“Ən böyük arzular əziyyət və səbirlə gerçəkləşir” - Uğur hekayəsi
Pozitiv, uzaqgörən və səbirlidir.
Elə bu səbri, əzmi onu xəyallarına qovuşdurub. Prinsipi sıfırdan əziyyətlə həyat
qurmaqdır. Özünün də dediyi kimi, kasıb ailədə doğulmağı bəhanə etmədən zirvələrə
dırmanıb. Zəhmətkeş ailədə dünyaya gəlib. Düşünür ki, kasıb ailədə doğulmaq özü
bir xoşbəxtlikdir. Çünki insan qıtlıq anlayışını dərk edir, gözünü açandan əli
qabarlı ana-ata görür, var olduqlarının dəyərini bilir.
Müsahibimiz Lüksemburqda "Vodafone”
şirkətinin qlobal satınalma üzrə meneceri Emin Quluyevdir.
1991-ci ildə Sumqayıtda
anadan olub. Orta məktəbi bitirdikdən sonra 606 balla Azərbaycan Dövlət İqtisad
Universitetinə qəbul olunub. İkinci kursdan təhsilini Xüsusi İstedadlar
Qrupunda davam etdirib. Hələ 4-cü kursda olarkən "Azərsun” Holdinqdə çalışmağa
başlayıb. Həmişə xaricdə təhsil alıb, fərqli mədəniyyətlərlə tanış olmağı xəyal
edən həmsöhbətimiz, 2015-ci ildə Fransa hökumətindən "Eyfel” təqaüdünü qazanır. O, Fransada biznesin idarə
olunması üzrə magistr (MBA) təhsili alır. Öz dövründə bu təqaüdü qazanan ilk azərbaycanlı
olur. Daha sonra Avropada qalaraq karyerasını burada davam etdirmək qərarına gəlir.
-
Emin bəy, müsahibələrinizdən birində fəhlə ailəsində dünyaya gəldiyinizi, fərqli
mədəniyyətlərlə tanış olmaq xəyallarınızın olduğunu vurğulamısınız. Xəyallarınıza
necə çatdınız?
- Mən uşaqlıqdan evdə zəhmətkeş
ailə üzvləri görmüşəm və o mühitdə böyüdülmüşəm. Valideynlərimdən başqa həyatımda
mayak kimi yol göstərən şəxs – xalam oğlu Cahandar olub. O, mənə həyatda şəxsiyyət
kimi formalaşmaqda, ambisiyalarımı müəyyən etməkdə çox kömək edib. Özümü dərk
edəndən prinsiplərimə, xəyallarıma daha da əmin olub, onlara aparan planlar
yazmışam. Mənə görə, ən böyük arzular mütləq əziyyət və səbirlə gerçəkləşir. Müvəffəqiyyətsizliyim
az olmayıb, amma hədəflərimdən dönməmişəm.
-
Siz "day-day” olmadan da uğur əldə etmək olar” fikrinin bariz nümunəsisiniz.
Belə düşünən gənclərə nə demək istərdiniz?
- "Day-day” prinsipi
bizim cəmiyyətdə çox açıq şəkildə hiss olunur və gənclərin inam hissinə təsir
edir. İnsanlar zəhmətkeş həmkarlarının "day-day”sız vəzifə almadıqlarını,
hansısa dövlət imtahanından kəsildiyini eşidəndə, vəzifəli şəxslərlə əlaqə
qurmaq ehtiyacı duyur. Digər qismi də onları qarşıda sonsuz əziyyət gözlədiyini
bilə-bilə, öz zəhmətlərilə irəli getməyi seçir. Kimsə hər hansı vəzifədəki
tanışı vasitəsi ilə bir işi həll etdikdə, yaxud işə girdikdə, həm o işin dəyərini
bilmir, həm də onu işə düzəldən adamın qarşısında sanki mənəvi borclu qalır. Bu
tip insanlar əziyyət çəkməyin nə olduğunu unudur və fərd kimi formalaşmaqda
problem yaşayırlar. Burada valideynin tərbiyə faktoru da çox önəmlidir.
Övladını tanışları vasitəsilə hansısa iş yerinə düzəltməyə çalışan valideyn, əslində
onu üzə bilməyəcəyi bataqlığa atmış kimi olur. Valideynlərim həmişə bu cür asan
yollardan məni çəkindirib və böyüdükcə öz əziyyətimin nəticəsinin daha çox zövq
verdiyini görmüşəm. İstər özəl, istər dövlət qurumlarında hər vəzifədə işləyən
dostlarım, qohumlarım var. Onlardan hansısa işimi asanlıqla həll etməsini istəməmişəm.
