Filmin ağası yox, nökəri olan rejissor
Qəzetlərin birinə
verdiyi müsahibədə Azərbaycanın əməkdar incəsənət xadimi, tanınmış kinorejissor
və aktyor Fikrət Əliyev belə bir fikir
söyləmişdi: "Mən hər on ildə bir film çəkirəm. Bu gün (2013-cü il nəzərdə
tutulur) dörd filmim var, baxsınlar, desinlər ki, Fikrət, bu film zəifdir.
Çünki mən filmdə ağalıq eləmirəm, filmin nökəri oluram.”
Fikrət müstəqil olaraq ilk filmini 1974-cü ildə çəkmişdir.
"Baladadaşın ilk məhəbbəti” adlanan bu qısametrajlı bədii film "Ömrün
səhifələri” kinoalmanaxına daxil edilmişdir. Onun axırıncı filmi - "Sonuncu
dayanacaq” kinokomediyası 2013-cü ildə istehsal olunmuşdur. Deməli, rejissor 8
ildən bir, 5 bədii filmə quruluş vermişdir. Halbuki bu boşdayanmalar az olsaydı
Fikrət daha bir neçə bədii film çəkə bilərdi. Bu gün bizə yalnız təəssüflənmək
qalır. Fikrət Balağa oğlu Əliyev 1939-cu ildə Bakıda qulluqçu ailəsində dünyaya
göz açmışdır. O, qızıl qumlu, bağ-bağatlı Abşeron torpağında böyümüşdür.
Fikrətgilin bağı Pirşağıda görkəmli
yazıçı və kinorejissor Həsən Seyidbəyligilin qonşuluğunda idi. O, Həsən
müəllimlə tez-tez görüşər, rejissorun kino sənəti ilə bağlı söhbətlərini
maraqla dinləyərdi. Elə Fikrətdə kinematoqrafa həvəsi də Həsən Seyidbəyli
oyatmışdı.
"Baladadaşın ilk məhəbbəti”
ilə başlayan yol
SSRİ xalq artisti, rejissor və kinoaktyor A.İsgəndərovun təşəbbüsü və rəhbərliyi
altında "Azərbaycanfilm” kinostudiyası və Azərbaycan Kinematoqrafçılar İttifaqı
nəzdində 60-cı illərdə fəaliyyətə başlayan "Kinoaktyor” studiyası
respublikamızda kino aktyorlarına tələbatın artması ilə əlaqədar yaradılmışdı.
Studiyada məşğul olanlar müxtəlif sənət sahibləri idi. Sonralar bu kursun
məzunlarından Telman Adıgözəlov, Ənvər Həsənov, Nuriyyə Əhmədova, Almaz
Əsgərova, Ömür Nağıyev, Sonaxanım Mikayılova, Ələsgər İbrahimov, Ötkəm
İsgəndərov, Əliqulu Səmədov, Eldəniz Rəsulov, Xalidə Quliyeva və başqları
peşəkar aktyorlar oldular. Fikrət Əliyev də həmin kursun tələbələrindən olub.
O, kinoaktyor kimi ilk dəfə 1967-ci ildə rejissor Ş.Mahmudbəyovun "Torpaq.
Dəniz. Od. Səma” filmində təyyarəçi Murad, həmin il rejissor A.Babayevin "İnsan
məskən salır” filmində mühəndis rollarında çəkilmişdir. Üçüncü dəfə 1969-cu
ildə rejissor H.Seyidzadənin "Dəli Kür”
filmində Şamxal obrazını yaratmışdır.
Fikrət bu filmlərə
çəkiləndə artıq peşəkar aktyor idi. O, 1966-cı ildə M.A.Əliyev ad. Azərbaycan
Dövlət İncəsənət İnstitutunun dram teatrı və kino aktyoru fakültəsini,
professor Adil İsgəndərovun sinfini bitirmişdi. Hətta Adil müəllimin məsləhəti
ilə təyinatını C.Cabbarlı ad. "Azərbaycanfilm” kinostudiyasına almışdı.
F.Əliyev "Torpaq. Dəniz.
Od. Səma” filmində çəkiləndən sonra rejissor A.Babayev onu "İnsan məskən salır”
filminə rejissor assistenti kimi dəvət edir. Bu filmdə çalışması onun üçün əsl
təcrübə məktəbi olur. Bundan sonra o, Arif müəllimin daha iki filmində −
"Uşaqlığın son gecəsi” (1968) və "Gün keçdi” (1971) bədii filmlərində II
rejissor işləyir.
