“Ən böyük böhtanla üz-üzə qaldım” - Fotolar
Ötən il Türkiyə mediasında ən çox iki məşhur isim -
Ahmet Kural və müğənni Sılanın yaşadığı eşq macərası gündəmi zəbt etdi. Daha
sonra bu macəra böyük qalmaqala səbəb oldu. Belə ki, məşhur cütlük iki dəfə
ayrılıb-barışandan sonra yenidən evlənmək üçün bir araya gəlmişdi ki, Ahmet
Kuralın Sılanı döydüyü xəbəri yayıldı. Sıla Ahmet Kuralın onu 45 dəqiqə
döydüyünü iddia etdi. Onların məhkəmə prosesi Türkiyə magazin dünyasının əsas
gündəm xəbəri oldu. Sıla bir neçə yerli sayta müsahibələr verərək Ahmet Kuralı
qadına qarşı şiddətdə günahkar hesab etdi. Türkiyənin bir çox sənətçisi Sılaya
dəstək çıxdı. Ahmet Kural isə "danışmaq istəmirəm” deyərək susdu. Amma aktyor
hadisələrin getdikcə daha da qızışdığını nəzərə alaraq "Günaydın” qəzetinə müsahibə
verib.Müsahibənin maraqlı olduğunu nəzərə alaraq olduğu
kimi təqdim edirik.
- Bu günə qədər yaşanan
hadisə ilə əlaqədar heç nə danışmadınız. Qərarınızı nə dəyişdi?
- İndiyə qədər media nümayəndələri bu sualla
müraciət edəndə, onlara "danışmayacam” deyirdim. Ancaq bəzi məsələlərin bilərəkdən
şəxsi-qərəzliyə çevrildiyini görəndə sükutumu pozdum. Gördüm ki, susmağım insanlar
tərəfindən səhv qəbul olunur və insanlar məni təhqir edirlər. Ona görə də yaşanılan
bu hadisəni bütün gerçəkliyi ilə danışacağam.
- O zaman Sılaya aşiq
olma hekayənizdən başlayaq.
- Mən Sılaya çox aşiq idim. İçi-çölü eyni olan bir insanam
və eşqə həqiqətən də inanıram. Bir insanla yaxınlıq etdikdə, münasibət quranda,
o zaman hər şey dayanır və gözünüz heç nəyi görmür. Qarşınızdakı insanla xoşbəxt
olmaq və onu xoşbəxt etmək istəyirsiniz. Zaman keçdikcə birlikdə yaşamağı və yaşlanmağı
istəyirsiniz, onunla ailə qurmağı düşünürsünüz. Mənim eşqim də bu baxımdan çox böyük
idi. Ancaq ən önəmli olan insanın şəxsiyyətinə olan hörmətidir. Çünki münasibətləri
ancaq şəxsiyyətə olan hörmət davam etdirə bilir. Təəssüf ki, bu da olmayanda eşq
davam etmir.
- Nələr dəyişdi?
- Bizə eşq bəs etmədi. Birlikdə olmaq, özümüz olmaq
yetmədi. Dostlarımın, inandığım insanların bir anda qiymətsiz, mənasız olduğunun
fərqinə vardım. Əslində bir şeyi çox sevirsiniz və onu sevdikdən sonra həyatınızda
başqa bir yolayrıcı başlayır. O zaman siz "mən” olmaqdan çıxırsınız və sizdən başqa
biri olmağınızı gözləyirlər. Bizim həyatımızda da yaşananlar eyni ilə belə idi.
Mən də bunları hiss etməyə başladıqda, hər iki tərəf məyus olmasın deyə münasibəti
bitirmək istədim.
- Münasibətlərinizi
bitirdikdən sonra yenidən Sıla ilə münasibət qurdunuz.
