Ermənistan Rusiya telekanallarında təhqir olundu
Rusiya mediası və əsasən də telekanalları Ermənistanın Avropa
İttifaqı ilə yaxınlaşma barədə imzaladığı sazişi geniş müzakirə etməkdədirlər.
Tok-şoularda işğalçı dövlət sözün əsl mənasında təhqir olunur və aşağılanır.
Sözsüz ki, bütün bunlar telekanalların özlərinin "məhsulu” və yaradıcılığı
deyil. Bütün bunlar ən yüksək səviyyədə hazırlanır, tapşırıq kimi hakimiyyətin nəzarəti altında olan
telekanallara ötürülür. Bəlli olduğu kimi, rəsmi Yerevan ötən günlərdə Aİ-nin
"Şərq tərəfdaşlığı” ilə əməkdaşlığı genişləndirmək barədə sazişə imza atıb.
Rusiyanın Birinci kanalında efirə gedən "Zaman göstərər” tok-şousunda
ekspertlər - polşalı politoloq Tomaş Maçeyçuk və jurnalist Maksim Şevçenko
arasında gedən müzakirədə Ermənistan aşağılanıb. Gərginlik diskussiya zamanı
polyak politoloq Şevçenkodan "Ermənistan sizin düşmənizdir, yozsa
müttəfiqinizdir” sualını verməsi zamanı yaranıb. Şevçenko da fikirləşmədən
"Rusiyanın müttəfiqi olan hissə bizim müttəfiqimizdir, sizin müttəfiqiniz olan
hissə isə bizim düşmənimizdir” deyib. "Bəs Qarabağ kimindir”, - deyə Maçeyçuk ardınca soruşub. Jurnalist də cavabında
bildirib ki, "Qarabağ Azərbaycan ərazisidir və Azərbaycanın məsələsi də Moskva,
Ankara və Tehran arasında üçlü müqavilə ilə tənzimlənməlidir”.
Başqa bir nüfuzlu kanalda NTV-də efirə gedən "Görüş yeri” proqramında
da bu məsələ müzakirə mövzusu olub. Tok-şounun aparıcısı Norkin bildirib ki,
Rusiya Ermənistanın təhlükəsizliyinin təminatçısı rolunda çıxış edir və Dağlıq
Qarabağ münaqişəsinin yeni qüvvə ilə güclənməsinə qarşıdır. Bu zaman aparıcı
Olqa Belova qeyd edib ki, Avropa İttifaqı Dağlıq Qarabağ münaqişəsində neytral
mövqe tutan Rusiyadan fərqli olaraq Ermənistandan tanınmamış respublika
ərazisindəki qoşunlarının çıxarılmasını tələb edir. Eyni zamanda xatırladıb ki,
Azərbaycan "Şərq tərəfdaşlığı” sammitinin yekun bəyannaməsinə üzv dövlətlərin
ərazi bütövlüyünə dəstəyi nəzərdə tutan bəndi salmağa müvəffəq olub.
Ermənistanın israr etdiyi xalqların öz müqəddəratını təyin etmə barədə bənddən
isə bəyannamədə söhbət belə getmir. Beləliklə, Belovanın qənaətincə, rəsmi Bakı
"Şərq tərəfdaşlığı” sammitinin yekun bəyannaməsində öz xeyrinə uyğun bəndi
salmağa müvəffəq olub. Rusiyanın məşhur politoloqu Sergey Markov isə hesab edir
ki, Aİ ilə Ermənistan arasında imzalanan saziş Rusiyaya qarşı hücuma hazırlıq
mənasını kəsb edir. Onun sözlərinə görə, bu saziş Ermənistan-Rusiya münasibətlərinin
pisləşməsinə işarədir. "Birincisi, Yerevanın Moskvaya qarşı iradları var.
