“Gecələrimiz də gündüzlərimiz kimi çıraqbandır” - Reportaj - Fotolar
Azərbaycanda bütün sahələrlə
yanaşı, energetikanın inkişafı ulu öndər Heydər Əliyevin ən çox diqqət
yetirdiyi sahələrdən biri olub. Təsadüfi deyil ki, məhz ulu öndərin müstəqil
Azərbaycana rəhbərlik etdiyi 1993-2003-cü illərdə enerji sisteminin
dirçəldilməsi üçün həyata keçirilən kompleks tədbirlər nəticəsində 700 mvt-dan
artıq yeni generasiya gücü yaradılaraq, ümumi generasiya potensialı 5 min mvt-a
çatdırılıb. Enerji sisteminin müasir və innovativ texnologiyaların tətbiqi ilə sürətli
inkişafı, iqtisadi yüksəlişin tələbatını ödəməsi isə Prezident İlham Əliyevin
təşəbbüsü və rəhbərliyi ilə reallaşdırılan siyasət tədbirlər nəticəsində mümkün
olub. Ötən 15 ildə bu sahədə görülən işlərin miqyası, həyata keçirilən
layihələrin həcmi olduqca böyükdür. Buna misal olaraq, ümumi gücü 2300 mvt-dan
artıq 20-dən çox elektrik stansiyasının tikilib istismara verilməsini, 10 min
kilometrdən artıq elektrik verilişi xətlərinin çəkilməsini, xeyli sayda
yarımstansiyaların inşa edilməsini və yenidən qurulmasını göstərmək olar. Bütün
bu tədbirlər ölkənin enerji tələbatının ödənməsinə, idxaldan asılılığın aradan
qaldırılmasına, üstəlik, ixrac potensialının yaranmasına səbəb olub. Əminliklə
deyə bilərik ki, ölkəmizdə həyata keçirilən islahatlar elektrik təchizatı ilə
bağlı müasir infrastrukturun yaradılması istiqamətində də mühüm nailiyyətlərin
əldə olunmasına şərait yaradıb.
Goranboyu nura
qərq edən layihələr
Energetika sahəsində həyata
keçirilən bu kimi tədbirlərdən Goranboy rayonuna da böyük pay düşüb. Ötən əsrin
90-cı illərində Ermənistan silahlı birləşmələrinin hücumlarına sinə gərən, bir
qarış torpağını düşmənə güzəştə getməyən, erməni yaraqlıları qarşısında sözün
əsl mənasında yenilməz qalaya, keçilməz səddə çevrilən Goranboy rayonunda geniş
abadlıq-quruculuq işləri görülüb. Bu işlər çərçivəsində rayonun enerji sektoru
da dirçəlib. Cari ilin iyun ayı isə rayonun elektrik təsərrüfatında ən əlamətdar
ay kimi yadda qalıb. Prezident İlham Əliyevin iştirakı ilə iyunun 5-də Goranboy
rayonunda 110/35/10 kilovoltluq 2x40 MVA gücündə "Dəliməmmədli”
yarımstansiyasının açılışı olub.
Bu yarımstansiyanın genişləndirilərək əsaslı
şəkildə yenidən qurulması rayonun keyfiyyətli, dayanıqlı və fasiləsiz elektrik
təchizatını tam formalaşdırmağa imkan verib. Hazırda "Dəliməmmədli”
yarımstansiyası vasitəsilə Dəliməmmədli şəhərinin və ətraf 21 yaşayış
məntəqəsinin, o cümlədən 35 kilovoltluq "Azad” hava xətti üzərində olan 35/10
kilovoltluq "Azad” və 35/10 kilovoltluq "Alıuşağı” yarımstansiyalarının
elektrik enerjisi ilə təchizatı həyata keçirilir. Yarımstansiyadakı 110
kilovoltluq açıq paylayıcı qurğu müasir tipli 7 eleqaz açarla təchiz edilib.
Bununla yanaşı, yarımstansiyada 8 çıxış fideri olan 35 kilovoltluq müasir tipli
qapalı paylayıcı qurğu, 33 çıxış fideri olan 4 giriş, 2 bölmədən ibarət 10
kilovoltluq müasir tipli qapalı paylayıcı qurğu var. Yarımstansiya müasir
standartlara cavab verən elektron tipli rele mühafizəsi və avtomatika
sistemləri ilə təchiz edilib və SCADA dispetçer sisteminə qoşulub.
20 min abonent - 100 mindən artıq əhali elektrik enerjisi ilə təchiz
edilir
Qeyd edək ki, "Dəliməmmədli”
yarımstansiyasında qısa qapanmaları məhdudlaşdırmaq üçün hər iki 40 MVA
transformatorun 10 kilovoltluq tərəfində hər biri 2500 amperlik 6 reaktor
qurğusu da quraşdırılıb. Yarımstansiya 110 kilovoltluq ikidövrəli "Gəncə-1” və 110 kilovoltluq "Gəncə-2” hava xətlərindən ikidövrəli
budaqlanma yolu ilə qidalanaraq 35 kilovoltluq 2 hava xəttini enerji ilə təmin
edir. Bundan başqa, 35 kilovoltluq "Kürəkçay” və "Azad”, 10 kilovoltluq
"Ağamalıoğlu”, "Nizami”, "Fəxralı”, "Göynüyən”, "Ferma”, "Səmədabad”, "Xoylu”,
"Baxçakürd”, "Pambıq zavod”, "IV Subartezian” və "Qazaxlar” hava xətləri də
məhz "Dəliməmmədli” yarımstansiyasından çıxır.
