Fərəh Əliyeva: “Bu sənət əynimə biçilib” - Fotolar
Kukla sənətinin 2500 il yaşı
olduğu deyilir. Kukla sənəti ilə məşğul olan, Azərbaycanı bu sahə üzrə
beynəlxalq festivallarda, sərgilərdə təmsil edən kuklaçı sənətkarlarımız
barmaqla sayılası qədərdir. Ötən gün azərbaycanlı bir xanımın hazırladığı kuklaları
ilə tanış oldum. Kuklaların müəllifi Fərəh Əliyeva redaksiyamızın qonağı oldu.Fərəh xanım Azərbaycan
Rəssamlar İttifaqının üzvü, Moskva beynəlxalq sərgisinin (2011), I və II
"Fusion Doll” Beynəlxalq Bakı Kukla Biennalesinin (2011, 2013) iştirakçısı,
incəsənət studiyasında (art studio) art-direktordur. Bakı Dövlət
Universitetinin məzunu, Azərbaycan Rəssamlar İttifaqı və Müəllif Kuklaları
Beynəlxalq Təşkilatının üzvüdür. Müxtəlif illərdə Moskva Beynəlxalq Kukla
Sərgisi, Bakı Beynəlxalq Biennali və bir çox tematik sərgilərin iştirakçısı, üç
fərdi sərginin müəllifidir. Yaradıcılığında müxtəlif janrlara avanqard,
klassik, interyer, konseptual və digər janrlara üstünlük verən rəssam 100-ə
qədər qarışıq texnikalı əsərlərin müəllifidir. Müsahibimin əl işləri ilə tanış
olduqdan sonra rahatlıqla deyə bilərəm ki, onun əsərləri Şərq və Qərbin zərif
sintezindən ibarətdir.
- Fərəh xanım, 4-5
yaşınızdan müxtəlif oyuncaqlar düzəldib, kuklalarınıza paltarlar tikməyə başlamısınız.
Sizcə, bu istedad gendənmi gəlir, yoxsa insan özü-özünü inkişaf etdirdikcə
nələrəsə nail olur?
- Uşaq yaşlarımdan incəsənətə böyük marağım olub. Anamın
süfrələrini kəsib-doğrayır, onlardan kuklalarıma paltarlar tikir, plastilindən fiqurlar
düzəldirdim. Kuklalara paltarlar tikib onlara obraz verirdim. Özümü tanıyandan rəssamlığa,
tikişə, dərziliyə, incəsənətə böyük həvəsim olub. Peşəkar olaraq kukla sənəti
ilə işə başlayanda, artıq bütün prosedurlardan
xəbərdar idim. Kuklaların dizaynını, makiyajlarını edib, rahatlıqla obraz verməyi
bacarırdım. Bu işlə məşğul olmaq mənim üçün çox rahatdır. Hətta deyə bilərəm
ki, bu sənət tam mənim əynimə biçilib.
- Ananızın kosmetikalarından
istifadə edəndə, onun geyimlərini, süfrələrini kəsib kuklaya paltar tikəndə, bu
ananızın qınağına səbəb olmurdumu?
- Anam hər gün işə gedəndə mənə təlimat verirdi. Deyirdi
ki, bu gün heç nəyi kəsmə, paltarlarımı korlama, heç nəyə toxunma. Sovet dönəmində
o süfrələr, pərdələr çox çətin tapılırdı. Bakıda bu cür parçalar çox az idi. Anam
işə gedəndə, onları bir-bir çamadanlardan çıxarıb, kəsirdim. Sonda heç nə
olmamış kimi düzəldib, yerinə qoyurdum ki, xəbəri olmasın. Bir gün anam çamadanın
ağzını açanda gördü ki, süfrənin birinin gülü, pərdənin naxışı yoxdur. O saat bildi
ki, onu mən kəsmişəm.
Uşaq yaşlarından təkcə dərziliyə, dekora,
rəssamlığa deyil, eyni zamanda kulinariyaya da böyük həvəsim var idi. Tortlar bişirir,
şirniyyatlar hazırlayır, yeniliklər etməyə çalışırdım. Bunun özü də anamın qınağına
səbəb olurdu. Bişirməyi xoşlayırdım, amma yığışdırmağı heç sevmirdim. Hətta
uşaq yaşlarımda ayaqqabılarımın dizaynını da özüm dəyişdirirdim, əlavə bantiklər,
lentlər yapışdırırdım. Uşaq yaşlarımdan daim yenilik axtarışında olmuşam. Bilmirəm,
bəlkə öz yolumu axtarırdım. Məşğul olduğum dizaynerlik, rəssamlıq və digər
marağımda olan sahələri bir yerdə - kukla sənətində tapmışdım. Yalnız bu
sənətlə məşğul olanda bir gün heykəltəraş, bir gün rəssam, bir gün qrimyor, bir
gün dizayner ola bilirdim.
- Azərbaycanda
kukla sənətini yaşadanlar çox azdır.
- Bəli, biz dörd nəfərik. Onlardan ən gənci mənəm.
