Ekoturizm, yoxsa Sabiha nənənin ətirli təndir çörəyi?
Turizm dedikdə insanın xəyalında uzaq bir ölkə, otel, musiqi, təbiət qoynu, səfalı yerlər canlanır. Ancaq
şahidinə çevrildiyim turizmə bizim dildə ekoturizm deyirmişlər. Əslində mən turizmin
bu növü barədə elə yazımı yazmağa başlayarkən məlumat əldə etdim. İndi
deyəcəksiniz ki, müəllif mövzuya necə bələddir ki, turizmin bu növündən xəbərsizdir.
Bəli, Türkiyənin ucqar bir məmləkəti
olan Kastamonuda olarkən, yol kənarında, meşənin bitəcəyində geniş və qədim bir
ev gördük. Bizə bildirdilər ki, o ev turistləri qəbul edir və "Hürriyyət”
qəzetinin siyahısına düşən, Türkiyənin 10 ən yaxşı səhər yeməyi verilən məkanlarından
biridir. Əslində təqdimat bizi özünə cəlb etdi. Daxil olduğumuz bu məkan Sabiha
İzbeliyə məxsus qədim bir ev idi. 400 ildir ki, burda məskən salan ailə yoldan
keçən yerli və xarici vətəndaşlara xidmət göstərib. Ancaq bir neçə ildir ki, bu
xidməti pullu edərək, həm də türk mətbəxinin və mədəniyyətini təbliğatını
aparırlar. Sabiha İzbelinin mətbəxinə kastamonulular bələddir desək yəqin ki,
yanılmarıq.
Onlar Sabiha xanıma "ana” deyə müraciət edirlər. Sabiha ananın qədim,
heç bir istilik sistemindən istifadə edilməyən, plastik pəncərələrdən belə uzaq
olan evinə daxil olanda gördüklərimiz bizi çox təəccübləndirdi. Belə ki, 87
yaşlı qadın geniş həyətində heyvandarlıqla məşğul olur. Bu həyətdə demək olar
ki, bütün ev heyvanları, toyuq-cücə saxlanılır. Bizim gəldiyimizi görcək, ev
sahibi tövlədəki yumurtaları götürüb evin ortasında qaladığı sobanın üzərində
qayğanaq bişirdi. Yenicə sağdığı inəyin südünü qızdırıb bizə təqdim etdi. 10
dəqiqə ərzində hazırladığı pendiri, yağı, öz həyətinin barından hazırladığı mürəbbələri
açaraq bizə samovar çayı dəmlədi. Təndirdən isti çörəkləri çıxarıb "Uzaq
məmləkətdən gəlibsiniz yeyin və görün ki, biz hələ də öz köhnə kənd həyatımızı itirməmişik.
İnsanlar nə qədər böyük şəhərlərdə yaşasalar da, onların da bir nənəyə və isti
bir ocağa ehtiyacları var” dedi. Əslində
Sabiha ananın bu xüsusiyyəti bizə sanki öz keçmişimizi, nənələrimizi, doğulub
boya-başa çatdığımız torpaqlarımızı xatırlatdı. Yadımdır, rəhmətlik nənəm də
hər dəfə kəndə gedəndə mənə məhz Sabiha ana kimi qulluq edər, həyətindəki
toyuğu kəsər, təndirdə çörək yapar, tutduğu pendiri bəh-bəhlə yedizdirərdi.
Sabiha ananın evindən geri döndükdən sonra turizmin bu növünün bizdə
olub-olmaması ilə maraqlandım. Belə bir
turizm məkanlarının mövcudluğunu araşdırmağa başladım. Ekspertlərlə söhbət etdikdə
onlar bildirdilər ki, ekoturizmüçünAzərbaycan
dünyanınnadirməkanlarındanbiridir.Xaricimütəxəssislərbunuilknövbədə
azərbaycanlıların qonaqpərvərliyi və bənzərsiz mətbəxi ilə bağlayırlar. Turistlər
evlərini kirayələdikləriyerliinsanlarlatezliklə səmimi
ünsiyyət yaradır, həttabirneçəgünərzində həmin ailənin
üzvünəçevrilir, onların həyat və məişəti, adət-ənənələri ilə yaxından
tanışolurlar. Nəticədə əhali gəlir,turistisə zəngin təəssürat
əldəedir, dincəlir, səyahətindənzövqalır, təbiət də korlanmır.
Ekspertlər belə turizm üçün bizim bölgələrimizdə əlverişli məkanların
mövcudluğundan danışdılar.
