi yaradılacaq
Gəncənin
tarixini araşdıran alimlərin Heydər Əliyev Park Kompleksindəki ərazidə
aşkarladığı və yaşı təxminən 3300 il olan, Son Tunc dövrünə aid kurqanların üzərində
açıq səma altında arxeologiya muzeyi yaradılacaq.
AZƏRTAC-ın
bölgə müxbiri xəbər verir ki, bu barədə AMEA-nın Gəncə Bölməsinin
akademik-katibi Fuad Əliyev məlumat verib.
Fuad
Əliyev bildirib ki, Gəncə Şəhər İcra Hakimiyyətinin dəstəyi ilə ilk dəfə
2015-ci ildə yerüstü araşdırmalar aparmaq üçün əraziyə AMEA-nın Arxeologiya və
Etnoqrafiya İnstitutunun alimlərindən ibarət böyük bir qrup cəlb olunub. İlkin
tədqiqatlar nəticəsində şəhər ərazisində 62 kurqan qeydə alınıb. Həmin
kurqanlardan dördü ötən il Arxeologiya və Etnoqrafiya İnstitutunun qərarı ilə
elmi tədqiqata cəlb edilib. İlk olaraq 1 nömrəli kurqanda arxeoloji qazıntı işlərinə
başlanılıb. Aparılan tədqiqat işləri zamanı kurqanlardan insan skleti və çoxlu
sayda maddi-mədəniyyət nümunələri aşkarlanıb.
Hazırda arxeoloq alimlərdən ibarət ekspedisiya qrupu
üzvlərinin Gəncə şəhər Heydər Əliyev Park Kompleksindəki ərazidə arxeoloji
qazıntı işlərini davam etdirdiyini deyən Fuad Əliyev bildirib ki, tədqiqatlar
bitdikdən sonra həmin yerdə açıq səma altında arxeologiya muzeyinin yaradılması
nəzərdə tutulub.