Gənc nəslin bədii ədəbiyyata biganəliyinin fəsadları
Məktəbyaşlı uşaqların, yeniyetmələrin bədii ədəbiyyata marağının
azalması artıq təkcə bizim yox, əksər ölkələrin problemidir. Bu mənada məsələnin
nə qədər aktual olduğunu düşünmək çətin deyil. Məsələn, qardaş ölkə Türkiyənin Təhsil
Nazirliyinin uşaq və gənclər üçün tərtib etdiyi «100 təməl əsər» adlı siyahıda 6-7 yaşdan 10-15 yaşa qədər uşaqların oxumalı
olduqları klassik əsərlərin adı yer alıb. Nəşriyyatlar əsərləri yaş qrupları
üzrə çap ediblər. İş o yerə çatıb ki, həmişə mütaliə vərdişləri ilə dünya
ölkələri içərisində öncül yerlərdən birini tutan Rusiya da narahatlığını oxşar
metodla ifadə edib. «Uşaq və yeniyetmələr üçün 100 əsər» onların dünyagörüşünün
və bədii zövqünün formalaşmasına hesablanıb.Rusiya təhsilinə cavabdeh
şəxslər hesab edirlər ki, bədii ədəbiyyat siyahısının yaş qrupları üzrə düzgün
tərtibi böyüyən nəslin təkcə bədii zövqünü formalaşdırmağa xidmət etmir,
həmçinin onlarda vətənpərvərlik hissi tərbiyə edir. "Hərb və Sülh”, "Sakit Don”,
"İnsanın taleyi” və s. kimi əsərlər onlarda mübarizə ruhu yaradır, Vətəni
sevməyə sövq edir, gənc nəslin milli mənlik şüurunun inkişaf
etdirilməsi və vətənpərvərlik hisslərinin tərbiyəsində rol oynayır.
Təəssüflə
qeyd etmək lazımdır ki, bizim ümumtəhsil məktəblərində də mütaliəyə dırnaqarası
münasibət var: həm müəllimlər, həm də
şagirdlər tərəfindən. Müəllimlər «Kurikulim
şagirdlərə ev tapşırığı və əlavə oxu verməyə imkan vermir» deyərək, özlərinə
haqq qazandırmağa çalışırlar. Tədris metodunun «şagirdlərin biliklərə dərsdə
yiyələnməsi» tələbi müəllimlərin bu mövzuda yaxalarını kənara çəkmələrinə bir
növ imkan yaradıb. Hətta "kurikulim çərçivəsində mütaliəni də sinifdə edirlər”
deyənlər var. Faktlar isə göstərir ki, müəllimlərin «yaxalarını kənara çəkmə”
metodları şagirdlərin bədii təfəkkürünün ziyanına işləyir. Digər tərəfdən,
uşaqların az-çox oxuduqları ədəbiyyat, test sualları çərçivəsindən kənara
çıxmır. Bu isə onların şifahi nitqlərində, düşüncələrini sözlə ifadə etmələrində
məhdudiyyət yaradır.
Uşaq və gənclərin bədii ədəbiyyata biganəliyi Təhsil Nazirliyini bir
neçə ildir ki, bu istiqamətdə hərəkətə gətirib. Məsələn, təhsil nazirinin əmri ilə artıq bir neçə ildir ki,
"Ədəbiyyat biliciləri” müsabiqəsi keçirilir. Məktəb, rayon (şəhər) və respublika mərhələsindən ibarət
olan müsabiqə Azərbaycan və dünya ədəbiyyatının görkəmli nümayəndələrinin
yaradıcılıqları haqqında şagirdlərin məlumatlılıq səviyyəsinin artırılması,
onların mütaliəyə meyil və maraqlarının gücləndirilməsi, yaradıcılıq
qabiliyyətlərinin aşkarlanması məqsədi daşıyır.
Maraqlıdır,
zamanın, qloballaşan dünyanın diktəsinə tabe olduğu, diqqətin texnologiyalara
yönəldiyi bir vaxtda yetişməkdə olan gəncliyi maraqlarından ayırıb bədii
ədəbiyyatla təmas yaratmaq mümkün olacaqmı? Hər halda, ədəbiyyat adamları o
qədər də ümidsiz görünmürlər.
Şagirdlərin dünyagörüşünə təsir
"Son illərdə
şagirdlərin mütaliə məsələsi gündəmdədir” deyən "Ədəbiyyat biliciləri” müsabiqəsinin təşkilat komitəsinin sədr müavini,
Yazıçılar Birliyinin katibi Rəşad Məcid hesab edir ki, orta məktəb şagirdlərinin ədəbiyyat adamları ilə görüşlərinin,
onların həyatına, gələcək yaradıcılıqlarına, münasibətlərinə, baxışlarına
müsbət təsiri olur: "Ümumiyyətlə, bədii ədəbiyyata marağın azalması ilə bağlı
cəmiyyətin narahatlığı var. Uşaqlarda
məktəb illərindən mütaliə vərdişini yaratmaq lazımdır. Bu cür müsabiqələrdə ən
yaxşı ədəbi əsərlərlə bağlı fikirləri, yazıları, esseləri olan şagirdlər uğur
qazanırlar. Müsabiqənin yarış formasına salınmasını, müasir dövrdə kommunikasiyalara, texnologiyalara uyğun
aparılmasını da müsbət hadisə hesab edirəm. Bu, orta məktəblərdə uşaqlarda
təkcə mütaliəyə deyil, həm də yaradıcılığa maraq yaratmaq xətrinə irəli sürülən
tendensiyadır”. R.Məcid "Biz şagirdlərdə ədəbiyyata necə maraq yarada bilərik?”