70-ci illərdə F.Əliyev
daha dörd bədii filmdə, o cümlədən
rejissor T.İsmayılovun iki filmində − "Çarvadarların izi ilə” (1974) və
"Vulkana doğru” (1976 – 1977), rejissor E.Quliyevin "Ürək, ürək” (1976)
filmlərində, rejissor C.Fərəcovun "Arvadım mənim, uşaqlarım mənim” novellasında
II rejissor kimi çalışmışdır.
Onu da qeyd etmək
lazımdır ki, Fikrət hələ orta məktəbdə oxuyarkən gələcəkdə kinorejissor olmağı
qarşısına məqsəd qoymuşdu, o, bu barədə fikrini C.Cabbarlı adına "Azərbaycanfilm”
kinostudiyasının direktoru A.İsgəndərova bildirir. Beləliklə, Fikrət 1971-1972-ci
illərdə Moskvada İkiillik Ali Ssenaristlər və rejissorluq kurslarında təhsil
alır və quruluşçu rejissor ixtisasına yiyələnir.
Gənc rejissor müstəqil olaraq "Mozalan” respublika satirik
kinojurnalı üçün müxtəlif vaxtlarda ona qədər kinosüjet çəkmişdir. Fikrət
Əliyev institutu bitirəndən, yəni 1966-cı il sentyabrın 5-dən ta dünyasını
dəyişənə kimi ( 8 mart 2016-cı il) C.Cabbarlı adına "Azərbaycanfilm”
kinostudiyasında işləmişdir.
Onun böyük kinoda ilk
müstəqil işi "Ömrün səhifələri” kinoalmanaxındakı "Baladadaşın ilk məhəbbəti” novellasıdır.
Rejissor F.Əliyev bu qısametrajlı bədii filmi yazıçı Elçinin ssenarisi əsasında
lentə almışdır.
Biz filmdə Baladadaşın yeniyetməlikdən gəncliyə keçid dövrünün
sarsıntılarla bağlı olduğunu, xarakterin necə formalaşdığını görür, bu rolu ifa
edən aktyor Şamil Süleymanovun gənc qəhrəmanının ilk məhəbbətinin
səmimiyyətinə, saflığına inanırıq.
Rejissor F.Əliyev bu filmlə əlaqədar müsahibəsində demişdir: "Mən hər
yay Pirşağıdakı bağımızda dincələndə çox adamlarla görüşür, çox hadisələrin
şahidi olurdum. Yaddan çıxmasın deyə gördüyüm və eşitdiyim əhvalatları özüm
üçün qeyd edirdim. Amma heç düşünməmişdim ki, bu yazdığım cızma-qaralar
"Baladadaşın ilk məhəbbəti” adlanan diplom işimdə karıma gələ bilər. Novella
baş tutmayan ilk məhəbbət, ülvi, yüksək hisslərlə dar düşüncənin, meşşan
əxlaqının toqquşması haqqında danışır. Bizim qəhrəman mənə çox əzizdir. Əgər
mən onun təmizliyini, qeyri-adiliyini, bütövlüyünü ekranda göstərə bilmişəmsə,
filmin əsas vəzifəsi yerinə yetirilmişdir...”.
Kinoalmanax ekranlara buraxılandan
sonra tamaşaçılar tərəfindən böyük maraqla qarşılandı. Kino mütəxəssisləri
Ş.Süleymanovun kinodakı ilk oyununu ümumən filmin müvəffəqiyyəti hesab ediblər.
Şamili gənc rejissor F.Əliyevin "kəşfi” adlandırıblar.
Aktyor seçiminə gəldikdə, Ş.Süleymanov bunu belə xatırlayır: "Eşitdim
ki, kinostudiyada hansı bir filmdəsə baş rolda çəkilməyə aktyor axtarırlar.
Bəxtimi sınamaq istədim. Düzünü deyim ki, bəyəniləcəyimə heç ümidim yox idi.
Deyəsən, bədii şuranın üzvləri də mənim baş rola çəkilməyimə razı deyilmişlər.
Ancaq filmin rejissoru Fikrət Əliyev məhz məni çəkməyi lazım bilib...”
Böyük kinoda ilk iş -
"Qızıl uçurum”
F.Əliyev qəzetlərin birinə verdiyi müsahibədə film üzərində necə
işlədiyini belə izah etmişdir: "Mən filmi hisslərimi, duyğularımı nəzərə alıb
çəkirəm. Hər hansı bir epizodu hiss eləməsəm, kim nə deyirsə-desin,
çəkmirəm...”
Rejissorun işləri ilə tanış olan "Azərbaycanfilm” kinostudiyasının
direktoru C.Əlibəyov "İstehsalat xarakteristikası”nda yazmışdır: "Rejissorluq
sahəsində sadə rejissor üsulları ilə ilk sınaq çəkilişlərində gücünü sınaması
bir daha göstərdi ki, F.Əliyev öz mövqeyini, öz dünyagörüşünü ifadə etməyə
çalışıb. Onun işlərində saflıq, yenilik özünü hiss etdirib. Gənc
kinematoqrafçının istedadı deməyə ümid verir ki, o, öz siması olan yeni,
maraqlı filmlər yaradacaqdır”.
