Bakı 23°C
Əmrə müntəzir qulbeçələr
Avropa ölkələrinə sığınaraq
özlərini "müxalifətçi” elan edənlər artıq bir neçə gündür sosial şəbəkələrdə
qarşılıqlı ittihamlar səsləndirir, həmfikirlərini nələrdəsə günahkar bilirlər.
Buna nümunə olaraq, Avropada yaşayan Məhəmməd Mirzəlinin "əqidədaşı” Tural
Sadıqlı haqda sosial şəbəkədə yazdıqlarını göstərmək olar. Dünənə qədər "qan
qardaşı” olan bu gənclər indi bir-birini "pul atmaqda”, yalan danışmaqda
təqsirləndirirlər. M.Mirzəlinin yazdıqlarından belə məlum olur ki, T.Sadıqlı
xarici donor təşkilatlarından qrantlar alsa da, həmin təşkilatların adını,
qrantın məbləğini ona bildirməyib. Üstəlik, M.Mirzəlinin saflığından istifadə
edən T.Sadıqlı onu efirə çıxarıb, qurbanlıq qoyun kimi öz maraqları naminə
istifadə edib. Bütün bu baş verənlərdən hiddətlənən M.Mirzəli "Facebook”da
status yazaraq T.Sadıqlını ifşa edib. Bununla hirsi soyumayan gənc fəal
əqidədaşı T.Sadıqlının təsiri altında hazırlayaraq "youtube”də yaydığı
videolarını da silib. Bəyan edib ki, T.Sadıqlı ondan istifadə edib, "xalqın
layihəsi”ni qrant xətrinə ortaya atıb. "Made in Azerbaijan” səhifəsinin admini
olan M.Mirəzli T.Sadıqlını satqınlıqda da ittiham edib. Qeyd edib ki, T.Sadıqlının
Bakıdakı fəaliyyəti barədə danışmağa başlasa o, batar. M.Mirzəli dostu
T.Sadıqlının ünvanına mesaj da göndərib. Vurğulayıb ki, T.Sadıqlının Almaniyada
etdikləri barədə daha bir yazı yazacaq.
Buna cavab olaraq T.Sadıqlı
da status yazıb və M.Mirzəlini nankorluqda ittiham edib və ona təzyiq olan
zaman dəstək olduğunu bildirib. Bununla yanaşı, Turalın atası Əlövsət Sadıqlı
öz oğluna qahmar çıxaraq, Məhəmmədin ünvanına sərt fikirlər səsləndirib.
Beləliklə də müxtəlif bəhanələrlə Azərbaycanı tərk edib Avropaya sığınanlar,
özlərini "demokrat”, "müxalifət” adlandıranlar arasında növbəti qalmaqal
yaşanıb. Bu qalmaqala səbəb isə qrantlar – böyük məbləğdə pullar, yəni alınan
pulların düzgün, ədalətli bölüşdürülməməsi səbəb olub. Bununla da bir daha
aydın olub ki, xaricdə oturub Azərbaycan əleyhinə kampaniya aparanlar,
məmurları hədəfə alanlar heç də bu işi cani-könüldən etmirlərmiş. Onların küçə
səviyyəsində, təhqirlərlə dolu statuslar yazmaqlarına, sosial şəbəkədə özlərini
"mübariz” hesab etmələrinə, cəmiyyətimizə "qəhrəman”, "müxalifətçi” kimi
sırınmaq istəklərinə yeganə səbəb pul olub. Əqidəsini, prinsipini, varlığını
pula satan, xarici dairələrin təsiri altında xalqına, dövlətinə, millətinə
qarşı çıxan bu kimi şəxslərin, "iaşə müxalifəti”nin qrant müqabilində siyasi
sifariş yerinə yetirdikləri gün işığına çıxıb.
Məhz buna görə də sosial
şəbəkə istifadəçiləri məhəmmədləri, turalları sərt tənqid atəşinə tutublar.
