“Ermənistan Rusiyanın nəzarətindən çıxa bilməz”
Şərq
Tərəfdaşlığı Avropa İttifaqının (Aİ) üzv dövlətləri, həmçinin Azərbaycan,
Belarus, Ermənistan, Gürcüstan, Moldova və Ukrayna daxil olmaqla, altı tərəfdaş
ölkəni bir araya gətirən birgə təşəbbüsdür. Avropa Qonşuluq Siyasəti (AQS)
2004-cü ildə Aİ-nin qonşu ölkələri ilə münasibətləri üçün çərçivə kimi ərsəyə
gətirilib. Aİ ilə onun altı Şərq Tərəfdaş ölkəsi arasında münasibətlərinin
çərçivəsini assosiasiya sazişləri, eləcə də Assosiasiya gündəlikləri və
Tərəfdaşlıq prioritetləri kimi müvafiq ikitərəfli anlaşmalar tənzimləyir. 2014-cü
ildə imzalanmış assosiasiya sazişləri, eləcə də Dərin və Hərtərəfli Azad
Ticarət Zonalarına dair sazişlər Aİ ilə Gürcüstan, Moldova və Ukrayna arasında
münasibətləri yeni səviyyəyə daşıyıb. Bu sazişlərin məqsədi siyasi assosiasiya
və iqtisadi inteqrasiyanı gücləndirməkdir. Bunlar Ttrəfdaş ölkələrin
qanunvericiliyi və standartlarının Aİ-yə uyğunlaşdırılması istiqamətində ciddi
islahatların həyata keçirilməsini nəzərdə tutur.
Bu münasibətlərin davam
etdirilməsi, daha da inkişaf etdirilməsi üçün noyabrın 24-də Brüsseldə 5-ci
Şərq Tərəfdaşlığı sammiti keçiriləcək. Aİ-nin üzv dövlətləri və altı tərəfdaş
ölkənin dövlət və ya hökumət başçıları sammitdə gələcək əməkdaşlığı müzakirə
edəcəklər. Onlar həmçinin, Şərq tərəfdaş ölkələrinin vətəndaşlarına təsirli
faydaların verilməsinə xüsusi diqqət yetirərək, ötən il Riqada keçirilən
sammitdən sonrakı nailiyyətləri qiymətləndirəcəklər.
Sammit
çərçivəsində Ermənistan tərəfindən Aİ ilə Assosiativ üzvlüyə dair sazişin
imzalanacağı gözlənilir. Təbii ki, istənilən dövlətin hansısa beynəlxalq
qurumla və ya ölkə ilə istənilən sazişi imzalaması onun öz işidir. Lakin söhbət
işğalçı dövlətdən, Rusiyanın forpostu Ermənistandan gedirsə, burada vəziyyət
bir qədər fərqlidir. Çünki, 2013-cü ildə Ermənistanın "Şərq Tərəfdaşlığı”
çərçivəsində Assosiasiya sazişi imzalamasına son anda Rusiya prezidenti
Vladimir Putinin qadağa qoyduğu heç kimə sirr deyil. Məhz həmin ərəfədə
Moskvaya səfər edən Serj Sarkisyan Ermənistana qayıdandan sonra ölkəsinin Avrasiya
İqtisadi İttifaqına üzv olacağını bəyan etdi. Bu dəfə isə Kreml rəhbərliyi forpost
ölkə başçısının davranışlarını susqunluqla müşahidə edir. Belə olan halda
maraqlı suallar yaranır: Rusiya Ermənistanın Aİ ilə Assosiativ üzvlüyə dair çərçivə
sazişi imzalamasına nəyin müqabilində razılıq verir? Yaxud, Rusiya Ermənistanı
Avropaya nə üçün buraxır?
