Çəngəllə deyil, əllə yeyin, evdə o dadı almağı isə unudun - Reportaj
Ustalar
deyirlər ki, xəmir qurudursa, tərəvəz pizzanın üstündə canlı görünmürsə, deməli...
"Bu yeməyi
həftədə bir dəfə yeyənlərin ağız boşluğunda şiş əmələ gəlməsi 34 %, həzm
sistemində isə 59 % azalır” deyirlər. Adı asılılıq yarada biləcək qidalar
sırasındadır, hətta insanlar tox olanda belə, bu yeməkdən imtina edə bilmirlər.
İtalyan mətbəxinin ən məşhur yeməyi olsa da, bu qidanı ən çox amerikalılar
istifadə edirlər.
Söhbətin
xəmir, pendir və sousun birləşməsindən əldə edilən möhtəşəm daddan - pizzadan
getdiyini yəqin ki yuxarıdakı bir neçə cümlə artıq demiş oldu. Pizza, hazırda
dünyanın dörd bir yanında sevə-sevə yeyilir, ölkəmizdə də həmçinin.
Restoranda
dost-tanışlarla oturub pizza yeyəndə, müxtəlif suallar eşidirsən. İlk dəfə yeyənlər
"Görəsən, hansı daha dadlıdır?”, bu dada bələd olanlar "Fərqli nə isə varmı?”,
çox sevən, mətbəx bacarığı olanlar isə "Bu dadı evdə necə ala bilərəm?” və s.
deyirlər. Pizza yeyəndə, ən çox mübahisə isə, çəngəllə, yoxsa əllə yeməklə
bağlı olur. Elə bu tipli suallara cavab tapmaq üçün yolumuzu "Dominos pizza”dan
saldıq.
O dadı evdə almaları çətin məsələdir
Biz işdən
sonra getdik, bu, o deməkdir ki, artıq axşam yeməyi vaxtı yaxınlaşırdı. Pizza
yemək üçün gələnlərin sayı artırdı və ustaların da mətbəxdə işi çoxalmışdı. Biz
də işə bu prosesi izləməklə başladıq. İlk diqqətimizi çəkən ustaların əlcəksiz
işləməsi oldu. Bildirdilər ki, restoran sistemində pizzanı əlcəklə bişirmirlər.
Sadəcə olaraq işə başlamamışdan əvvəl və sonra əllər mütləq yuyulur.
Mətbəxə
keçdiyimizdə ilk sifariş "Extravaganza” pizzası oldu. Qarğıdalı ununda hazır xəmir
yayıldı, üzərinə pizza sousu yaxıldı. Daha sonra üzərinə pepperoni, jambon,
sosiska, soğan, yaşıl bibər, göbələk, qara zeytun, qarğıdalı, mozarella pendiri
əlavə edilib sobaya göndərildi. Belə baxanda, sadə görünür, amma biz o dadı evdə
ala bilmirik. Ustalarla da söhbətə elə bu mövzu ilə başladıq.
Usta İlkin Əzizov deyir ki, restoranda yediyiniz pizzanın dadını evdə
almağı unudun: "Xanımlar tez-tez bu sualla bizə müraciət edirlər. Ancaq təəssüf
hissi ilə deməliyəm ki, o dadı evdə almaları çətin məsələdir. Birincisi, evdə
hazırlanan xəmirin resepti restoranlardakı ilə eyni deyil. Pizza xəmirinin
yumşaqlığı da önəmlidir. Evdə bunu dəqiq tutmaq olmur. İstifadə olunan ərzaqların
da miqdarı vacibdir. Hansısa ərzağı az və ya çox olanda, dad dəyişir. Bundan
başqa, pizzanın bişmə temperaturu çox önəmli faktorlardandır. Biz 245 dərəcədə,
8-9, maksimum 10-12 dəqiqəyə bişiririk. Bundan artıq sobada qalırsa, artıq o,
yararsız olur. Ev şəraitində hərə bir temperaturda bişirir. Üstəlik,
restoranlarda bunun üçün xüsusi sobalar var, evlərdə o da yoxdur. Maraq üçün
evdə də edə bilərlər, ancaq dadlı pizza yemək istəyənlər restoranlara üz tutsa,
daha yaxşı olar”.
