Erməni xalqı Koçaryan-Sarkisyan rejiminin mahiyyətini anlamağa başlayıb
Uzun illər Ermənistanda hakimiyyətdə olan Koçaryan-Sarkisyan rejimi
təkcə Azərbaycan xalqına deyil, erməni xalqına qarşı da çoxsaylı cinayətlər
törədib. Ermənistanın bugünkü ağır sosial-iqtisadi vəziyyəti bunu bir daha
təsdiqləyir.Bu günlərdə Qafqaz Müsəlmanları İdarəsinin təşkil etdiyi iftar mərasimində
çıxış edən prezident İlham Əliyev də məsələ ilə bağlı öz fikrini səsləndirib. O,
əvvəllər bu rejimin qaniçən, qəsbkar olması ilə bağlı söylədiyi fikirlərinin
indi erməni xalqı tərəfindən təsdiqləndiyini bildirib. Göründüyü kimi, vaxtilə
Koçaryan-Sarkisyan hakimiyyəti ilə bağlı qeyd edilənlər, baş verən hadisələr
bir həqiqət olaraq təsdiqlənir.
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Elman Nəsirov bildirdi ki,
Qafqaz Müsəlmanları İdarəsinin müqəddəs Ramazan ayı ilə bağlı təşkil etdiyi
iftar məclisində prezident İlham Əliyev uzun illərdir Ermənistanda qaniçən,
despotik rejimin hakimiyyətdə olduğunu qeyd edib: "Ən çox da bu rejimdən ziyan
çəkən erməni xalqının özüdür. Erməni xalqı bu rejimin girovuna çevrilib.
Ermənistan iqtisadi və demoqrafik böhran yaşayır. Hər il on minlərlə insan
ölkəni tərk edir və Ermənistanın heç bir gələcəyi yoxdur, indi də xaosa
sürüklənməkdədir. Dövlət başçısı vurğulayır ki, onun bu sözlərini indi erməni
xalqı deyir, təkrarlayır və məlum inqilabi proseslər də bunun təsdiqi kimi
qiymətləndirilə bilər. Əslində Azərbaycan prezidentinin Ermənistandakı despotik
rejimlə bağlı fikirləri yüz faiz təsdiqini tapdı. Erməni ekspertləri bunu
təsdiq edirlər ki, erməni xalqı və ziyalıları indi daha çox ilkin mənbə olaraq
Azərbaycan prezidentinin Ermənistan haqqında söylədiklərini diqqətə almalı və
nəticə çıxarmalıdır. Çünki dövlət başçısının söylədikləri öz təsdiqini tapır.
Həqiqətən də məlum olur ki, Koçaryan və Sarkisyan cinayətkar bir rejimə
rəhbərlik ediblər, öz xalqına qarşı güc tətbiq ediblər. 2008-ci ilin mart
ayında Sarkisyanın öz xalqını gülləbaran edərək, öz prezidentlik kürsüsünü
qoruyub saxlaması bəlli məsələlərdir. İndi artıq bununla bağlı yeni hakimiyyət
cinayət işi açmaq niyyətini ortaya qoyub. Eyni zamanda 1999-cu ildə
parlamentdəki güllələnmə hadisəsinə siyasi qiymət verilməyib. Heç şübhəsiz ki,
bu proseslərdə Ermənistana rəhbərlik edənlər birbaşa təşkilatçı kimi çıxış
edirlər. Biz onun şahidiyik ki, xarici siyasət daxili siyasətin davamıdır.
Ermənistanda terrorçu, qaniçən, quldur və öz xalqına qənim kəsilən hakimiyyət
daxildə yeritdiyi siyasəti xaricdə də davam elətdirib, Azərbaycan torpaqlarını
işğal edib və eyni zamanda Xocalı soyqırımına imza atıb”.
