Fiziki məhdudiyyət dünyanın axırı deyil
"Neft Akademiyasında oxuyurdum, amma sağlamlığıma
görə təhsilimi yarımçıq qoydum. Öz üzərimdə işlədim və kompyuteri öyrəndim. Bir
çox yerə iş üçün müraciət etməyimə baxmayaraq, mənə uyğun iş olmadığını qeyd
edirdilər. Sonra internet vasitəsilə məlumatlar toplayıb əl işi (duzlu xəmirdən
suvenirlər düzəldir- A.Ə) ilə məşğul olmağa başladım, sərgilərdə işlərimi
nümayiş etdirdim. Amma bu da davamlı olmurdu. Sərgi bitdikdən sonra evdə
oturmaq məcburiyyətində qalırdım. Mənim isə gündəlik işə ehtiyacım var idi. Ötən
ilin təxminən avqustunda iş üçün "ASAN xidmət”ə müraciət etdim. Bir müddət
sonra zəng edib müsahibəyə çağırdılar. Ümidsiz idim. İşə götürülmədiyim təqdirdə,
uzun müddət depressiyada olacaqdım”.
Bu sözləri bizimlə söhbətində Bərdə "ASAN xidmət” mərkəzinin könüllülərlə iş üzrə məsul şəxsi
Mehriban Zeynalova bildirdi. İşə götürüləcəyinə inanmasa da, qəlbindəki
kiçicik işıq onu müsahibəyə getməyə məcbur edir: "Rus dilini bilirdim,
kompyuter bacarığım da var idi. Müsahibədən keçdim və elə oradaca işə
götürüldüyümü bildirdilər. Həmin an elə bil bütün dünyanı mənə verdilər, o qədər
sevincliydim ki, hisslərimi sözlərlə ifadə edə bilmirəm (kövrəlir – A.Ə). Əvvəl
özümü yararsız hesab edir, düşünürdüm ki, mənasız yerə yaşayıram. Amma indi həyat
mənim üçün gözəlləşib. Cəmiyyətə adaptasiya olmağıma ən çox anam sevinir. Mən
işə girəndən sanki 76 yaşlı anam cavanlaşıb”.
Amma hamı Mehriban kimi şanslı deyil. Məsələn, həmsöhbət
olduğumuz nitq və eşitmə məhdudiyyətli Əli Əliyev bir çox kompyuter kurslarına
gedib, kompyuteri gözəl bilməsinə baxmayaraq, ixtisasına uyğun iş tapa bilmir. Müraciət
etdiyi qurumlarda ona müsbət cavab vermirlər. Buna görə də hazırda mağazalardan
birində topdansatış bölməsində köməkçi kimi çalışır: "İşim ağırdır, gecəyə kimi
işləyirəm. Çox istərdim ki, kompyuterlə bağlı iş tapım. Bu sahəyə böyük marağım
var”.
"Məhdudiyyətləri
olmasaydı, mağazada işləyə bilərdilər”
Surdo-tərcüməçisi
Yeganə Tağızadə bizimlə
söhbətində nitq və eşitmə məhdudiyyətli şəxslərin problemlərindən danışdı.
Bildirdi ki, onların iş tapması çox çətindir: "Əmək qabiliyyətli olsalar da, iş
tapmaqda çətinlik çəkirlər. Sovet dövründə bu cür məhdudiyyəti olan insanlar
zavodlarda çalışa bilirdilər. İndi isə belə imkanlar yoxdur. Paltar, ayaqqabı
sexlərində işləyənlər var, amma azdır. Nitq v eşitmə qüsurlu tanışlarım həmişə
şikayətlənirlər ki, məhdudiyyətləri olmasaydı, mağazada, hansısa şirkətdə işləyə
bilərdilər. Fəhləlik etmək üçün gərək qulaqları eşidə ki, onları buyursunlar.
Onu da deyim ki, fiziki baxımdan çox güclüdürlər. Aralarında gözəl sənətkarlar
da var. Mənim tələbələrimdən biri Rəssamlıq Akademiyasının emalatxanasında işləyir.
Yaxşı imkanı olan biznesmenlər də, çox aşağı səviyyədə yaşayanlar da var”.
Qeyd edək ki, Yeganənin valideynləri də nitq və
eşitmə məhdudiyyətlidirlər.