Otel
mühitindən bezmiş turistlər olur
"New ERA Travel” turizm
agentliyinin rəhbəri Elçin Rüstəmovla söhbətimizdə qarşılaşdığım
mənzərəni danışdım. O deyir ki, burda təəccüblənməli heç nə yoxdur, siz
dediyiniz həmin turizmdən bizdə də mövcud olsa da, bir o qədər də inkişaf
etməyib: "Ekoloji turizmdən daha çox təbiətin qorunması məqsədi ilə istifadə edilir.
Elə insanlar var ki, istirahət etmək üçün kənd həyatına üstünlük verir. Daha çox Avropa turistləri bu sahəyə çox meyllidir.
Ekoturizm onlarda daha çox yayılıb. Ərəb və Asiya bazarı üçün bu o qədər də maraqlı
deyil. Gedib oteldə qalmaq, orada istirahət edib qayıtmaq artıq ənənəvi bir turizm
növüdür. Bu, artıq turistlərin marağını o qədər də cəlb etmir. O turistlər ki, bir
az yenilik, fərqlilik, insanların içində daha çox qaynayıb qarışmağa üstünlük verirlər
və bundan nələrsə əldə edirlər. İnsanlar daha çox bunlardan istifadə edirlər. Bu
turizmə insanlar daha çox qrup halında getməyə üstünlük verirlər. Bizdə Qəbələ,
Balakən, Zaqatala, Xınalıq və Cənub rayonlarında, yəni təbiəti olan bölgələrdə bu
turizm inkişaf edib. Qəbələdə kifayət qədər otellər var və turistlər bundan lazımi
səviyyədə istifadə edirlər. Ekoloji turizmlə bağlı saytlarımız da mövcuddur ki,
siz ordan sifarişlər də verə bilərsiniz. Yəni sizin qeyd etdiyiniz ekoturizm xüsusi
bir turizm sahəsi kimi inkişaf edir. Hətta insanlar bir-biri ilə evlərini belə dəyişirlər.
Bir insan deyək ki, başqa bir ölkədə insanların arasında yaşamaq istəyir. Turist
olaraq gedib şirkətlərə müraciət etmirlər, fərqli istiqamətdə gedirlər. Azərbaycanda
bu tip turizm şirkətləri var. Turist gəlir, özünü bir həftə, on gün cəmiyyətin bir
fərdi kimi hiss edir. Bunlar daha çox otel
mühitindən bezmiş turistlər olur. Gündəlik qayğılardan daha çox ayrılmaq üçün istifadə
edirlər. Ancaq bu sahə bizdə o qədər də inkişaf etməyib”.
Kirayə ev və ekoloji təmiz
kənd məhsulları
Turizm eksperti Bahadur
Bilalov da deyir ki, bu turizm
növündən Azərbaycanda istifadə edilir. Bundan daha çox Şəkidə, Cənub
bölgələrimizdə istifadə edilir: "Təbiəti gözəl olan bölgələrimizdə insanlar var
ki, öz evlərini gələn turistlərin ixtiyarına verirlər. Bu sahənin daha çox
reklamına və inkişafına ehtiyac var. Bizdə bununla məşğul olan xüsusi bir assosiasiya
da var - Kənd Yaşıl Turizm Assosiasiyası. Bu gün olmasa da, ümid edirəm ki,
yaxın gələcəkdə bu turizm geniş yayılacaq”.
Ekspertimizə özünün istirahət
etməsi üçün hansı turizmə müraciət etdiyini xəbər aldım. O, deyir ki, bir neçə
il bundan öncə İsmayıllıda hər şəraiti
olan bir ev tutub. Sahibkar qonaqlardan yalnız evdə qalmaq üçün pul alıb, mənzildə
özünəqulluq şəklində yaşayıb: "O evdə ərzaqlarımızı özümüz alırdıq. Ev sahibi bizə ekoloji cəhətdən təmiz kənd
məhsulları təklif edirdi. Təbii ki, pulla”.
Turistləri evlərində qonaq
et, pul qazan
Tanınmış teleaparıcı
Mirsəməd Cəfərli uzun müddətdir ki, səyahətli tipli verilişlər
hazırlayır, dünyanı gəzir. Onun bu mövzu ilə bağlı fikirləri maraqlı idi. Deyir
ki, Azərbaycanda da bu tip turizm obyektləri olsaydı, təbii ki, yaxşı olardı: "Gürcüstanın
Acarıstan bölgəsində belə bir turizmlə qarşılaşmışam. Sloveniyada atyetişdirmə
zavodu var, onun nəzdində də otellər mövcud idi. Acarıstanda kəndlərdə ekoturizm geniş
yayılıb. Batuminin mərkəzindən maşınlarla turistləri dağa aparırlar, oradakı
kənd həyatı ilə tanış edirlər. Kəndlilərin necə çaxır hazırladıqlarını
göstərirlər. Onlar sadəcə olaraq turistləri evlərində qonaq edərək, pul
qazanırdılar”.
