Əyalətdə 126-cı mövsümünü bitirən teatr - Fotolar
Bu mövsüm mütəmadi olaraq Nəcəf bəy Vəzirov adına Lənkəran Dövlət
Dram Teatrının hazırladıqları tamaşalar, qastrol səfərləri ilə bağlı məlumat
vermişik. Ancaq min eşitməkdənsə bir görmək prinsipi ilə hərəkət edərək, 126-cı
teatr mövsümünün son günündə Lənkəran Teatrına yollandıq. Mövsümün son tamaşanı
izlədikdən sonra mövsümü böyük uğurla
başa vuran teatr kollektivinin rəhbəri Tofiq Heydərovla görüşdük. Əvvəla onu
deyim ki, Tofiq müəllim səmimi və bir o qədər də qonaqpərvərdir. Deyir ki,
Lənkəran Teatrının qapıları teatrdan yazan və teatrı anlaya bilən bütün mətbuat
nümayəndələrinin üzünə açıqdır. Yetər ki, onlar ölkəmizin cənub bölgəsində belə
bir teatrın olmasının fərqinə varsınlar və bizim heç də paytaxt teatrlarından
az işləmədiyimizin şahidi olsunlar: "Qoy, mətbuat nümayəndələri bizim teatra gəlsinlər,
yazsınlar, bəlkə biz yaxşı tamaşa hazırlamırıq, bəlkə haradasa nöqsanlarımız
var? Biz sağlam tənqidə hər zaman hazırıq”.Rəngarəng repertuarı və biri-birindən maraqlı tamaşaları ilə Lənkəran
tamaşaçılarının zövqünü oxşayan bu teatrın öz ənənələri var. İzlədiyimiz "Ay
lolu və Moskvalı gəlin” tamaşası ilə bunu deməyə tam səlahiyyətimiz çatır.Nəinki Lənkəran tamaşaçıları, hətta sərhədləri aşaraq İrana mütəmadi
olaraq qastrol səfərlərinə gedən teatrın orada da kifayət qədər tamaşaçı
kütləsi var. Onlar teatrın tamaşalarını sevərək izləyir və ölkələrində hər il
keçirilən festivallarda onları qonaq qismində görməkdən məmnunluq hissi
duyurlar.Belə ki, iyunun 29-dan 30-a kimi qonşu ölkənin Parsabad şəhərində
Bəhram Beyzayinin "İlan Sultan” tamaşası ilə çıxış edən teatrın kollektivi
oradan əlidolu geri dönüb. T.Heydərovun sözlərinə görə, iki gün
müddətində "İlan Sultan” tamaşasına İranın Ərdəbil, Parsabad, Germi və digər
şəhərlərindən 1000-dən çox sənətsevər baxmaq imkanı qazanıb. Anşlaqla keçən
tamaşa barədə İranın informasiya agentlikləri, qəzetləri, "Səhər” və "Seda
Sima” televiziya kanalları məlumat yayıblar.Sonda Lənkəran sənətçiləri Parsabad Şəhər Mədəniyyət İdarəsinin fəxri
fərmanları və xatirə hədiyyələri ilə mükafatlandırılıb.Bu mövsüm sözügedən teatr bir-birindən
maraqlı tamaşalar hazırlayaraq tamaşaçılarına təqdim edib. Bu və digər
məsələlərlə bağlı teatrın direktoru "Kaspi”yə danışır.
- Tofiq bəy, teatrın 126-cı
mövsümünü başa vurduq. Bu mövsümü necə qiymətləndirirsiniz?
- Lənkəran Teatrının 126-cı mövsümünü məhsuldar və uğurlu hesab
edirəm. Çünki bu mövsümdə bir sıra uğurlu qastrol səfərlərimiz oldu.
İstər uşaqlar, istərsə də böyüklər üçün bir neçə tamaşalarımızın
premyeraları baş tutdu. Mövsümə başlayandan teatrımızın yaradıcı heyəti ilə
çalışır və tamaşaçılarımız üçün maraq kəsb edən tamaşalar hazırlamağa
çalışırıq. Bu mövsümdə Hafiz Mirəznin "Ay Lolu və Moskvalı gəlin” tamaşasını
hazırladıq. Sözügedən tamaşa bölgə tamaşaçıları tərəfindən böyük rəğbətlə
qarşılandı. Bundan əlavə, fransız dramaturqu Jan Batist Molyerin "Jorj Danden
və ya aldadılmış ər” komediyasına müraciət etdik. Tamaşaya quruluşu teatrın baş
rejissoru Tural Mustafayev verib. Səhnə tərtibatı rəssam Tərlan Sadıqovun,
musiqi tərtibatı Fərahim Fərəcovundur. Tamaşa növbəti mövsüm izləyicilərimizə
təqdim olunacaq. Teatrda paralel olaraq daha iki səhnə əsərinin – italyan
dramaturqu Lüidci Lunarinin "Üç nəfər yelləncəkdə” və Rövşən Ağayevin "Bir
gecənin nağılı” əsərləri üzərində iş gedirdi. Bu tamaşaların da növbəti
mövsümdə təhvil verməyi düşünürük. Bu il həmçinin J.B.Molyerin "Jorj Danden”,
Ə.Haqverdiyevin "Xortdanın cəhənnəm məktubları”, M.Musabəylinin "Toy səyahəti”
və daha bir neçə uşaq əsərini tamaşaya hazırlamağı planlaşdırmışıq. Ümid edirik
ki, bu tamaşalar da tamaşalarımızın marağına səbəb olacaq.