Statistika
aparılmır
Ölkəmizdə fiziki məhdudiyyətli insanların işlə təmin
olunma statistikasını öyrənmək üçün Dövlət
Statistika Komitəsinə müraciət etdik. Bildirdilər ki, onlarda belə bir məlumat
yoxdur.
Məlumat üçün deyək ki, əvvəllər
əlilliyin müəyyən olunması zamanı müayinə aktından çıxarış blanklarında müvafiq
bənddə əlilin fəaliyyət göstərə bilməsi üçün zəruri olan əmək şəraiti göstərilmir,
sadəcə, "əmək qabiliyyətsiz” sözü yazılırdı. Bu da əlil şəxslərin məşğulluğuna
ciddi maneə yaradan hal kimi onları narahat edirdi. Səlim Müslümov əmək və əhalinin sosial müdafiəsi naziri
təyin olunandan sonra bu maneəni aradan qaldırdı və artıq əlillik qrupu verilən
bütün şəxslərin əlillik arayışlarında onlar üçün əmək zəmanəti qeyd olunur ki,
bu da əlilliyi olan şəxsə bu və ya digər müəssisədə öz fiziki imkanlarına uyğun
işlə təmin olunmağa imkan verir.
Kvota var
Bu barədə qəzetimizə məlumat
verən nazirliyin sözçüsü Elman Babayev bildirdi
ki, Ümumdünya Səhiyyə Təşkilatının məlumatına əsasən, dünya əhalisinin 15
faizini əlilliyi olan şəxslər təşkil etdiyi halda, Azərbaycanda əlilliyin səviyyəsi
bundan 2,5 dəfə azdır. Belə ki, ölkə əhalisinin təqribən 6 faizi əlilliyi olan
şəxslər və sağlamlıq imkanları məhdud uşaqlardan ibarətdir. E.Babayevin sözlərinə
görə, əlillər üçün kvota müəssisələrdəki işçilərin orta siyahı sayının 5
faizindən çox olmamaq şərtilə müəyyən edilir: ""Məşğulluq haqqında” Azərbaycan
Respublikası Qanununda sosial
müdafiəyə ehtiyacı olan və işə düzəlməkdə çətinlik çəkən vətəndaşlar
kateqoriyasına əlilliyi olan şəxslər də
aid edilib. Həmin kateqoriyalardan olan vətəndaşlar üçün Nazirlər Kabinetinin
"Sosial müdafiəyə xüsusi ehtiyacı olan və işə düzəlməkdə çətinlik çəkən vətəndaşlar
üçün kvota tətbiq edilməsi Qaydası”na əsasən, müəssisələrdə kvota üzrə iş yerləri
müəyyən edilir. Yəni Qaydaya əsasən, kvota müəssisələrdəki işçilərin orta
siyahı sayının 5 faizindən çox olmamaq şərtilə müəyyən edilir. Belə ki, işçilərinin
sayı 25-dən 50-dək olan müəssisələrdə işçilərin orta illik siyahı sayının 3
faizi (bir iş yerindən az olmamaqla)
miqdarında (bu halda həmin iş yerlərindən biri əlilliyi olan şəxslər üçün nəzərdə
tutulmaqla), işçilərinin sayı 50-dən 100-dək olan müəssisələrdə işçilərin orta
illik siyahı sayının 4 faizi miqdarında (işçilərin orta illik siyahı sayının 2
faizi əlilliyi olan şəxslər üçün nəzərdə tutulmaqla); işçilərinin sayı 100-dən
çox olan müəssisələrdə işçilərin orta illik siyahı sayının 5 faizi miqdarında
(2,5 faizi əlilliyi olan şəxslər üçün nəzərdə tutulmaqla) kvota ayrılır”.
Müsahibimizin
sözlərinə görə, əlilliyi
olan şəxslərin işlə təmin edilməsi il ərzində nəzarətdə saxlanılır: "Əmək və
Əhalinin Sosial Müdafiəsi Nazirliyi yanında Dövlət Məşğulluq
Xidmətinin rayon Məşğulluq
mərkəzləri tərəfindən hər il üçün ərazi məşğulluq proqramları hazırlanır və təsdiq
edilir. Bu proqramlarda müvafiq rayon və ya şəhər üzrə fəaliyyət göstərən müəssisələrdəki
kvota üzrə ayrılmış iş yerləri də qeyd olunur. Həmin kvota yerlərində sosial
müdafiəyə ehtiyacı olan və işə düzəlməkdə çətinlik çəkən vətəndaşların, o cümlədən
əlilliyi olan şəxslərin işlə təmin edilməsi il ərzində nəzarətdə saxlanılır.
