Erməni əsilli nazirin sonu yaxınlaşır
Ukrayna hökumətində çalışan erməni əslili nazir Arsen Avakovla bağlı
qalmaqal pik həddə çatıb. Ukraynadakı azərbaycanlı iş adamlarının
oğurlanmasında və qətlə yetirilməsində rolu olduğu iddia edilən nazir haqda
cinayət işi açılıb. Ukraynanın baş prokuroru Yuri Lusenko Avakov haqqında
çoxsaylı şikayətlərdən sonra belə addım atdıqlarını bəyan edib. Baş prokurorun
sözlərinə görə,Korrupsiyaya qarşı fəaliyyət Mərkəzinin rəhbəri Vitali
Şabunun "24-cü kanal”ın efirində daxili işlən nazirini ittiham edib. "Mən
Şabunin də daxil olmaqla, hər gün onlarla insandan məktub alıram. Siz
inanmayacaqsınız, məhz Şabuninin məktubu əsasında, DİN rəhbəri Avakova qarşı
cinayət işi başlanılıb”,- deyə "Sol sahil” proqramının efirində Lutsenko
bildirib. Məlumata görə, bundan əvvəl isə Kiyevin Solomensk Məhkəməsi Milli
Antikorrupsiya Bürosunun detektivlərinə Avakovun telefonlarını dinləmək
səlahiyyəti verib. Buna səbəb isə "YouTube”da DİN əməkdaşları üçün çantaların
alınmasına dair danışıq aparan Aleksandr Avakova (DİN rəhbərinin oğlu) və
Sergey Çebotıryaya (Avakovun müavini) bənzəyən şəxslərin videosunun yayılması
səbəb olub. Burada söhbətin korrupsiyadan getdiyini ehtimal edilmişdi.
Jurnalistlərin məlumatına görə, naməlum səhifə sahibi tərəfindən yüklənən video
S.Çebotıryanın kabinetində gizli kamera ilə çəkilib. Söhbətdən anlaşılır ki,
A.Avakovun oğluna bənzəyən insan DİN-ə böyük həcmdə çanta gətirmək istəyir,
əslində isə bu proses açıq tender yolu ilə baş tutmalıdır. Videodakı dialoq
2014-cü ilin dekabr ayına aiddir. 2015-ci ilin fevralında isə DİN həqiqətən
16,5 milyon qrivenlik (630 min dollar) çanta alıb. A.Avakov isə öz növbəsində
Baş prokurorun ittihamlarını rədd edərək tender prosedurunun şəffaf keçdiyini
bildirib. Lakin Antikorrupsiya Bürosunun tədqiqatları da göstərib ki, alınmış
altı min çantanın qiyməti şişirdilib, tender qalibləri isə DİN başçısının sabiq
müavininin müdaxiləsi ilə seçilib. Bu azmış kimi, alınan mallar anbarlara tam
həcmdə daxil olmayıb. Xatırladaq ki, Ukraynanın DİN rəhbəri Arsen Borisoviç
Avakov 1964-cü ildə Bakının Binəqədi rayonunda (keçmiş Kirov rayonunun Kirov
qəsəbəsində) hərbçi ailəsində anadan olub. 1966-cı ildən isə Ukraynada yaşayır.
Ukraynanın ən varlı 200 şəxsinin siyahısında 118-ci olan erməni nazirin
varidatı 98 milyon dollar civarındadır.
Onun azərbaycanlı iş adamlarının oğurlanması, talan edilməsi,
öldürülməsi kimi cinayət işlərinin sifarişçisi olduğu da deyilir. Bu səbəbdən
də, Ukraynadakı Azərbaycan diasporası ötən gün Kiyevdə Daxili İşlər
Nazirliyinin binası önündə baş verənlərə qarşı etiraz aksiyası keçirib.