Bədii kino sahəsində
təxminən altı illik fasilədən sonra günlərin birində kinostudiyanın redaktoru
Vaqif Əlixanov Fikrəti yanına çağırıb
deyir: "Ssenari portfelimizdə bir əsər var. Yazıçı İ.B.Musabəyovun "Neft və
milyonlar səltənətində” povestinin motivləri əsasında yazılmış ədəbi
ssenaridir. Ssenarini Mirzağa Mirmövsümov yazıb. Heç kim bu ssenarini götürüb
işləmək istəmir.” Səbəb ssenarinin melodram janrında yazılmışdı. Fikrətlə
Mirzağa ssenari üzərində demək olar ki, yenidən işləməli olurlar.
Filmə hazırlıq dövründə rejissor
baş rolun – Cəlilin ifası üçün aktyorlardan Rasim Balayevi və Əliabbas
Qədirovu kino sınaq çəkilişlərinə dəvət edərkən, çox götür-qoy etməli,
düşünməli olur. Fikrət deyirdi ki, Rasimə nə paltar geyindirirsən geyindir,
kasıba oxşamır, Əliabbası isə paltarlarla dəyişdirmək olurdu. Yəni nimdaş
paltarda o, kasıba, bahalı paltarda isə bəyə oxşayırdı. Bizə də elə bu lazım
idi. Ona görə də Ə.Qədirovu Cəlil roluna çəkdik.
Rejissor F.Əliyev böyük kinoda ilk işi olan "Qızıl uçurum” bədii
filminin çətinlikləri haqqında belə demişdir: "Çəkilən hər bir səhnə o dövrün
ab-havasını əks etdirməli idi. Həm də bu günümüzlə səsləşməli idi. Lazımi
naturanın, interyerin, dekorasiyanın dəqiqliyi vacib idi. XIX əsrin Bakısını,
keçmiş neft mədənlərini inandırıcı şəkildə göz önündə canlandırmaq, haradasa
"Fransa səhnələrini” çəkmək, bir də Cəlil ağanın evi kimi böyük, geniş
dekorasiyanı kinostudiyanın pavilyonunda tikmək işi çətinləşdirirdi. Bunu
yaradıcı heyətin birgə səyi ilə aradan qaldıra bildik.”
Təsadüfi deyil ki, "Qızıl uçurum” filmi yüksək bədii səviyyəsinə və
böyük tərbiyəvi əhəmiyyətinə görə, 1981-ci ildə Vilnüsdə keçirilən XIV Ümumittifaq
kinofestivalında nümayiş etdirilmiş, quruluşçu rejissor Fikrət Əliyev "Uğurlu
debütə görə” prizinə və diploma layiq görülmüşdür.
F.Əliyevin növbəti – "Yuxu” kinokomediyası da müasir mövzudadır.
Burada iki sevən gəncin məhəbbətindən bəhs olunur. Mövzuya gəldikdə, filmdəki
hadisələr bizim günlərdə Bakı kəndlərindən birində, baş qəhrəman Əliabbasın
yuxusu ətrafında cərəyan edir. Əliabbas sevgilisi Bahara qovuşmaq üçün öz
xoşbəxtliyi uğrunda mübarizə aparır...
"Yuxu” filmini F.Əliyev özünün iştirakı ilə Qasım Səfəroğlunun
yazdığı ssenari üzrə çəkmişdir. Film hələ çəkildiyi vaxt onun uğur qazanacağına
əmin idik. Ona görə ki, "Yuxu” kino həvəskarlarının ən çox sevdikləri lirik
komediya janrında lentə alınırdı. İkincisi, burada məşhur kino ulduzlarından
ibarət aktyor ansamblı iştirak edirdi.
Filmin ssenari müəllifi Qasım Səfəroğlunun xatirələrindən: "Bir neçə
il bundan qabaq ürəyimdə gəzdirdiyim ən böyük arzularımdan biri həyata keçdi.
Yaxın dostum, istedadlı kinorejissor Fikrət Əliyevin istəyi ilə "Yuxu” filminin
ssenarisini yazdım. Əlimə imkan düşmüşdü. Məsmə nənə obrazını məxsusi Nəsibə
xanım üçün yazdım. Fikrət filmi böyük məharətlə çəkdi.”
Rejissor F.Əliyev müsahibələrinin birində demişdir: "Uzun illər idi
ki, "Yuxu” filminin ideyasını beynimdə gəzdirirdim. Bir neçə yazıçı ilə
işlədim, bir neçə ssenari yazıldı. Ancaq onların heç biri məni təmin etmirdi.
