Ermənistan ABŞ-ın qəzəbinə tuş gəlib
ABŞ Ermənistanı "qara siyahı”ya salınmış Rusiya şirkətləri ilə
sazişlər bağlayacağı təqdirdə, sanksiyalarla üzləşəcəyi barədə xəbərdarlıq
edib. Ermənistanın "Aykakan Jamanak” qəzeti xəbər verir ki, bu barədə ABŞ-ın
Yerevandakı səfirliyinin bəyanatında bildirilib. "Biz hökuməti və bir sıra
ölkələrin özəl şirkətlərini Rusiyanın adı siyahıda olan şirkətləri ilə
əhəmiyyətli sazişlər imzalanacağı təqdirdə, sanksiyalar tətbiq edilə biləcəyi
ilə bağlı xəbərdar etdik", - ABŞ diplomatik missiyasından bildirilib. Nəşr
qeyd edir ki, kontekstdən "əhəmiyyətli sazişlər” deyərkən nə nəzərdə tutulduğu
aydın olur. Xatırladaq ki, ötən ilin dekabrında Ermənistan prezidenti Serj Sarkisyan
daha əvvəl ölkə parlamentinin qəbul etdiyi, Rusiyadan 100 milyon dollar
məbləğində silah alınması üzrə sazişi ratifikasiya edib. "Digər ölkələrin
Rusiyadan hərbi-kəşfiyyat vasitələri almasını məhdudlaşdıraraq, Rusiyanı onların
satışından əldə olunacaq gəlirlərdən məhrum edirik. Çünki bu gəlirlər
beynəlxalq mənfi təsir və qeyri-sabitlik kampaniyasını davam etdirilməsi üçün
istifadə edilə bilər”, - deyə ABŞ-ın Ermənistandakı səfirliyindən vurğulanıb. Qeyd
edək ki, Ermənistanın maliyyə naziri Vardan Aramyan sanksiya riski olduğunu
təsdiqləyib. Onun sözlərinə görə, Yerevan üçün problemli vəziyyət yaranacağı
halda, amerikalı tərəfdaşları ilə danışıqlara başlayacaqlar.
Beləliklə, ABŞ sanksiyalarının miqyasının daha geniş coğrafiyanı
əhatə edəcəyi barədə proqnozlar reallığa çevrilir. İlk növbədə Rusiyanın
hərbi-sənaye kompleksi ilə əməkdaşlıq edənlərin hədəfə alınacağı artıq
reallaşıb. Lakin ABŞ-ın xəbərdarlığı sözsüz ki, daha qlobal kontekst kəsb edir
və Dağlıq Qarabağ münaqişəsinin nizamlanması prosesinə birbaşa təsir edə bilər.
Erməni tərəfi bu məlumatdan dərhal sonra iddia edib ki, belə bir xəbərdarlıq
məktubu Azərbaycana da göndərilə bilər. Lakin məsələ ondadır ki, Azərbaycan
Ermənistandan fərqli olaraq, hərbi-texniki əməkdaşlıq məsələlərində çoxşaxəli
siyasət yürüdür. Məsələn, Azərbaycan hərbi sahədə İsrail, Türkiyə və digər
ölkələrlə sıx əməkdaşlıq edir. Ermənistan isə yalnız Rusiya ilə əməkdaşlıq
edir. Bundan əlavə Rusiyanın tam siyasi və iqtisadi asılılığındadır. Lap imkan
verilsə belə, onun buna iqtisadi potensialı imkan vermir. Azərbaycan isə bu
sahədə daha əlverişli vəziyyətdədir. "Vestnik Kafkaza” yazır ki, baxmayaraq ki,
Rusiya Azərbaycana 4 milyardlıq hərbi-sursat, texnika satıb, Bakı geniş hərbi
əməkdaşlıq coğrafiyasına malikdir.
Ümumiyyətlə, Trampın hakimiyyətə
gəlişi ilə bir sıra postsovet ölkələrinə, o cümlədən Ermənistana ayrılan
yardımlarda azalma müşahidə edilməkdədir. Yeri gəlmişkən, yanvarın sonunda ABŞ
səfirliyi ötən il üçün Ermənistanın investisiya mühiti ilə bağlı hesabat dərc
edib. Burada investorlar üçün vəziyyətin əlverişli olmadığı xüsusi vurğulanıb.
Xüsusən də hakimiyyət orqanları iqtisadiyyatı monopollaşdırmaqda ittiham
olunublar. "Vestnik Kafkaza”a bu hesabatın nə qədər həqiqəti əks
etdirdiyini şərh edən erməni eksperti
Arman Gevorkyan bildirib ki, məlumat tam şəkildə həqiqəti əks etdirir. "Burada
qeyri-adi, gözlənilməz və ekstaordinar nəsə yoxdur. Hakimiyyətin bir sıra
biznesmenlərə tam şəkildə himayədarlıq etdiyini 15 ildir ki, təkrarlarıyıq.