-
Emin bəy, xəyallarınıza "Vodafone”la davam edirsiniz. Maraqlıdır, nəhəng bir
şirkətin işləmə prinsipləri necədir?
- 2015-ci ildə Fransada
oxuduğum müddətdə 12 kvadratlıq otağımda gərgin şəkildə iş, staj axtarışında
idim. Sonsuz müsahibələrdən sonra "Vodafone”-un Lüksemburq ofisindən təcrübə təklifi
gəldi. Qısa zamanda daimi müqavilə ilə iş təklifi etdilər. Hazırda həmin ofisdə
satınalma üzrə menecer olaraq çalışıram. Böyük şirkətlərin prinsiplərini işə qəbul
mərhələsindən hiss edirsən. Bir vakansiya üçün 50-100 nəfər namizəd olur və
onlardan sadəcə bir nəfər seçilir. "Vodafone” illər əvvəl qurulmuş dəyərlər əsasında
işləyir. Bizdə ən çox sevdiyim cəhət işçi-müdir iyerarxiyasının olmamasıdır. Məsələn,
dünən işdə müdirlərlə iş saatının azaldılmasının müsbət tərəflərini müzakirə
edirdik, hər kəs öz fikrini açıq deyirdi. Azərbaycanda bu haqda fikir desən,
müdirin düşünər ki, işləmək istəmirsən (gülür - A.Ə). Bundan başqa, şirkətin gələcəyində
hər kəsin rolu aydın müəyyən olur: strategiya yazılır və hamı ona uyğun planlar
qurur, hər kəs şirkətdəki dəyərini anlayır. Ən sevdiyim tərəfi işçilərə fərd
olaraq yanaşılması və müdirlərin işçilərin inkişafı üçün birgə müzakirə aparıb
səmimi fikirlərini deməsidir.
-
Ətrafınızda elə özünüz kimi uğurlu gənclər görürük. Bu nə ilə bağlıdır. Sizcə,
uğurlu karyeranın insanın ətrafı ilə əlaqəsi varmı?
- Əslində insan öz
dostlarını özü müəyyən edir. Bəzən kimsə pis vərdişlərində dostlarını günahlandırır.
Bunu qəti qəbul edə bilmirəm. Hər kəsin öz dostunu tanıma, seçmə imkanı var.
Uşaqlıqdan zəhmətkeş insanların ətrafında olmağa, onlarla dostluq etməyə
çalışmışam. İnsanın ətrafında əziyyəti sevən adamlar olanda, daha da
ilhamlanır, onlardan motivasiya alır. Bundan başqa, doğru dostlarla müzakirələrdə
insan daha da aydınlanır, dünyagörüşü genişlənir. Dostlarımın əksəriyyəti mənim
kimi adi ailədə doğulub zəhmətlə irəliləyiblər. Hazırda fərqli qurum və şirkətlərdə
yüksək vəzifələrdə çalışırlar. Gənclərə dost seçimində ehtiyatlı olmağı məsləhət
görürəm.
-
Eyni gündə 3 ölkədən – Birləşmiş Ərəb Əmirlikləri, Fransa və Lüksemburqdan iş təklifi
almısınız. Deyirlər, xarici ölkədə iş tapmaq asan deyil...
- 2015-ci ildə Fransaya
MBA təhsili üçün köçəndə Avropada karyera qurmaq prinsipiylə getmişdim. Azərbaycanda
qazandığım fərqlənmə diplomu, 4 illik iş təcrübəmə arxayın idim. Amma
pasportuma görə iş görüşlərində çətinlik çəkəcəyim heç ağlıma gəlməmişdi. Qrup
yoldaşlarım Avropa turu etdiyi zamanda mən kiçik otaqda bütün günü CV göndərirdim.
Təhsilə başladığım aydan sonrakı 6-7 ay müddətində heç bir nəticə olmadı. Şirkətlər
əksər iş görüşlərində iş vizasına görə çağırmadıqlarını açıq deyirdilər. 7 ayın
sonunda çox sarsıntı keçirtdim. İlk dəfə idi əziyyətimin yerdə qaldığını
yaşayırdım, indiyə kimi belə ağır period olmamışdı, dolmuşdum... Həmin gün eyni
vaxtda 3 təklif gəldi. Fransada təhsil aldığım qrupdakı 28 nəfərdən 4-5 nəfər
praktika tapmışdı. Onlardan sadəcə 3 nəfəri hazırda Avropada iş tapa bilib.
-
Bu təcrübəni keçmiş insan kimi xaricdə iş tapmaq istəyən gənclərə nə məsləhət
görərdiniz?
