Əmək müqaviləsi əsasında çalışanların sayı 1,4 mln. nəfəri keçib
Azərbaycan Respublikası Sahibkarlar (İşəgötürənlər)
Təşkilatları Milli Konfederasiyasının (ASK) V qurultayı öz işinə başlayıb.
Qurultayda iqtisadiyyat naziri Şahin
Mustafayev Azərbaycan Respublikasının Prezidenti cənab İlham Əliyevin qurultay
iştirakçılarına təbrik məktubunu oxuyub.
Qurultayın açılışında çıxış edən əmək və əhalinin
sosial müdafiəsi naziri Sahil Babayev Azərbaycan Respublikasının Prezidenti cənab
İlham Əliyevin həyata keçirdiyi uğurlu dövlət siyasətinin müasir yanaşmalar,
milli iqtisadi prioritetlər əsasında ölkədə innovativ iqtisadiyyatın
formalaşdırılması, əmək məhsuldarlığının artırılması, əhalinin sosial rifahının
yüksəldilməsi istiqamətində mühüm nailiyyətlərin qazanılmasına imkan verdiyini
vurğulayıb.
O, ASK-nın nümayəndələrinin də təmsil olunduğu
Sоsial və İqtisadi Məsələlər üzrə Üçtərəfli Komissiyanın fəaliyyəti çəçivəsində
birgə səylərin aparılan islahatlarda işəgötürənlərin və işçilərin hüquq və mənafelərinin
bərabər şəkildə təmin olunmasına zəmin yaratdığını deyib.
S.Babayev dövlət başçısının müvafiq Sərəncamı ilə
icra olunan özünüməşğulluq proqramına
cari ildə artıq 7737 nəfərin cəlb edildiyini, onlardan 7300 nəfərin artıq
biznes-planlarını müdafiə etdiklərini
bildirib. O diqqətə çatdırıb ki, gələn ildən məşğulluq mərkəzləri tərəfindən
göndərişlə işə qəbul olunmuş şəxslərin əməkhaqlarının subsidiyalaşdırılmasına başlanacaq.
Bu da aktiv məşğulluğu təmin etməklə yanaşı, işəgötürənlərin əmək haqlarına çəkilən
xərclərinin azalmasına xidmət edəcək.
Əmək bazarında qeyri-formal məşğulluq hallarının
mövcud olduğunu bildirən S.Babayev diqqətə çatdırıb ki, dövlət başçısı tərəfindən
Əmək Münasibətlərinin Tənzimlənməsi və Koordinasiyası Komissiyası yaradılaraq,
"Azərbaycan Respublikasında qeyri-rəsmi məşğulluğun qarşısının alınmasına dair
Tədbirlər Planı” təsdiq edilib.
Nazir görülmüş tədbirlər nəticəsində cari ildə əmək
müqaviləsi əsasında çalışanların sayının 100 min nəfər artaraq, 1,4 mln. nəfəri
keçdiyini bildirib. S.Babayev vurğulayıb ki, qeyri-formal məşğulluq hallarının
tam şəkildə aradan qaldırılması üçün sosial tərəfdaşlarla birgə zəruri tədbirlər
davam etdirilməli, işgötürənlər isə öz növbəsində sosial məsuliyyəti artıraraq,
əmək qanunvericiliyinə tam şəkildə əməl etməklə nümunəvi fəaliyyət göstərməlidirlər.