Kvota üzrə iş yeri ayrılmış hər bir müəssisə ƏƏSMN yanında Dövlət Məşğulluq
Xidmətinin aidiyyəti rayon Məşğulluq
mərkəzi tərəfindən göndəriş əsasında göndərilmiş əlilliyi olan şəxsi kvota üzrə
iş yerinə qəbul etməlidirlər. Həmçinin belə müəssisələr kvota üzrə işə qəbul
edilənlər və işdən çıxarılanlar barədə qanunvericilikdə nəzərdə tutulmuş müddətdə
müvafiq forma üzrə aylıq hesabatı rayon məşğulluq mərkəzlərinə təqdim etməlidirlər”.
"Kvota formal
xarakter daşıyır”
Vətəndaşların
Əmək Hüquqları Liqasının sədri Sahib Məmmədov əlilliyi olan şəxslərin cəmiyyətə inteqrasiyasında,
onların iş probleminin həllində vəziyyətin heç də yaxşı olmadığını bildirdi.
Hüquq müdafiəçisinin sözlərinə görə, qanunlardakı boşluqlar yavaş-yavaş düzəlsə
də, təcrübədə fiziki məhdudiyyəti olan insanlara məhdudiyyətlər qalmaqdadır:
"Bu sahədə vəziyyət yaxşı deyil. Problem hökumət səviyyəsində də etiraf olunur.
Baxmayaraq ki, bizdə kvota sistemi müəyyən olunub və bir sıra qurumlar bu
kvotaya əsasən, fiziki məhdudiyyətli insanları da işə götürməlidirlər, amma bu,
formal xarakter daşıyır. Əlilliyi olan şəxslərin əməyini, işləməyini məhdudlaşdıran
çoxlu səbəblər var. Qanunvericilik səviyyəsində olan səbəblər yavaş-yavaş
aradan qaldırılsa da, təcrübədə fiziki məhdudiyyəti olan insanlara məhdudiyyətlər
qalmaqdadır. Əlilliyi olan şəxslərin bir
çox imtiyazları olduğu üçün bu, işəgötürənlərə sərf etmir və onlar belə işçini
qəbul etmək istəmirlər”.
"Arabadan istifadə edənlər üçün uyğunlaşdırılmış müəssisə
yoxdur”
Xarici təcrübə haqqında məlumat
verən həmsöhbətimiz deyir ki, digər ölkələrdə əsasən, əlillərin imtiyazları işəgötürənlər
tərəfindən deyil, dövlətin yaratdığı fondlar vasitəsilə ödənilir: "Məsələn, əlilliyi
olan şəxs qrupundan asılı olmayaraq, ildə başqaları 21 gün ödənişli məzuniyyətə
getdiyi halda, onlar 42 gün gedir. Bu da işəgötürənlərin əlavə xərclərini
artırır. Onlar da üzdə deməsələr də, belə şəxsləri işə götürməkdə həvəsli
deyillər. Bu baxımdan, məsələnin maddi tərəfini dövlət tərəfindən yaradılan
fondlar qarşılamalıdırlar. İkinci problem ondan ibarətdir ki, əlil arabasından
istifadə edənlər üçün bizdə uyğunlaşdırılmış müəssisə yoxdur. Müəssisələrimizin
girişində pandus olmur, liftlər, qapılar fiziki qüsurlu şəxsin istifadəsinə
uyğun deyil. Yeni inzibati məhkəmə binaları tikiləndə qismən nəzərə alınır.