- Təəssüf ki, Bakıdan
göndərilən CV-lərə xarici şirkətlər nadir hallarda baxırlar. Buna səbəb şirkətin
namizədə görə əlavə viza alması və xərcləridir. Amma şirkətə xüsusi dəyər
qatacaq namizədlərə hər yerdə ehtiyac var. Mənim məsləhət görəcəyim ən ideal
yol xaricə təhsil almağa gedib oxuduğu müddətdə iş axtarmaqdır.
-
"Bizlər adi - kasıb ailədə doğulmağı bəhanə etmədən zirvələrə birgə
dırmanmışıq” fikirləri sizə məxsusdur. Adi, kasıb ailədə doğulub zirvəyə
dırmanmaq çətin idimi?
- Əslində kasıb ailədə
doğulmaq özü o qədər xoş bir şeydir ki... İnsan qıtlıq anlayışını dərk edir,
gözünü açandan əli qabarlı ana-ata görür, var olduqlarının dəyərini bilir. Bəzi
gənclər təəssüf ki, valideynlərinin varlı olmamasını uğursuzluq kimi qəbul
edir. Mən və dostlarım hər kəsin öz əməyinin nəticəsinə nail olduğuna inanırıq
və indiyədək öz istəklərimizə nail olmuşuq. Bunun üçün şəxsi prinsiplər, real hədəflər
seçmək lazımdır. Uğursuzluqlardan qətiyyən həvəsdən düşmək olmaz.Hədəflərə
çatana kimi insanın dizləri yara ola bilər, amma zirvəyə çatanda aldığın həzz
çox dərin olur.
-
Bəzi insanlar karyera qurarkən ailə qurmaqdan çəkinirlər. Siz ailəlisiniz və
çox fərqli, xoşbəxt ailə mühitiniz var. Ailə qurmaq uğurlu karyeraya maneədirmi?
- Ailə mövzusu haqda
ayrıca geniş məqalə yaza bilərəm, amma qısaca deyim ki, insan öz ruh əkizini
tapmalıdır. Əgər doğru insanı seçmisinizsə, o, sizə doğru qərarlar verməkdə
yardımçı olacaq. Bəzi gənclər iş-həyat balansını itirir və bəzən şəxsi həyatından
vaxt qurban verərək daha çox işləyirlər. Bu, bəzən ailədə təbii şəkildə
problemlərə səbəb olur. Bu cür fərdlərə ailə qurmaq karyeraya maneə kimi
sayılır. İşimi nə qədər çox sevsəm də, heç vaxt axşam 6-dan gec işdə qalmıram.
Həyat yoldaşım karyera və digər mövzularda dəstək olur və qərarlarımda ondan məsləhət
alıram. İş həyatım onun istəklərinə uyğun olmasa, əlbəttə,
karyeramı dəyişərəm. Bəzənsə həyat
yoldaşınızla karyeranızı birgə qura bilərsiniz. Hazırda biz öz biznesimizin (startap)
üzərində işləyirik. Həyat yoldaşım gələcəkdə direktorum olacaq.
- Azərbaycanlı gənclərə iş tapmaqda kömək edir, xüsusilə CV yeniləməkdə dəstək
olursunuz. Maraqlıdır, ideal CV necə olmalıdır?
- Hər gün gələn onlarla
CV-lərə zaman ayırıb rəylərimi yazmağa çalışıram. Əslində mənim burda ciddi
rolum yoxdur, sadəcə, gənclərin özlərini 1 səhifəlik həcmdə təqdim etmələrinə
yardımçı oluram. İdeal CV 1 səhifə, rəngli-kreativ dizaynda, ağ fonda pozitiv şəkilli
olmalıdır. Namizədlər əvvəlki iş yerlərində gündəlik funksiyalardan başqa, şirkətə
gətirdikləri faktiki dəyərlərdən yazmalıdırlar. Təklif edirəm, 20 yaşlarında
profilə "liderlik qabiliyyəti” yazmasınlar. 7 IELTS almaq təmiz ingilis dilində
danışmaq deyil, buna da diqqət etsinlər. Qeyri-iradi kiçik yalan sizin bütün
profilinizi gözdən sala bilər. CV-də doğum tarixi və yeri, ev, qapı nömrəsi,
facebook profilinin linkini yazmağa qəti ehtiyac yoxdur. Məqaləmi oxuyanlar
geniş material üçün mənə müraciət edə bilərlər. Bu mövzuda həmvətənlərimə təmənnasız
yardım edirəm.
-
Emin bəy, uğur sirriniz nədir?
- Optimistlik, paylaşmaq,
digərlərinə qayğı göstərmək. Zəhmət, məqsədlə yanaşı, bu xüsusiyyətlər varsa,
uğur qazanmaq çətin deyil.
Aygün ƏZİZ