• cümə, 29 Mart, 09:54
  • Baku Bakı 5°C

Elçin Hüseynbəyli: “Yazıçılar Birliyində üzvlük ləğv edilməlidir”

07.06.13 13:12 2442
Elçin Hüseynbəyli: “Yazıçılar Birliyində üzvlük ləğv edilməlidir”
”Katibliyin Şərif Ağayarın üzvlükdən çıxarılması ilə bağlı keçirdiyi iclasda iştirak etməmişəm. Şərifin çıxarılması xəbərini saytlardan öyrəndim. Şərif Fikrət Qoca haqqında çox sərt danışıb. Gərək bunu etməyəydi”.
Kulis.Az-a açıqlamasında “Ulduz” jurnalının baş redaktoru, yazıçı Elçin Hüseynbəyli belə deyib.
O əlavə edib ki, umu-küsü də, narazılıq da ola bilər, amma gərək təhqirə yol verilməsin: “Yazıldı, yazılmadı bir əxlaq kodeksi var. Buna görə Şərifi üzvlükdən çıxarıblar. Aqil Abbasın da fikrini oxudum. Ona qatılıram. Bəlkə alternativ variant tapıla bilərdi. Anlaşmaya gəlmək olardı. Katibliyin də qərarını şübhə altına qoya bilmərəm. Amma daha yumşaq qərar verilə bilərdi. Mərhum Rafiq Tağı da Yazıçılar Birliyindən çıxarılanda da demişdim ki, sərt qərardı”.
Elçin Hüseynbəyli deyib ki, AYB Gənclər Şurasının sədri kimi dəfələrlə müsahibələrində, Anarla söhbətlərində Yazıçılar Birliyinin çevikləşməyə, gəncləşməyə ehtiyacı olması fikrini səsləndirib.
O hazırda da bu mövqedə qaldığını, gözləntilərinin qurultayda özünü doğruldacağına ümid etdiyini vurğulayıb.
“Sadəcə bir az hövsələli olmaq lazımdır. İstefalar məsələsinə gəldikdə isə çoxdan bu fikirdəyəm ki, AYB-də üzvlük məsələsi ləğv edilməlidi. Yəni açıq üzvlük olmalıdır. Kim istəyər üzv olar, kim istəyər üzv olmaz. Onda belə şeylər də ajiotaja səbəb olmaz. Guya AYB kimisə üzv edən kimi həmin adam avtomatik yazıçı olur? Mən düşünürəm ki, AYB açıq qapı siyasəti aparmalıdır. Onda bu cür səs-küylü, skandal xarakterli hadisələrə də yer qalmaz.”
banner

Oxşar Xəbərlər