Bakı 23°C
Öfkəylə qalxan zərərlə oturar
Azərbaycan ərazi baxımından
kiçik ölkədir. Burada yaşayan insanları danışdırıb kimisə soraqlasan
uzaqdan-uzağa qohum-qardaş, yaxud dost-tanış çıxacaq. Sözümün canı budur ki, bu
məmləkətin sakinləri bir-birlərini yaxşı tanıyırlar. Xüsusən də müxalifətçi,
demokrat adı altında qıy-qışqırıq salanların, həyata qara eynək arxasından
baxaraq hər şeyi qara rəngdə görənlərin dabbaqda gönünə hər kəs bələddir. Müstəqil vəkil, hüquq müdafiəçisi, jurnalist və sair bu kimi adlardan
sui-istifadə edənlərin əsl gerçəklikdə hansı işlər çevirdiyi də hamıya
məlumdur. Bu sıraya vəkil kimi tanınan Aslan İsmayılovu da aid etmək olar. Heç
bir siyasi partiya və təşkilatın üzvü olmadığını, yalnız vəkilliklə
dolandığını, müstəqil şəxs olduğunu tez-tez dilə gətirən bu adam özünü
haqq-ədalət carçısı, qanunun aliliyinin tərəfdarı kimi qələmə verir.
Zaman-zaman budaqdan budağa qonmaqla, yəni gah Milli Şura və AXCP-nin
tədbirlərində, mitinqlərində görünməklə, gah da Ziyalılar Forumu adlandırılan qurumun
təmsilçiləri ilə həmsöhbət olmaqla özünün müxalifətçi, demokrat görüntüsünü də
yaratmağa cəhd edir. Lakin A.İsmayılovun real davranışları, atdığı addımlar bu şəxsin
nə ondan olduğunu, nə də bundan olduğunu göstərir. Hətta bəzən elə hərəkətlərə
yol verir ki, onun hüquqşünaslığı, vəkilliyi, ali hüquq təhsilli alması da şübhə
altına düşür.
Misal üçün, Səbail
rayonunun Bayıl qəsəbəsində jurnalistlər binası kimi tanınan yaşayış binasının
qarşısında avtomobil yolu var və bu yolda nəqliyyat vasitələri yüksək sürətlə
hərəkət edirlər. Bina sakinlərinin çoxsaylı müraciətlərini nəzərə alan müvafiq
qurumlar həmin yolda piyadaların təhlükəsiz hərəkətini təmin etmək üçün işıqfor
quraşdırıblar. Məntiqlə burada neqativ nə isə axtarmağa dəyməz. Lakin ali
təhsili, hüquqşünas ixtisası, vəkil peşəsi olan A.İsmayılov buna da etiraz
edir. Hətta bu hadisəyə siyasi çalar qataraq, yolda işıqforun quraşdırılmasını
iqtidarı tənqid etmək üçün əsassız vasitəyə çevirir. Nə var, nə var Aslan
müəllim şəxsi avtomobili ilə həmin yolla hərəkət edərkən işıqforun qırmızı
işığında 10-15 saniyə dayanmalı olacaq, yolu keçmək istəyən piyadalara yol
verəcək. Burada A.İsmayılovu qəzəbləndirən odur ki, o, avtomobilinin qaz
pedalının üstünə minib sürətlə şütüyərkən, əziyyət çəkib sürət həddini
azaldacaq, 10-15 saniyə işıqforda gözləyəcək. Görünən budur ki, bizim
hüquqşünasımız üçün kimlərinsə, xüsusən də məktəbə gedən uşaqların həyatının
təhlükəyə atılması, maşın yolunu məhz belə təhlükə altında keçməsi heç vecinə
də deyil.
Ötən ilin oktyabrında
A.İsmayılov daha bir hərəkəti, daha dəqiq desək, kobudluğu, qanun pozuntusu ilə
gündəmə gəlib. Belə ki, 2017-ci il oktyabrın 2-də Binəqədi rayon məhkəməsində məhkəmə
heyətinə qarşı kobud hərəkətlərə yol verib. Həmin vaxt o, Müasir Müsavat
partiyasının sədri Hafiz Hacıyevə qarşı təhqir və böhtanla bağlı xüsusi ittiham
qaydasında şikayətinin icraata götürülməsindən imtina olunması barədə hakim
Rəşad Əliyevin qərar qəbul etdiyini öyrəndikdən sonra yüksək səslə buna etiraz
edib. Ardınca da iclas zalından hakimin müşavirə otağına keçməsi üçün nəzərdə
tutulmuş qapıdan məhkəmənin dəhlizinə keçməyə cəhd edib. Onun cəhdi baş
tutmadıqda bağlı qapını sındırmağa çalışıb. Zərbələrin şiddətindən qapı
çərçivəsinin ətrafındakı boyanın bir hissəsi tökülüb. Daha sonra A.İsmayılov
iclas zalından çıxıb məhkəmənin həyətində ucadan səs-küy salaraq hakim və
məhkəmə sədrinin onun qarşısına çıxmalarını tələb edib, onların ünvanına ucadan
təhqiredici ifadələr işlədib.
Təbii ki, onun bu hərəkətinə
hüquq çərçivəsində lazımi qiymət verilməliydi. Ona görə də baş verənlərlə bağlı
A.İsmayılovun ictimai qaydanı və məhkəmənin iş rejimini pozaraq xuliqanlıq
hərəkətləri etməsi barədə Binəqədi rayon məhkəməsinin işçiləri tərəfindən akt
tərtib olunaraq müvafiq materiallarla birlikdə Binəqədi rayon prokurorluğuna
göndərilib. Prokurorluq tərəfindən Cinayət Məcəlləsinin 221.1-ci maddəsi ilə
cinayət işi başlanaraq istintaqı aparılması üçün Binəqədi RPİ-nin İstintaq
Şöbəsinə ünvanlanıb. Məhkəmə kompleks tikinti-texniki və əmtəəşünaslıq
ekspertizasının rəyinə görə, baş vermiş hadisə nəticəsində Binəqədi rayon
məhkəməsinin əmlakına yüz otuz manat məbləğində maddi zərər dəyib. Bu il mayın
25-də A.İsmayılova CM-nin 221.1-ci maddəsi ilə ittiham elan edilib və barəsində
başqa yerə getməmək haqqında iltizam qətimkan tədbiri seçilib. 04 iyun 2018-ci
il tarixində isə iş üzrə ittiham aktı təsdiq edilərək cinayət işi baxılması
üçün Binəqədi rayon məhkəməsinə göndərilib.
Budur özünü vəkil hesab
edən, demokrat kimi qələmə verən, guya hüququn aliliyinin tərəfdarı olan bu
insanın əsl siması. Sizcə özünü peşəkar hüquqşünas bilən birisi belə hərəkətə yol
verərdimi? Amma A.İsmayılov öz şəxsi
maraqları naminə istənilən vaxtda, istənilən anda bu cür qıy-qışqırıq salmağı
bacarır. Bu isə qanunsuzluq olmaqla yanaşı, nəinki hüquqşünas, vəkil adına,
ümumiyyətlə heç bir əxlaqa sığmayan hərəkətdir. Sözsüz ki, bu hərəkətinə görə
də məhkəmə onun barəsində qanun çərçivəsində layiqli hökm çıxaracaq.
F.Qəhrəmanlı
