Ermənilər ağalarına qarşı
Ermənistanı hər zaman özünün vassalı, forpostu gözündə görən Rusiya
bu dəfə də onu aşağılayıb. Bu dəfə qalmaqal Ermənistanda rus dilinin statusu
ilə bağlı ortaya çıxıb. Rusiya Xarici İşlər Nazirliyinin xüsusi tapşırıqlar
üzrə elçisi Elyanora Mitrofanova bəyan edib ki, rus dilinə keçmiş sovet
ölkələrində ikinci dövlət dili statusu verilməsi Rusiya xarici siyasətinin
gündəliyinə salınacaq. Onun bu bəyanatı isə Ermənistanda ciddi narazılıqla
qarşılaşıb.
"Ermənistanın dövlət dili erməni dilidir və hər hansı bir dilə ikinci
dövlət dili statusu verilməsinə ehtiyac yoxdur, istər rus, istər yunan, istərsə
də ingilis dili olsun”. Bunu tert.am saytına müsahibəsində parlamentin sədr
müavini Eduard Şarmazanov bildirib. Amma Şarmazanov qeyd edib ki, rus dili də
daxil olmaqla Ermənistan cəmiyyətində xarici dilləri dərinləşdirmək lazımdır,
gənc nəsil azı iki xarici dil - rus və ingilis dillərini bilməlidir. Ermənistan
elm və təhsil naziri Levon Mkrtçyan da ölkədə rus dilinin statusunun
dəyişilməsi barədə məsələyə münasibət bildirib. O, qəti şəkildə buna qarşı
olduğunu bildirib. Onun sözlərinə görə, rus dili Ermənistanda digər dillərlə
eyni statusa malikdir və heç bir dəyişikliyə uğraya bilməz.
Heç kimə sirr deyil ki, ermənilər rusların sayəsində dövlətçilik əldə
etsələr də, ruslara qarşı daim pataloji nifrət bəsləyiblər. Onlar açıq şəkildə
bunu etiraf etməyə cürət etməsələr də, hər halda hər şey göz qabağındadır. Tək
elə rusları ölkədən qovub çıxarmaları buna bariz nümunədir. Bəlli olduğu kimi, Ermənistan
keçmiş SSRİ respublikaları içərisində son 30 ildə etnik rusların azalması
səviyyəsinə görə lider ölkədir. Bu müddətdə Ermənistanda yaşayan rusların sayı
9 dəfə azalıb. Qeyd edək ki, Ermənistan müstəqilliyini əldə edəndən sonra rus
məktəblərinin sayı ölkədə get-gedə azalmaqdadır. Bu gün rus məktəbləri ancaq
Yerevan və Gümrüdə qalıb. Onlar da Rusiya hərbi hissələrinin ərazisindədir və
rus hərbçilərinin uşaqları üçün nəzərdə tutulub. Hazırda Ermənistanın 40
məktəbində "rus sinfi” var və onların cəmi 3-də təhsil rus dilindədir.
Yerevandakı "Rusiya” ictimai təşkilatının rəhbəri Yuri Yakovlev bu
qənaətdədir ki, etnik ruslar və rusdilli əhali özünü Ermənistanda diskomfort
vəziyyətdə hiss edir və hüquqları dövlət tərəfindən lazımi səviyyədə qorunmur,
onlar ölkənin sosial-ictimai həyatına qatıla bilmirlər. Onun sözlərinə görə,
erməni məktəblərinin rusdilli siniflərinə qəbul ciddi şəkildə məhdudlaşdırılıb.
Bu isə öz növbəsində, rusdilli əhalinin böyük əksəriyyətinin iş tapmasına mane
olur. Ermənistanda rus dili, rusların sıxışdırılması ilə bağlı problemlər illər
uzunudur ki, davam edir. Rusiya siyasi dairələrində hesab edirlər ki, forpost
Ermənistanda rusların sayı az olsa da, rus dilinə dövlət dili statusu
verilməlidir. Bu məsələni ən çox qabardanlar Rusiyanın Ermənistandakı keçmiş
səfiri Vyaçeslav Kovalenko və jurnalist Dmitri Kiselyov olub.
Bir faktı da qeyd edək ki, Avrasiya İqtisadi İttifaqını yaradan
Rusiya rus dilinə rəsmi dil statusu verilməsinə çalışır. Aİİ-yə Rusiya ilə
yanaşı, Qazaxıstan və Belarus da daxildir. Belarusda rus dili dövlət dili
statusuna malikdir, Qazaxıstanda yerli dil ilə yanaşı rus dili rəsmən dövlət
təşkilatlarında və yerli idarəetmə orqanlarında istifadə olunur. Quruma üzv
olmağa çalışan Ermənistanda isə rus dili belə statusa malik deyil. Erməni
tərəfi bunu onunla əsaslandırır ki, respublika təkmillətlidir - son məlumatlara
görə, ermənilər ölkə əhalisinin 97 faizini təşkil edir, etnik rusların sayı 0,4
faizdir. Rus dili məktəblər SSRİ dağıldıqdan sonra bağlanıb. Dəqiq desək,
1993-cü ildə qəbul olunan qanunla erməni dilinə dövlət dili statusu verildi və
bununla da rus dili arxa plana keçdi.
Azər