Politoloq Fikrət Sadıxov mövzu ilə
bağlı "Kaspi”yə açıqlamasında deyib ki, Ermənistan 2013-cü ildə Aİ ilə
Assosiativ sazişi daha geniş formatda imzalamaq istəyib. Hətta həmin sazişdə Aİ
ilə Ermənistanın maraqlarına cavab verən maddələrin nəzərdə tutulduğu da qeyd
olunur. Politoloqun sözlərinə görə, o dövrdə Sarkisyan təcili Moskvaya
çağırıldıqdan sonra sözügedən sazişdəki bir sıra maddələr oradan götürülüb:
"Kreml rəhbərliyi görür ki, Ermənistanın Avropa İttifaqı ilə assosiativ saziş
imzalamasının qarşısını ala bilmir. Ona görə də forpost Ermənistana bu sazişi
rəsmi Moskvanı qane edən formatda imzalamağa razılıq verilib. Sarkisyana yumşaq
şəkildə desək, tövsiyə edilib ki, necə davranış nümayiş etdirsin. Lakin bu
sazişin imzalanması heç də o demək deyil ki, Ermənistan Rusiyanın orbitindən
çıxır. Əvvəla Ermənistan
Kremlin layihələri olan Avrasiya İqtisadi İttifaqının və Kollektiv
Təhlükəsizlik Müqaviləsi Təşkilatının üzvüdür. Digər tərəfdən, Ermənistan bu
regionda Rusiyanın əsas oyunçusudur. Ermənistan bu rolu bundan sonra da icra
edəcək. Bu baxımdan, 2013-cü ildə Ermənistan prezidentinin Moskvaya çağırılması
xəbərdarlıq mahiyyəti daşıyıb. Serj Sarkisyan bu xəbərdarlıqdan nəticə
çıxararaq, noyabrın 24-də Brüsseldə yalnız icazə verilən çərçivədə Avropa
İttifaqı ilə saziş imzalaya bilər. Bu bir reallıqdır ki, Ermənistan heç vaxt
Rusiyadan üz çevirə bilməz. Hətta Avropa İttifaqı ilə assosiativ saziş imzalasa
belə, bu, Ermənistan-Rusiya münasibətlərində heç nəyi dəyişməyəcək. Rusiya
regiondakı platsdarmını heç zaman itirmək istəməz”.
Politoloq Qabil Hüseynli də hesab edir
ki, həmin sazişdə Dağlıq Qarabağa dair irəli sürülən müddəa, yəni, problemin
ərazi bütövlüyü və xalqların öz müqəddəratını təyin etmə prinsipi əsasında
həlli Rusiyanı da qane edir. Politoloqun fikrincə, Kreml rəhbərliyi əvvəlcədən proqnozlaşdırıb
ki, Qərb ölkələri, o cümlədən Avropa İttifaqı Dağlıq Qarabağ münaqişəsinin
həllini məhz bu istiqamətdə müəyyən edəcək: "Ermənistan tərəfi həmin sənədə
xalqların öz müqəddəratını təyinetmə prinsipinin salınması üçün cəhdləri
göstərir. Təbii ki, belə mövqe Azərbaycanı qane edə bilməz. Problemin sülh yolu
ilə həllində rəsmi Bakı ölkələrin ərazi bütövlüyü məsələsində razılığa gəlsə
də, tarixi Azərbaycan torpağında ikinci erməni dövlətinin yaranmasına göz yuma
bilməz. Bu qətiyyətli mövqeyi Azərbaycan Prezidenti dəfələrlə bəyan edib.
Bundan başqa, Ermənistan hansı təşkilata üzv olsa da, hansı beynəlxalq qurumla
saziş imzalasa da Rusiyanın nəzarətindən çıxa bilməz. Ermənistan Rusiyanın
əyaləti kimi bir yerdir. Ermənistan hansı beynəlxalq qurumda təmsil olunmasına
baxmayaraq, Rusiyanın əmrlərini qeyd-şərtsiz yerinə yetirəcək. Azərbaycan isə
sözün əsl mənasında müstəqil, suveren bir ölkədir. Ona görə də Azərbaycanın
milli və dövlətçilik maraqlarına uyğun gəlməyən, qarşılıqlı əməkdaşlığa,
bərabər hüquqlu münasibətlərə söykənməyən hər hansı sazişə heç bir zaman qol
çəkilməz”.
Rufik İSMAYILOV