Xəmir yumşaq deyilsə, qurudursa...
Həm də
deyirlər ki, pizza xeyirlidir, amma evdə bişirilirsə. İlkin Əzizov bu fikirlə
razılaşmadı: "Restoranda hazırlanan pizzalar daha təhlükəsiz olur, çünki biz
pizzaları geniş kütlə üçün hazırlayırıq, buna görə də mütləq təhlükəsizliyi təmin
etməliyik. Üstəlik, biz pizza ilə bağlı daha məlumatlıyıq. Evdə bişirilənlərin
təhlükəli olduğunu demirik, amma restoranda hazırlananların təhlükəsizliyindən
tam əmin ola bilərsiniz. Hər gün yeni məhsullar gətirilir, tərəvəzlərimiz təbiidir”.
Yemək
bişdiyi halda orda xəmirin keyfiyyətini, tərəvəzin təbiiliyini necə müəyyənləşdirməsi
haqda isə usta Öztürk Bayramov məlumat
verdi: "Sobadan bişib gələn ərzağın yeni və köhnə olduğunu müəyyənləşdirmək heç
də asan deyil. Bunu mütəxəssislər baxan kimi bilirlər. Ancaq müştərilər də diqqətli
olsalar, bunu hiss edə bilərlər. Xəmir yumşaq deyilsə, qurudursa, deməli, yeni
deyil. Tərəvəzlər pizzada bişsə də, onun təbiiliyini müəyyənləşdirmək
mümkündür. Hər nə qədər bişmiş olursa olsun, təbii tərəvəz rəng, canlılıq
baxımından, pizzanın üzərində özünü göstərə bilir. Tərəvəz pizzanın üstündə canlı görünmürsə, deməli, yeni deyil”.
Ananas və soğan eyni pizzada
Artıq 9
dəqiqə tamamdır və sobaya qoyduğumuz pizza bişib müştəriyə təqdim olunur. Yeni
sifarişlər də qəbul edilir. Müştərinin biri pizza sifariş verdi, ancaq içərisindən
soğan olmasını istəmədi. Ustalar deyirlər ki, bu məsələdə müştəri istəyi önəmlidir:
"Bir müştərimiz var, hər gün səhər bir balaca toyuqlu pizza sifariş verir.
Deyir ki, üzərində toyuq və pendirdən başqa heç nə olmasın. Yaşıl bibər, göbələk
və qarğıdalını çıxarır. Soğanı çıxaranlar da çox olur. Ümumiyyətlə, pizzanın
reseptində olan məhsulların hamısının istifadə edilməsi vacib deyil. Müştərinin
zövqündən asılı olaraq, bir çox ərzağı əlavə edə, yaxud çıxara bilərik. Məsələn,
ananas və soğanın eyni pizzaya əlavə edilməsi kiməsə qəribə gələ bilər, amma
bunu istəyənlər də olur”.
Amerikada
bir nömrəli pizza vəsaiti pepperonidir. Verilən sifarişlərin təxminən üçdə
birində pepperoni istifadə edilir. İlkin bəy bu pizza növünün bizdə də çox
sifariş edildiyini bildirdi: "Ən çox satılan pizzalar adətən peperoni və
qarışıq pizzalardır. Ətli, toyuqlu və tərəvəz məhsullarından ibarət pizzalara
daha çox tələbat olur. Amma ümumilikdə, hər növ pizza sifariş edirlər. Mən təklif
edərdim ki, hər dəfə fərqli pizza dadsınlar. Çünki hər pizzanın xüsusi dadı var
və hər pizza insana öz xüsusi ləzzətini pıçıldayır”.
Çəngəllə, yoxsa əllə?
Türkiyənin
İğdır vilayətindəki məktəblərin birində müəllim işləyən Mehmet Özcan şagirdlərinə
pizza sifariş edib. İlk dəfə pizza görən uşağın reaksiyası sosial şəbəkələrdə
maraqla qarşılanmışdı. Belə ki, həyatında ilk dəfə pizza görən
şagird"müəllim, bu necə yeyilir? demişdi. Doğrudan, bu necə yeyilməlidir?
