Ermənilərin 30 il əvvəl başlayan fəlakəti
Otuz il bundan öncə Dağlıq Qarabağda ermənilərin separatçı hərəkatına
rəsmən start verildi. Bu tarixə qədər bölücülük fəaliyyətlərini gizli formada
həyata keçirən separatçılar bu mənfur hərəkətləri ilə on minlərin insanın
ölümünə, yüz minlərlə insanın isə ev-eşiklərindən didərgin düşməsinə səbəb
oldular. Sözsüz ki, bu separatçı hərəkatda ən çox ziyan çəkən Azərbaycan tərəfidir.
Lakin erməni faşist rejiminin bu siyasətindən erməni xalqı da az zərər çəkməyib.
Və bu ziyan tək fiziki deyil, həm də siyasi, iqtisadi və mənəvi mənada ölçülür.
Ermənistan hakimiyyəti fəxrlə torpaqları tutduğunu bəyan edir. Amma sirr deyil
ki, bu işğalçı fəaliyyət erməni xalqının onsuz da ağır olan durumunu daha da çətinləşdirib.
Ölkə regionun iri miqyaslı layihələrindən kənarda qalıb və qalmaqda da davam edəcək.
Bu mənfur siyasətin sadə ermənilərə heç bir mənfəət gətirmədiyini onların
ağlını hələ itirməmiş siyasiləri də açıq şəkildə etiraf etməyə başlayıblar.
Vaxtilə ölkənin birinci prezidenti olmuş Levon Ter-Petrosyanın Dağlıq Qarabağ
münaqişəsinin həllində kompromislərə gedilməsini top-tüfənglə qarşılayanlar,
indi artıq elə də sərt reaksiya göstərmirlər. Xüsusən də bu əhval-ruhiyyə
Bakı-Qars dəmir yolu layihəsinin reallaşmasından sonra güclənib. Petrosyanın
lideri olduğu "Erməni Milli Konqresi”nin sədr müavini Aram Manukyan
"Azatyutyun” radiosuna müsahibəsində 30 il bundan əvvəl baş verənləri artıq
sevinclə deyil, ürək ağrısı ilə xatırlayır. Onun sözlərinə görə, hakimiyyət
orqanları bu "yubiley” tarixinə saymazyana
münasibət bəsləyiblər. "Nə qaldı və biz nə itirdik” sualına Aram
Manukyan belə cavab verib: "Nəyimiz var idi, o da qalıb. İnsanlarımız ölkəni
tərk edib gediblər. Biz o vaxt yaşananları qeyd etməyə çalışırıq, hakimiyyətin
isə kabinetlərdə başı pul qazanmağa qarışıb”, - deyə erməni siyasətçisi
bildirib.
Qeyd edək ki, "yubiley”lə bağlı Serj Sarkisyan kiçik mətnli bir
müraciətlə kifayətlənib. Maraqlısı odur ki, separatçı hərəkatın başlanmasına
önəmli rol oynayan Levon-Ter Petrosyan bu dəfə hər hansı bir müraciətlə çıxış
etməyib, mesaj yaymayıb. Yəqin ki, erməni separatçı hərəkatının vaxtilə öndə
gedəni artıq anlayıb ki, bu fəaliyyət onlara zərərdən başqa heç bir xeyir
gətirməyib. Bu müddət ərzində heç bir dövlət nəinki separatçı rejimin
müstəqilliyini tanıyıb, əksinə işğal altında olan torpaqlardan Ermənistan
qoşunlarının çıxarılmasını tələb edən qətnamələr qəbul edib. Ölkənin siyasi,
hərbi, iqtisadi, sosial və demoqrafik resursları tükənməkdədir, həmçinin,
suveren dövlət kimi Ermənistan öz mövcudluğunu ciddi sual altına qoyub.
Ermənistan istisna olmaqla, bütün beynəlxalq ictimaiyyət Azərbaycanın
beynəlxalq səviyyədə tanınmış sərhədləri daxilində ərazi bütövlüyü və
suverenliyini tanıyır və dəstəkləyir. Bu mövqe BMT Təhlükəsizlik Şurasının
məlum qətnamələri, ATƏT, İslam Əməkdaşlıq Təşkilatı, Avropa Şurası, Avropa
İttifaqı, NATO, Qoşulmama Hərəkatı və digər beynəlxalq təşkilatların
bəyanatları, qətnamə və qərarları, habelə ikitərəfli əsasda digər dövlətlərin
bəyanatlarında və ikili sənədlərində təsbit olunub. Aram Manukyan da qeyd
etdiyimiz fikirləri bir növ təsdiq etmiş olub. Onun sözlərinə görə, xalq
anlamalıdır ki, aşağılanmaqla və əllərini aşağı salmaqla ölkəni itirir: "Erməni
vətəndaşlar özlərində erməni ruhunu, genini qaldırmalıdırlar. Bunu
aktivləşdirməyə çalışın. Qoy bir gün xalq ayağa qalxsın və partlayışa gətirib
çıxaracaq addımlar atsın. Gözəl bir gündə bu Azadlıq meydanı yenidən Azadlıq
meydanına çevriləcək. Ardınca bu hakimiyyəti süpürüb atacaq”. Ən maraqlısı isə
o dövrün hadisələrini əks etdirəm fotosərgiyə insanların münasibəti olub.
Məsələn, radioya açıqlamasında insanlar bildiriblər ki, artıq hər şey onlar
üçün mənasız bir şeyə çevrilib. İnsanlarda əvvəlki əhval-ruhiyyədən əsər-əlamət
qalmayıb. "Biz nəyi qazandıq, nəyi itirdik? Artsaxı qoruyub saxladıq,
sivilizasiyanı isə itirdik” - deyə sakinlərdən biri bildirib.
Beləliklə, artıq erməni siyasətçiləri, cəmiyyəti anlayır ki, Dağlıq
Qarabağ uğrunda haqsız mübarizə onlara yalnız və yalnız fəlakət gətirib. Ermənistan
rəhbərliyi bu reallığı nə qədər tez dərk edərsə, Azərbaycan ərazilərinin
işğalına son qoyarsa, bir o qədər də tez regionda davamlı sülh və sabitlik
bərqərar olar.
Azər