Ermənistan Rusiya mediasının hədəfində

Vətəndaş müharibəsinin bir addımlığında olan Ermənistanda vəziyyət kritik həddədir. Hazırkı rejimlə "Qarabağ klanı” və onun tör-töküntüləri arasında gərginlik pik həddə çatıb. Qarşılıqlı ittihamlar o həddə çatıb ki, tərəflər bir-birini satqınlıqda günahlandırır. Beləliklə, vəziyyət kritik həddədir və proseslərin belə davam edəcəyi təqdirdə, xaos və böhran qaçılmaz olacaq. Dünya mediasının diqqət mərkəzində olan Ermənistanda baş verənlərə reaksiyalar müxtəlifdir. Bir qisim rusiyapərəst qüvvələri günahlandırır, bir qisim də Qərbin müxtəlif dairələnin sifarişi ilə proseslərin gərginləşdirildiyini iddia edir. Rusiya mediasında dərc olunan məqalələrdə ekspertlər və müəlliflər birmənalı olaraq Nikol Paşinyanı günahlandırır. Ən əsası, baş nazirin Rusiya silahları ilə bağlı söylədikləri ruslara yaman yer edib. Bu səbəbdən də əksər media vasitələri baş naziri hədəfə alıblar. Bütün nəşrlər birmənalı olaraq mövcud durumun kritik olduğunu bildirirlər. Eyni zamanda, Ermənistan hakimiyyətinin baş verən hərbi fiaskodan hələ də nəticə çıxarmadığı vurğulanır. Bəziləri isə hesab edir ki, Ermənistanın bəlalarının səbəbi ermənilərin əldə bayraq etdikləri aşırı millətçilikdədir.

"İt hürər, karvan keçər” prinsipi ilə hərəkət etməyi tövsiyə edərdim”

Ermənistanda baş verənləri analiz edən deputat bu qənaətdədir ki, erməni xalqının, Ermənistanın və hakimiyyətin maraqları baş nazir Nikol Paşinyanın mövqeyi ilə üst-üstə düşmür: "Paşinyan rejimi qərbyönümlü və marionet bir rejimdir. Yalan və ermənilərin özlərinə qarşı zorakılıq üzərində fəaliyyət göstərir. Bu səbəbdən də Paşinyanı mütəmadi olaraq devirməyə çalışırlar – gah etiraz edən ictimaiyyət, gah da hərbçilər. Qısası, erməni müxalifətini də "hədiyyə” adlandırmazdım. Yerevanda dövlət paradiqmasının dəyişməsindən çox, klanların müharibəsini müşahidə edirik. Ermənistana yeni milli strategiya, fərqli bir dövlət strategiyası və əvvəlki zərərli rusofob, qərbyönümlülük, azərbayacanafobiya kimi zərərli vərdişlərdən yaxa qurtarmaq gərəkdir. Lakin hesab edirəm ki, Rusiya və Azərbaycanın birgə səylərilə onun xroniki sosial-siyasi vərdişlərindən qurtula bilərik. Hələ ki, erməni tərəfinin aqressiv-neqativ bəyanatlarını, sadəcə xəstəliyin əlamətləri kimi qarşılaya bilərik. Mən indi daha çox "it hürər, karvan keçər” prinsipi ilə hərəkət etməyi tövsiyə edərdim. Erməni radikal siyasətçilərinin Qarabağ ermənilərin öz müqəddəratını təyin etmək çağırışları bir məqsədi daşıyır – sülhyaratma missiyasını dondurmaq və erməni revanşı üçün zəmin yaratmaq, yəni müharibəni yenidən başlatmaq. Revanşistlərin məqsədi yeni şovinist partlayışa, nəticədə çoxsaylı insan qurbanlarına hədəflənib. Bu səbəbdən də üçtərəfli razılaşmaya əməl etmək gərəkdir. Əldə olunan razılaşmanın qarantı isə Azərbaycan Silahlı Qüvvələri və Rusiya sülhməramlı kontingentidir. Xüsusi qeyd edim ki, onlar çox yaxşı şəkildə anlaşırlar”.

"Paşinyan kinoda rol alsaydı...”

Başqa bir nüfuzlu nəşr "Kommersant”da dərc olunan məqalədə isə bildirilir ki, Nikol Paşinyan müxalifətlə küçə qarşıdurmasında qalib gəldi. Müəllif yazır ki, hökumət başçısı rəqiblərinə qarşı əks-hücuma keçdi və göstərdi ki, eyni zamanda həm iqtidar ola, həm də rəqibləri ilə tamamilə inqilabi mübarizə apara bilər: "Nikol Paşinyan siyasətdə mümkün olmayanı mümkün etmək təcrübəsi göstərir. Ölkədə bütün hakimiyyət əlində olduğu halda, o, nə vaxt lazım olursa, dərhal inqilabçı roluna girir. Və bu sehr işə yarayır. 1 martda onun çağırışı ilə on minlərlə tərəfdarı itaətkarlıqla paytaxtın mərkəzi meydanını doldurdu. Həmin gün onlar burada cənab Paşinyana lazım idi. Baş nazirin keçirdiyi aksiya ilə, demək olar ki, eyni zamanda "Vətəni xilas hərəkatı”nda birləşən müxalifət parlament yaxınlığında öz mitinqini keçirirdi. Və Nikol Paşinyan üçün dəstəyin kimin tərəfində olduğunu göstərmək vacib idi. Bu, alındı. "Respublika” meydanındakı izdiham hökumət əleyhinə olan etiraza nisbətən daha təsirli görünürdü”. Müəllif yazır ki, Nikol Paşinyan kinoda rol alsaydı, "Oskar”a iddiaçı ola bilərdi. "Əgər səhnədə çıxış edən adamın artıq 3 ildir ölkəni idarə etdiyi məlum olmasaydı, düşünmək olardı ki, bu parlaq natiq xalqı rejimlə mübarizəyə qaldıran müxalifət lideridir”. "Kommersant”ın "Mənim addımım” fraksiyasında olan mənbəsi anonimlik şərtilə xəbər verib ki, erkən seçkilərin keçirilməsi prosesi ən yaxın zamanda, Baş Qərargah rəisi məsələsi həll edilən kimi, "işə salınacaq”.
İqtidar blokundan olan deputat "Kommersant”a deyib ki, bu proses başa çatan kimi biz erkən seçkilərin təşkilinə başlayacağıq. Biz ona, yaranmış durumdan çıxış üçün fürsət kimi baxırıq”.

"Ölkəni ən azı 300-400 min insan tərk edəcək”

"Moskovski komsomolets”də dərc olunan məqalədə isə Ermənistan parlamentinin keçmiş deputatı Tevan Poqosyanın fikirləri yer alıb. Nikol Paşinyanın çıxışını neqativ qiymətləndirən keçmiş deputat onu yalançılıqda ittiham edir. Növbədənkənar parlament seçkilər keçirilməsi barədə vədini bir neçə dəfə pozmaqda günahlandırıb. "Biz hələ bir il bu rəhbərliyin hakimiyyəti altında yaşamalıyıq. Azərbaycan hər gün öz maraqlarını yeridir, biz ona heç nə ilə cavab vermirik. Azərbaycanda hərbi vəziyyət çoxdan ləğv edilib, bizdə isə bəlli olmayan səbəbdən hələ qalır.”
Rusiyanın "Jurnalistskaya pravda” nəşri "İsgəndər” Operativ-Taktiki Raket Kompleksinin səmərəsizliyi ilə bağlı Paşinyanın qalmaqallı bəyanatına və bir neçə gün sonra "üzr istəmək cəhdi”nə toxunub.

Azər NURİYEV