Erməni mətbuatı: İlham Əliyevin çıxışı praqmatik siyasi əsasa malikdir
Prezident İlham Əliyev
Azərbaycanın ərazi bütövlüyünün ən böyük təminatçısıdır. Ali Baş Komandan
Ermənistan-Azərbaycan, Dağlıq Qarabağ münaqişəsinin ədalətli həlli, ərazi
bütövlüyümüzün təmin olunması, torpaqlarımızın işğaldan azad olunması, qaçqın
və məcburi köçkünlərin yaşadıqları ərazilərə geri qayıtması üçün var gücü ilə
çalışır. O, Azərbaycanın haqq işini ən yüksək səviyyədə, ən yüksək
tribunalardan müdafiə edir, Ermənistanın işğalçılıq siyasətini beynəlxalq
ictimaiyyətin diqqətinə çatdırır. Tarixi Azərbaycan torpağında ikinci erməni
dövlətinin yaradılmasına imkan verilməyəcəyini qətiyyətlə bildirən Prezident
İlham Əliyev sülh danışıqlarından hələ ki, ümid kəsilmədiyini, Azərbaycanın
ərazi bütövlüyünün danışıqlar mövzusu olmadığını, sülh danışıqları nəticə
verməyəcəyi təqdirdə torpaqlarımızın hərbi yolla azad ediləcəyini, bayrağımızın
Şuşada, Xankəndində, Kəlbəcərdə, Laçında dalğalanacağını birmənalı olaraq bəyan
edir.
Fevralın 8-də Heydər Əliyev
Mərkəzində keçirilən Yeni Azərbaycan Partiyasının (YAP) VI qurultayında çıxışı
zamanı Prezident İ.Əliyev bir daha bu məsələ üzərində dayanıb, münaqişənin
həllinə dair fikirlərini geniş ictimaiyyətə çatdırıb. O bildirib ki,
Ermənistan-Azərbaycan, Dağlıq Qarabağ münaqişəsi yalnız ölkəmizin ərazi
bütövlüyü çərçivəsində BMT Təhlükəsizlik Şurasının qətnamələri əsasında öz
həllini tapmalıdır: "Bunun başqa yolu yoxdur. Biz heç vaxt imkan verə bilmərik
ki, torpağımızda ikinci erməni dövləti yaradılsın. Ölkəmizin ərazi bütövlüyü
danışıqlar mövzusu deyil və heç vaxt olmayacaq. Biz, sadəcə olaraq, öz
səylərimizi daha da artırmalıyıq və artırırıq. Əminəm ki, bu məsələ beynəlxalq
hüququn norma və prinsipləri əsasında öz ədalətli həllini tapacaq, ölkəmizin
ərazi bütövlüyü bərpa ediləcək”.
Ali Baş Komandan İ.Əliyev
onu da əlavə edib ki, tarixi torpaqlarımız da unudulmamalıdır. Prezidentin
sözlərinə görə, bu, gələcək fəaliyyətimiz üçün istiqamət olmalıdır, necə ki, hazırda
bu istiqamətdə iş görülür: "Bizim tarixi torpaqlarımız İrəvan xanlığıdır,
Zəngəzur, Göyçə mahallarıdır. Bunu gənc nəsil də, dünya da bilməlidir. Mən
şadam ki, bu məsələ ilə bağlı - bizim əzəli torpaqlarımızın tarixi ilə bağlı
indi sanballı elmi əsərlər yaradılır, filmlər çəkilir, sərgilər təşkil olunur.
Biz növbəti illərdə bu istiqamətdə daha fəal olmalıyıq və dünyanın müxtəlif
yerlərində sərgilər, təqdimatlar keçirilməlidir. Çünki İrəvan bizim tarixi
torpağımızdır və biz azərbaycanlılar bu tarixi torpaqlara qayıtmalıyıq. Bu,
bizim siyasi və strateji hədəfimizdir və biz tədricən bu hədəfə yaxınlaşmalıyıq”.