Üçüncü qrup əlillər üçün ümumiyyətlə, şəhərdə, qəsəbələrdə hərəkət məhdudiyyətləri
var. Şəhər infrastrukturu, ictimai nəqliyyat, səkilər, hərəkət yerləri onların
istifadəsinə uyğunlaşdırılmayıb. Eyni zamanda, elə əlilliyi olan şəxslər var
ki, onlara yardım edilməlidir ki, işləyə
bilsinlər. Dünya təcrübəsinə əsaslanaraq deyə bilərik ki, problemin həlli üçün
bir çox ölkələrdə sosial müəssisələr fəaliyyət göstərir. Sovet dönəmində də
gözdən əlillərin, eşitmə və nitq məhdudiyyətli insanların cəmləşdiyi məhdudiyyətli
cəmiyyətlər və bu cəmiyyətlərin özlərinin müəssisəsi var idi. Fiziki əngəli
olanlar bu müəssisədə çalışıb pul qazanırdılar. İndi belə müəssisələr yoxdur”.
Fiziki məhdudiyyət əngəl deyil
Sosial-psixoloq
Əhəd Kazım nitq və
eşitmə məhdudiyyətli gənclərə müxtəlif peşələrin öyrədildiyi "Bizimlə daha rəngarəng”
layihəsinin ideya müəllifidir. Daim müxtəlif məhdudiyyətli insanlarla təmasda
olur. Deyir ki, fiziki məhdudiyyətli insanlar stresə meyllidirlər, özlərinə
inamları aşağıdır: "İşlə bağlı fiziki məhdudiyyət əslində əngəl deyil. Xaricdə
məhdudiyyəti olan insanlar rahat şəkildə cəmiyyətə inteqrasiya edilir və şirkətlərdə
qabiliyyətlərinə uyğun işlərdə çalışırlar. Dünyada son 10-20 ildə başa düşüblər
ki, fiziki məhdudiyyətli insanları işə cəlb etmək vacibdir. Əgər fiziki əngəlli insana iş verirsənsə, müxtəlif insanlarla
ünsiyyətdə olur və özgüvəni artır. Ailədə də psixoloji vəziyyət düzəlir. Bundan
əlavə, fiziki məhdudiyyətli insan da işləyərkən dövlətə vergi ödəyir və bu da
dövlət üçün töhfədir. Bundan başqa, fiziki məhdudiyyətli insanlar işlədikləri
quruma ömür boyu bağlı olurlar, heç vaxt müdirlərini aldatmırlar. Həmçinin bir
qurumda məhdudiyyəti olan insan varsa, digər işçilər həmin insanı işə
götürdüyünə görə müdirə hörmətlə yanaşırlar”.
Əlillik son
deyil
Murad Məmmədov 15 yaşına kimi bir addım
belə atmayıb. Amma 15 yaşında həyatda öz ayaqları üstə durmaq, sevdiyi qızla bərabər
addımlamaq istəyi ona motivasiya verib və həkimlərin müdaxiləsi olmadan yeriməyə
başlayıb. Bir gün baxıb ki, əsanın köməyi ilə sərbəst şəkildə gəzə bilir. Murad
deyir ki, fiziki məhdudiyyətli uşaqları adətən valideynləri evə qapadır,
sosiallaşmalarına izn vermirlər: "Ola bilər ki, uşağın əlilliyi aradan
qaldırılmasın, amma onun reabilitasiyası mümkündür. Valideynlər çalışmalıdırlar
ki, övladlarını reabilitasiyaya cəlb etsinlər. Üstün olan xüsusiyyətlərini daha
da inkişaf etdirərək, övladlarını cəmiyyətə qazandırsınlar. Çünki əlillik son,
dünyanın axırı deyil. İnsan, əlilliyi olduğu halda belə, çoxsaylı uğurlar
qazana bilər. Bu yolda valideynlər övladlarına dəstək olmalıdırlar. Əgər belə
etsələr, valideynlər nə qədər yaxşı iş gördüklərinin fərqinə varacaqlar və əlilliyi
olan övladların uğurlarından faydalanacaqlar”.
Qeyd edək ki, BMT-nin "Əlillərin
hüquqları haqqında” Konvensiyaya əsasən, işə qəbul, məşğulluq,
işin qorunması, xidməti vəzifədə irəliləmə, təhlükəsiz və sağlam əmək şəraiti də
daxil olmaqla məşğulluq növləri ilə bağlı bütün məsələlərə münasibətdə əlillik əlaməti üzrə ayrı-seçkilik qadağan
olunur.
Aygün ƏZİZ
Yazı Azərbaycan
Respublikasının Prezidenti yanında Kütləvi İnformasiya Vasitələrinin İnkişafına
Dövlət Dəstəyi Fondunun keçirdiyi müsabiqəyə təqdim edilir