“Ərəb musiqi mədəniyyəti” günü keçirilib - Fotolar
Misir Ərəb Respublikasının Azərbaycandakı
Səfirliyinin Mədəniyyət və Təhsil Əlaqələri Mərkəzində "Ərəb musiqi
mədəniyyəti” günü keçirilib.
Misir Ərəb Respublikasının Azərbaycandakı Fövqəladə
və Səlahiyyətli səfiri cənab Adel İbrahim çıxış edərək "Ərəb musiqi
mədəniyyəti” gününü Azərbaycanda ilk dəfə keçirildiyini bildirib: "Musiqi
mədəniyyətin böyük bir sahəsidir. Musiqi insanın, onun şəxsiyyətinin və
fikrinin formalaşmasında böyük rol oynayır. Ərəb Dövlətləri Liqası və Misir
Mədəniyyət və Xarici İşlər Nazirliyinin təşəbbüsü ilə ilk
dəfə həyata keçirilən bu tədbir mədəniyyət sahəsinin inkişafı,
ölkələrimiz arasında mədəni əlaqələrin genişləndirilməsi, Misir və ərəb
musiqisinin daha yaxından tanınması üçün atılmış bir addımdır.”
Daha sonra Azərbaycan Respublikasının əməkdar
artisti, kamança ustası Fəridə Məlikovanın və xalq artisti Munis Şərifovun
rəhbərlik etdiyi Qədim musiqi alətləri ansamblının ifasında bir sıra ərəb
musiqiləri səslənib.
Tədbirdə BƏƏ, Səudiyyə Ərəbistanı, Fələstin,
Mərakeş, Liviya, İraq, Əlcəzair Moldova, Belçika, Peru, Çili, Xorvatiya,
Tacikistan dövlətlərinin səfirləri, digər diplomatik nümayəndəliklərindən qonaqlar iştirak ediblər.