Ən nəhayət, Qasım Səfəroğlu ilə işləməli olduq. Onun yazdığı ssenari
arzularımla o qədər səsləşirdi ki, elə bilirdim onu özüm yazmışam.”
Bu gün tamaşaçılar "Yuxu” bədii filminə həvəslə baxırlar. Çünki
"Yuxu” sənət əsəri olmaqla bərabər, həm də tamaşaçı filmidir. Bu kinokomediya
Abşeron koloritini əks etdirən, yerli camaatın xarakterini incə yumorla açıb
göstərən ən gözəl ekran əsərlərimizdən biridir.
Və "Ölüm növbəsi”ndən
"Axırıncı dayanacağ”a gedən yol
Bundan sonra rejissor F.Əliyev daha iki kinolentə − "Ölüm növbəsi”
və "Axırıncı dayanacaq” bədii filmlərinə
quruluş verdi. Rejissor hər iki filmin ədəbi ssenarisini yazıçı İlqar Fəhmi ilə
birgə yazmışdır. Maraqlıdır ki, Fikrət Əliyev demək olar ki, çəkdiyi filmlərin
əksəriyyətinin ideya müəllifidir.
Reallıq harada bitir və irreal aləm harada başlayır – hər zaman
müxtəlif yönlü sənətkarlar bu suala cavab axtarıb, amma bu iki aləmin – reallıqla
irrealın sərhədini təbii ki, heç kim dəqiq göstərə bilməyib. Əlbəttə ki, Allaha
məxsus olan sirri insanlar aça bilməz.
"Ölüm növbəsi” filmi də əslində reallıqla irreallığın, həyat ilə
ölümün, yuxu ilə oyaqlığın sərhəddində gəzişmələri xatırladır. Çünki filmdə baş
verən hadisələrin reallıqda, ya irreallıqda, həyatda, ya yuxuda baş verdiyi,
yaxud, ümumiyyətlə baş verib-vermədiyi sona qədər dəqiq bilinmir, filmin
yaradıcıları sanki tamaşaçının çaşmasını, reallıq hissini itirməsini istəyir.
Filmdə təsvir olunan hadisələr Bakı ətrafında Abşeron kəndlərində baş
verir. Yaradıcı heyət özünəməxsus keyfiyyətləri ilə zəngin olan Abşeron
mühitini çox canlı şəkildə yarada bilib, çünki filmə baxan kimi başa düşürsən
ki, belə epizodlar yalnız Abşeronda baş verə bilər.
Filmin əsas qayəsi insanların reallıq kimi qəbul etdiyi aləmin
əslində mütləq olmadığını, zamanın və məkanın nisbiliyini, həyatla ölüm,
yuxuyla oyaqlıq arasındakı sərhədin nə qədər anlaşılmaz olduğunu göstərmək və
bu xüsusda tamaşaçını düşündürməkdir.
"Axırıncı dayanacaq” isə kinokomediyadır. Burada "Ahıllar evi”nə
düşmüş keçmiş gəmi kapitanının başına gələn əhvalatlardan bəhs olunur. Fikrət
danışırdı ki, hələ 2000-ci ilin əvvəlində Buzovnadakı "Ahıllar evi”nə gedibmiş.
Direktorun razılığını alandan sonra rejissor düz bir aya yaxın orada qalıb,
buranın sakinləri ilə tanış olub. Fikrətin "Ahıllar evi”ndə olması ona bərk
təsir edibmiş. O, deyirdi: "Buradakı insanların taleyinə biganə qalmaq mümkün
deyil. Hətta onlardan hər biri haqqında
film çəkmək də olar. Buranın öz ab-havası var.
Burada gördüklərim əsasında həmkarımla bir neçə variantda ssenari
yazdıq.
"Axırıncı dayanacaq”ı çəkməkdə məqsədim var idi: tamaşaçıları filmə
baxarkən güldürüb düşündürmək. Çünki bu film "Ahıllar evi”ndə yaşayan
insanların həyatından, onların acı və şirin talelərindən bəhs edir. Biz bu
insanlara biganə qala bilmədik. Mən hesab edirəm ki, kinematoqraf öz sözünü
deməli idi. Bu missiyanı da mən öz üzərimə götürdüm.”
Təəssüf ki, bu film Azərbaycanın əməkdar incəsənət xadimi, quruluşçu
rejissor, gözəl insan Fikrət Əliyevin həyatının son dayanacağı oldu, sənətkarın
vaxtilə çəkmək istədiyi, amma özündən asılı olmayan səbəblərdən çəkə bilmədiyi
filmlər də elə arzu olaraq qaldı.
Aydın Kazımzadə,
Əməkdar incəsənət xadimi