- Bəli. Bu müddət ərzində onu daha yaxşı tanıdım. Mənim
haqqımda "şiddət göstərən”, "qadına əl qaldıran” və "əsəblərini cilovlaya bilməyən”
bir insan profili yaratdı. Vaxtikən mənə mahnılar yazan və mənimlə münasibət qurması
üçün bəzi insanları araya salan, israrlı şəkildə mesajlar yazan bu adam indi
məni yerdən-yerə vurur. İnsanların bilmədiyi bir çox ayrılıqlar yaşadıq. Bəlkə də
bu, son şansımızdır. Mən ona aşiq idim, amma ağlımda bir sual vardı. Onunla münasibətə
başlayanda, sual verdim: "Məndən sonra olan məni maraqlandırmaz. Amma hal-hazırda
məndən başqa bir insanla münasibətin varsa, münasibətə başlamayaq”. Bu suala "yox”
cavabını alanda çox xoşbəxt oldum. Çünki mənə görə, yenidən başlayacağım iş yalansız
olmalı idi. Mən də onun haqqında ciddi düşünürdüm. Ailəmlə tanış etdim. Evlənmək
üçün planlar qurduq və qısa zaman kəsiyində onun etdiklərinə baxdım. Vicdanım rahat
bir şəkildə deyə bilərəm ki, mənim müalicəyə ehtiyacım yoxdur və Sılanınkı həqiqi
eşq deyilmiş.
- Sıla "hadisədən beş
dəqiqə əvvəl evlilikdən və uşaqlardan danışırdıq. Nə oldusa, bir anda bu hadisələr
baş verdi” dedi. Hadisədə Okan Canyantının adı hallandı.
- Gəlin sizə bu hadisəni ətraflı şəkildə danışım. Qarşı
tərəf hər şeyi deyir və iddia edir. Amma bu mübahisənin nədən yarandığını söyləmir.
Sanki mən bir anda əsəbiləşmişəm, beş dəqiqə əvvəl gözəl danışarkən əsəblərimi cilovlaya
bilməmişəm. Bəli, biz ondan beş dəqiqə əvvəl çox xoşbəxt və gözəl şəkildə danışırdıq.
Mən onunla ailə qurmaq istədiyimi və valideynlərimlə danışdığımı dedim. Bir neçə
dəfə ona sual verəndə, Sıladan fərqli cavablar aldığım üçün yenə soruşdum. "Mənimlə
ayrıldıqdan sonra bu insanla yenidən münasibətin oldumu”- deyə. Mənə "bəli, sənin
canını incitmək üçün onunla münasibət qurdum” dedi. Mənim güvəndiyim və aşiq olduğum
qadının məni həqiqətən sevmədiyini anladığım an idi. Mənə dəlilər kimi aşiq olduğunu
söyləyən insanın məndən ayrılar-ayrılmaz başqa bir insanla münasibətə başlaması
və yenidən münasibətlərimizi bərpa edəndə bunu bilərəkdən məndən saxlaması çox pisimə
getdi. Və inandığım eşqin qarşılıqlı olmadığını anladım. Sıladan evi tərk etməyini
istədim. Qarşılıqlı bir münaqişə yaşadıq.
- Həqiqətlər o gecə
Sılanın iddia etdiyi kimimi oldu?
- Mən heç kimə zərbə yetirməmişəm. Qarşılıqlı bir münaqişə
yaşamışıq. Bunu elə bir şəkildə təqdim etdilər ki, guya mən şiddəti qəbul etmişəm
və Sıladan üzr istəmişəm. Hər zaman doğrunu söyləyəcək bir cəsarətə sahibəm. Çünki
sevgidolu gözəl bir ailədə böyümüşəm. Qurduğum münasibətləri küçənin ortasında danışan
bir insan deyiləm. "Belə bir hadisədə yer aldığım üçün başda Sıla olmaq üzrə bütün
qadınlardan üzr istəyirəm” – demişəm. Bu açıqlamamda qadına şiddət mövzusunda adımın
çəkilməsindən təəssüf hissimi bildirmişəm.
