Erməni diasporu Sarkisyanı devirəcəyi ilə hədələyir
Aprelin 2-də Ermənistanda keçirilməsi nəzərdə tutulan seçkilərlə
bağlı narazılıq və narahatlıq artmaqdadır. Əksəriyyət artıq indidən seçkilərin
saxtalaşdırılacağını bəyan edir. Onların sırasına diaspor da qoşulub. Bəlli
olduğu kimi, "Ermənistanda ədalət” adlı Təşəbbüs Qrupu hələ ötən ilin
sonlarında 2017-ci ilin aprelində Ermənistanda keçiriləcək parlament seçkisini
müşahidə edəcəyini bəyan edib. Erməni diasporunun tanınmış üzvlərinin yaratdıqları
Təşəbbüs Qrupunun üzvü, tanınmış kanadalı rejissor Atom Eqoyan Los-Ancelesdə
keçirilən forumda aprel seçkisinin nəticələrinin onlar üçün qabaqcadan bəlli
olduğunu deyib.
"Real böhran budur ki, biz seçkidə nə olacağını bilirik və
nəticələrlə barışmamalıyıq. Biz siyasi motivli həbslərə etiraz etməliyik.
Seçkinin nəticələrini bilirik, amma indi seçkidən sonra nə olacağını düşünməli
və erməni diasporu kimi bu ölkədəki proseslərdə biz də iştirak etməliyik. Gəlin
lazım olsa ora gedək, küçələrdə oturaq”, - deyə Eqoyan bildirib. Eqoyanın
həyat yoldaşı, kanadalı aktrisa Arsin Xancyansa deyib ki, təkcə seçkiləri
müşahidə etməklə iş bitmir, xaricdə yaşayan Ermənistan vətəndaşları ölkəyə
gedib səs verməlidirlər. "Nəyinsə dəyişməsinə hələ ki azacıq da olsa ümid var.
Amma bu dəyişiklik yalnız bizim iştirakımızla mümkündür. Biz diaspor kimi
status-kvonun (Dağlıq Qarabağ münaqişəsində) saxlanmasının yeganə yol olduğunu
düşünməməliyik”,- deyə Xancyan bildirib. Forumda iştirak edənlərdən biri, yumorist
Baqe Berberyansa deyib ki, onların işi təkcə Ermənistandakı hakimiyyətə təsir
etmək yox, həm də ölkə sakinlərinə dəyişikliyin yolunu göstərməkdir. "İnsanlar
həqiqətən də öz səslərini 5 min drama satırlar. Biz təkcə bu səsləri alan
məmurlara yox, həm də onu satan insanlara təzyiq edirik ki, səslərini
satmasınlar” – deyə Berberyan vurğulayıb.
Yeri gəlmişkən, erməni mətbuatı artıq indidən yazır
ki,Ermənistanda qarşıdan gələn parlament seçkilərində hər bir seçicinin
ələ alınması üçün verilən rüşvət 100 dollara çatacaq. Bunu Ermənistanda çıxan
"Joqovurd” ("Xalq”) qəzeti yazıb. Nəşrinyazdığına əsasən, seçkiqabağı
dövrdə Ermənistan sakinlərinə çoxsaylı rüşvət təklifləri edilməyə başlanıb.
Qəzet redaksiyasına bu məsələ ilə bağlı çoxsaylı məlumatlar daxil olur. Xəbərdə
bildirilib ki, hakim Ermənistan Respublikaçılar Partiyası seçkidə
saxtakarlıqlar etməyə hazırlaşır: "Ötən seçkidə hər seçiciyə 5-10 min dram
rüşvət (təqribən 1-2 dollar ) verilirdisə, bu dəfə səsləri almaq üçün
seçicilərə 100 dollar məbləğində rüşvət təklif ediləcək”. Qəzet onu da yazır
ki, parlament seçkilərinə az qalmış, Ermənistan hökumətinin tərkibində növbəti
dəyişikliklər həyata keçiriləcək. Nəşr Ermənistanın baş naziri Karen
Karapetyanın ötən ilin sentyabr ayında hökuməti formalaşdıran və nazirləri
təyin edən zaman seçdikləri şəxslərin ya silahdaşları olduğunu, ya da həmin
vaxt daha yaxşı namizəd tapa bilmədiyini söylədiyini xatırladıb. "Mətbuatda isə
dəfələrlə baş nazirin tempinə heç də bütün nazirlərin tab gətirməməsi və bunun
hökumətin iclaslarında aydın görünməsi barədə informasiya yayılıb”, - qəzet
yazıb. Nəşr Ermənistan hökumətinə yaxın mənbələrə istinadən yazıb ki, kabinetdə
bəzi dəyişikliklər planlaşdırır: "Hətta onun özünün təyin etdiyi şəxslərə də
rəhm etməyəcəyi bildirilir. Bu dəyişikliklərin parlament seçkilərinə qədər
həyata keçiriləcəyi də istisna deyil”.
