Gənc Tamaşaçılar Teatrında premyera olacaq

Oktyabrın 28-də Azərbaycan Dövlət Gənc Tamaşaçılar Teatrında Migel De Servantesin "Don Kixot” əsəri əsasında quruluş verilmiş eyniadlı tamaşanın premyerası olacaq. Tamaşanın quruluşçu rejissoru Azərbaycanın və Kalmıkiyanın Əməkdar incəsənət xadimi Bəhram Osmanov, quruluşçu rəssamı Elşən Sərxanoğludur. Səhnə əsərinin plastik həlli Ceyhun Dadaşova aiddir.
Tragikomediya janrında qurulan tamaşada dahi bəstəkar Qara Qarayevin "Don Kixot” simfonik qravürlərindən, həmçinin Qiya Kançelinin və digər bəstəkarların musiqilərindən istifadə olunub.
Don Kixot rolunu Xalq artisti Qurban İsmayılov, Sanço Pansanı əməkdar artist Şövqi Hüseynov canlandırıblar. Həmçinin tamaşada əməkdar artist Elşən Çarhanlı, aktyorlar Mehriban Hüseynova, Təhminə Məmmədova, Xalidə Şərifova, Ədalət Əbdülsəməd, Elnur Hüseynov, Elşən Hacıbabayev, Vüqar Məmmədəliyev, Ramil Məmmədov, Rövşən Abbasov, İlham Əsədov, İradə Rəşidova, Könül Əbilova, Elgün Yəhyayev, Bəhram Həsənov, Xaliq Bəkirov, Tahir İsmayılov rol alıblar.
Əsrlər öncə yazılmasına baxmayaraq, bu gün üçün də aktual olan əsərin vasitəsilə yaradıcı heyət insana xas olan mərhəmət, sevgi, saflıq kimi duyğuları ifadə etməyə çalışır.