Əlbəttə ki, bu mənzərə ilk növbədə Azərbaycandakı radikal müxalifət təmsilçilərini,
həmçinin "müxalifətçi” adı ilə xaricdə özlərinə gün-güzəran quranları da
narahat edib. Belələri Məhəmmədlə Turalın bir-birini ifşasından qeyzlənərək hər
kəsi susqunluğa dəvət edib, nə vaxtsa öz paxırlarının da açılmasından
ehtiyatlanıblar. Misal üçün, AXCP sədri Əli Kərimli ilk vaxtlar susqunluq
nümayiş etdirsə də, vəziyyətin dramatik hal aldığını görüb dərhal "Facebook”da
zühur edib, internet üzərindən canlı müsahibə verib, ardınca da bu müsahibəni
öz profilində belə bir təqdimatla paylaşıb: "Müxalifət partiyalarına,
bütövlükdə demokratik düşərgəyə təklifim var. Demokratik düşərgə daxilində hər
cür intriqaları dayandıraq. Bir-birimizin fəaliyyətini tənqid, təftiş etməyək,
imkan yaradaq bizim fəaliyyətimizə xalq qiymət versin. Hər birimiz bacardığımız
qədər və doğru bildiyimiz yollarla mübarizə aparaq. Hələlik vahid təşkilatda
birləşmək alınmırsa da, əməldə və mübarizədə bir olaq. Çiyin-çiyinə, real
mübarizə aparanlar prosesin gedişində uzlaşmanın, birləşmənin, qarşılıqlı kompromislərin
də yolunu tapacaqlar”.
Göründüyü kimi, AXCP sədri
baş verənlərdən böyük həyəcan və narahatlıq keçirib. Qarşılıqlı ifşanın bir
ucunun da gec-tez ona doğru istiqamət alacağından qorxub. Çünki mühacir
biznesinin kurasiyası, o cümlədən saxta müxalifətçi vəsiqələrinin, arayışların,
zəmanətlərin verilməsi bilavasitə Ə.Kərimliyə aiddir. Eləcə də xarici
dairələrdən qrantlar almaq ənənəsi, bunun müqabilində hətta şeytanla
əməkdaşlığa getməyə hazır olmaq kimi pis nümunə də məhz AXCP sədrinə məxsusdur.
O, "müxalifətçi”, "vicdan məhbusu”, "jurnalist” adı altında xaricə "ezam
etdirdiyi”, "yol” göstərdiyi gənclərin nə vaxtsa təlimatları AXCP sədrindən
aldıq demələrindən ehtiyat edir. Bu da heç kimə sirr deyil ki, vaxtilə Qərb
dairələrindən, Avropa ölkələrinin Azərbaycandakı səfirliklərindən qrant və
təlimatlar alan Ə.Kərimli daim siyasi sifariş yerinə yetirib. 2013-cü ilin prezident
seçkiləri öncəsi isə o, şimal küləyinin, daha doğrusu rus pulunun təsiri altına
düşüb, Milli Şura adlı bir qurumda öz missiyasını yerinə yetirib. Bu gün
də Milli Şura AXCP sədrinin iradəsinə
tabe olan amorf təşkilatdır. 2018-ci il prezident seçkiləri öncəsi isə
Ə.Kərimli istiqamətini Qərbə və ya Şimala deyil, Cənuba dəyişib. Bu dəfə
"demokrat” Ə.Kərimli radikal dindarlarla eyni mövqeni paylaşıb.
Bütün bunlar yenidən bir
fikri səsləndirməyə əsas verir ki, AXCP sədri Ə.Kərimli, eləcə də ondan nümunə
götürərək xaricdə Azərbaycan əleyhinə çirkin kampaniya aparan "iaşə
müxalifətinin” "qarnının ağrısı” yalnız puldur. Kimliyindən və mövqeyindən
asılı olmayaraq, hətta erməni diaspor təşkilatları, ermənipərəst dairələr belə
olsa fərqi yoxdur, əgər pul təklif etsələr onlar sifariş yerinə yetirən
qulbeçələr kimi əmrə müntəzirdirlər. M.Mirzəli-T.Sadıqlı qarşıdurmasına AXCP
sədri Ə.Kərimlinin, eləcə də onun tərəfdaşlarının, trollarının verdiyi reaksiya
məhz bu qulbeçəliyi ört-basdır etmək, gizlin saxlamaq cəhdidir.
F.Qəhrəmanlı
