Ermənistanın qonşularına qarşı növbəti hörmətsizliyi
Zaman-zaman azərbaycanlıların
yaşadığı torpaqlara köçürülən ermənilər yerli əhaliyə qarşı kütləvi qırğınlar
törədiblər. "Gəmiyə minib gəmiçi ilə dava-dalaş etmək” xislətinə sahib
ermənilər bu yolla dənizdən-dənizə "Böyük Ermənistan” yaratmaq xülyasına
qapılıblar. Xain qonşularımız bu məqsədə çatmaq üçün imperialist güclərin
dəstəyindən yetərincə yararlanıblar. Böyük dövlətlərin əlində maşa rolunu
oynayan ermənilər ümumilikdə iki əsr ərzində minlərlə, on minlərlə azərbaycanlını
qətlə yetiriblər. Özgə torpaqlarında yaradılan Ermənistan adlı dövlət də qonşularına
qarşı əsassız ərazi iddiaları ilə çıxış edib.Əfsuslar olsun ki,
Ermənistanın işğalçılıq, qəsbkarlıq, soyqırımı və deportasiya siyasətinə dünya
birliyi yalnız seyrçi mövqedən yanaşır. Əgər belə olmasaydı, Cənubi Qafqazda
kiçik bir dövlətin azsaylı xalqı tərəfindən ümumilikdə region gərginlik ocağına
çevrilməzdi. Uydurma əfsanənin köləsi olan ermənilər və onların hazırkı dövləti
Ermənistan Türkiyə və İrana qarşı da ərazi iddiaları ilə çıxış etməkdədir. İşğalçı
dövlətin rəmzlərində təmsil olunan "xəritələrdə” Türkiyənin və İranın əraziləri
ermənilərin "böyük dövlət”inin ərazisi kimi təqdim olunur. Hətta Ermənistandakı
ictimai nəqliyyatda, o cümlədən metroda "Böyük Ermənistan”ı əks etdirən
xəritələr nümayiş olunur.
Yəni, XXI əsrdə, müasir dövrdə də Ermənistan
beynəlxalq prinsipləri ayaq altına atır, işğalçılıq siyasətini davam etdirir. Misal
üçün, 2008-ci il avqustun 8-də Gürcüstanın Abxaziya və Şimali Osetiya
ərazilərində separatizm baş qaldırıb, müharibə ocağı yaranıb. Rus qoşunlarının
köməyi ilə həmin ərazilərə nəzarəti təmin edən separatçılar sonradan öz
"müstəqilliklərini” elan ediblər. Bununla da Azərbaycanın Ermənistan tərəfindən
işğal olunmuş Dağlıq Qarabağ ərazisində yaradılan "respublika” kimi Gürcüstan
ərazisində də iki qondarma qurum meydana gəlib. Gürcüstan ərazisində yaşayan
ermənilər həmin vaxt öz dövlətlərinin mövqeyini müdafiə etmək, çörəyini yeyib,
suyunu içdikləri ölkənin təəssübünü çəkmək əvəzinə, separatçılara dəstək
nümayiş etdiriblər. Hətta Gürcüstanın Cavaxetiya bölgəsində yaşayan ermənilər
də öz "müstəqilliklərini” elan etmək barədə çağırışlar ediblər.
Bir neçə gün bundan öncə
ermənilərin qonşu Gürcüstanla əlaqəli davranışları, bu ölkənin ərazi
bütövlüyünə açıq-aşkar hörmətsizliyi Ermənistanın işğalçı mahiyyətini növbəti
dəfə ortaya qoyub. Ermənistan Gürcüstanın Abxaziya ərazisində yaradılan separatçı
rejimin 25 illiyi ilə bağlı xüsusi canfəşanlıq nümayiş etdirib.Milli
Məclisin Müdafiə, təhlükəsizlik və korrupsiya ilə mübarizə komitəsinin üzvü,
Xocalıdan olan millət vəkili Elman Məmmədov mövzu ilə bağlı
fikirlərini bölüşərkən deyib ki, "Böyük Ermənistan” yaratmaq xülyası,
işğalçılıq siyasəti Ermənistanın Konstitusiyasında əks olunub. Deputatın
sözlərinə görə, Ermənistanda və dünyanın müxtəlif ölkələrində yaşayan ermənilər
tərəfindən yazılan romanlarda, məqalələrdə, kitablarda bu xülya geniş təbliğ
olunur. O qeyd edib ki, ermənilərin son olaraq Gürcüstana qarşı xəyanət
etmələri onların bu xülyadan əl çəkmədiklərini bir daha sübut edir: "Vaxtilə
Suxumi uğrunda gedən döyüşlərdə ermənilər tərəfindən "Baqration batalyonu”nun
gürcülərə qarşı vuruşduğu hər kəsə aydındır. Həmin batalyon döyüşlərdə
gürcülərə qarşı xüsusi qəddarlıq göstərib. Bu tarixi faktı hamı yaxşı
xatırlayır. Bu gün isə ermənilər Gürcüstanın Cavaxetiya regionuna ərazi
iddiaları irəli sürürlər. Ona görə də Gürcüstan rəhbərliyi baş verənlərdən
nəticə çıxarmalı, ermənilərə qarşı addımlar atmalıdır. Ərazi iddiası
ermənilərdə bir xəstəlik halındadır. Hətta onların siyasətçiləri də bu
xəstəliyə tutulublar. Açıqlamalarında Türkiyə, Gürcüstan, İran və digər
ərazilərin "Böyük Ermənistan”a aid olduqlarını bildirirlər. Onları bu
xəstəlikdən yayındırmaq üçün güc tətbiq edib, dərslərini verməkdən başqa çarə
yoxdur. Çünki onlar hara ayaq bassalar oranı öz adlarına çıxıb sahiblənmək
iddiasına düşürlər. Misal üçün, ermənilər tarixən, elə indinin özündə də
Azərbaycan və Türkiyəyə qarşı ərazi iddialarında olublar. Eyni zamanda, Ermənistanın
İrana qarşı da ərazi iddiaları var. Hesab edirəm ki, ermənilərin qonşu ölkələrə
ərazi iddialarına sərt şəkildə qarşılıq verilməlidir”.
Hüquq
elmləri doktoru, professor Rüstəm Məmmədov da bədnam qonşumuzun daim
"Böyük Ermənistan” xülyası ilə yaşadığını dilə gətirib. Deyib ki, bu,
Ermənistanın işğalçılıq niyyətlərindən əl çəkmədiyini nümayiş etdirir.
Professor bildirib ki, Ermənistanda Azərbaycan torpaqlarında yaradılan qondarma
rejimin rəhbərinin öz "həmkarına” Abxaziyanın yaradılması ilə bağlı təbrik
məktubu göndərməsi faktı Ermənistanın, ermənilərin Gürcüstanın ərazi bütövlüyü
və suverenliyinə hörmət etmədiyini ortaya qoyur: "Bütün cəhdlərə rəğmən,
Ermənistanın öz xülyasını reallaşdırmaq üçün heç bir şansı yoxdur. Buna
beynəlxalq hüquq imkan vermir. Tarixən Ermənistan qonşu dövlətlərinə qarşı
ərazi iddialarında olub və bu iddiaları sayəsində də özünə dövlət qurub. Belə
olan halda, öz xülyalarını gerçəkləşdirmək üçün heç bir ölkə onları müdafiə
etməyəcək. Ayrı-ayrı şəxslərin Ermənistanı müdafiə etməsi isə heç bir anlama
gəlmir”.
Alpər
TURAN