“ELS” Müstəqil Araşdırmalar Mərkəzi yeni layihəsinin ilkin təqdimatını keçirib - Fotolar
"ELS” Müstəqil Araşdırmalar
Mərkəzi İctimai Birliyi bu gün Beynəlxalq Mətbuat Mərkəzində AR Prezidenti
yanında Qeyri-Hökumət Təşkilatlarına Dövlət Dəstəyi Şurasının maliyyə, Azərbaycan
Respublikasının Prezidenti yanında Bilik Fondu və İctimai Televiziya və Radio
Yayımları Şirkətinin informasiya, texniki və təşkilatçılıq dəstəyi ilə "Ailə,
qadın və uşaq problemlərinin həllində milli-mənəvi dəyərlərin rolunun gücləndirilməsi”
layihəsinin ilkin təqdimatını keçirib.
Layihənin mahiyyətindən
danışan Mərkəzin rəhbəri İradə Yaqubova yetişən nəslin mənəvi, fiziki və
psixoloji cəhətdən milli ənənələrə uyğun formalaşması, sağlam ailə münasibətlərinin
qurulması, məişət zorakılığının aradan qaldırılması kimi cəmiyyəti narahat edən
aktual məsələlərə toxunub. Onun fikrincə, yetişən nəslin mədəni-mənəvi cəhətdən
formalaşması, milli ənənələrin qorunması, sağlam ailə modelinin qurulması və təbliği
nəticəsində vətəndaş cəmiyyətində mənəvi dönüş yaratmaq vaxtı yetişib artıq.
İctimai Televiziyada bu məsələlərlə bağlı silsilə verilişlərin hazırlanacağını
deyən layihə rəhbərinin qənaətinə görə, bu, mövcud problemlərin ictimailəşdirilməsinə
gətirib çıxaracaq.
Sonra İ.Yaqubova Azərbaycanın
ali təhsil ocaqlarının tələbələri arasında keçirilmiş ailə həyatının
formalaşması, ailə dəyərlərinin qorunmasına dair sorğunun nəticələri açıqlayıb.
İctimai Televiziya və Radio
Yayımları Şirkətinin gənclər, elm və təhsil departamentinin direktoru Zaur
Mahmudov "ELS” Müstəqil Araşdırmalar Mərkəzi ilə çoxillik əməkdaşlıq təcrübəsindən
danışıb. O, bu gün ortaya qoyulan mövzuların İctimai Televiziyanın
konsepsiyasına tam uyğun olduğunu və tezliklə həmin məsələlərin ekspertlərin
iştirakı ilə efirdə müzakirə ediləcəyini söyləyib.
Tədbir dövlət və qeyri-hökumət
təşkilatları nümayəndələri, psixoloqlar, orta və ali təhsil müəssisələrinin müəllim
və tələbələri iştirakı ilə ictimai müzakirələrlə davam edib.