sualına belə cavab verir: "Azərbaycan
dilində bədii əsərləri oxumaq, ana dilimizin gözəlliyinə vaqif olmaq gələcəkdə bu
dildə rəvan danışmağın əsasını qoyur. Bu mənada da hansı sahədə olursa-olsun, şagird gələcəkdə siyasətlə, hüquqla,
iqtisadiyyatla məşğul olsa belə, o, öz dilində səlis danışmalıdır. Bunun üçün
isə Azərbaycanın yazıçı və şairlərinin
əsərlərini oxumalı, şeirlər əzbərləməlidir. Mən hər şeydən əvvəl bu amili önə
çəkirəm. Hesab edirəm, bu vasitə ilə şagirdlərin dünyagörüşünə təsir etmək
olar. Çünki onların içərisində iddialıları, gələcəkdə uğur qazanmaq istəyənləri
var. Onlar da yaxşı danışmaq və nitq qabiliyyətinə malik olmaq üçün bədii
ədəbiyyat oxumağın vacibliyini dərk edirlər. Bundan əlavə, bədii ədəbiyyat
insanın mənəvi dünyasını gücləndirir, cəmiyyətimizin saflaşmasına xidmət edir.
Bədii ədəbiyyat oxuyanlar daxilən daha zəngin olurlar. Hesab edirəm ki, bu cür
təbliğatla orta məktəb şagirdlərini mütaliəyə nəinki cəlb etmək olar, onların
bədii təfəkkürünün inkişafına nail olmaq da mümkündür. Bu isə şagirdlərdə bir
sıra müsbət keyfiyyətlərin formalaşmasına səbəb olacaq”.
Mübarizə əzminin yüksəlməsinə xidmət
Yazıçılar Birliyinin katibi İlqar Fəhmi zamanı bir qədər fərqli hesab edir: "Artıq bir
qədər fərqli dönəmdir. Ədəbiyyatın, incəsənətin təbliğinin spesifik yolları
tapılmalıdır. Bu yollardan biri də müasir, dinamik cəmiyyətə uyğun olan yarışma
üslubudur. Ədəbiyyatın təbliğində də məhz bu yarışma üslubundan istifadə
olunması təqdirəlayiq haldır. Ədəbi yaradıcılıq elə bir prosesdir ki, o,
hardasa yeniyetməlik vaxtından özünü göstərir. Əminəm ki, o müsabiqədə iştirak
edən və yüksək yer tutan iştirakçıların böyük əksəriyyətinin yeniyetmə
səviyyəsində də olsa, müəyyən yaradıcılığı var. Onlar hekayələr, esselər və ya
şeirlər yazıblar. Mən əminəm ki, o qələm sahiblərinin içindən gələcəkdə şair,
yazıçı və ya publisist çıxa bilər”. Yazıçının fikrincə, ümumiyyətlə, uşaqlar
arasında müəyyən yarışmaların olması istər təhsil sahəsində, istərsə də digər
sahələrdə stimullaşdırma prosesləridir: "Gələcək fəaliyyətlərində də uşaqlarda
belə bir hiss yaranacaq ki, sadəcə, nəyisə bilmək kifayət etmir, bu biliyi
yüksək səviyyədə çatdırmaq, özünü təsdiq etmək, tanıtdırmaq, məqsədlərin
uğrunda sona qədər mübarizə aparmağa yardım edəcək. Mütaliə, müəyyən
intellekti, erudisiyası olan uşaqların mübarizə əzminin yüksəlməsinə xidmət
edəcək”.
