Bakı 21°C
Fermer Cavanşir Paşayev: İndiyə kimi pomidor becərib ziyana düşən adam görməmişəm
Təsərrüfatımız əsasən pomidor istehsalı üzrə ixtisaslaşıb. Texnika və gübrəyə olan tələbatımızı "Aqrolizinq”in yerli nümayəndəliyinin dəstəyi hesabına ödəyirik. Bu il yüksək məhsul əldə etmişik və yığdığımız pomidoru artıq bazara çıxarırıq. Qiymətlər də bizi qane edir.
AZƏRTACxəbər verir ki, bu sözlərin müəllifi Xaçmaz rayonunun Hülövlü kəndində yerləşən fermer təsərrüfatının rəhbəri Cavanşir Paşayevdir.
Fermer kənd təsərrüfatı məhsullarının istehsalçılarına göstərilən dövlət dəstəyindən məmnundur: "Dövlət bizi texnika, gübrə və toxumlarla təmin edir, fermerlərə bütün güzəştlər tətbiq olunur. Hazırda texnika boldur, gübrələr də çox aşağı qiymətlərlə fermerlərə təqdim olunur. İndiyə kimi pomidor becərilməsindən zərərə düşən fermer görməmişəm. Özüm 5 hektar sahədə pomidor əkmişəm. Hazırda məhsulu bazara çıxarıram. Təxmini hesablama aparaq. Əgər bir yeşik pomidoru 5 manata satıramsa, 100 yeşikdən 500 manat əldə edirəm. Bir gündə kim 500 manat qazana bilər? Deməli, bizim üçün pomidor istehsalı sərfəli sahədir”.
Cavanşir Paşayev pomidorun xeyirli tərəvəz olduğunu deyir. "Xaçmaz pomidorundan çox dadlı salat olur, iştahanı artırır. Quba rayonu öz ağ alması, Xaçmaz isə pomidoru ilə məşhurdur. Harada gedib pomidorun dadına baxsanız, Xaçmaz pomidorunun tamını verməyəcək. Bu neməti bizim torpaqlarımız yetişdirir. Qızıl kimi torpaqlarımız var”, - deyə fermer bildirib.
Qeyd edək ki, Xaçmaz rayonu tərəvəzçilik üzrə ixtisaslaşmış bölgələrdəndir. Hazırda bölgədəki təsərrüfatlarda pomidor yığımı davam edir. Toplanan məhsul paytaxt bazarlarına, emal müəssisələrinə göndərilir və Rusiyaya ixrac olunur.