Azərbaycanda
bu turizm növünün çox böyük potensialı mövcuddur
"Kənd Yaşıl
Turizminin İnkişafına Dəstək” İctimai Birliyindən bildirildi
ki, 2014-cü ildə Mədəniyyət və Turizm Nazirliyinin dəstəyi ilə yaradılan qurum
ölkəmizdə bu turizm növünün inkişaf etdirilməsi üçün müxtəlif maarifləndirici
tədbirlər həyata keçirir. Böyük şəhərlərdən gələn insanlarda adi kənd evində
yaşayıb istirahət etmək arzusu olur: "Buna "kənd turizmi”, "aqroturizm” də
deyilir. Adından da bəlli olduğu kimi, yerləşmə obyekti kənd evidir. Kənd evi qısa müddət ərzində
buraya qonaq gəlmiş turistə qidalanma, yerləşmə, lazım gəldikdə ekskursiya və
digər xidmətlər təqdim edən kiçik mehmanxana müəssisəsinə çevrilir. Kənd yaşıl
turizmi XX əsrin 70-ci illərindən başlayaraq dünyanın müxtəlif ölkələrində,
xüsusi ilə də Avropa ölkələrində inkişaf edib: "Azərbaycanda da bu turizm
növünün çox böyük potensialı mövcuddur. Əsrarəngiz təbiətə, zəngin tarixi
abidələrə, adət-ənənələrə, mədəniyyətə və mətbəxə malik kəndlərimiz var.
Hacıkənd və Lahıc qəsəbələri, Kiş, İlisu, Xınalıq ölkəmizdə kənd yaşıl
turizminin daha da inkişaf etdirilməsi üçün böyük imkanlara malik yaşayış
məntəqələridir. Demək olar ki, ölkəmizin bütün kəndlərində bu turizm növünü
inkişaf etdirmək olar. Hazırda Quba, Qusar, Şəki, Qax, Zaqatala, Xaçmaz,
Lənkəran, Astara, Masallı, Lerik, Göygöl və digər rayonlarımızın kəndlərində
kənd yaşıl turizmi müəyyən dərəcədə fəaliyyət göstərir”.
Lerikdə öz evini turistlərə icarəyə verən İnqilab Məmmədov deyir ki,
evlərini daha çox xarici turistlərə icarəyə verirlər. Məbləğə də ancaq kirayə pulu
daxildir, buraya nə yemək nə də xidmət daxil deyil. Turistlərə kənd məhsulları
da satılır ki, bu da kəndlilər üçün yaxşı gəlir mənbəyi sayılır. Onlar
təsərrüfatlarında yetişdirdikləri məhsulu satmaq üçün yaxşı bazar əldə edirlər.
Sahibkarlarla da danışdıqdan
sonra Azərbaycanda ekoturizmin potensialının böyük olmasına əminliyimin
yaranmasına baxmayaraq, mənə elə gəldi ki, Sabiha nənənin o ətirli təndir
çörəyi üçün çox darıxacağam. Bəlkə də məsələ nə o çörəkdə, nə o süddə, nə də o
kənd məhsullarındadır. Sabiha nənənin gülər üzü, mehribançılığı və o kiçik
daxmasında tanımadığı insanlara qarşı göstərdiyi xoş münasibət nəyə desən
dəyərdi. Bizə ailə ortamı yaradan həmin koma üçün darıxacağam. Bir sual isə məni
düşündürür: Türkiyədə 87 yaşlı qadın belə bir vasitədən istifadə edib, gəlir
əldə bilirsə, hər bir potensiala sahib, gözəl təbiəti, zəngin süfrəsi olan biz
bu turizm növündən niyə yararlanmayaq?
Xəyalə Rəis
Yazı Azərbaycan
Respublikasının Prezidenti yanında Kütləvi İnformasiya Vasitələrinin İnkişafına
Dövlət Dəstəyi Fondunun 2018-ci il Novruz Bayramı münasibətilə keçirdiyi fərdi
jurnalist yazıları müsabiqəsi üçün yazılıb