Hər birimizin günahı
"Ulduz” jurnalının baş redaktoru Qulu Ağsəsin fikrincə,
insan nə qədər çox mütaliə edərsə, onun danışıq tərzi düzələr, söz ehtiyatı
artar: "O, bəlkə də ən müşkül məsələni dilindəki hansısa ehtiyat bir sözlə həll
edə bilər. Təəssüf ki, bu gün orta məktəblərdə, xüsusən ixtisas seçiminə görə, ədəbiyyata
maraq həddən artıq aşağıdır. Valideyn artıq 4-cü , 6-cı sinifdən uşağının hansı
sahəyə gedəcəyini müəyyənləşdirir və
onun fikrini ədəbiyyatdan uzaqlaşdırır. Bu cür müsabiqələrdə iştirak edən
uşaqlar hansı sənət sahibi olmasından asılı olmayaraq, öz fikirlərini çox dəqiq
ifadə edə biləcəklər. Misal üçün, Türkiyə prezidenti Rəcəb Tayyib Ərdoğan elə mətləblər var ki,
şeirlə deyir və publika da onu sevə-sevə dinləyir”. Baş redaktor həm ali, həm orta
ixtisas, həm də orta ümumtəhsil məktəblərində ədəbiyyata olan münasibətdən
narazı olduğunu deyir: "Biz tələbə və şagirdlərlə görüş keçirəndə, onların
simalarındakı donuq ifadədə "biz bədii ədəbiyyat oxumuruq” fikirlərini aydın
görürük. Onların simasında emosiya olmur. Bədii ədəbiyyatla, bədii sözlə məşğul
olmamaqdandır ki, emosiya çatışmır. Bu, valideyndən tutmuş məktəbə qədər, hər
birimizin günahıdır. Müxtəlif nəşriyyatlar uşaqlar üçün kifayət qədər nəşrlər
buraxırlar. Dünya ədəbiyyatının, o cümlədən bizim nağılların, dastanların uşaq
formasını hazırlayırlar. Valideyn övladı ilə bərabər gəzintiyə çıxanda yolunu kitab
mağazalarından da salmalıdır. Bəzən valideyn uşağına kitab alıb verir, amma onu
sonradan müzakirə etmir. Uşaq bədii ədəbiyyatı mətn olaraq mənimsəyir, amma öz
fikirlərini bölüşə bilmir, çünki ədəbiyyat
həm də nitqdir. İstərdim ki, valideynlər uşaq üçün aldıqları kitabı
özləri də vərəqləsinlər, uşaqda həvəs yaratmaq üçün ona sual versinlər. İmkan
yaratsınlar ki, onlar səhv fikirlərini də desinlər. Yoxsa biz orta və ali
məktəblərdə şagirdlərlə, tələbələrlə görüşə gedəndə onların üzündəki donuq
ifadəni silə bilməyəcəyik. Onlara sual verəndə qorxacaq, ünsiyyətdən
qaçacaqlar. Ədəbiyyat isə adamı yetişdirir, ruh halına gətirir”.
Bədii zövqün
formalaşmasında mütaliənin rolu
Səbayel rayon 7
saylı tam orta məktəbin ana dili və ədəbiyyat müəllimi Kifayət Qurbanova məktəblərdəki real
mənzərəni belə təsvir edir: "Şagirdlər mütaliə etmək istəmirlər. Onlara
tətillərdə mütaliə etmələri ilə bağlı siyahı verilir. Bəziləri oxusa da, bir
çoxları oxumur. Onlar öz seçimlərini ixtisas qrupuna görə müəyyənləşdirirlər. Bu
seçim isə onları bədii qiraətdən uzaq salır. "Bizə imtahanda ədəbiyyat lazım
deyil” deyirlər. Oxuyanda da daha çox detektiv əsərlər oxuyurlar”. K.Qurbanova
mütaliənin şagirdlərin şəxsiyyət kimi yetişməsində rolunu xüsusi vurğulayır:
"Şagirdlər bədii kitab oxuyanda onların dünyagörüşü, bədii zövqü formalaşır.
Mütaliə onlarda humanist hisslər, vətənpərvərlik duyğuları, milli mənlik şüuru
tərbiyə edir”. Müəllimə hesab edir ki, uşaq və yeniyetmələrin mütaliəyə
həvəsinin formalaşmasında təkcə məktəbin rolu azdır. Bu istiqamətdə ailə
mühitinin, telekanalların da rolu əhəmiyyətlidir: "Uşaqlar üçün stimullaşdırıcı
yarışlar, müsabiqələr keçirilməli, onlara müəyyən hədiyyələr təqdim
olunmalıdır. Ətrafdakı mənzərə də "kitab oxu!” fikirlərini diktə etməlidir.
Həmçinin vətəndaş cəmiyyətinin də bu istiqamətdə fəaliyyəti olmalıdır. Bu
baxımdan, bu cür həlli vacib məsələdə bir sıra amillərin rolu birgə
olmalıdır”.
Razılaşaq ki, problemin həlli istiqamətində ölkədə sayı çox olsa da,
Qeyri Hökumət Təşkilatlarının rolu hiss olunmur. Bu mənada kəmiyyət keyfiyyəti
üstələyib. Vətəndaş cəmiyyətinin fəaliyyəti isə bu istiqamətdə böyük təsirə
malik ola bilər. Çünki söhbət böyüməkdə olan nəslin bədii tərbiyəsindən, milli
mənlik şüurunun inkişaf etdirilməsindən, vətənpərvərlik hisslərinin mütaliə
yolu ilə formalaşmasından gedir. Belə getsə... onların sorağı kitab mağazaları və ya kitabxanalardan deyil, daha çox
internet klublarından, kafe və ya digər əyləncəli məkanlardan gələcək...
Dayandur Sevgin
Yazı Azərbaycan
Respublikasının Prezidenti yanında Kütləvi İnformasiya Vasitələrinin İnkişafına
Dövlət Dəstəyi Fondunun keçirdiyi müsabiqəyə təqdim etmək üçün hazırlanıb.