Baş nazir Karen Karapetyan bu günlərdə Ermənistanda fəaliyyət
göstərən xarici diplomatların qarşısında bəyan edib ki, ölkə demokratik
seçkilər keçirmək, korrupsiya ilə mübarizə etmək, geniş iqtisadi islahatlar
aparmaq əzmindədir. "Serjik”in bu yaxınlardakı bəyanatını təkrarlayan baş nazir
də bildirib ki, aprelin 2-də keçiriləcək parlament seçkiləri"tam yeni
keyfiyyət”daşımalıdır. "Seçkilərin şəffaf keçməsi üçün hər şeyə hazırıq”,
- deyə o bildirib. Onun sözlərinə görə, Ermənistanda hökumət korrupsiyasının
miqyasını məhdudlaşdıracaq. "Vergidən yayınma və korrupsiya əleyhinə mübarizə
aparmadan biznesə ədalətli və şəffaf mühit yarada, inkişafa nail ola bilmərik”,
- deyə baş nazir çıxışında bu sözləri də səsləndirib.
Ölkə müxalifəti isə hökumətin islahatlar vədinə şübhə ilə baxır.
Onlar deyirlər ki, hökumət xalqın hakimiyyətə qəzəbini yumşaltmaq üçün
seçkiöncəsi belə vədlərə əl atır.
Yeri gəlmişkən, Qərb müşahidəçiləri hesab edirlər ki, getdikcə
pisləşən iqtisadi vəziyyətə və 2012-ci ildə qazandığı seçki qələbəsinin
legitimliyi ətrafında mübahisələrin davam etməsinə baxmayaraq, bu seçkidə
prezident Serj Sarkisyanın partiyası parlament çoxluğunu əldə edəcək və koalisiya
hökuməti quracaq. Lakin o da qeyd edilir ki, Sarkisyanın prezidentdən baş
nazirə çevrilməsi bir o qədər də sadə olmayacaq və bunu əsaslandıran faktorlar
mövcuddur. Ən əsası, son altı ildə əhəmiyyətli islahatlar, daha geniş
demokratikləşdirmə vəd edən prezident vədlərinə əməl edə bilməyib. 2013-cü ilin
fevralında keçirilmiş prezident seçkisi ərəfəsində də Sarkisyan vədlər vermişdi.
Seçkidə Sarkisyan səslərin 58 faizini qazanıb 7 rəqibinə qalib gəlsə də,
beynəlxalq müşahidəçilər seçkidə genişmiqyaslı saxtalaşdırmalar qeydə
almışdılar. Lakin Sarkisyan nəinki bu vədlərini yerinə yetirməmiş, hətta
2013-cü ilin sentyabrında Avropa İttifaqı ilə üç il davam edən danışıqlardan
sonra assosiasiya sazişini imzalamaqdan imtina edərək, ölkənin Avrasiya Gömrük
İttifaqına qoşulmasına dair başqa bir müqaviləni imzalamışdı. O vaxt onun bu
hərəkəti bir çox erməniləri məyus etmişdi.
Lakin son 12 ayda baş vermiş bir-birinə bağlı iki hadisə göstərdi ki,
Sarkisyan yalnız vədlərlə əvvəlki kimi rahat hakimiyyət sürə bilməyəcək. Bu
hadisələrdən biri ötən ilin aprelində Qarabağdakı 230 kilometrlik təmas xətti
boyunca dörd gün davam edən müharibə idi. Bu müharibədə Ermənistan yüzlərlə əsgərini
itirdi, Azərbaycansa 1990-cı illərdə itirdiyi ərazilərin çox kiçik hissəsini
özünə qaytardı. Bu müharibədə erməni tərəfinin itkiləri silah-sursatın
çatışmaması ilə əlaqələndirilmişdi. Bu isə erməni cəmiyyətində hakimiyyətin
çoxdan cilovlamağı vəd etdiyi korrupsiyaya bir daha diqqət çəkdi. Bəlli olmuşdu
ki, ölkədə baş alıb gedən korrupsiya artıq birbaşa milli təhlükəsizliyə hədə
yaradır. İkinci hadisə isə iyul ayında "Sasna Tsrer” adlı silahlı qruplaşmanın
Yerevanın mərkəzindəki polis şəhərciyini ələ keçirməsi, müxalifət liderlərindən
Jirayr Səfilyanın azad edilməsi və Sarkisyanın istefasının tələb etməsi idi. 10-15
silahlının polis şəhərciyini əldə saxladığı günlərdə Yerevanda bu aksiyaya
dəstək verən çoxminlik mitinqlər keçirilirdi. Bundan beş həftə sonra baş nazir Ovik
Abramyan istefa verməli oldu, onun yerinə isə 53 yaşlı Karen Karapetyan gətirildi.
Ekspertlər hesab edirlər ki, Rusiya Karen Karapetyana dəstək verir. Sarkisyan
və keçmiş prezident Robert Köçəryan kimi, Karapetyan da Dağlıq Qarabağda
doğulub. O özünü sanballı iqtisadi menecer kimi göstərə bilib. Keçmiş güləş
çempionu, hazırda isə varlı biznesmen Qaqik Tsarukyan onunla bağlı deyib ki, "o
nə etdiyini bilən adamdır”. Gəlinən qənaət budur ki, Karapetyan ölkənin hakim
zümrəsi daxilindəki rəqabətdən ustalıqla faydalana və seçkilərdən sonra öz
mövqeyini gücləndirə biləcək.
Azər