Çəngəllə, yoxsa əllə? Öztürk bəy bildirdi ki, çəngəllə o dadı tutmaq çətin məsələdir:
"Bir çox müştəri çəngəllə yeyir deyə, biz stola çəngəl də qoyuruq. Ancaq pizza əllə
yeyilməlidir. Çəngəllə yediyində o dadı ala bilməzsən”.
Pizza və qazlı su yaxşı tamamlama deyil
Fikir
verdik ki, sifariş zamanı müştərilər pizzanın yanında şirin qazlı sular
götürürlər. Bir rusiyalı həkim deyib ki, pizza ilə qazlı su heç də yaxşı
tamamlama deyil. Ustalar deyirlər ki, pizzanın standartında yanında nəyi
içib-içməməklə bağlı xüsusi qayda yoxdur: "Pizza ilə yanaşı, adi qazlı sular
çox sifariş edilməsə belə, şirin qazlı sulara üstünlük verirlər. Pizza ilə
hansı suları içib-içməməklə bağlı elə bir standart yoxdur. Müştərinin zövqündən
asılıdır”.
Gecə saat 2-də də sifariş edirlər, səhər 5-də də
Kuryer Ümid Paşayev 7 ildir ki, pizza çatdırma işini həyata keçirir.
Deyir ki, ölkəmizdə pizzasevərlərin sayı getdikcə artır: "Pizza yeməyin saatı
yoxdur. Nə vaxt istəsələr, yeyə bilərlər. Bizdə səhər 5-ə qədər çatdırılma xidməti
var. Və istənilən saatda sifarişlər olur. İnsanlar gecə saat 2-də də pizza
sifariş edirlər, səhər 5-də də. Bizim iş elədir ki, hər gün müxtəlif ünvanlara
çatdırma edirik, ona görə heç də hamısını yadda saxlaya bilmirik. Ancaq elə
ünvanlar olur ki, ayda 15 dəfə sifariş verirlər, ona görə həmin ünvanları artıq
əzbər bilirəm”.
Pizzanın dadı restoranlara görə dəyişir
Hər dəfə
pizza yeyəndən sonra özünü xoşbəxt hiss etdiyini deyən müştəri Lalə xanım bildirdi ki, pizza onun əvəzolunmaz yeməyidir:
"Hər gün pizza yediyimi deyə bilmərəm, ancaq çox sevirəm, böyük zövqlə yeyirəm.
Düzü, bir müddət elə öyrəşmişdim ki, hər gün ürəyim istəyirdi. Ancaq sonra bunu
nizama saldım. Ayda bir neçə dəfə yeyirəm. Məkan olaraq isə heç vaxt eyni yerə
getmirəm. Çünki fikir vermişəm ki, pizzanın dadı restoranlara görə dəyişir. Bir
neçə dadlı bişirilən yerləri özüm üçün müəyyənləşdirmişəm və davamlı olaraq
onlara gedirəm”.
Hansı
pizzanı seçməyə gəlincə isə, Lalə bildirdi ki, o həmin vaxt ürəyindən nə keçməsinə
bağlıdır: "Demək olar ki, pizzanın sevmədiyim bir növü yoxdur. Ona görə, seçim
elə də çətin olmur. Bəzən olur ki, evdə pepperonili bir pizza ürəyimdən keçir,
ancaq gəlib menyuya baxanda fikrim dəyişir. Ancaq dostlarla oturanda, ortaq məxrəcə
gəlib qarışıq pizza götürürük”.
Sonda
ustalar bildirdilər ki, pizznı isti-isti yeyin, soyudusa, dadını unudun: "Soyuq
olanda əsl dadı və keyfiyyəti hiss etmək olmur. Bizim ünvana çatdırma xidmətimiz
var. Sifarişlərimiz bişirildikdən sonra yeddi dəqiqəyə ünvana çatdırılmalıdır
ki, istiliyi qorunsun”.
Aygün
Asimqızı