Bu yarımstansiyadan çıxan 10
kilovoltluq hava xətləri vasitəsilə 8 min abonentin elektrik enerjisi təchizatı
təmin olunur. Görülən işlər nəticəsində 1947-ci ildən istismarda olan
"Kürəkçay” yarımstansiyası da tamamilə yenidən qurulub. Goranboy şəhərindəki
mühüm sosial və istehsalat obyektlərinin enerji ilə təminatını həyata keçirən
"Kürəkçay” yarımstansiyasında 40 MVA gücündə iki transformator, 110 kilovoltluq
5 dəst müasir tipli eleqaz açar, müasir tipli idarəetmə mərkəzi, 35 və 10
kilovoltluq qapalı paylayıcı qurğular və 34 yuva quraşdırılıb. Ümumilikdə
"Kürəkçay” yarımstansiyası vasitəsilə 20 min abonent - 100 mindən artıq əhali
elektrik enerjisi ilə təchiz edilir.
Fərqi hiss edən
qaradağlılar
Ölkəmizdə, o cümlədən Goranboy
rayonunda energetika sahəsində həyata keçirilən tədbirlər yerli sakinlər
tərəfindən də razılıqla qarşılanır. Rayonun Qaradağlı kəndində olduğumuz
müddətdə yerli sakinlərlə apardığımız söhbətlər bunu deməyə əsas verir. Təxminən
20 ilə yaxın bir müddətdə elektrik kimi çalışan, hazırda təqaüddə olan ahıl
kənd sakini Möysüm İmanov öz həyat tərzindən, məişət qayğılarından sitat
gətirməklə, faktlara istinad etməklə yaşadığı məntəqənin dünənini və bu gününü,
enerji istehlak səviyyəsini aydın şəkildə canlandırdı. Qeyd etdi ki,
müstəqilliyin ilk illərində bütün ölkədə olduğu kimi, Qaradağlı kəndində də
ağır sosial-iqtisadi vəziyyət hökm sürüb. Belə bir çətinlikdə elektrik enerjisinə
olan tələbatın ödənməməyi də əlavə qayğılar yaradıb.
Onun sözlərinə görə,
kəndin qazla təmin edilməməsi səbəbindən, qış aylarında sakinlər elektrik
enerjisi ilə evlərini qızdırmağa üstünlük veriblər. Lakin elektrik təsərrüfatının
günün tələbinə cavab verməməyi, elektrik xətlərində və istismar müddətini başa
vurmuş transformatorlardakı nasazlıqlar, üstəlik, xətlərin aşırı yüklənməsi
kəndliyə əlavə qayğılar yaşadıb. Elektrik verilişində uzun fasilələr yaranıb.
Hətta günün günorta çağında istehlakçılara cəmi bir-iki saat elektrik verilib.
Bununla yanaşı, istifadə edilməyən elektrik enerjisinə görə hər ay standart
ödəmələrin tələb edilməsi vətəndaşları bezdirib.
Hər bir sakin tələbat duyduğu qədər elektrik enerjisindən istifadə
edə bilir
M.İmanov deyir ki, ölkə
iqtisadiyyatı gücləndikcə, bütün sahələrdə həyata keçirilən islahatlar,
genişmiqyaslı quruculuq işlərinin aparılması son illərdə Qaradağlı kənd
sakinlərinin də həyat tərzini yaxşılaşdırıb, onları bir sıra məişət
qayğılarından azad edib. Ağsaqqalın sözlərinə görə, təkcə son bir-iki il
ərzində kəndin bütün elektrik xətləri, elektrik dirəkləri, transformatorları,
hətta elektrik sayğacları yenisi ilə əvəz olunub.
Ağsaqqalın sözlərinə görə, bu işlər görüləndən sonra
elektrik verilişindəki fasilələr, çatışmazlıqlar tamamilə aradan qalxıb: "Bu
günümüzə çox şükürlər olsun. Əvvəlki kimi işıqlarımız tez-tez sönmür, elektrik
verilişində fasilələr yaşanmır. Əlbəttə ki, bu, görülən işlərin nəticəsidir.
Gərək heç kimin haqqını danmayasan. Əvvəlki dövrdə elektrik verilişi ilə
indikinin arasında dağlar qədər fərq var. Hətta "gecələrimiz də gündüzlərimiz
kimi çıraqbandır” deyə bilərik. İstər qışda istilik üçün, istərsə də yayda
sərinlik üçün elektrik enerjisindən istifadə zamanı da fasilələr yaranmır.