-
Bəs, peşəkar aktyor cəhətdən qıtlıq çəkirsinizmi?
- Bu məslə ilə bağlı onu demək istəyirəm ki, Lənkəran Teatrına daha
çox gənc nəslin nümayəndələri müraciət edirlər. Onların da aktyor və ya
rejissor təhsili yoxdur. Ancaq bizə müraciət edən gəncləri ruhdan salmır,
onların üzərində çalışırıq və səhnə üçün hazır olandan sonra onlara tamaşalar
həvalə edirik. Bu gün teatrımızda aparıcı aktyorlar var ki, çox gözəl, peşəkar
aktyordurlar ancaq onların təhsilləri yoxdur. Bunlara Şəbnəmi, Səyyad Əlini və
repertuarımızda rol alan digər aktyorları misal göstərə bilərəm.
- Hazırda paytaxt
teatrlarında aktyorların yaş limiti gündəm yaradır. Lənkəran teatrında bu məslə
nə dərəcədə aktualdır?
- 65 yaşından sonra hər bir vətəndaş təbii olaraq pensiyaya
çıxmalıdır. Dövlətin qanunu belədir. Ancaq məsələnin bu tərəfi bir az başqadır.
Yaradıcı insanlar bir qədər həssas və
kövrək olur. Yaşlaşdıqca daha çox diqqət tələb edirlər. Haradasa onları da başa
düşmək olar. Ötən ay Odessada olarkən qonağı olduğum ölkənin teatrlarından birində tamaşaya baxdım. Baxmayaraq ki, aktyorun 75 yaşı var idi, o
həm oxuyur, həm rəqs edir, həm də enerjili çıxışlar edirdi. Bu, çox möhtəşəm
idi. Ancaq bizdə isə məsələ belə deyil... Teatrımızda istedadlı aktyorlar
kifayət qədərdir. Klassik aktyorlarımızdan olan xalq artisti Qabil Quliyev
var ki, o hələ də öz üzərində çalışır. Öz sağlamlığının qayğısına qalır.
Onlar sənətkardırlar. Sənətkarların isə qəlbinə dəymək olmaz. Hətta o qədər həssas insandırlar ki, teatra
gələndə hər kəsə salam verirəm, kiminləsə bir az soyuq salamlaşanda onların qəlbinə dəyir (gülürük). Mədəniyyət
və Turizm Nazirliyi də bu məsələdə bizi
dəstəkləyir. Bu günün yaşlı aktyorları gələcək nəsil üçün bir örnəkdir. Hər
hansı gənc aktyor görsə ki, illərini teatra həsr edən yaşlı bir aktyoru işdən
çıxardırlar və o aktyor mənəvi cəhətdən ölüb, haqlı olaraq düşünəcəklər ki, bəs
görəsən biz bu sənətdə yaşlanandan sonra necə olacağıq? Bizim üçün hər bir
aktyorumuz qiymətlidir. Xüsusən də bu sənətdə sözünü demiş klassik
aktyorlarımız.
- Biz bura gəlməyənə qədər
teatrın təmirsiz olduğundan xəbərsiz idik. Bəs nə üçün mətbuat bundan
xəbərsizdir.
- Məsələ ilə bağlı Mədəniyyət və Turizm Nazirliyi özü maraqlanır.
Yaxın zaman ərzində Lənkəran Teatrının təmiri gözlənilir. Ancaq mən bu barədə
kimlərisə xəbərdar etməyi və vəziyyətimiz barədə acınacaqlı xəbər verməyi
xoşlamıram. Hazırda teatrın vəziyyəti o qədər də faciəvi deyil. Bir az
işıqlarda və foyedə problem var. Bu da dəhşətli bir şey deyil. Səhnənin
quruluşu bizə icazə verir ki, maraqlı tamaşalar hazırlayaq. Sizə ancaq onu deyə
bilərəm ki, nazirlik teatrımızın binasının təmirini dövlət proqramına salıb. O vaxta
qədər yəqin təmir olunar. Bu, bizdən asılı olan bir məsələ deyil.