E.Nəsirov qeyd etdi ki, Ermənistanı idarə edən şəxslərin mahiyyəti
tam çılpaqlığı ilə bəllidir: "Prezident İlham Əliyev də öz çıxışlarında bu
məsələlərə hər zaman toxunub. Deməli, əslində bu gün deyilənlər Ermənistan
rəhbərliyi üçün ciddi siqnal olmalıdır. Anlamalıdırlar ki, əvvəlki hakimiyyətin
siyasətinin formal dəyişiklik etməklə davam etdirilməsi Ermənistan xalqını
məhvə aparır. Eləcə də onu idarə edən şəxsi məhvə sürükləyir. Yəni, bu artıq
aksiomadır və bunun isbata ehtiyacı yoxdur. Çıxış yolu isə var. Bunu dövlət başçısı
İlham Əliyev dəfələrlə söyləyib və son olaraq iftar mərasimində də bir daha
qeyd etdi ki, Ermənistan konstruktiv danışıqlar aparmalıdır, Azərbaycan
torpaqlarının işğalına son qoymalıdır, torpaqlar geri qaytarılmalıdır və
yaranacaq yeni şəraitdə Ermənistanın nicat yolu başlana bilər. Yəni hər şey
Ermənistan rəhbərliyinin ağıllı, konstruktiv mövqeyindən və birdəfəlik aqressiv
siyasətə son qoymasından keçir. Bu, sadə bir həqiqətdir və Paşinyan rejimi bu
reallığı tez dərk etsə, bir o qədər tez nicat yolu tapacaq. Yox, əgər o da
Sarkisyan kimi bu həqiqəti görmək istəməsə, onda Ermənistanın uçuruma
yuvarlanması labüdləşir və Paşinyanın Sarkisyanın taleyini yaşaması, heç
şübhəsiz, proqnozlaşdırılan məsələyə çevrilir”.
Millət vəkili, politoloq
Hikmət Məmmədov bildirdi ki, Azərbaycan Ermənistanı idarə edən
hərbi xunta diktaturasını ifşa edə bilib: "Ona görə də prezident İlham Əliyev
öz nitqində dedi: "Mənim illər ərzində dediyim sözləri indi erməni xalqı deyir.
Mən dünyanın ən ali kürsüsündən - BMT kürsüsündən Ermənistanın əvvəlki kriminal
rejimini ifşa etmişəm. Onları öz adları ilə çağırmışam. Onları Xocalı
soyqırımında ittiham etmişəm, hərbi cinayətlərdə ittiham etmişəm. Ermənistanın
əvvəlki hakimiyyətini qaniçən, kriminal, quldur rejim adlandırmışam. Bütün bunlar
həqiqətdir. Mən həqiqəti demişəm, indi bu həqiqəti erməni xalqı deyir”. Bu
fikirlər indiyə qədər Azərbaycan tərəfinin erməni diktatura rejiminin
işğalçılıq siyasətini ifşa etmək üçün həyata keçirdiyi diplomatik həmlələrin
bir qismini tamamilə doğru ifadə edir”.
H.Məmmədov vurğuladı ki, məsələnin ikinci tərəfi isə iqtisadi sahə
ilə bağlıdır: "Bu istiqamətdə də Azərbaycan işğalçı Ermənistanı dalana dirəmək
üçün qətiyyətli addımlar atıb. Ona görə də prezident İlham Əliyev bu məsələlərə
də toxunaraq bildirdi: "Mən dəfələrlə demişdim ki, Ermənistanda iqtisadi və
demoqrafik böhran yaşanır, ölkə boşalır, hər il on minlərlə insan ölkəni
həmişəlik tərk edir, Ermənistanda inkişaf üçün heç bir perspektiv yoxdur.
Demişəm ki, Azərbaycan Ermənistanı dalana çevirib, iqtisadi, siyasi, nəqliyyat
dalanına çevirib. Nəyə görə? Ona görə ki, Ermənistan torpaqlarımızı işğal edib.
İndi bütün bunları erməni xalqı deyir”. Bu, bir daha onu göstərir ki, bu
münaqişədə Azərbaycan öz istədiyinə nail olacaq, həqiqəti, ədaləti bərpa edəcək.
Dağlıq Qarabağ probleminin həlli bütövlükdə Qafqaza sülh və əmin-amanlıq gətirə
bilər ki, bu da həm Cənubi Qafqaz üçün rifah və sabitlik, həm də regionda
strateji marağı olan ölkələr üçün yeni əməkdaşlıq perspektivləri deməkdir”.
Bəxtiyar MƏMMƏDLİ