“Ermənistanda ABŞ-Rusiya qarşıdurması açıq müstəviyə keçib”
Ermənistanda siyasi böhran
davam edir. Dünənə qədər forpost ölkədə baş verən prosesləri kənardan müşahidə
edən rəsmi Moskva artıq Ermənistan rəhbərliyi ilə əlaqə yaratmağa başlayıblar.
Kremlin mətbuat xidmətinin yaydığı məlumata görə, Rusiya prezidenti Vladimir
Putin və Ermənistan prezidenti Armen Sarkisyan arasında telefon danışığı olub.
Danışıqlar zamanı Ermənistanda yaranmış mövcud vəziyyət müzakirə edilib. Bu
telefon danışığının ardınca Ermənistanın xarici işlər naziri Edvard Nalbandyan
Moskvaya yola düşüb. Eyni zamanda, Ermənistanın baş naziri vəzifəsini müvəqqəti
icra edən Armen Gevorkyanın da məsləhətləşmələr üçün Moskvaya getməsi barədə
məlumatlar yayılıb.
"Atlas”
Araşdırmalar Mərkəzinin rəhbəri, politoloq Elxan Şahinoğlu hesab edir
ki, Moskva Ermənistanda yaşanan olaylar zamanı S.Sarkisyanı qorumayıb və onun
istefasını kənardan seyr edib. Politoloqun qənaətincə, Kremldən keçmiş baş
naziri müdafiə edən heç bir açıqlama da verilməyib: "Ancaq Moskva indi düyməyə
basıb. Görünür, Kremldə anlayıblar ki, Ermənistanda küçə hakimiyyəti formalaşır
və bu, uzun müddət davam edə bilər, bu isə anarxiyaya aparır. Ona görə də
Rusiya prezidenti Vladimir Putin erməni həmkarı Armen Sarkisyana zəng edib,
xarici işlər naziri Edvard Nalbandyanı təcili Moskvaya çağırıblar. Kremlin bu
addımının iki məqsədi var. Birincisi, Ermənistandakı vəziyyət və hakimiyyətin
planları barədə informasiyaları ilk əldən almaq istəyirlər. İkincisi də Yerevana
edilən telefon zəngləri ilə Qərb dövlətlərinə mesaj yollayırlar ki,
Ermənistanın taleyini Kreml həll edir və başqa dövlətin bu ölkədə işi olmasın”.
Siyasi
İnnovasiya və Texnologiyalar Mərkəzinin direktoru, politoloq Mübariz Əhmədoğlu da
qəzetimizə açıqlamasında bildirib ki, Ermənistan prezidenti A.Sarkisyan yalnız Rusiya
prezidenti V.Putinə deyil, həmçinin Kollektiv Təhlükəsizlik Müqaviləsi üzrə
Təşkilatın (KTMT) üzvü olan Qazaxıstan və Belarus rəhbərlərinə də zəng vurub. Politoloqun
fikrincə, Ermənistanda A.Sarkisyan vasitəsilə növbəti Rusiya layihəsi
reallaşdırılır: "Artıq başa düşülür ki, Ermənistanın daxilində mitinqləri
sakitləşdirəcək güc yoxdur. Ola bilsin ki, Ermənistan daxilindəki polis qüvvələrinə
KTMT sülhməramlılarını da əlavə etsinlər. Ona görə də Armen Sarkisyanı başa
salıblar və o, da Belarus və Qazaxıstan dövlət başçıları ilə telefon danışığı
aparıb. Ermənistanda ABŞ-Rusiya qarşıdurması açıq müstəviyə keçib. İndiyə qədər
bu mübarizə gizli formada gedirdi. Serj Sarkisyan iki stulda oturmağa can atır,
ayrı-ayrılıqda Rusiya və Amerikaya onların adamı olduğunu inandırmağa
çalışırdı. Lakin sonda məlum oldu ki, hərbi cinayətkar Sarkisyan nə Rusiyanı,
nə də Amerikanı aldada bilməyib, yalnız özünü və erməni xalqını aldadıb. Bundan
sonrakı proseslərə ABŞ-Rusiya qarşıdurması prizmasından baxmaq gərəkdir.
Proseslərin gedişində maraqlı məqamlardan biri də budur ki, dünəndən etibarən
Serj Sarkisyanın yenidən siyasətə qayıtmaq cəhdləri müşahidə olunmağa başlayıb.
Halbuki, Rusiya bunun qəti əleyhinədir. Fikir verdinizsə, Sarkisyan hakim
partiya funksionerlərini başına toplayıb iclas keçirən kimi dərhal Moskvadan
sabiq baş nazir Karen Karapetyana göstəriş gəldi ki, hakim partiyanın
sədrliyini üzərinə götürsün. Ermənistanın hakim Respublika Partiyası keçirdiyi
təcili iclasda Karen Karapetyanın baş nazir postuna namizədliyini də irəli
sürdü. Bununla da Serj Sarkisyanın yenidən siyasətə qayıtmaq cəhdinin qarşısı
alındı. Mayın 1-də baş tutacaq parlament iclasında baş nazir seçilmək üçün 53
deputatın səsi kifayətdir. Hakim Respublika Partiyasının isə hazırkı
parlamentdə 58 mandatı var”.
Politoloq bildirib ki,
Ermənistandakı hadisələrin dinc yolla başa çatması qeyri-mümkündür: "ABŞ hesab
edir ki, müxalifətçilər dinc yolla hakimiyyəti ələ almalıdır. Təbii ki, Rusiya
bunu qəbul edəsi deyil. Ona görə də rəsmi Moskva aktivlik nümayiş etdirir.
Edvard Nalbandyanın Moskvaya səfərinə gəlincə, hesab edirəm ki, o, rusiyalı
həmkarı ilə KTMT sülhməramlılarının Ermənistana gətirilməsi məsələsini müzakirə
edib. Bununla yanaşı, Nalbandyan Kreml rəhbərliyinin Serj Sarkisyana olan
qəzəbini, kinini azaltmaq üçün də cəhdlər edəcək. Armen Gevorkyana gəlincə, o,
Serj Sarkisyanın sağ əli idi. "Qarabağ klanı”nın ən inanılmış adamlarından
hesab olunur. Serj Sarkisyan Ermənistana başçılıq edəndə Armen Gevorkyan
prezident administrasiyasına rəhbərlik edirdi. Serj baş nazir olanda isə Armeni
özünə müavin təyin etmişdi. Hiss olunurdu ki, əsas işlər Armen vasitəsilə idarə
olunacaq. Bu adamın Moskvaya səfəri sırf Serj Sarkisyanı yenidən "diriltmək”,
onun təzədən hakimiyyətə qayıdışını təmin etmək, bu barədə müzakirələr aparmaq
niyyəti daşıyır”.
Rufik
İSMAYILOV