- Kuklaçı
sənəti üzrə ali təhsil ocaqlarında nə bir ixtisas var, nə də bu ixtisas üzrə kurslarda
tələbə yetişdirilir. Siz bu sənətin sirlərinə necə yiyələnmisiniz?
- Uşaqlıqdan təcrübələrim əsasında nələrsə
öyrənmişəm. Özüm öz kuklalarımı düzəldərək təcrübə yığırdım. Müəyyən yaş
həddinə gəlib çatdıqdan sonra bu işin peşəkarından dərs almağa başladım. Belə
ki, Pərviz Hüseynov və onun xanımından dərs aldım. Onların hazırladıqları
kuklalara baxırdım. Əslində onların yanına gedəndə, təxmini prosesləri bilirdim.
Ancaq bəzi xırda detallar var idi ki, onları öyrənməli idim. Hazırda öz texnikamla
işləyirəm, yaradacağım obrazlarımı özüm təyin edirəm.
- Hazırladığınız
kuklalar müasirliklə milliliyin qarışığıdır sanki. Digər tərəfdən, onların
timsalında Şərqlə-Qərbin zərif sintezini də görürük.
- Yaratdığım hər bir kukla mənə övladım kimidir. Kukla
hazırlayarkən onun mayasında Şərqlə-Qərbi qarışdırmağı çox xoşlayıram. Çalışıram
ki, avanqard, klassik, interyer, konseptual və digər növ kuklalar hazırlayım. Kuklarımın
obrazlarının zənginliyi ilə seçilməyini, kuklaların bir-birini təkrarlamamasını
istəyirəm.
Şərqlə Qərbin sintezi hər zaman diqqət çəkib. Belə
ki, beynəlxalq tədbirlərdə iştirak edərkən kuklalarımda olan millilik, o
parçalarımız, naxışlarımız xaricilərin daha çox diqqətini çəkir. Mən
milliliyimizə bir qədər müasirlik qatıb təqdim edirəm. Milli atributlarımızı
avanqard formada hazırlayıram. Hətta qeyd edim ki, bu yaxınlarda mənim "Sarı
gəlin” kuklam Şəki muzeyi tərəfindən alındı. Hazırda bir eksponat olaraq
qorunur.
- Bakı
Dövlət Universitetində təhsil almısınız və müəllim kimi də fəaliyyət
göstərirsiniz. Müəlliməlikdən kuklaçılığa
gedən yol çoxmu keşməkeşli oldu?
- Məktəbdə uşaqlara coğrafiya dərsini tədris
edirəm. Bundan əlavə, ART studiyada kukla sənətinin sirlərini öyrədirəm. Nəinki
kukla sənəti, eyni zamanda, rəssamlıq kurslarım da var. Şagirdlərim yerli və
xarici müsabiqələrdə qalibiyyət əldə edirlər. Uşaqları hərtərəfli yetişdirməyə çalışıram.
Müxtəlif, qarışıq texnikalardan istifadə etməyi xoşlayıram, çünki bu daha maraqlıdır.
Belə olanda tələbələr yorulmurlar.
- Yaradıcılığınıza
nəzər yetirdikdə, müxtəlif beynəlxalq festivallarda iştirak etdiyinizin şahidi
oluruq. Festivallar sizə nə qazandırır?
- Festivallar mənə dünya kuklaları ilə tanış olma imkanı
qazandırıb. Onların yaradıcıları ilə görüşüb, texnikalarını müzakirə etmişik. Yeni
nələrsə öyrənəndə daha çox həvəslənir, gözəl kuklalar hazırlayıram. Hər kəsin öz
texnikası, dəst-xətti var və beynəlxalq kukla festivallarında biz dünyanın bir
çox kuklaçıları ilə görüşür, ideyalarımızı paylaşırıq. Ötən ilin oktyabr ayında
tələbələrimlə Ukraynanın Kiyev şəhərinin beynəlxalq kukla sərgisində iştirak edərək
Azərbaycanı təmsil etdik. Tələbələrim diplomla təltif olundular. Hazırda isə Parisdəki
Luvr muzeyinə kuklalarımızı təqdim etməyə hazırlaşırıq.
- Beynəlxalq
kukla sərgilərində sizə maneçilik törədən hər hansı nüanslar olubmu?
- Əslində xarici səfərlərə, sərgilərə getməyimiz
bizə problem yaradır. Çünki hazırladığımız kuklalar çox zərifdirlər, tez
sınırlar. Onları xarici sərgilərə aparmaq müşkülə çevrilir. Belə olan halda,
məcburuq ki, karqodan istifadə edək. Bu da bir az maliyyə tələb edir. Ona görə
də hər sərgiyə gedəndə hərəmiz 3-4 kukla ilə yola düşürük.
- Siz müəllif kuklalarının
beynəlxalq təşkilatının üzvüsünüz. Bu təşkilat hansı işləri görür?
- Bu təşkilat dünyadakı bütün kukla sənəti ilə
məşğul olan insanları bir araya toplayır. Beynəlxalq sərgilər təşkil edir və bu
sərgilərin keçirilməsi ilə bağlı məlumat verirlər. Dünyadakı bütün kuklaçıları birləşdirən
bir təşkilatdır.