- Yaşadıqlarınız psixologiyanıza
necə təsir etdi?
- İnsafsızca və dinlənilmədən, birtərəfli şəkildə hadisələrin
mərkəzində idim. Böyük bir travma aldım.
Bir insan üçün ən çətin şey haqlıykən özünü çarəsizcə izah edə bilməməsidir. Mən
bunun ən böyüyünü yaşadım. Hətta elə bir nöqtəyə gəldim ki, "əsəblərini sahmana
salmaq üçün müalicə alacaq” deyildi. Axı bir insanın hər gün yaşaya biləcəyi bir
hadisəni yaşamamışdım. Bunu yaşamayan insan heç vaxt başa düşə bilməz. Susub hadisələrə
kənardan baxa bilən bir insanın psixoloqa ehtiyacı olur. Uzun illər psixoloq yanına
gedib onlardan dəstək alanlar var. Onda onların hamısından qorxmaqmı lazımdır?
- Sıla münasibətlərinizin
əvvəlində də ona şiddət göstərdiyinizi iddia edib.
- Bu, təktərəfli bir referans qaynağıdır. Uzun illərdir
ki, aktyor kimi çalışıram. Çalışdığım komandada o qədər qadınlar olub ki... Mənim
prodüserim, vəkilim, həmkarlarımın çoxu qadındır. Ancaq mən mediaya aşırı dərəcədə
içki qəbul edən biri kimi təqdim olunuram.
Çevrəmdəki və məni tanıyan insanların nə dediyi və haqqımda nə düşündükləri önəmlidir.
"Ən çox bağıran ən haqlıdır” anlayışının doğru olduğunu düşünürlər. Ancaq bu belə
deyil. Bu kimi hadisələri o qədər məşhurlar yaşayıb ki, o hadisələr heç gündəmə
gəlməyib. O gecə Sılanın özünün də içkili olduğunu söyləməməyi çox qəribədir. Ortada
çox bir pis niyyət var. Ahmet Kural tək müzakirə olunan bir insan oldu. Mövzu isə
qadına şiddətdir.
- Bu hadisədə Sılanın
tərəfini saxlayanlara qarşı incikliyiniz varmı?
- Hadisənin bilərək, istəyərək gündəmdə olması üçün
açıqlama verənləri, müdafiə haqqına hörmət etməyərək tərəf tutanları vicdanı ilə
baş-başa buraxıram. Onlar mənim ifadə belə vermədən, qarşı tərəfi dinləmədən yox
olmağımı istədilər.
- Ayrılıq sonrası nə
üçün sizə doğru yönələn iddialara cavab verməyə çalışmadınız?
- Bu müsahibəyə qədər heç danışmadım. O qədər şey yaşandı,
ancaq ağzımı açıb bir kəlmə danışmadım. Çünki mən nə olursa-olsun qarşımdakı insana
hörmət edirəm. Bu bizim şəxsi məsələmizdir. Danışmadığım üçün də peşman deyiləm.
Mənimlə bağlı bir necə iddialar edən insanlar da olub. O zaman da bu iddialara qarşı
susdum. Polemikalarla, belə ucuz mübahisələrlə gündəmdə yer almaq istəmirəm. Həqiqətən
çox sevdiyim bir işim, həyatım və sevdiyim insanlar var. Bu sevgini qazanmaq üçün
çox çalışmışam. Mən bir insanın başına gələ biləcək ən böyük böhtanla üz-üzə qaldım.
İlk gündə söylədim, indi də deyirəm: "Məndən pis heç nə eşitməyəcəksiniz”. Ancaq
iş o qədər həddindən çıxdı və qadın hikkəsinə məruz qaldı ki, artıq danışmaq məcburiyyətindəyəm.
- İnstagramda və
digər sosial şəbəkələrdə sizin haqqınızda "kim haqlıdır?”- deyə yarışmalar başladıldı.