Yəni, hər bir sakin tələbat duyduğu qədər elektrik enerjisindən istifadə edə
bilir. Bu da onları bir çox məişət qayğılarından azad edir. Bu xidmət
qarşılığında hər kəs razı qalır, işıq pulu da vaxtlı-vaxtında ödənir. Kimsənin
bununla əlaqədar hər hansı qayğısı yoxdur”.
Gəlin, görün və
sonra nəticə çıxardın
Qaradağlı kəndinin başqa bir
sakini, təsərrüfatçı Əli Namazov da energetika sahəsində görülən işlərdən,
kəndin elektrik enerjisi ilə təminatından razı qaldığını söylədi. Bildirdi ki,
müasir dövrdə həyatımızı elektrik enerjisiz təsəvvür etmək qeyri-mümkündür:
"Müasir dövrdə tək Qaradağlıda deyil, ölkəmizin, hətta dünyanın istənilən
yerində insan yaşayışını elektrik enerjisiz təsəvvür etmək olmaz. Elektrik
enerjisi hesabına evimizdə işıq yanır, radio, televizor, soyuducu, kondisioner
və digər məişət avadanlıqları işlətmək mümkün olur. İnternet vasitəsilə dünyaya
çıxış əldə olunur ki, bu da elektrik enerjisindən asılıdır. Hətta işlətdiyimiz
mobil telefonlar da elektrik vasitəsilə enerji toplayır, işləyir. Yəni,
elektrik enerjisi olmadan insan dünyadan təcrid olunar. Bunu dərk etmək üçün
xüsusi istedada, yüksək təhsilə sahib olmaq şərt deyil".
Ə.Namazov əvvəllər elektrik xətlərinin tez-tez sınaraq sıradan çıxdığını, işıq dirəklərin əyilərək az qala yerə dəydiyini, yerə sallanan işıq xətlərinin kənd sakinləri üçün təhlükə yaratdığını da dilə gətirib: :"Dünənimizi
və bu günümüzü müqayisə etdikdə, elektrik enerjisi ilə təminat məsələsində
mühüm irəliləyişlər olduğunu, müqayisəyəgəlməz miqyasda işlər görüldüyünü deyə
bilərik. Sevindirici haldır ki, bu işlər sayəsində kəndimiz də abadlığa
qovuşub, elektrik xətlərimiz, transformatorlarımız dəyişdirilib, şəffaflıq
olsun deyə, yeni elektrik sayğacları quraşdırılıb".
Kənd sakini deyir ki, indi elektrik enerjisi fasiləsiz
verilir, hər kəs də işlətdiyi miqdarda pulunu ödəyir: "Kəndimizin məktəbi, uşaq
bağçası, bələdiyyəsi, poçtu, məscidi və sair ünvanları da bu xidmətdən
lazımınca faydalanır. Nəyisə şişirdib bəzəməyə, qədərindən artıq söyləməyə
ehtiyac yoxdur. Söylənilənlərə zərrə qədər də olsa şübhə ilə yanaşan varsa, həmin
adamı Qaradağlı kəndinə dəvət edirəm. Gəlsin, kəndimizi görsün, insanlarımızla
tanış olsun, söhbətləşsin, enerji təminatı ilə bağlı hər kəsin fikrini
öyrənsin, sonra nəticə çıxarsın”.
Regionların sosial-iqtisadi inkişafına əsaslı töhfə
Qeyd edək ki, kənddə olduğumuz
müddətdə söhbətləşdiyimiz hər bir sakindən adlarını çəkdiyimiz müsahiblərimizin
səsləndirdiyi fikirlərlə üst-üstə düşən mövqe öyrəndik. Ona görə də eyni
fikirləri təkrarlamadan vurğulamaq istərdik ki, ölkəmizin regionlarının
elektrik təsərrüfatında silsilə və kompleks yenidənqurma tədbirlərinin ardıcıl
icrası sakinlərin sosial məsələlərinin həlli istiqamətində görülən tədbirlərdən
biridir. Bu tədbirlər, ilk növbədə, elektrik enerjisinə olan tələbatın
ödənilməsinə, rayonların elektrik enerjisi ilə təchizatının əsaslı şəkildə
yaxşılaşdırılmasına, elektrik şəbəkələrində yüklənmələrin azalmasına, texniki
itkilərin minimuma endirilməsinə hesablanıb. Sevindirici haldır ki, bütün bu
hədəflərə çatmaq üçün görülən işlər, o cümlədən energetika sahəsində tətbiq
olunan yeniliklər və həyata keçirilən layihələr bütövlükdə regionların
sosial-iqtisadi inkişafına əsaslı töhfə verir.
Rufik İSMAYILOV
Yazı "Azərişıq” Açıq Səhmdar
Cəmiyyəti və Azərbaycan Respublikasının Prezidenti yanında Kütləvi İnformasiya
Vasitələrinin İnkişafına Dövlət Dəstəyi Fondunun keçirdiyi müsabiqəyə təqdim
olunur