“Fransa ilə əməkdaşlığımız Avropa İttifaqı ilə əlaqələrin inkişafına səbəb olacaq”
Azərbaycan Prezidenti İlham Əliyevin Fransaya rəsmi
səfəri iki ölkə arasında bütün sahələr üzrə əməkdaşlığın daha da inkişaf
etdirilməsinə mühüm impuls verəcək. Çünki, Azərbaycanla Fransa arasında güclü
siyasi əlaqələr iki ölkə arasında bütün sahələr üzrə əməkdaşlığın inkişafına
müsbət təsir göstərir. Təsadüfi deyil ki, Fransanın siyasi rəhbərliyi, biznes
dairələri Azərbaycan Prezidentinin bu ölkəyə səfərinə mühüm əhəmiyyət verib.
Dövlətimizin başçısı səfər çərçivəsində Fransanın aparıcı şirkət rəhbərləri ilə
çoxsaylı görüşlər keçirib. Bu faktın özü də Fransanın biznes dairələrinin Azərbaycana
böyük marağının ifadəsidir. Məlumat üçün onu da qeyd etmək yerinə düşər ki, Azərbaycanda
50-dən çox fransız şirkəti uğurla fəaliyyət göstərir və ölkə iqtisadiyyatına yatırılan
investisiyaların həcmi 2 milyard dollardan çoxdur. Fransa-Azərbaycan iqtisadi əlaqələrinin
bu cür uğurla inkişafı həm Azərbaycanın potensialını, həm də fransız biznes
dairələrinin ölkəmizdə fəaliyyət göstərməyə marağını nümayiş etdirir.
Milli Məclisin
deputatı, politoloq Elman Nəsirov mövzu ilə bağlı açıqlamasında qeyd edib ki, Azərbaycan
Prezidenti İlham Əliyevin Fransa səfəri iki ölkə arasında əlaqələrin hərtərəfli
genişlənməsinə səbəb olacaq. Onun sözlərinə görə, Fransa-Azərbaycan əlaqələri
bir neçə parametr üzrə olduqca böyük əhəmiyyət kəsb edir: "Birincisi ona görə
ki, Fransa Avropanın iki lokomotiv dövlətindən biridir. Fransa Avropa qitəsində
xüsusi çəkiyə malikdir. Ona görə də bizim Fransa ilə əməkdaşlığımız həm də
Avropa İttifaqı ilə əlaqələrin inkişafına səbəb olacaq. Avropa İttifaqı ilə Azərbaycanın
Cənub Qaz Dəhlizində ciddi əlaqələri qurulub. Bu baxımdan da səfər çox əhəmiyyətlidir.
Bununla yanaşı, bu səfər iqtisadi-ticari, humanitar və kənd təsərrüfatı, kosmik
sənaye və digər sahələrdə əməkdaşlığın genişlənməsində yeni imkanlar açır”.
E.Nəsirov bildirib ki, səfər Dağlıq Qarabağ münaqişəsinin
nizamlanmasında irəliləyişin əldə edilməsi üçün də mühüm rol oynaya bilər:
"Fransa həm də Dağlıq Qarabağ münaqişəsinin nizamlanmasında vasitəçi olan
ATƏT-in Minsk Qrupunun həmsədridir. Biz bu münaqişənin həlli ilə bağlı
Fransanın bir neçə dəfə fəal iştirakının şahidi olmuşuq. Ona görə də Prezident
İlham Əliyev Fransada əksər görüşlərində münaqişənin həllinə toxundu və bu
prosesdə Ermənistanın danışıqlar prosesindən yayındığını, hələ ki buna nail
olduğunu da diqqətə çatdırdı.Ümumilikdə hesab edirəm ki, dövlət
başçısının səfəri Fransa-Azərbaycan əməkdaşlığının inkişafı üçün yeni imkanlar
açacaq və xüsusən də Dağlıq Qarabağ münaqişəsinin həlli prosesinin sürətlənməsinə
xidmət edəcək”.
Politoloq
Fikrət Sadıxovisə bizimlə söhbətində bildirib ki, Azərbaycan Prezidentinin Fransaya səfərinin
əsas üstünlüyü onun Parisə Serj Sarkisyandan sonra getməsi, Avropanın mərkəz
dövlətində işğalçı dövlət rəhbərini ifşa etməsi, prinsipial mövqeyimizi bir
daha çatdırmasıdır: "Sarkisyan öz ölkəsi barədə həqiqətdən uzaq, yalan,
şişirdilmiş fikirlər söyləməklə yanaşı, Azərbaycan ünvanına da həqiqətlə
uzlaşmayan ifadələr səsləndirmişdi. Ona görə də Azərbaycan prezidenti Parisdə bəyan
etdi ki, Ermənistan hakimiyyəti yararsız təbliğat aparmaq əvəzinə, diqqəti ölkədəki
dəhşətli iqtisadi vəziyyətdə cəmləşdirsəydi daha yaxşı olardı. Ölkəmizin
başçısı Ermənistanı "innovasiyalar ölkəsi” kimi qələmə verən Serj Sarkisyanın
iddialarının gülüş doğurduğunu diqqətə çatdıraraq sual verdi ki, əgər Ermənistanda
iqtisadi vəziyyət yaxşıdırsa, hansı səbəbdən ermənilər bu ölkədən baş götürüb
qaçır? Daha sonra yenə də sualla müraciət etdi ki, Sarkisyan belə ağıllıdırsa,
ölkəsi böyük potensiala malikdirsə, niyə Ermənistan bu qədər kasıbdır?”.
Politoloq deyib ki, səfər zamanı Azərbaycan
prezidenti bəzi xarici şirkətlərin işğal olunmuş ərazilərimizdə risk altında,
qanunsuz fəaliyyət göstərməsini də vurğulayıb, həmin ərazilərdə qanunsuz fəaliyyət
göstərən şirkətləri belə fəaliyyətdən çəkinməyə çağırıb: "Prezident qeyd elədi
ki, bəzi Fransa şirkətlərinin də həmin ərazilərdə iş qurması Azərbaycanla
Fransa arasındakı dost münaisbətlərə uyğun deyil. Ümumiyyətlə, Prezident İlham
Əliyev ölkəmizin Ermənistan-Azərbaycan, Dağlıq Qarabağ münaqişəsinin beynəlxalq
hüququn norma və prinsipləri əsasında tezliklə həllinin tərəfdarı olduğunu
xüsusi ilə qeyd etdi, Azərbaycan torpağında ikinci erməni dövlətinin
yaradılmasına imkan verilməyəcəyini söylədi. Bizim istəyimiz budur ki, Dağlıq
Qarabağ münaqişəsi ilə bağlı status-kvo dəyişdirilsin, münaqişəyə son qoyulsun,
bölgədə sülh təmin edilsin. Heç şübhəsiz ki, Fransanın siyasi elitasını təmsil
edən şəxslər Prezident İlham Əliyevin Azərbaycanın iqtisadi, siyasi, humanitar
vəziyyəti, Dağlıq Qarabağ münaqişəsinə baxışı barədə verdiyi bütün bu mesajları
eşitdilər. bu baxımdan ümidvarıq ki, Fransa-Azərbaycan əlaqələri bundan sonra
daha faydalı, qarşılıqlı maraqlara söykənən istiqamətlər üzrə inkişaf edəcəkdir”.
Rufik
İSMAYILOV