Bakı 20°C
Erməni jurnalistlərə qadağa
Yerevan Ağsaqqallar Şurasında yaşanan biabırçı qalmaqallardan
sonra jurnalistlərin bir daha iclaslara buraxılmaması barədə qərar qəbul edilib.
Meriyanın informasiya aparatının rəhbəri Artur Gevorkyan bildirib ki, şəhər
şurasında keçirilən iclasdan sonra belə bir qərar qəbul edilib. Dərhal da
mətbuat bunu onların peşə fəaliyyətinə qoyulan məhdudiyyət kimi qələmə
veriblər.
"Azatutyun” radiosu ilə yanaşı, "A+1” teleşirkətinin əməkdaşlarına
qarşı da belə bir qadağa qoyulub. Artıq jurnalist təşkilatları baş verən
insidentdən sonra bəyanatla çıxış ediblər. Bəyanatda bildirilib ki, meriyanın
bu addımına qarşı adekvat tədbirlər həyata keçirəcəklər. Mer Taron Markaryandan
isə mətbuat xidmətinin rəhbəri Artur Gevorkyanın qəbul etdiyi qərara reaksiya
vermək tələb olunub. "Yerkir tsirani” (Əriklər ölkəsi) partiyasının lideri
Zaruhi Postancyan bildirib ki, məsələ ilə bağlı onlar parlamentdə məsələ
qaldıracaqlar. Meriyanın iclasına buraxılmayan nəşrlər Jurnalistlər İttifaqı
qarşısında məsələni sərt şəkildə qoyublar. Onlar bildiriblər ki, məsələ müsbət
həllini tapmayacağı təqdirdə, xarici səfirliklərə müraciət edəcəklər.
Jurnalistlər İttifaqının sədri Satik Seyranyan həmkarlarının tələblərinin haqlı
olduğunu diqqətə çatdırıb.
Parlamentin müxalifətdən olan fraksiyaları
jurnalistlərin meriyanın binasına buraxılmamasına reaksiya veriblər. "Yelk”
(Çıxış) fraksiyasının üzvü Alen Simonyan bu qərarı qəbulolunmaz və rüsvayçı
adlandırıb. O bildirib ki, hakim Respublika Partiyasının üzvləri öz
tərəfdarlarına cəza vermək əvəzinə, jurnalistləri iclaslara buraxmamaq barədə
qərar qəbul ediblər. "Yerkir tsirani” partiyasının və fraksiyasının
rəhbəri Zaruhi Postancyan isə bildirib ki, bununla da söz azadlığını pozmağa
cəhd edilir. Halbuki, Ağsaqqallar Şurası seçkili orqandır. Qanuna görə, belə
orqanlara daxil olmaq, onların fəaliyyətini işıqlandırmaq olar.
Qeyd edək ki, ötən həftə Ermənistan paytaxtının
meriyası biabırçı olaylara meydan olub. Yerevan Ağsaqqallar Şurasının bu il ilk
dəfə keçirilən təntənəli açılışı bir neçə dəqiqədən sonra dava-dalaşa səhnə
olub. Hər şey ondan başlanıb ki, "Yerkir tsirani” müxalifət fraksiyasının
üzvləri iclas zalına Yerevanın Nubaraşen şəhərətrafı qəsəbəsindən bankalarda
gətirdikləri kanalizasiya suyunu şəhər meri Taron Markaryana sakinlərin "hədiyyəsi”
kimi təqdim etmək istəyiblər."Kommunal xidmətlər qırılaraq sıradan çıxan
kanalizasiya borusunun təmiri üçün heç bir tədbir görmür”, - deyən
müxalifətçilər maska geyinərək şüşə bankaların ağzını açıblar. Ağsaqqallar
Şurasının müxalifətdən olan üç qadın üzvü əvvəlcə tibb əlcəkləri və tibb
maskaları geyiniblər və bundan sonra gətirdikləri bankaların ağzını açıblar.
Bankalardan çıxan üfunət iyi bütün zalı bürüyüb. Bunun ardınca "Yelk”
fraksiyasından olan üzvlər bir-bir zalı tərk etməyə başlayıblar. Bu vaxt artıq
müxalifətçi qadınlar – Sona Aqekyan və Marina Xaçatryan əllərindəki
kanalizasiya suyu ilə merə yaxınlaşmağa cəhd göstəririblər. Bunu görən Taron
Markaryan onların qarşısının alınmasına göstəriş verib. Marina Xaçatryan
bankadakı kanalizasiya tullantısını "Nubaraşendən hədiyyə" deyərək zalın
döşəməsinə səpələyib. Qarışıqlıq zamanı Xaçatryanın sifətinə yumruq zərbəsi
dəyib. Məsələyə "Çıxış” müxalifət blokunun üzvləri də müdaxilə ediblər.
Beləliklə, Nubaraşendən gətirilən bankaları merə təqdim etmək mümkün olmayıb.
Bunun qarşısını qadınların üstünə atılan Respublika Partiyasının üzvləri və
meriyanın mətbuat katibi Artur Gevorkyan almağa çalışıb. Bununla da zalda artıq
hamının iştirak etdiyi dava-dalaş başlanıb. Şillələr, qarşılıqlı söyüşlər işə
düşüb. Əvvəlcə Marina Xaçatryan onu itələyən Respublika Partiyasının üzvü Edmon
Kirakosyana şillə çəkib. Əvəzində respublikaçıdan eyni hərəkəti görüb. Bu vaxt
respublikaçılardan Vaspurak Martirosyan müxalifətçi Xaçatryanın saçlarından
dartmağa başlayıb. Bundan sonra Respublika Partiyasından olan kişi üzvlər
müxalifəti zaldan çıxarmağa çalışıblar. "Yelk” fraksiyası öz üzərinə
dalaşanları ayırmaq missiyasını götürüb. Lakin bunların arasında ən fəalı
aktyor-karateçi Qor Vardanyan olub. O, davaya girişməkdənsə, Marina Xaçatryanı
qucaqlayaraq zaldan çıxarıb.
Fasilədən sonra "Yerkir tsirani” fraksiyasının qadın üzvləri polisə "cinayət
baş verməsinə dair” ərizə təqdim ediblər. Zaruhi Postancyan deyib ki, müxalifət
bu məsələdə axıra qədər gedəcək: "Bu üfunət iyi sizi bütün yerlərdə müşayiət
edəcək. Hətta bahalı ətir və konyaklarınız da köməyinizə çatmayacaq. Üfunət
adamı boğmaz, amma zəhərləyə bilər. Siz zəhərlənməlisiniz. Biz sizin həyatınızı
zəhərləyəcəyik”.
Onu da qeyd edək ki, Yerevan Ağsaqqallar Şurasında
baş verən insidentdən sonra ombudsman baş prokurora şikayət edib. "1in.am”
saytının yazdığına görə, ombudsman şikayətində baş verənlərlə bağlı cinayət
işinin qaldırılmasını tələb edib. Məlumata görə, artıq faktla bağlı cinayət
işinin qaldırılması nəzərdə tutulub. Müxalifət hesab edir ki, hakimiyyət bununla
onlara qarşı təzyiqi gücləndirməyə çalışacaq.
Azər