Bunlardan xəbərdar idinizmi?
- Məni bir ana böyüdüb. Hətta sosial şəbəkələrdə
anama belə söz atdılar. Vəkilim qadın olduğu halda bu işlə məşğuldur - deyə ona
hücumlar oldu. Və bunu qadına şiddət adı altında etməyə başladılar. Mən nəinki qadına,
hər hansı insana, ya heyvana qarşı şiddəti qəbul etmirəm. Digər yandan, "Sıla
ilə Ahmet Kural davasında kim haqlıdır?” - deyə "İnstamgram”da yarışma başladıb
makiyaj seti hədiyyə edənləri də gördüm. Biz məşhuruq. Bu hadisənin bu qədər səs
gətirməyinin, məni bu qədər pis insan kimi təqdim etməyin də səbəbi budur. Bu ölkədə
kişilərdən şiddət görən və həyatını itirən qadınların yaxınlarını məyus etmək istəmədim.
Susmayan, sosial şəbəkələrdə müzakirə açan insanlar mənim səssizliyimdən istifadə
edib, özlərini reklam etdilər.
- Üzərindən
aylar keçməsinə baxmayaraq, indi də sizin 45 dəqiqə Sılanı döydüyünüz iddia
edilir.
- Hadisənin mətbuata çıxdığı ilk günü xatırlayın.
Məhkəmənin çıxışında bir anda jurnalistlər, kameralar bizi əhatəmizi etdi.
Hadisə elə bir şəkildə təqdim olundu ki, nəinki bir kişi, bir qadın, çox həssas
bir mövzunu əhatə etdi - qadına şiddət. Çünki bu mövzu Türkiyədə yaşayan
qadınların ən böyük problemlərindən biridir. Bu şəkildə təqdim olunanda cəmiyyətin
mənə qarşı olan münasibəti dəyişdi. O gün mənim əleyhimə açıqlama verən
dostlarımdan bəziləri bu gün mənə zəng edib birtərəfli müsahibələr verdikləri
üçün üzr istədilər. İlk başda 45 dəqiqə onu döydüyüm, sonra külqabını onu
başına atdığım və kürəyində güldanı sındırdığım söylənildi. Sonra bunların
olmadığı ortaya çıxınca, səssizlik hökm sürdü. Və şiddətin adı bir anda dəyişib
"mənə şillə vurdu” oldu. Bunun tək bir səbəbi var idi, atdığım bu böyük
addımdan geri dönmədim.
- Ailəniz və yaxın
çevrəniz yaşanan bu hadisələr haqqında nələr deyirlər?
- İlk başda çox məyus oldular. Ancaq sonra mənim
tərəfimi tutub dəstək oldular. Çünki onlar məni yaxşı tanıyırlar. Bu hadisələr
mənə onu göstərdi ki, məni həqiqətən sevən çoxlu insanlar var və o insanların
sevgisi bu çətin dönəmi belə asanlıqla keçirməmə köməkçi oldu. Xüsusən də ailəm
və dostlarım. Onlara çox minnətdaram.
- Yeni layihələr üzərində
işləyirsinizmi?
- Bəli, artıq danışıqlar aparılıb. İnsanlara verdiyimiz
xoşbəxtlik - motivasiya qaynağımızdır. Bilirik ki, bu sevgi qarşılıqlıdır və səmimiyyətdən
başlanır. Yeni işlərimiz olacaq.
- Hazırda 2019-cu
ilin ilk ayını yaşayırıq. Bu ildən gözləntiləriniz nələrdir?
- 2018-ci ildə çox pis hadisələr yaşadım. Ancaq
eyni zamanda, ailəmin, dostlarımın, sevdiklərimin sevgisini də hiss etdim. Hər
ildən gözləntilərim ayrıdır. 2019-cu ildə xoşbəxtlik, sağlamlıq və əmin-amanlıq
arzulayıram.
Xəyalə Rəis