Ermənistan iqtisadiyyatının demonopolizasiyası və yaxud rəqabət qabiliyyətinin
artırılması - siyasi məsələdir. Siyasi məsələlər isə prezidentin nəzarəti
altındadır. O isə monopoliyalardan mənfəət əldə edən dairələrin dəstəyinə
malikdir. Buna müvafiq olaraq prezident cavabında monopolizasiya kursunu
götürür. Burada kimin nəyə cavabdeh olduğunu bölmək gərəkdir. 2000-ci illərdən
başlayaraq bütün hökumətlər iqtisadiyyatın monopoliyadan azad olunması
məsələsini həll edə bilməyiblər. Səbəb də qeyd edildiyi kimi, onların siyasi
qərarlar qəbul edə bilməmələridir. İndi hökumətə bu məsələdə nəsə bir irad
bildirmək o qədər də düz deyil - bu hökumət il yarımdır fəaliyyət göstərir və
2000-ci illərdən yığılıb qalan problemləri həll etmək iqtidarında deyil. Siyasi
hakimiyyət prezidentin əlində cəmləşib, hökumətin yox”, - deyə ekspert
vurğulayıb. Qeyd edək ki, hesabatda ölkədə oliqopoliya (bazarın elə bir növüdür ki, bu cür bazarlarda
sadəcə, bir neçə dominantfirmafəaliyyət göstərir.
Bufirmaların hər biri bazarda xeyli yer tutur və qiymətinformalaşması
prosesinə təsir edə bilir. Başqa sözlə, oliqopoliya, eyni fəaliyyət sahəsində
bir-birinə təsir edəcək qədər az sayda firma qarşısında çox sayda alıcının
olduğunu ifadə edir - müəl.) olduğu da əks olunub. Ekspert bildirir ki,
belə bir halın mövcudluğunu hələ sabiq baş nazir Tiqran Sarkisyan da etiraf
edirdi. Lakin o bütün bunları həll edə bilmir, nəzarət prezidentin əlindədir.
Hesabatda investorların Ermənistanın məhkəmə-hüquq sisteminə etibarının
olmadığı da vurğulanır. Səbəb kimi də onların müstəqil olmadığı vurğulanır.
Erməni ekspert bunun da həqiqəti tam şəkildə əks etdirdiyini bildirib. Onun
sözlərinə görə, məhkəmə qərarları icra strukturlarının tapşırığını yerinə
yetirir. "Digər tərəfdən, son 20 ildə məhkəmə sistemi ilə bağlı bütün
islahatlar Qərb ekspertlərindən daxil olub. Bütün bu islahatlar Avropa İttifaqı
ölkələrindən maliyyələşib. Bütün bunlara baxmayaraq, vəziyyət günbəgün
pisləşir. Avropa İttifaqı son illər ərzində məhkəmə-hüquq sahəsində
islahatların həyata keçirilməsinə 20 milyon avro vəsait ayırıb. Lakin avropalı
vergiödəyiciləri bu vəsaitlərin hara sərf olunduğunu və effektin necə olduğunu
bilirlərmi? Yəni islahatlar prosesi üzərində normal nəzarət mövcud deyil.
Ermənistan hakimiyyət orqanlarının siyasi iradəsi mövcud deyil. Lakin
məsuliyyəti tək bizim hakimiyyət deyil, həm də Qərbin məsləhətverici
strukturları daşıyır”, - deyə o əlavə edib. Onun sözlərinə görə, əsas problem
korrupsiya olaraq qalır: "Ermənistanda guya 20 ildən artıqdır ki, korrupsiyaya
qarşı mübarizə aparır. Birincisi, bəllidir ki, Ermənistan bu məsələdə üzərinə
düşən beynəlxalq öhdəlikləri yerinə yetirmir. İkincisi, kütləvi informasiya
vasitələri korrupsiya məlumatları ilə bağlı faktlarla doludur. Hüquq-mühafizə
orqanları isə icra strukturlarının sifarişi ilə oturub-dururlar. Bu planda
Ermənistan digər ölkələrdən heç nə ilə fərqlənmir. Korrupsiyaya qarşı real
mübarizə aparılmır. Bu məsələ də siyasi məsələdir”. Ekspert hakimiyyət
daxilində məsuliyyətin bölgüsünə toxunaraq əlavə edir ki, hesabatda bu məsələ
də əks olunub. Hesabatda, ölkədəki gərgin vəziyyətin birbaşa baş nazir Karen
Karapetyanın nüfuzuna təsir etdiyinə toxunan ekspert hesab edir ki, bütün bu
problemlərin həlli siyasi olmalıdır. "Baş nazir isə siyasi mandata malik deyil”,
- deyə o, fikrini tamamlayıb.
Azər NURİYEV