Ermənistanın “inqilab qonaqlığı” bitdi
Ermənistanın qalmaqallı baş naziri kimi ad çıxarmış Nikol Paşinyan
populist açıqlama və bəyanatları ilə sadə erməni vətəndaşlarının gözündə
yüksəlmək siyasətini davam etdirir. Bu dəfə o, hökumətin dünənki iclasından
öncə deyib ki, Ermənistan "yeni tarixi dönəmə” girir və yazda başlanmış
qeyri-zorakı məxməri inqilabı tamamlamalıdır: "Bu gün Ermənistan yeni mərhələyə
qədəm qoyur. Bu mərhələnin əsas mahiyyətini belə xarakterizə etmək olar: onun
nəticəsində biz yazda baş tutan məxməri inqilabı sona çatdırmalıyıq. Bu barədə
mən axşam daha konkret danışacağam”. Onu da qeyd edək ki, baş nazir açıqlama
verəndən bir gün sonra hökumət fövqəladə iclas keçirəcək. Ermənistan
konstitusiyasına görə, baş nazir istefa verir, parlament iki həftə ərzində onun
yerinə kimsəni təsdiqləyə bilmirsə, erkən seçkilər təyin olunur. Lakin artıq
ölkə və onun hüdudlarından kənarda Ermənistanın gələcəyinin necə olacağı
dumanlı təsir bağışlamaqdadır. Məsələn, Qərb mediası ölkədə yaşananları lağlağı
edərək, baş verənləri belə qələmə verir – "Ermənistanın inqilab qonaqlığı bitdi”.
"Foreign Policy”dərgisində Maksim Edvards Ermənistanda maydakı hakimiyyət
dəyişikliyindən sonra yeni hökumətin korrupsiyayla mübarizəsindən söz açarkən
bunları yazıb – "Ermənistanın yeni hökuməti korrupsiyanın kökünü kəsmək
istəyir, amma köhnə rejim də savaşsız təslim olan deyil”. "Bir sıra
keçmiş rəsmilərin, deputatların sərvətinin izinə düşülüb, onlara mənimsəmə,
qanunsuz varlanma, sursat saxlama ittihamları irəli sürülüb. Hətta keçmiş baş
nazir, ölkəni 10 il prezident kimi idarə etmişSerj Sarkisyanın qardaşı,
mühafizəçisi belə saxlanıb. Ancaq deyəsən, köhnə qvardiya təslim olmaq fikrində
deyil. Bu ayın əvvəlində Respublika Partiyasının dominantlıq təşkil etdiyi
parlament erkən parlament seçkisini önləyəcək qanun layihəsi qəbul etdi və bu,
Yerevanda əlavə etirazlara yol açdı. Parlament iki dəfə baş nazir seçə bilməsə,
qanun onun buraxılmasına imkan verir. Lap qumar kimidir; Respublika
Partiyasından olan deputatlar daha üzüyola birini baş nazir seçə, bu yolla
seçkinin qarşısını ala bilərlər. Parlamentdəki "Çiçəklənən Ermənistan” kimi
bəzi qruplar ayın əvvəlində bu ziddiyyətli qanun layihəsini dəstəklədi, amma
sonradan Paşinyanın erkən seçki planının tərəfini saxladı...”– yazan
müəllif hazırda Yerevanda ehtiyatlı nikbinliyin hökm sürdüyünü vurğulayır. "Hakimiyyətin
keçidi zamanı ritorika tamamilə köhnə rejimə qarşı yönəlmişdi. Bu, yaxşı idi.
Müsbət bir proqram əhalini böləcəkdi, baxmayaraq ki, heç kəs qohumbazlığın,
yaxud korrupsiyanın tərəfdarı deyil”,– deyə Yerevandakı Qafqaz İnstitutundan
Aleksandr İsgəndəryandeyib. "Dəstək azalınca yeni hökumət neyləyəcək?
Korrupsionerlərə və korrupsiyaya qarşı mübarizə fərqli şeylərdir. İkincisi daha
mürəkkəbdir. 30 korrupsioneri kənarlaşdırmaq cəmiyyəti dəyişməyəcək”,– deyə
o, sözlərinə əlavə edib. Müəllif yazır ki, Ermənistan inqilabının ilk
günlərində tanınmış oliqarxların həbsi camaatın yanğısıyla yaxşı uzlaşırdı.
"İctimaiyyət antikorrupsiya mövzusunda nə dərəcədə bilgilidir, əmin deyiləm.
Ermənistanlılar adətən korrupsiya deyəndə ölkəni talayan oliqarxları
təsəvvürlərinə gətirirlər”, – deyə "Chatham House” beyin
mərkəzindənAnahit Şirinyanbildirib. Məsələ bundadır ki, bəzi əsas
oliqarxlar Paşinyan hökumətinin qəzəbindən kənar qala bilib və bu da hökumətin
apardığı həbslərin selektiv olması iddialarına yol açıb. "Söhbət ancaq pis
oliqarxlardan gedə bilməz. Ermənistanda universitetlərdən tutmuş xəstəxanalara
qədər çox yerdə korrupsiya yayılıb. Buna qismən ictimai-mədəni problem kimi də
baxılır”,– London İqtisadiyyat MəktəbindənArmine İşkanyandeyib.
Yeri gəlmişkən, ekspert dairələrində prezident Armen Sarkisyanın gözlənilmədən Rusiya səfər etməsi geniş müzakirə olunur və bu səfərin bir çox sualların yaranmasına səbəb olduğu vurğulanır. Qeyd olunur ki, növbədənkənar parlament seçkilərinin keçirilməsinin planlaşdırıldığı bir vaxtda Sarkisyanın Moskvaya səfər etməsi ayrı bir məna kəsb edir. Bu səfər Kremlin seçkilərə müdaxilə etmə ehtimalının yüksək olması ilə əlaqələndirilir.
Azər NURİYEV
Yeri gəlmişkən, ekspert dairələrində prezident Armen Sarkisyanın gözlənilmədən Rusiya səfər etməsi geniş müzakirə olunur və bu səfərin bir çox sualların yaranmasına səbəb olduğu vurğulanır. Qeyd olunur ki, növbədənkənar parlament seçkilərinin keçirilməsinin planlaşdırıldığı bir vaxtda Sarkisyanın Moskvaya səfər etməsi ayrı bir məna kəsb edir. Bu səfər Kremlin seçkilərə müdaxilə etmə ehtimalının yüksək olması ilə əlaqələndirilir.
Azər NURİYEV