- Teatrın repertuarını seçərkən nəyə daha çox önəm
verirsiniz?
- Repertuar seçərkən çalışıram ki, rəngarənglik olsun. Eyni janr,
eyni mövzulara müraciət etməkdən imtina edirəm. Bu mövsüm isə daha çox
klassikaya, müasir dramaturgiyaya müraciət etdik. Gələcəkdə türk müəlliflərinin
əsərlərinə də müraciət etməyi planlaşdırırıq. İstəyirik ki, növbəti mövsümdə İran və Türkiyədən
rejissor dəvət edək. Onların da təcrübələrindən yararlanaq.
- Bəs nə üçün gənc
yazarlara müraciət etmirsiniz?
- Mən işimlə əlaqədar olaraq bir çox romanlar oxuyuram. Bunların
içərisində gənc müəlliflər də üstünlük təşkil edir. Mənimlə bərabər
rejissorlarımız da əsərlər oxuyur və ümumi bir nəticəyə gəlirik. Ancaq hansı
əsər bizi qane edirsə, onları da səhnələşdiririk. Parsabad şəhərində olarkən
bizdən 20 yanvar və Qarabağ hadisələri ilə bağlı bir əsər istədilər. Biz çox
araşdırmalar etdik və normal, xalqımızın başına gətirilən hadisələri özündə
şərh edən qənaətbəxş bir əsər tapmadıq.
- Lənkəran teatrı bu vaxta
qədər həm yerli, həm də xarici rejissorlarla çalışıb. Hansı rejissorla işləmək teatrın kollektivi
üçün daha rahatdır?
- Rejissordan çox şey asılıdır.
Hər rejissorun özünün dəsti-xətti olur. Rejissor kollektivi yığır, ətrafına cəm
edir, onlarla danışıqlar aparır. Hesab edirəm ki, xarici rejissorlar daha çox
çalışır. Çünki onlar sırf başqa dövləti təmsil etdiyi üçün işlərinə daha
məsuliyyətlə yanaşırlar. Uşaqlarımız onlarla
işləməkdən yorulmurdu. Onlar imkan vermir ki, hazırlayacağı tamaşanın məşqi
hədər yerə getsin. Çalışırlar ki, gəldiyi müddətdə bir iş görsünlər. Müəyyən
vaxtdan sonra da işlərini bitirib gedirlər.
Bizim rejissorlar isə işi çox uzadırlar.
- Tofiq bəy, Lənkəranda
çəkilən "Günəşim ol” serialının əsas iştirakçıları məhz Lənkəran Teatrının
kollektivindən seçilmişdi. Çox zaman teatr rəhbərləri aktyorlarının seriala
çəkilməsinə qarşı çıxır, bu layihələrin teatrın işini ləngitdiyini deyir.
- Təbii olaraq hər bir teatr rəhbəri çalışır ki, onun işçisi daha çox
qazansın və evinə bir tikə çörəkpulu aparsın. Burda pis heç nə ola bilməz. "Günəşim ol” filminin təşkilatçı
heyəti ilə tez-tez görüşür və əlaqə saxlamağa çalışırdıq. Düzdür, onlarla bəzən
işimiz toqquşurdu. Ancaq mən heç vaxt onların əleyhinə çıxmamışam. Teatrımızın
aktyorları seriala çəkilməklə daha da məşhurlaşdı. Bu təbii ki, teatrın adına
xidmət edir. Hətta sizə bir hadisə danışım. Biz İrana qastrol səfərinə gedərkən gömrükdə serial qəhrəmanları olan Qafuru,
Natiqi, Nüşabəni və digər aktyorları oynadıqları rolun adı ilə çağırdılar.
Astara, Biləsuvar gömrüyündə bizi yaxşı tanıyırlar. Onlar bizə yüksək səviyyədə
kömək edirlər. Sərhəddə belə bizim
aktyorları məndə çox tanıyırlar (gülürük). Təbii ki, biz buna sevinirik. Onların
seriala çəkilməsi və tanınması bizə çox xoş təsir bağışlayır. Mən də bacardığım
qədər buna şərait yaradıram. Yenə
təklif olsa, məmnuniyyətlə buna razılıq
verərdim. Bəzən olurdu ki, seriala çəkilən aktyorlar tamaşanın məşqlərinə gələ
bilmirdilər və o zaman tamaşaları dəyişirdim.
Tamaşaların premyeralarında qarşılıqlı koordinasiya edirdik. Aktyorun bu gün teatrdan
əlavə yerdə də qazancının olması böyük işdir.
Xəyalə Rəis