Azərbaycan Prezidentinin
səsləndirdiyi bu fikirlər Ermənistan cəmiyyətində böyük səs-küy yaradıb,
siyasətçilər, ekspertlər arasında ciddi narahatlığa səbəb olub. Bununla yanaşı,
Prezident İ.Əliyevin proqram xarakterli çıxışının Rusiya mediasında yer alması,
təhlil edilməsi, üstəlik Ermənistanın işğalçılıq siyasətinin qınanılması sadə erməni
vətəndaşlarına ciddi psixoloji sarsıntı yaşadıb. Misal üçün, bu günlərdə
"Vestnik Kafkaza” nəşrində dərc olunan məqalədə (http://vestikavkaza.ru/news/Azerbaydzhantsy-dolzhny-vernutsya-na-istoricheskie-zemli.html)
vurğulanıb ki, danışıqlar prosesinin tez bir zamanda başa çatması istiqamətində
nə bir irəliləyiş var, nə də vasitəçi dövlətlər tərəfindən işğalçı Ermənistana
qarşı təzyiq. İşğalçı dövlət nəinki 30 ildən artıqdır ki, Azərbaycan
torpaqlarını işğal altında saxlayır, hətta Azərbaycana qarşı yeni hücum
planlarına hazırlaşır, yeni ərazilər ələ keçirmək planını rellallaşdırmağa
çalışır. Bu planın reallaşdırılması istiqamətində mütəmadi olaraq İrəvanda
yerli erməni "qırğıları” çıxış edirlər. Məqalə müəllifi (http://kaspi.az/az/azerbaycanlilar-z-tarixi-torpaqlarina-qayitmalidirlar/)
qeyd edib ki, Prezident İ.Əliyevin sözləri rəsmi Yerevana Azərbaycana
qarşı hər hansı bir aqressiyaya yol verilməməsinə xəbərdarlıq kimi
qarşılanmalıdır. Əgər Ermənistanın işğalçılıq siyasəti davam edəcəksə,
Azərbaycan ordusu hücuma keçib öz işğal altında olan torpaqlarını azad etmək
iqtidarındadır. Məqalənin sonunda vurğulanıb ki, əgər İrəvandakı "qırğılar” "Bakıya
kimi getməyə” hazırdırlarsa, onda tarixi Azərbaycan torpaqlarına qayıtmaq
barədə cavab bəyanatı təbii qarşılanmalıdır. Və Ali Baş Komandanın da
qarşısında duran əsas vəzifə Konstitusiya ilə ona həvalə edilmiş sərhədlərin və
vətəndaşlarının təhükəsizliyinin qorunub saxlanılmasıdır. Bütün bunlar isə
Ermənistan tərəfindən təhlükə altındadır.
Ermənistanın "1in.am”
saytında yer alan məqalədə isə (http://ru.1in.am/1213984.html) bildirilib ki,
Azərbaycan Prezidenti İ.Əliyevin YAP-ın VI qurultayında səsləndirdiyi
bəyanatlara rəsmi İrəvan tərəfindən qeyri-adekvat reaksiya verilib. Qeyd olunub
ki, İ.Əliyevin çıxışında seçkiöncəsi komponent olsa da, bu, Ermənistan dövlət
orqanları və ekspertlərinin Azərbaycan prezidentinin bu çıxışına soyuqqanlı
yanaşmaq fikrindən uzaq durmaq üçün səbəb olmamalıdır: "Əliyevin çıxışının
analizi göstərir ki, onun sözlərində güclü təbii artım və ardıcıllığa malik
türk elementinin nə vaxtsa Ermənistan Respublikasının yerləşdiyi əraziyə qayıda
biləcəyinə dair əminlik var. Bizim hakimiyyət inkar edir ki, Əliyevin
əminliyinin mənbəyində ölkəmizin biabırçı durumu və dağıdıcı emiqrasiya
dayanır. Keyfiyyətsiz və cinayətkar idarəçiliyin hər ötən günü Əliyevin inamını
artırır, Ermənistanı tərk edən hər bir kəs bununla özü də dərk etmədən türk elementinə
daha bir qapı açır. Belə davam etsək, Əliyev nəinki İrəvanı qaytaracaq, üstəlik
hər birimizin evinə girəcək. Əliyevin çıxışının aqressivliyi hakimiyyət
nümayəndələrimiz üçün xoş olmasa da, praqmatik siyasi əsasa malikdir. Bu,
dövlətin institusional və perspektiv iflası şəkildə boşaldılan Ermənistandır”.
Sözügedən məqalədə
vurğulanıb ki, Ermənistan hakimiyyət nümayəndələrinin sərt bəyanatlarının
məqsədi apardıqları siyasətin iflasını ört-basdır etməkdir. Bildirilib ki,
Azərbaycan prezidentinin əminliyinin səbəbi Ermənistanın çökməsinin davam
etməsi, habelə milli gündəmin və idealların olmamasıdır.
Heç şübhəsiz rəsmi Bakının
bu siyasəti bundan sonra da qətiyyətlə davam etdiriləcəkdir. Ali Baş Komandanın
vurğuladığı kimi, Azərbaycan bütün imkanlardan, o cümlədən hər gün artan
gücündən, iqtisadi potensialından, siyasi imkanlarından, hərbi qüdrətindən
istifadə edib Dağlıq Qarabağ problemini həll edəcək, ölkəmizin ərazi bütövlüyü
təmin olunacaq.
Rufik
İSMAYILOV