- Könül istər ki,
milli kukla brendlərimiz olsun.
- Mənim kuklalarımda milli nağıl qəhrəmanlarımızdan
"Tıq-tıq xanım”, "Cırtdan” və başqaları var. Xaricə gedəndə daha çox bunları aparıram.
Bu bizim milli kuklalarımızdır.
- Kuklalarınızı
bazara çıxarıb, onun satışını necə təşkil edirsiniz?
- Kuklalarımı Azərbaycanda fəaliyyət göstərən səfirliklər
daha çox alır. Argentina, Fransa, Norveç, digər Avropa ölkələrinin səfirlikləri
mənə müraciət edirlər. Əl işlərimi, hazırladığım kuklaları bəyənirlər, amma qiymətlərlə
tanış olduqdan sonra imtina edirlər.
- Qiymətlər çox
bahadır?
- Hazırladığım kuklanın üzərində gecə-gündüz ən azı
2 həftə işləyirəm. Hətta olub ki, bir kuklaya 6 ay vaxt sərf etmişəm. Hazırladığım
kuklaların materialları çox bahadır. Mən kukla hazırlayarkən ən keyfiyyətli məhsullardan
istifadə edirəm. Kuklalarımı düzəldərkən polimer özübərkiyən plastikadan (darvi,
rok, kağız yapışqanı, covi, papye-maşe) və digər müxəlif materiallardan
yararlanıram. Öz işlərimdə tez-tez qarışıq texnikadan da istifadə edirəm, çünki
eksperiment etməyi sevirəm. Müxtəlif ipəklərdən, "Svarovski” daşlarından
istifadə edirəm, onlar mənim kuklalarıma zəriflik və gözəllik qazandırırlar.
Mənim yaradıcılığımda ideya və fantaziyalar sərhədsizdir, mən hər zaman nəsə
yenilik axtarıram və təkrarçılığa yol vermirəm.Hər
kukladan bir dənə olur. O, muzey əşyasıdır. Ona antikvar kimi baxmaq lazımdır. Nəticədə,
bu kuklaların qiyməti baha olmalıdır. Ancaq bizdə bu sənətə o qədər də böyük dəyər
verilmir. Avropada yaşasaydım, kuklalarım daha baha qiymətə satılardı. Ona görə
də bu qiymətə kuklaları Azərbaycanda satmaq çətindir. Kukla hazırlamaq üçün
bəzi materialları internetdən sifariş verirəm, bəzilərini xaricdə olan rəfiqələrim
göndərirlər.
- Gənclərin bu
sənətə marağı varmı?
- Əlbəttə ki. Tələbələrim arasında müxtəlif yaş
kateqoriyalarına rast gəlmək mümkündür. Gənclərlə daha çox çalışıram. 50-dən çox
gənc xanımlara bu sənətin sirlərini öyrətmişəm. Mənim tələbələrim Amerika, Fransa,
İngiltərədə universitetlərə qəbul olunublar və mən onlar haqqında rəy
məktubları yazmışam.
- Nədən ilham alırsınız?
- Həyatdan, sevgidən. Mən həyatı çox sevirəm, çünki
həyat çox gözəldir. İnsan öz işini sevəndə həyat ona daha maraqlı gəlir.
- Fərəh xanım,
tələbələrinizdən danışdınız, ancaq emalatxananızdan danışmadınız. Özünüzə
məxsus emalatxananız varmı?
- Hazırda öz emalatxanam yoxdur. Tələbələrimi evdə qəbul edirəm. Məktəblərə,
liseylərə gedir, orada dərs deyirəm. Bundan əlavə, iki ildir ki, Sağlamlıq
imkanları məhdud uşaqlar üçün 5 nömrəli respublika xüsusi internat məktəbində çalışıram. Keçən il oradakı şagirdlərin əl işlərindən ibarət
sərgi keçirmişdik. Leyla xanım Əliyeva da həmin sərgidə iştirak edirdi.
- Sizə belə
pərakəndə şəkildə çalışmaq çətin olmurmu?
- Çox çətindir. Bütün günü işləyirəm və müxtəlif hissələrə
parçalanıram. Əslində, bir emalatxanam olsa, orada işləmək mənə daha rahat olar.
Sərgi qalereyası olsaydı, uşaqlar başqa məkanlar axtarmazdı, fəaliyyətimiz daha
da genişlənərdi. Bizim işimiz də asanlaşardı. İstərdim ki, bizə bu rahatlıq təmin
olunsun. İstərdim ki, Azərbaycanda kukla sənətiNİN inkişaf etməsi üçün bizə dəstək
olsunlar. Çünki kukla sənəti Avropada, MDB ölkələrində, dünyanın müxtəlif ölkələrində
inkişaf edib. Ancaq Azərbaycanda yeni-yeni yaranmağa və inkişaf etməyə
başlayıb. Azərbaycan kuklalarının dünyada
tanınması üçün çalışıram.
Xəyalə Rəis