Ukraynanın baş naziri Vladimir Qroysman azərbaycanlılara qarşı cinayət
hallarının artması məsələsini şəxsən öz üzərinə götürdüyünü açıqlayıb. Gəzən
məlumatlara görə, A.Avakov vəzifəsindən çıxarılacaq. Lakin onun erməni əsilli
köməkçisi Şkiryak Zoryan Avakovun vəzifəsinin başında olduğunu deyib və yayılan
məlumatları cəfəngiyyat adlandırıb. Bu proseslər həmçinin, Ukrayna hökuməti
daxilində nələrin baş verdiyinə dair suallar yaradır. Məsələn, politoloq
Aleksey Poltorakov hesab edir ki, Ukrayna baş prokurorunun Avakova qarşı
cinayət işinin açılması ilə bağlı bəyanatı prezident Pyotr Poroşenkonun yaxın
ətrafında siyasi qarşıdurmanın təzahürlərindən biridir:"Avakov və Lusenko
prezidentin etimadından sui-istifadə edir. Təsadüfi deyil ki, Avakov son
vaxtlar bir sıra qalmaqallarla ilə yadda qalıb. İndi Ukrayna prezidenti
vaxtından əvvəl keçiriləcək parlament seçkiləri ərəfəsində "Xalq cəbhəsi” partiyası
ilə danışıqlar aparır. Bu partiyanın əsas liderlərindən biri də Avakovdur. Ona
görə də daxili işlər naziri istədiyi kimi hərəkət edir”.
Bundan əvvəl də bu
şəxs azərbaycanlıların heysiyyətinə toxunacaq açıqlama verib. Müsahibəsində o,
tarix boyu ermənilərin təcavüzkar deyil, yaradıcı bir xalq olduğunu iddia edib.
Erməni nazirin Odessa meri Mixail Saakaşvili ilə yaşadığı qalmaqal da hamının
yadındadır. O zaman belə bir iddia var idi ki, M.Saakaşvili erməni nazirin
korrupsiya əməlləri barədə kompromat məlumatlara malikdir. Bu yaxınlarda isə o,
yenidən diqqət mərkəzinə düşüb. Naziri şəxsi ordu yaratmaqda, hətta prezident
Pyotr Poroşenkonu devirmək məqsədilə dövlət çevrilişi həyata keçirmək cəhdində
ittiham ediblər. Bəzi məlumatlara görə, nazir "Azov” batalyonunu
maliyyələşdirir. Bu batalyon isə "İnter” telekanalına hücum etməkdə və onu
yandırmaqda günahlandırılır. A.Avakova məxsus biznes strukturlarının Xarkov
ətrafında onlarla hektar torpaq sahəsini mənimsəməkdə də günahlandırırlar. Ali
Radanın deputatı Sergey Leşenko isə bəyan edib ki, nazirin yaxın ətrafı
Ukraynadan Panamadakı offşor hesablara 40 milyon dollar köçürüblər. Avakovun nazir
kimi yarıtmaz fəaliyyəti də qabardılır. 2014-cü ildən nazir işləyən Avakovun
dövründə ölkədə cinayətlərin sayı xeyli artıb, kriminogen vəziyyət ağırlaşıb.
Onun tək hüquq-mühafizə orqanları ilə deyil, qanunverici orqanla da problemləri
var. Ötən ayın sonu onun DİN rəhbəri vəzifəsindən azad edilməsi il bağlı qanun
layihəsi gündəliyə salınmışdı. Ən maraqlısı isə odur ki, təklif prezident
fraksiyası – "Pyotr Poroşenkonun bloku”nun üzvü Sergey Kaplindən gəlmişdi. Deputatların
qənaətincə, Avakov dövlət çevrilişi həyata keçirib Poroşenkonu devirməyə
çalışır.
Beləliklə, bundan sonra hadisələrin hansı axarda davam edəcəyini
prezidentin qəbul edəcəyi qərar müəyyənləşdirəcək. Hər halda, əgər dövlət
başçısı bel bir şəxsi vəzifədə saxlayarsa, özünə ciddi problem yaratmış olacaq.
Azər NURİYEV