Onların qənaətincə, biz onlara az pul veririk. İkincisi, Hitlerin tərəfdarı
olan Njdenə münasibətdə bizimlə onlar arasında fikir ayrılığı mövcuddur. Ona
Ermənistanda heykəl qoyur, mili qəhrəman adlandırırlar. Bundan əlavə,
Ermənistan tərəfindən Rusiyanın daxili işlərinə qarışmaq cəhdləri olub. Rusiya
telekanallarına təzyiq göstərərək, Njde barəsində nasist cinayətkar ifadəsini
işlətməməyi tələb ediblər. Axı o bildirirdi ki, Almaniya uğrunda ölən
Ermənistan uğrunda ölmüş olur”. "Nə üçün Avropa İttifaqı Avrasiya İqtisadi
İttifaqına üzv olan Ermənistana güzəşt edərək, onunla birgə sazişə imza atdı”
sualına cavab verən S.Markov "Avropalılar elə belə də deyirlər – "Ermənistan
Gömrük İttifaqına üzv olunduğundan bizə ona Ukraynayla olduğu kimi öz
şərtlərimizi irəli sürə bilmərik. Əvvəlcə bu şərtləri onlara yeridək, sonra isə
digər məsələləri həll edərik”. Avropalılar mütəmadi olaraq Ermənistana öz
şərtlərini yeridəcəklər. Avropa İttifaqı vəziyyəti münaqişə həddinə çatdıracaq.
Avropa İttifaqı Rusiya ilə postsovet məkanında əməkdaşlıq etmir. Halbuki, biz
bu əməkdaşlığı təklif etmişdik”, - deyə Markov NTV telekanalında efirə gedən
verilişdə bəyan edib.
Öz növbəsində politoloq Oleq Barabanov da hesab edir ki, Ermənistan
Avropaya heç gərək də deyil və əsas məqsəd Avrasiya İqtisadi İttifaqına paz
çalmaqdır. "Və burada sualı Avropaya deyil, Ermənistana vermək gərəkdir.
2013-cü ildə bu ölkə şərti mənada desək, azad idi və Avropa İttifaqının
Assosiativ üzvlüklə yanaşı, Avrasiya İqtisadi İttifaqı arasında seçim etməkdə
müstəqil idi. Ermənistan Aİ-ni seçdi. İndi Ermənistan müstəqil deyil. O,
Aİİ-nin tamhüquqlu üzvüdür. Lakin baxın, Avropa İttifaqı ilə saziş imzalayır”,
- deyə Barabanov əsəbi formada bəyan edib. Onu da qeyd edək ki, NTV-də gedən
diskussiya ermənilər üçün çox təhqiredici formada keçib. Məsələn, politoloq
Nikolay Starikov Ermənistanın Aİ ilə imzaladığı sazişlə, Rusiyanın Ermənistanla
imzaladığı sazişlər arasında paralellər aparıb. Bu zaman o, Ermənistanı həm xəz
şuba, həm də sırğa almaq istəyən arvad rolunda göstərib. Politoloq Gevorq
Mirzoyan isə belə vəziyyətdə yumşaq ritorika nümayiş etdirməyi və arvadı zor
gücünə bağlı qapılar arxasında saxlamamağı məsləhət görüb. O, hətta Ermənistanı
onun-bunun qucağında oturan ev pişiyinə bənzədib. Aparıcı Olqa Belova isə
cavabında bildirib ki, pişikləri axtalamaq da mümkündür.
Maraqlısı odur ki, xanım aparıcı verilişi aşağıdakı sözlərlə bitirib –
"gəlin, indi də başqa bir gəzəyən arvada - Belarusa keçək”. Bu zaman Gevork
Mirzoyan deyib ki, Rusiyadan həddən artıq asılılıq Ermənistana çox ciddi zərbə
vurur. "Ermənistan bu gün 48 faiz Rusiyadan asılıdır. Bu asılılıq getdikcə
gərgin xarakter alır. Əgər siz Rusiya-Ermənistan İttifaqında bərabər hüquqda
deyilsinizsə və özünüzü kiçik tərəfdaş hesab edirsinizsə - bu, hər zaman
gərginlik yaradır”. Öz növbəsində rusiyalı politoloq Boris Nadejdin bildirib
ki, erməni həmkarının məntiqindən dəhşətə gəlib. "Onun məntiqi belədir: mən
balacayam, lakin qürurlu qızam. Artıq bakirəliyi də əldən gedib, lakin yenə də
özünü qürurlu qız kimi hiss edir”, - deyə Nadejdin vurğulayıb.
Azər NURİYEV